Mambo Wekutanga we Aisraeri

Djehovha ainga akasanangura atongi kuti atungamirire Aisraeri. Asi ngokuti madzinza amweni ese ainga ano madzimambo, hino Aisraeri aidawo kugara na mambo. Awona akaenda kookumbira izvona kuna Samueri. Asi Samueri wakaona kuti zvainga zvakashata uye wakanamata kuna Djehovha. Djehovha akadaira Samueri eciti: ‘Awona aaripi kuramba iwewe, asi ari kuramba inini. Abvunze kuti kana akagara na mambo, mambo wakhona ucaabambidzira kuti amupase uye amuitire zviro zvakawanda.’ Pedzepo, Samueri wakaenda koobhuya no Aisraeri. Kunyazi zvakadaro awona akadaira kuti: ‘Atina ndaa nazvo. Catiri kuda basi kugara na mambo!’

Djehovha akabvunza Samueri kuti mwanarume umweni waizwi Sauri ndiye waizogara mambo. Zuwa rimweni, Sauri wakaenda koona Samueri ku Rama. Kuti apangidze kuti Sauri wainga asanangurhwa kuti agare mambo we Israeri, Samueri wakamudzodza nge kudurura mafuta mu musoro make.

Mumasure mazvo, Samueri wakaunganidza Aiesraeri kuti aapangidzire mambo wawo mupsva. Asi aaszi kuona kuti Sauri wainga ari kupi. Unozviziya kuti ngei? Ngokuti iyena wainga aenda koofindara. Mumasure me kumupsvaka, awona akamuona. Iyena wainga ari munhu akareba kupinda anhu ese uye wainga akarungama maningi. Hino, Samueri wakatora Sauri kuti aende naye pakati pe anhu ese uye iyena wakabhuya kuti: ‘Onai, uu ndiye mambo wamasanangurirhwa na Djehovha.’ Anhu akadainzira no mupfaro paakaona kuti ainga aano mambo!

Pakutanga, Sauri waizwira Djehovha ngo kuita zvese zvaaibvunzwa na Samueri. Asi nokuhamba ke nguwa, iyena wakagara munhu usikazwiri. Ngo muezaniso, mambo Sauri wainga asikadikani kupasa cibairo. Zuwa rimweni, Samueri wainga abvunza Sauri kuti amuetsere dakara aguma, asi Samueri wakanonoka. Hino Sauri aazi kuetsera uye wakasanangura kupasa cibairo ari ega. Ndiyo ndaa, Samueri wakasumurura Sauri eciti: ‘Iwewe waidikana kuzwira Djehovha.’ Mumasure me kusumururhwa, Sauri wakasanungura kuzwira Djehovha here? Haiwa.

Nokuhamba ke nguwa, Sauri wakaenda koorhwisana no dzinza ro Aamareki. Djehovha akamubvunza kuti waidikana kuuraya anhu ese e dzinza irona. Asi Sauri wakasanangura kutama kuuraya mambo we Aamareki waizwi Agagi. Djehovha akabvunza Samueri kuti: ‘Sauri wandisiya uye aazi kundizwira.’ Samueri wakatsukwara maningi uye wakaenda koobvunza Sauri kuti: ‘Ngokuti iwewe auzwiri, Djehovha acakanda mambo umweni pa mbuto pako.’ Samueri paakatendeuka kuti ahwirire, Sauri wakakweya djira rokunza ra Samueri uye rakamweka. Samueri wakabhuya kuti: ‘Djehovha acabvisa umambo we Israeri kauri.’ Ndiani waizogara mambo mupsva we Aisraeri? Djehovha aizosanangura munhu umweni waimuda uye waimuzwira.