Pauro na Timoti

Timoti wainga ari hama ye cidjaha ye ungano yo Ristra. Baba ake ainga ari Mugrego uye mai ake ainga ari Mudjudha. Mai ake aizwi Eunisi uye mbiya ake aizwi Roidhi. Awona akafundisa Timoti ngezva Djehovha kubvira aciri mwana mudoko.

Pauro paakapinda nge ku Ristra pa rhwendo rake rocipiri re kuparidzira, iyena wakaona kuti Timoti wainga ano rudo rakakura uye waipfarira kubetsera hama. Hino, Pauro wakapika Timoti kuti aite rhwendo naye. No rubetso ra Pauro, Timoti wakafundira kuparidzira uye kufundisa zvakanaka.

Mwari akaseenzesa mwiya mucena wake, kuti apangidze kaidikana kuenda Pauro uye Timoti. Pa usiku umweni, Pauro wakaona ciono. Pa ciono icona, mwanarume umweni wakabvunza Pauro kuti uya kuno ku Masedhoniya kuti mutibetsere. Pedzepo, Pauro, Timoti, Sirasi, uye Ruka akaenda ku mutanha we Masedhoniya kooparidzira uye kooumba ungano.

Ku Tesaronika thaundi rimweni ro ku Masedhoniya, akawanda akagara Akristu. Asi Adjudha amweni ainga asikapfariri Pauro no shamwari dzake. Hino awona akaungana oumba cikwata cakakura uye akakwekweredza Pauro no shamwari dzake dakara kune anyautongi e thaundi. Awona akakhuwa eciti: ‘Anarume aya azondi e utongi we Ciroma!’ Kurumbwa ari ipona, zvaizokanda pangozi upenyu wa Pauro na Timoti, ndiyo ndaa awona akatiza co usiko oenda ku Bhereya.

Anhu e ku Bhereya ainga ano cido cakakura ce kufunda masoko akanaka uye Adjudha no Agrego akagara Akristu. Adjudha anganani e ku Tesaronika paakaenda ku Bhereya kooreketedzana, Pauro wakaenda ku Atena. Asi Timoti na Sirasi akasara ku Bhereya kuti abambise kutenda ke hama. No kuhamba ke nguwa, Pauro wakakumbira Timoti kuti ahwirire ku Tesaronika uye abetsere hama kuti dzishingirire kutereerhwa kaaibatana nako. No kuhamba ke nguwa, Pauro wakakumbira Timoti kuti avhakacire uye abambise ungano dzakawanda.

Pauro wakabvunza Timoti kuti: ‘Uya anoda kuseenzera Djehovha ucateererhwa uye ucabathwa zvisina unatsi.’ Timoti wakateererhwa uye wakasungwa nge ndaa ye kugara Mukristu. Asi iyena waizwa kupfara ngekuti waikwanisa kupangidza kuti wainga akagondeka kuna Djehovha.

Pauro wakabvunza Afiripi kuti: ‘Inini ndakatuma Timoti kuti aende dakara ikona. Iyena ucafundisa kuti cinyi cinozwi kuhamba mu cokwadi uye ucamurowedzai kuti muite basa re kuparidzira.’ Pauro waiziya kuti waikwanisa kugonda Timoti. Awona akaseenza ese ke makore akawanda uye akagara no ushamwari wakakura.