FUNDO 37

Bhaibheri Rinobhuyei nge Nyaya ye Basa uye Mare?

Rakaizwa Zvekudindhwa

Imwimwi makambonetseka nge nyaya ye basa uye mare here? Zvingashupha kukwanisa kudziriritira pamwepo mecinamata Djehovha nge mushobo waakasisira. Asi Bhaibheri rinotipasa mazano akanaka angatibetsera.

1. Bhaibheri rinobhuyei nge zve basa?

Mwari anoda kuti tipfadzwe no basa ratinoita. Bhaibheri rinoti, “apana cakanakira munhu kupinda kuti . . . apfadzwe no kuseenza kake no simba.” (Muparidzi 2:24) Djehovha anoseenza maningi. Tinoda kuteedzera Djehovha nge kugara aseenzi akanaka nge kuti patinoita izvona tinopfadza Djehovha uye isusu pacedu tinopfarawo.

Kuseenza kunokosha. Asi atidikani kusiya kuti basa rinyanye kukosha kupinda kunamata kedu Djehovha. (Juau 6:27) Djehovha anotigondesa kuti kana tikakanda kuda kake pekutanga, iyena acatipasa zvatinoda kuti tirarame.

2. Ngaapi maonero ari pakati ne pakati nge zve nyaya ye mare?

Bhaibheri rinotendera kuti “mare inodziirira.” (Muparidzi 7:12) Asi irona rinotingwadzawo kuti mare andiyopi inotiita kuti tigare ne mupfaro. Ndiyo ndaa, Bhaibheri rinotikohomedzesa kuti tisanyanye kuda mare, asi tinodikana ‘kugutsikana no zviya zvatinazvo.’ (Erengai Ahebheru 13:5.) Kana tikaita izvona, atiori mwoyo nge kurangarira kuti atina zvinotikwanira, uye atizogariwo no magaa akawanda. (Zvierengo 22:7) Uye atidzikandi pa ngozi yokubatanidzwa mumajogo anoita hingana kuti ticapfuma nokukasika.

3. Tingaseenzesa kudini mare kuti tibetsere amweni?

Djehovha ndi Mwari ano rupo, uye tinomuteedzera ‘patinopasa amweni zvatinazvo.’ (1 Timoti 6:18) Tingaita izvona nge kubetsera ungano uye kupasa rubetso ku aya anoda, maka-maka ku hama dzedu mu kunamata. Djehovha aanyanyi kuringira kukura kerubetso redu, asi pacikonzero cinotitora kuti tiite izvona. Tikagara ne rupo rinobva mu mwoyo, ticapfara uye ticapfadza Djehovha.—Erengai Zviito 20:35.

FUNDAI ZVAKAWANDA

Onai kuti ngei zvakanaka kukanda basa pa mbuto yaro uye kugutsikana ne zvatinazvo.

4. Mushobo wamunoseenza ungakudza Djehovha

Ushamwari wedu na Djehovha unodikana kubata-bata maonero edu nge zve basa. Ridzai VHIDHIYO, pedzepo cedzai nge zve mibvunzo dzinoteera.

VHIDHIYO: Seenzerai Djehovha no Mwoyo Wese (4:39)

Mu vhidhiyo yatapedza kuona, cinyi canyanya kumushamisa mumaitire a Jason ku basa?
Cinyi caakaita kuti akande basa pa mbuto yaro?

Erengai Akorosi 3:23, 24, pedzepo cedzai nge zve mubvunzo unoteera:

Ngei zvecikosha kugara aseenzi akanaka?

Collage: Mwanarume eciita basa rake ciro cinonyanya kukosha mu upenyu wake. 1. Iyena unoseenza mushikritorio zuwa rese. 2. Iyena unorumbwa ari pa basa panotanga usiku. 3. Iyena unorumbwa eciseenza kunyazi adoni ake atokhumuka.

Kuseenza kunokosha. Asi atidikani kusiya kuti basa rinyanye kukosha kupinda kunamata kedu Djehovha

Collage: Mwanarume umwewo unooa nguwa yekuita zviro zvinonyanya kukosha. 1 . Iyena unoseenza mushikritorio zuwa rese. 2. Iyena unoenda kumba zuwa parinobira. 3. Iyena unomutsa nyara kuti adaire pamusangano. 4. Iyena unorarira pamwepo no mukadzi wake no ana e asikana ake airi.

5. Kugutsikana no zvatinazvo kunounza mupfaro

Anhu akawanda anoedza kutunhudzira kuda mare. Asi Bhaibheri rinotikohomedzesa kuita zviro zvakasiyana. Erengai 1 Timoti 6:6-8, pedzepo cedzai nge zve mubvunzo unoteera:

Bhaibheri rinotikohomedzesa kuitei?

Kunyazi tisina zviro zvakanyanya kuwanda, tingakwanisa kupfara. Ridzai VHIDHIYO, pedzepo cedzai nge zve mibvunzo dzinoteera.

VHIDHIYO: “Gutsikanai ne Zviya Zvamunazvo” (3:20)

Kunyazi no mare padoko, cinyi caipasa mhuri idzi mupfaro?

Zvakadini kana tino mare yakawanda, asi tecida kutunhudzira imweni? Djesu akapanganidza muezaniso ecireketa nge zve ngozi iyona kamare. Erengai Ruka 12:15-21, pedzepo cedzai nezve mubvunzo unoteera:

Mafundei nge muezaniso wa Djesu?—Onai vhersikuro 15.

Erengai Zvierengo 10:22 uye ezanisai na 1 Timoti 6:10. Pedzepo cedzai nge zve mibvunzo dzinoteera:

Munorangarira kuti cinyi cinonyanya kukosha: Kugara shamwari ya Djehovha here, kana kuti kugara no mare yakawanda? Ngei?
Kana munhu akadisisa maningi mare, matambudziko api aanosongana nawo?

6. Djehovha acatipasa zvese zvatinoda

Kunetseka nge ndaa ye mare uye basa zvingakwanisa kuedza kutenda kedu kuna Djehovha. Ridzai VHIDHIYO kuti tione catinodikana kuita kana tino zvinetso izvi, todaira mibvunzo dzinoteera.

VHIDHIYO: Djehovha Acatipasa Zvatinoda pa Kurarama (6:21)

Mu vhidhiyo, hama yainga ino dambudziko ripi?
Iyona yakaitei kuti ikunde zvinetso izvi?

Erengai Mateu 6:25-34, pedzepo cedzai nge zve mubvunzo unoteera:

Djehovha anogondesei ku aya anokanda zviro zvekunamata pekutanga?

ANHU AMWENI ANOTI: “Ndinodikana kuseenza no simba kuti ndiriritire mhuri yangu. Hino andikwanisi kuenda ku misangano masumana ese.”

I tsamba ipi ye mu Bhaibheri inomupasa rugondo rekuti kukanda kunamata Djehovha pa mbuto yekutanga cisananguro cakanaka?

MUCIGWAGWA

Basa uye mare i zviro zvinokosha, asi zviro izvi azvidikani kutipingaidza pakuseenzera Djehovha.

Mibvunzo yekuhwirinzira

Cinyi cingamubetsera kuti mugare ne maonero ari pakati no pakati nge zve basa?
Ngei zvakanaka kupfara no zviro zvatinazvo?
Imwimwi mungapangidza kudini kuti munogonda ne zvipikirhwa zva Djehovha zvekuti acadziirira anhu ake?

Ndakapedza fundo ii muna:

Edzai kuita zvinoteera

Imwimwi makaruza misangano yakawanda mu mwedzi yakadarika nge ndaa ye basa renyu here? Kana zviri izvona, rangaridzai zvamaizoita kuti muzvigadzirise.

Zvimweni:

Your other goal

ZIYAI ZVAKAWANDA

Bhaibheri rinobhuya kuti mare yakashata here?

“Mare Inzinde ye Zviro Zvese Zvakashata Here?” (Fundo ye mu saite)

Onai kuti tingapangidza kudini rupo kuti tipfadze Mwari.

“Bhaibheri Rinobhuyei nge zve Mare?” (Fundo ye mu saite)

Kubheca i mutamboo basi we kudziaraidza here?

“Zvinoreketa Bhaibheri—Kutamba Cabutha” (Mukai!, wa Marso 2015)

Onai zvakabetsera mwanarume umweni kuti asiye kubheca uye kuba.

“Ndaipfarira Maningi Kugogoma no Hashi” (Murindiri wa 1 ya Novembro wa 2011)