Rubhabhatidzo—Cinangwa Cakanaka!

Djesu akati aKristu anodikana kubhabhatidzwa. (Erengai Mateu 28:19, 20.) Asi cinyi cinozwi rubhabhatidzo? Munhu unodikana kuitei kuti abhabhatidzwe?

1. Cinyi cinozwi rubhabhatidzo?

Soko rekuti “rubhabhatidzo” rinobva mu soko reci Grego rinoreya “kunyikwa.” Djesu paakabhabhatidzwa, muiri wake wese wakanyikwa mu mvura. Tinozviziya ngekuti paakabhabhatidzwa ayena ‘akabuda mu mvura.’ (Marko 1:9, 10) Ndiyo ndaa aKristu e zvirokwazvo paanobhabhatidzwa muiri wawo wese unonyikwa mu mvura.

2. Munhu paanobhabhatidzwa unonga ecipangidzei?

Munhu paanobhabhatidzwa, unopangidza kuti wapira upenyu wake kuna Djehovha. Iyena unodzipira kudini? Asati abhabhatidzwa iyena unoita munamato kuna Djehovha eciti unoda kumuseenzera nokusikaperi. Iyena unogondesa kuti ucanamata Djehovha basi uye kuti ucakanda kuda kake pa mbuto yekutanga mu upenyu wake. Iyena unosanangura ‘kudziramba uye unorumbwa eciteera’ fundiso uye muezaniso wa Djesu. (Mateu 16:24) Kudzipira uye kubhabhatidzwa ndikona kunoita kuti munhu agare no ushamwari wakabamba na Djehovha uye no aya aanonamata naye.

3. Munhu unodikana kuitei kuti abhabhatidzwe?

Musati mabhabhatidzwa, zvinokosha kufunda nge zva Djehovha uye kugara nokutenda kakabamba maari. (Erengai Ahebheru 11:6.) Uzii uye kutenda kenyu pazvinotunhudzira, rudo renyu kuna Djehovha rinotunhudzirawo. Mucada kuparidzira nge zvake uye kurarama maererano no mitemo yake. (2 Timoti 4:2; 1 Juau 5:3) Munhu paanopangidza kuti unoda kurarama ‘ecinyasa kupfadza Djehovha’ iyena pamweni ungasanangura kudzipira kuna Mwari obhabhatidzwa.—Akorosi 1:9, 10.a

FUNDAI ZVAKAWANDA

4. Tingafunda zvakawanda kubva pa rubhabhatidzo ra Djesu

Erengai Mateu 3:13-17 kuti mufunde zvakawanda nge zve rubhabhatidzo ra Djesu. Pedzepo cedzai nge zve mibvunzo dzinoteera:

• Djesu ainga ari kamwana paakabhabhatidzwa here?

• Ayena akabhabhatidzwa kudini? Akadururirhwa zvimvura padoko mu musoro make here?

Mumasure mekubhabhatidzwa, Djesu akatanga basa rake rinokosha raakapaswa na Mwari. Erengai Ruka 3:21-23 uye Juau 6:38, pedzepo cedzai nge zve mubvunzo unoteera:

• Djesu paakabhabhatidzwa, i basa ripi raakakanda pambuto yekutanga mu upenyu wake?

5. Rubhabhatidzo cinangwa camunokwanisa kugumira

Kudzipira kuna Djehovha uye kubhabhatidzwa kungaita hingana zvisikakwanisiki. Asi pamunofunda zvakawanda nge zva Djehovha uye moseenzesa zviya zvaanobhuya, mucanyasa kugara no rugondo rekuita cisananguro ici cinokosha. Onai anhu amweni akanyasa kuita izvona kamare, ridzai VHIDHIYO.

VHIDHIYO: Kubambisa Ushamwari na Djehovha (1:11)

Erengai Juau 17:3 uye Tiyago 1:5, pedzepo cedzai nge zve mubvunzo unoteera:

• Munhu angaitei kuti agadzirire kubhabhatidzwa?

1. Kudzipira ndi kubvunza Djehovha kuti ticamunamata nekusikaperi

2. Patinobhabhatidzwa, tinopangidza anhu kuti takadzipira kuna Mwari

6. Kubhabhatidzwa kunoita kuti tigare nhengo ye mhuri ya Djehovha

Patinobhabhatidzwa, tinogara nhengo ye mhuri yakabatana ye mu nyika dzese. Kunyazi tiri we nyika imweni kana kuti tino tsika dzimweni, tese tinotenda zviro zvimwezvo uye tinoteerera mitemo imweyo ya Mwari. Erengai Pisarema 25:14 uye 1 Pedru 2:17, pedzepo cedzai nge zve mubvunzo unoteera:

• Mumasure mekuti munhu abhabhatidzwa, unogara no ushamwari wakadini na Djehovha uye no aya amunonamata nawo?

MUCIGWAGWA

Djesu akafundisa aKristu kuti anodikana kubhabhatidzwa. Kuti adaro, munhu unodikana kugara nokutenda kakabamba muna Djehovha, kurarama maererano no zvaanobuya kuti zvakanaka uye kudzipira kaari.

Mibvunzo yekuhwirinzira

• Cinyi cinozwi rubhabhatidzo, uye ngei recikosha?

• Kudzipira kunobatana papi ne kubhabhatidzwa?

• Zviro zvipi zvinodikana kuizwa no munhu, asati adzipira kuna Djehovha uye asati abhabhatidzwa?

ZIYAI ZVAKAWANDA

Fundai kuti cinyi cinozwi rubhabhatidzo uye cisiripi rubhabhatidzo.

“Chii Chinonzi Kubhabhatidzwa?” (Fundo ye mu saite, mu ciShona)

Onai zviro zvinodikana kuizwa no munhu kuti abhabhatidzwe.

“Kuda Jehovha Kunoita Kuti Ubhabhatidzwe” (Murindiri, wa Nyaonga 2020, mu ciShona)

Onai kuti cinyi cakaita kuti mwanarume umweni ade kubhabhatidzwa.

“Vaida Kuti Ndizvionere Ndoga Zvinodzidziswa neBhaibheri” (Murindiri, wa 1 ya Musekwa 2013, mu ciShona)

Fundai kuti ngei rubhabhatidzo i cinangwa cinobetsera uye kuti imwimwi mungagadzirira kudini kuti mubhabhatidzwe.

“Ndinofanira Kubhabhatidzwa Here?” (Mibvunzo Inobvunza Vechiduku—Mhinduro Dzinoshanda, Bhuku 2, chitsauko 37, mu ciShona)