Djehovha Akapasa Simba Samusoni

Aisraeri akawanda akahwirirazve kunamata madzimwari ekunyepa. Ndiyo ndaa, Djehovha akasiya Aisraeri ecitambudzwa nge Afiristiya. Asi Aisraeri anganani aida Djehovha. Umwe wayo waizwi Manoa. Iyena no mukadzi wake ainga asina ana. Zuwa rimweni, ngirozi yakabvunza mukadzi wa Manoa kuti: ‘Djehovha acakupasa mwana. Ucaponesa Aisraeri munyara dze Afiristiya. Mwana wako ucagara Munaziri.’ Unoziya kuti Anaziri ainga ari ani? Ainga ari anhu aiseenzera Djehovha nge mushobo unokosha uye awona ainga asikadikani kucinga tsitsi.

Manoa no mukadzi wake akagaradi no mwana uye akamupasa zina rokuti Samusoni. Djehovha akaita kuti Samusoni agare mwanarume ane simba maningi. Wainga ano simba zvekuti waikwanisa kuuraya mhondoro no nyara basi. Zuwa rimweni, Samusoni wakauraya Afiristiya anokwana kuita 30 ari ega. Afiristiya aimuzonda uye aigara eciedza kuda kumuuraya. Usiku umweni Samusoni wainga akawata mu thaundi raizwi Gaza. Afiristiya aida kumuuraya, ndiyo ndaa akaenda kumusuwo mukuru we thaundi ecimuetsera kuti amubate kana kukaedza. Asi Samusoni wakamuka pakati po usiku uye wakakuca musuwo mukuru we thaundi, wakauthwara pa phewa rake dakara pamusoro pe dunhu rainga riri padhuze no thaundi rimweni!

Afiristiya aazi kuima kuda kubata Samusoni. Hino, iwona akaenda kookumbira rubetso Dharira musikana wa Samusoni. Awona akamubvunza kuti: ‘Isusu tiri kuda kusunga Samusoni. Kana iwewe ukatibvunza ciro ciri kuitisa kuti Samusoni agare no simba rakakura, isusu ticakupasa mare yakawanda maningi yo prata. Dharira waida maningi mare. Ndiyo ndaa, iyena wakabetsera Afiristiya. Iyena wakabambidzira Samusoni dakara amubvunza. Pakutanga Samusoni wainga asikadi kumubvunza. Asi wakapedzesera amubvunza kuti: ‘Zvakanaka, ndicakubvunza! Inini ndiri Munaziri, andisati ndakambocinga tsitsi rangu kubvira pandakabarhwa. Asi kana munhu akacinga tsitsi rangu, ndinopera simba.’ Samusoni wakabatana no matambudziko akakura maningi nge kubvunza Dharira kaibva simba rake. Unoziya kuti Dharira wakaitei?

Dharira wakagogoma koopanganidzira Afiristiya. Mumasure mazvo, iyena wakahwirira uye wakaita kuti Samusoni awate pa mirenje dzake. Pedzepo, wakakumbira munhu kuti amucinge tsitsi rake! Hino Afiristiya paakaenda koobata Samusoni, iyena wakaedza kudzidziirira, asi wakaona kuti simba rake rainga rapera. Hino Afiristiya akamubata omubora-bora madziso ake uye akamukanda mukaraboso.

Zuwa rimweni, Afiristiya akabatana kuti animate Dhagoni mwari wawo. awona aindokhuwa eciti: ‘Takwanisa kubata Samusoni ngekuti Dhagoni watibetsera!’ Awona akaimisa Samusoni pakati pe mapirari mairi akakura maningi uye akatanga kuseka hope yake. Tsitsi rake rainga rakurazve. Samusoni wakadeketera eciti: ‘Djehovha, ndapota ndipaseizve simba renyu kamwe basi.’ Hino Samusoni wakagarazve no simba uye wakakwanisa kumbwedza mapirari mairi. Pa mbuto iyona painga pakadzara no Afiristiya uye denga rakaambwerera. Anhu ese ainga arimo akapera kufa kutobatanidzawo Samusoni.