Cishaishi Cakaizwa na Mambo Dhavhidhi

Sauri paakafa, Dhavhidhi wakagara mambo. Iyena wainga ano makore anokwana 30. Usiku umweni, Dhavhidhi paainga ari padenga pe nyumba, iyena wakakwanisa kuona mwanakadzi umweni wainga akarungama maningi. Dhavhidhi wakazoziya kuti mwanakadziwo waizwi Bhati-Sebha uye wainga akawakwa no musurudado umweni waizwi Uriya. Kunyazi zvakadaro, Dhavhidhi wakaita kuti Bhati-Sebha auye kumba kake uye akaita zvepamaponde. Pedzepo Bhati-Sebha wakagara no pa mwiri. Dhavhidhi wakada kufisa zvaainga aita ngo kuwaka Bhati-Sebha. Ndiyo ndaa, wakapsvaka mushobo wekuti Uriya afe ku hondo yaizoteera. Mumasure mekuti Uriya wafa, Dhavhidhi wakawakana na Bhati-Sebha.

Asi Djehovha akaona zviro zvese izvi zvakashata zvakaizwa na Dhavhidhi. Hino iyena akatuma Muphorofita Natani kuti aende koobhuya na Dhavhidhi. Natani wakabhuya kuti: ‘Mwanarume wainga akapfuma maningi, wainga ano mabira akawanda uye mwanarume murombo wainga ano bira rimwe raaida maningi. Mwanarume uya mupfumi wakatora bira rimwe basi re mwanarume murombo.’ Dhavhidhi paakazwa izvona, iyena wakanyangadzwa maningi uye wakabhuya kuti: ‘Mwanarume iyena mupfumi unodikana kufa!’ Hino Natani wakadaira eciti: ‘Asi ndizvona zvamakaita kuna Uriya!’ Dhavhidhi wakatsukwara maningi uye wakabhuya kuti zvaainga aita zvainga zvakashata maningi. Ngo ndaa ye cishaishi ici, Djehovha akasiya kuti zviro zvakashata zviitike na Dhavhidhi uye ku mhuri yake. Asi Dhavhidhi wakadzidodosa uye wakabhuya zvese zvaainga aita. Djehovha akamurekerera.

Mumakore akazoteera, Dhavhidhi wakada kuwakira Djehovha tempro, asi Djehovha akasanangura Soromoni mwana wa Dhavhidhi kuti aite izvona. Dhavhidhi wakatanga kugadzirira zviro zvekuwaka nazvo kuti apase Soromoni uye wakati: ‘Ngokuti Soromoni uciri Mudjaha uye tempro ya Djehovha inodikana kurungama, inini ndicamubetsera.’ Dhavhidhi wakapasa mare yakawanda kuitira kuti tempro iwakwe. Iyena wakadainzawo aseenzi akawanda. Uye wakaunganidza oro, prata uye no matabwa. Nguwa doko asati afa, Dhavhidhi wakabvunza Soromoni kuti: ‘Djehovha akandikumbira kuti ndikupase dhezenyo iri rinopangidza kuti ucawaka kudini tempro. Usathye mwana wangu ngokuti Djehovha acakubetsera. Bamba uye tanga basa.’