FUNDO 46
Ngei Mecidikana Kudzipira uye Mobhabhatidzwa?
Pamunodzipira kuna Djehovha munoita munamato kaari mecimugondesa kuti mucanamata iyena basi uye kuti mucakanda kuda kake pa mbuto yekutanga mu upenyu wenyu. (Pisarema 40:8) Kana mukadaro zvinonga zvaakuita kuti mubhabhatidzwe. Pamunobhabhatidzwa, munonga mecipangidzira anhu amweni kuti makadzipira kuna Djehovha. Kusanangura kudzipira kuna Djehovha ciro cinokosha kupinda zviro zvese zvamungaita mu upenyu wenyu. Asi ciro cipi cinoita kuti munhu aite cisananguro cinokosha kudaro?
1. Ngacipi cinoita kuti munhu asanangure kudzipira?
Rudo ndiro rinoita kuti munhu adzipire kuna Djehovha. (1 Juau 4:10, 19) Bhaibheri rinotikohomedzesa kuti: “Ida Djehovha Mwari wako no mwoyo wako wese, no upenyu wako wese, no ndangariro dzako dzese uye no simba rako rese.” (Marko 12:30) Tinopangidza kuti tinoda Mwari ngezvatinoreketa uye no zvatinoita. Kana mukomana no musikana ecidanana zvezvirokwazvo awona anowakana, hino kana tecidawo Djehovha tinodzipira kaari uye tobhabhatidzwa.
2. Djehovha anogondesa Apupuri ake akabhabhatidzwa makomborero api?
Kana makabhabhatidzwa, munonga maakubatanidzwa mu mhuri ya Djehovha inopfara. Munonga maakutodzionera mwega kuti iyena anomuda, uye mucarumbwa mecikhwedera dhuze naye. (Erengai Marakiya 3:16-18.) Djehovha anonga aaBaba enyu kamare uye munonga maa mumhuri ye hama no hanzvadzi dziri mu nyika yese dzinoda Baba enyu uye dzinomudawo. (Erengai Marko 10:29, 30.) Asi pano zviro zvamunodikana kuita kuti mubhabhatidzwe. Munodikana kufunda nge zva Djehovha, kumuda, uye kutenda mu Mwana wake. Pedzepo, munodikana kudzipira kuna Djehovha. Kana mukaita zviro izvi, mobhabhatidzwa, munonga mapinda mu gwanza rinoenda ku upenyu usikaperi wakadzara nomupfaro. Soko ra Mwari rinobhuya kuti: “Rubhabhatidzo . . . riri kumuponesai zvino.”—1 Pedru 3:21.
FUNDAI ZVAKAWANDA
Ongororai kuti ngei mecidikana kudzipira kuna Djehovha uye mobhabhatidzwa.
3. Tese tinodikana kusanangura kuti tonamata ani
Mu nguwa dze Aisraeri, anhu amweni airangarira kuti anokwanisa kunamata Djehovha asi ecinamata mwari umweni wekunyepa unozwi Bhaari. Asi Djehovha akatuma muphorofita Eriya kuti aabvunze kuti ainga akapsveteka. Erengai 1 Madzimambo 18:21, pedzepo cedzai nge zve mubvunzo unoteera:
Aisraeri aidikana kuita cisananguro cipi?
Hingana Aisraeri isusuwo tinodikana kusanangura kuti ticanamata ani. Erengai Ruka 16:13, pedzepo cedzai nge zve mibvunzo dzinoteera:
Ngei zvisikaiti kuti tinamate Djehovha asi tecinamata munhu umweni kana kuti ciro cimweni?
Tinopangidza kudini kuti tasanangura kunamata Djehovha?
4. Nyasai kurangarira nge zve rudo ramakapangidzirhwa na Djehovha
Djehovha akatipasa zvipo zvakawanda zvinokosha. Asi isusu cinyi catingamupasawo? Ridzai VHIDHIYO.
Djehovha akamuitirei kuti apangidze kuti anomuda? Erengai Pisarema 104:14, 15 uye 1 Juau 4:9, 10, pedzepo cedzai nge zve mibvunzo dzinoteera:
Zvipo zvipi zvamunonyanya kukoshesa zvamakapaswa na Djehovha?
Zvipo izvi zvinoita kuti muzwe kudini nge zva Djehovha?
Kana tikapaswa cipo catinonyasa kuda, tinopangidza munhu unonga atipasa cipoco kuti tinotenda zvaatiitira. Erengai Dheuteronomiyo 16:17, pedzepo cedzai nge zve mubvunzo unoteera:
Kana mukarangarira zvese zvamakaizirhwa na Djehovha, munogara no cido cekuda kumuitirei?
5. Kudzipira kunounzisa makomborero
Anhu akawanda anorangarira kuti mbiri, basa rakanyasa kunaka, uye mare yakawanda ndizvona zvinoita kuti munhu apfare. Zvirokwazvo here? Ridzai VHIDHIYO, pedzepo cedzai nge zve mibvunzo dzinoteera.
Ngei mucai we bhora uri muvhidhiyo wakasiya kucaya bhora kunyazi airipfarira maningi?
Iyena wakasanangura kudzipira kuna Djehovha haiwa ku bhora. Munorangarira kuti iyena wakaita cisananguro cakanaka here? Ngei mecibhuya kudaro?
Paainga asati agara mukristu, muphostori Pauro wakafundira basa raizoita kuti iyena agare no mbiri. Iyena wainga akafundiswa mutemo wecidjudha no mufundisi wainga ano mbiri. Asi wakasiya zviro zvese izvi kuti agare mukristu. Pauro wakazotsumba here? Erengai Afiripi 3:8, pedzepo cedzai nge zve mibvunzo dzinoteera:
Ngei Pauro wakati zviro zvese zvaiita asati agara mukristu waizviona hinga “marara?”
Iyena wakazoona mubairo upi pa mbuto ye zviro zvaakasiya?
Munorangarira kuti upenyu wenyu unonga wakanaka kana mukasanangura kuseenzera Djehovha here?
Pauro paakagara mukristu wakawina zvakawanda kupinda zvaakasiya sure
ANHU AMWENI ANOTI: “Andidi kudzipira kuna Djehovha ke upenyu wangu wese.”
Ngei mecirangarira kuti zvinobetsera kudzipira kuna Djehovha?
MUCIGWAGWA
Rudo ndiro rinoita kuti tidzipire kuna Djehovha uye tibhabhatidzwe.
Mibvunzo yekuhwirinzira
Ngei Djehovha ecisisira kuti timude no mwoyo wese uye timunamate?
Djehovha anokomborera kudini Apupuri ake akabhabhatidzwa?
Maizoda kudzipira kuna Djehovha here?
ZIYAI ZVAKAWANDA
Onai kuti ngei muembi uye mugogomi umweni akasanangura kudzipira kuna Djehovha.
Madjaha Anobvunzisa Eciti—Ndicaitei no Upenyu Wangu?—Zviro Zvamakamboita (6:54)
Onai zvikonzero zvimweni zvinopangidza kuti ngei munodikana kudzipira kuna Djehovha.
“Ngei Mecidinikana Kudzipira Kuna Djehovha?” (Murindiri wa 15 ya Janero wa 2010)
Mu vhidhiyo ii, onai mupfaro uno aya anodzipira kuna Djehovha.
Mu ngano inoti, “Kemakore Akawanda Andaimbodzibvunzisa Kuti, ‘Tiri Kuraramirei?’” Onai cakaita kuti mwanakadzi umweni aongorore zvaaikoshesa mu upenyu.
“Bhaibheri Rinocinja Upenyu” (Murindiri wa 1 ya Novembro wa 2012)