Djesu Munhu Akaita Kudini?

Patinofunda zviro zvakaizwa na Djesu paainga ari pasi pano, pane zvatinofunda uye zvicatikhwededza dhuze naye uye na Baba ake Djehovha. Ngazvipi zviro zvakanaka uye zvinopfadza zvatinofunda ne zva Djesu, uye tingamuteedzera kudini mu upenyu wedu?

1. Djesu akatodzana papi na Baba ake?

Djesu paainga ari kudenga, aiona zvaiizwa na Baba ake ano rudo uye aifunda kubva kaari ke mabhirionji e makore. Izvi zvakaita kuti agare ne marangariro uye maitiro akatodzana ne a Baba ake. (Erengai Juau 5:19.) Zvezvirokwazvo, Djesu anopangidza unhu wa Baba ake zvakakwana zvekuti akareketa eciti: “Munhu wese unonga aona inini waonawo Baba.” (Juau 14:9) Pamunofunda nge zva Djesu, mucanyasa kuziyawo Djehovha. Mabatiro aiita Djesu anhu ne usisi anopangidza kuti Djehovha anozwawo kudini nge zvenyu.

2. Djesu akapangidza kudini kuti anoda Djehovha?

Djesu akati: “Kuti nyika iziye kuti ndinoda Baba, ndiri kuita kamare zvandakabvunzwa na Baba kuti ndiite.” (Juau 14:31) Paainga ari pa nyika, Djesu akapangidza kuti anoda Baba ake nge kuwazwira kunyazi pezvainga zvisiripi nyore. Djesu aipfarirawo kureketa nge zva Baba ake uye aibetserawo amweni kuti agare no ushamwari na Djehovha.—Juau 14:23.

3. Djesu akapangidza kudini kuti anoda anhu?

Bhaibheri rinobhuya kuti Djesu “aipfarira maningi ana e anhu.” (Zvierengo 8:31) Akapangidza rudo iri ngekubambisa uye ngekudzipira pakubetsera anhu. Iyena akaita zvishamiso zvaipangidza haiwa simba rake basi asiwo usisi wake. (Marko 1:40-42) Iyena aibata anhu zvakanaka uye ainga asikasananguri. Masoko ake akapasa nyaradzo uye kariro kune ese ano mwoyo wakagondeka aimupurutana. Djesu ainga akashinga kushuphika uye kufa nge ndaa ye rudo rake ku anhu ese, kunyanya anhu aya anopurutana zvaakafundisa.—Erengai Juau 15:13, 14.

FUNDAI ZVAKAWANDA

4. Djesu anoda Baba ake

Zvakaizwa na Djesu zvinotifundisa mapangidziro atingaita kuti tinoda Mwari. Erengai Ruka 6:12 uye Juau 15:10; 17:26. Mu masure mekuerenga tsamba imwe cedzai nge zve mubvunzo unoteera:

• Tingateedzera kudini Djesu pakupangidza kuti tinoda Djehovha?

6. Djesu ano rupo

Djesu ainga asikanyimi kunyazi hazvo ainga asina zvakawanda zvekunyama, uye iyena akatikohomedzesa kuti tipewo anhu amweni zvatinazvo. Erengai Zviito 20:35, pedzepo cedzai nge zve mubvunzo unoteera:

• Maererano no masoko a Djesu, tingakwanisa kudini kupfara?

Ridzai VHIDHIYO, pedzepo cedzai nge zve mubvumzo unoteera.

VHIDHIYO: “Kupa Kuno Mupfaro Kudarika Kutambira”—Isikazi Kureba (4:00)

• Tingaita kudini kuti tigare anhu anopa kunyazi tisina zvakawanda zvekurarama nazvo?

Maizviziya here?

Bhaibheri rinotifundisa kuti tinodikana kunamata kuna Djehovha nge mu zina ra Djesu. (Erengai Juau 16:23, 24.) Patinonamata nge mushobo uwona, tinonga tecipangidza kuti tinoziya zvakaizwa na Djesu kuti atibetsere kugara shamwari ya Djehovha.

MUCIGWAGWA

Djesu anoda Mwari uye anhu. Ngekuti Djesu akaita hingana Baba ake, pamunonga mecifunda nge zvake mucagumawo pakuziya Djehovha.

Mibvunzo yekuhwirinzira

• Tingateedzera kudini Djesu pakupangidza kuti tinoda Djehovha?

• Tingateedzera kudini Djesu pakupangidza kuti tinoda amweni?

• Cinyi camunonyanya kupfarira pana Djesu?

ZIYAI ZVAKAWANDA

Onai nge zve mawara manganani a Djesu atingateedzera.

“Kuti Mukwanise Kuteedzera Djesu Munodikana . . .” (Jesu—Nzira Nechokwadi Neupenyu, peji 317)

Ongororai basa rinokosha rinoizwa na Djesu pa minamato.

“Ngei Tecidikana Kuita Munamato mu Zina ra Djesu?” (Murindiri, wa 1 ya Fevrero wa 2008)

Bhaibheri rino zvarinobhuya nge zve ciimo ca Djesu here?

“Djesu Ainga Akaita Kudini?” (Fundo ye mu saite,)

Tingafundei pamabatiro aiita Djesu anakadzi?

“Mwari Anobata Zvakanaka Anakadzi uye Anoareremedza” (Murindiri, wa 1 ya Setembro wa 2012)