Djehovha Anodziirira Djeosafati

Djeosafati wainga ari mambo we Djudha uye iyena wakapedza kunamata kese ka Bhaari mu umambo wake. Djeosafati waida kuti anhu ese azwire mutemo wa Djehovha. Hino iyena wakasanangura anarume anganani aiziya mitemo ya Djehovha kuti aifundise anhu.

Madzinza aigara padhuze nawo aithya kurhwisa Adjudha ngokuti aiziya kuti Djehovha aidziirira anhu ake. Madzinza awona aitotora zvipo kuti apase Mambo Djeosafati. Asi Amoabhi no Aamoni uye no aya aigara ku mbuto inodainzwa kuti Seir akauya koorhwisa Adjudha. Mambo Djeosafati waiziya kuti waida rubetso ra Djehovha. Ndiyo ndaa, iyena wakatuma anarume, anakadzi uye no ana adoko kuti aende ku Djerusarema. Iyena wakanamata pamberi pe anhu ese eciti: ‘Djehovha, atikwanisi kuwina pasina rubetso renyu. Ndapota, tibvunzei zvatinodikana kuita.’

Hino Djehovha akadaira kuti: ‘Musathye henyu. Inini ndinemwi. Apana anodikana kurhwisa, onai zvandicaita.’ Djehovha aida kuitei kuti aponese anhu ake?

Pa zuwa rakateera, Djeosafati wakasanangura anarume anganani ainga ari aembi. Aembi aya aidikana kuenda mberi ke cikwata ce masurudado eciembera Djehovha no mupfaro. Hino awona akahamba kubva ku Djerusarema dakara ku mbuto yaizoitika hondo inozwi Tekowa.

Asi aembi aya paaiemba, Djehovha akaita ciro cinoshamisa maningi. Iyena akaita kuti Aamoni uye no Amoabhi arhwisane ega pacawo. Hino ese akapera kufa, asi Djehovha akadziirira anhu ake hinga zvaainga aagondesa. Madzinza ese ainga ari dhuze no Djudha akazwa zvese zvaiizwa ndi Djehovha uye akaona kuti iyena aindorumbwa ecidziirira anhu ake. Unokwanisa kuona kuti Djehovha nguwa dzese anopsvaka mukana wekuti akwanise kuponesa anhu ake here? Iyena aadi rubetso ro munhu upi hake kuti aite izvona.