Zvakapangidzwa—Zvinoreyei Kamuri Nyamasi Uno

1-2. Ngacipi cikonzero catinaco kuti tipfarire bhuku ra Zvakapangidzwa?

IMWIMWI makambogara no mukana wekuona mafoto e shamwari yenyu here? Zviri pamhene kuti mucaona anhu akawanda amusikazii pa mafoto awona. Pedzepo munoona foto inomushamisa. Ngei? Ngekuti munonga muripoo pa foto iyona. Imwimwi munoedza kuedzurira kuti fotoyo yakadusirhwepi uye rini. Munoedzawo kuedzurira anhu anonga aripo pa fotoyo. Foto iyona inokosha maningi kamuri.

² Bhuku ra Zvakapangidzwa rakaita hingana foto iyona. Ngei? Nge zvikonzero zviiri. Cekutanga, bhuku iri rakatarirhwa isusu kamare. Pa vhersikuro yekutanga kamare tinoerenga kuti: “Zvakapangidzwa na Djesu Kristu, zvaakapaswa ndi Mwari, kuti apangidze aranda ake zviro zvinodikana kuitika nokukasika.” (Zvak. 1:1) Zviri pamhene kuti zviro zvakatarhwa mu bhuku iri azvizi kutarirhwa munhu wese, asi aseenzi akagondeka a Mwari. Katiri, azvishamisi kuziya kuti tinobatanidzwa pakudzadzisa uphorofiti uri mu bhuku iri rinoshamisa maningi. Nge masoko amweni, zvinoita hingana tiri kudziona “pa foto.”

3-4. Uphorofiti uri mu bhuku ra Zvakapangidzwa waizotanga kudzadzika rini, uye izvona zvinotibata-bata kudini?

³ Cikonzero cecipiri cinoita kuti tipfarire uphorofiti uri mu bhuku ra Zvakapangidzwa i nguwa icadzadzika uphorofiti iwona. Muphostori Juau wakabhuya nguwa yaizodzadzika uphorofiti iwona, iyena wakati: “Ndakafemerhwa ndoonekepo pa zuwa ra Tenzi.” (Zvak. 1:10) Juau wakatara masoko aya mu gore ra 96 K.A. uye “zuwa ra Tenzi” rainga riciri kure kamare. (Mat. 25:14, 19; Ruka 19:12) Maererano no uphorofiti uri mu Bhaibheri, zuwa ra Tenzi rakatanga muna 1914 Djesu paakatanga kutonga hinga Mambo kudenga. Kubvira mu gore irona kuenda mberi, uphorofiti uri mu bhuku ra Zvakapangidzwa wakaringana no anhu a Mwari wakatanga kudzadzika. Hino nyamasi uno, isusu taakurarama mu “zuwa ra Tenzi”!

⁴ Ngekuti tiri kurarama mu mazuwa anoshamisa, tinodikana kunyasa kupurutana zano re rudo riri pana Zvakapangidzwa 1:3: “Unopfara uya unoerenga no izwi guru no aya anozwa masoko e uphorofiti uu uye anoita zviro zvakatarhwemo, ngekuti nguwa yakasanangurhwa yaa padhuze.” Ndiyo ndaa, ii ndiyo nguwa yatinodikana ‘kuerenga no izwi rinozwika,’ “tozwa masoko e uphorofiti iwona,” uye “toteerera” zvakatarhwepo. Asi masoko api manganani atinodikana kuteerera?

GARAI NE COKWADI COKUTI KUNAMATA KENYU KUNOTENDERHWA NA MWARI

5. Bhuku ra Zvakapangidzwa rinopangidza kudini kukosha kunoita kunamata Djehovha nge mushobo waanotendera?

⁵ Kubvira mu kapituro yekutanga re bhuku ra Zvakapangidzwa, tinokwanisa kuona kuti Djesu anoziya zvese zviri kuitika mu ungano dzese. (Zvak. 1:12-16, 20; 2:1) Izvi zvinooneka pa masoko akatumirhwa na Djesu ku ungano nomwe dzeku Ásia Menor. Pa masoko awona, ayena akapasa nhungamiriro dzakananga kuti abetsere ungano idzi kuti dzinamate Djehovha nge mushobo waanotendera. Uye zvakarekethwa na Djesu zvinoseenzawo ku anhu a Mwari nyamasi uno. Tinofundei? Mutungamiriri wedu Djesu Kristu anonyasa kuziya kukura katakaita pakunamata. Djesu anotitungamirira uye anotidziirira. Ayena anoziya zvese zvirikuitika. Ayena anoziyawo zvatinodikana kuita kuti tirumbwe tecitenderhwa na Djehovha. I nhungamiriro ipi yakapaswa ndi Djesu iri mu bhuku ra Zvakapangidzwa yatinodikana kuteerera?

6. (a) Maererano na Zvakapangidzwa 2:3, 4, ungano ye Aefeso yainga ino cinetso cipi? (b) Tinofundei?

⁶ Erengai Zvakapangidzwa 2:3, 4. Atidikani kusiya rudo ratainga tinaro kuna Djehovha pakutanga. Masoko akatumirhwa na Djesu ku ungano ye Aefeso anopangidza kuti kunyazi no zvinetso zvaiisongana nazvo, awona airumbwa ecinamata Djehovha no ushingi. Asi zvinotsukwarisa kuti awona ainga asikacadi Djehovha hingana madire aaimuita pakutanga. Hino zvaikosha maningi kuti adezve Djehovha hingana pakutanga—izvona zvaizoita kuti Djehovha atenderezve manamatiro awo. Isusu tinodikanawo kuita zvakawanda pano kushingirira basi. Tinodikana kushingirira nge zvikonzero zvakanaka. Mwari wedu Djehovha aaoni basi zvatinoita, asi anoonawo zvikonzero zvinoita kuti tizviite. Cikonzero cinoita kuti tiite ciito cinokosha maningi kuna Djehovha, ngekuti ayena anoda kuti kunamata kedu kubve pa rudo rikuru ratinaro uye kumutenda katinoita.—Zvie. 16:2; Mk. 12:29, 30.

7. (a) Maererano na Zvakapangidzwa 3:1-3, hama dze ungano ye ku Sardhi dzainga dzino cinetso cipi? (b) Tinodikana kuitei?

⁷ Erengai Zvakapangidzwa 3:1-3. Tinodikana kurumbwa takangwarira. Hama dze ungano ye ku Sardhi dzainga dzino zvinetso zvakasiyana-siyana. Kareko, awona aiseenzera Djehovha no simba rese, asi zvino ainga athurudza mathanyu awo. Ndiyo ndaa, Djesu akabhuya kuti aidikana “kungwarira.” Izvona zvinotifundisei? Zviri pamhene kuti Djehovha aazombokanganwi basa ratinomuitira. (Ahe. 6:10) Kunyazi zvakadaro, atidikani kurangarira teciti, ngekuti takaseenzera Djehovha no simba kareko, tinodikana kuthurudza mathanyu mazuwa ano. Kunyazi tisikacakwanisi kuita zviro zvataiita kare, tinodikana kurumbwa takabatikana “mu basa ra Tenzi” kuti tikwanise kungwarira dakara ku mugumo.—1Ako. 15:58; Mat. 24:13; Mk. 13:33.

8. Tinofundei kubva pa masoko akarekethwa na Djesu ku hama dze ku Raodhiseya, ari pana Zvakapangidzwa 3:15-17?

⁸ Erengai Zvakapangidzwa 3:15-17. Tinodikana kuseenza no simba uye tonamata Djehovha no mwoyo wese. Masoko akatumirhwa ndi Djesu ku ungano ye Raodhiseya anopangidza cinetso cimweni. Awona ainga “asikacanyanyi kukoshesa” zviro zvekunamata. Ndiyo ndaa, Djesu akaabvunza kuti ainga “asikacabetseri uye aipasisa usisi.” Awona aidikanazve kunamata Djehovha no simba rese. (Zvak. 3:19) Tinofundei? Kana tikaona kuti aticaripi kuseenzera Djehovha no simba rese, tinodikana kumutenda no zviro zvese zvaanotipasa. (Zvak. 3:18) Atidi kuwarairhwa no zviro zvisikanyanyi kukosha, hingana kupsvaka zviro zvakawanda zvekunyama uye upenyu wakanakisisa, topedzesera tabvisa zviro zvekunamata pa mbuto yekutanga.

9. Maererano no zvakarekethwa na Djesu ku hama dze ku Pergamo uye Tiyatira, tinodikana kungwarirei?

⁹ Tinodikana kuramba fundiso dze aya akapauka pakutenda. Djesu akasumurura hama dzinganani dze ku Pergamo, ngekuti dzaiita kuti ungano isabatane. (Zvak. 2:14-16) Asi ayena akasimba hama dze ku Tiyatira ngekuti dzakasiya “maitiro akadzika a Sathani” uye akaakohomedzesa kuti “abatisise” cokwadi. (Zvak. 2:24-26) Hama dzainga dzatanga kuteerera fundiso dze kunyepa dzaidikana kucinyuka. Izvona zvinotifundisei? Tinodikana kuramba fundiso ipi hayo isikaenderani no zvinorekethwa na Djehovha. Anhu akapauka pakutenda “angagara hingana kuti anoteerera Mwari,” kana kuti anoita hingana kuti anokoshesa zvinorekethwa no Bhaibheri asi maitiro awo “anopangidza zvimweni.” (2 Tim 3:5) Asi kuti tikwanise kuona nokuramba fundiso dzekunyepa, tinodikana kugara afundi akanaka e Bhaibheri.—2 Tim 3:14-17; Dju. 3, 4.

10. Tingafundeizve kubva pa zviro zvakarekethwa na Djesu ku ungano ye Pergamo uye Tiyatira?

¹⁰ Atidikani kutsigira, kutendera kana kutenda mushobo upi hawo we zviro zvisikazi kucena. Hama dze ku Pergamo uye dze ku Tiyatira dzainga dzino cinetso cimwenizve. Djesu akashora anganani awo nge kuti ainga asikarambi zviro zvisikazi kucena. (Zvak. 2:14, 20) Tinofundei? Kunyazi taano makore akawanda tecimuseenzera uye titori no ubaba mu sangano rake, atidikani kurangarira kuti apana cicaizwa na Djehovha kana tikaita ciro cisikazi kucena. (1 Sam. 15:22; 1 Pe. 2:16) Maonero e nyika nge zve zviro zvakacena no zvisikazi kucena arikurumbwa ecishata, asi Djehovha anoda kuti isusu tizvione nge mishobo yakasiyana. Ayena anoda kuti tigare no muhambiro wakakwirira pakati pe zviro zvakacena no zvisikazi kucena.—Aef. 6:11-13.

11. Tafundei dakara zvino? (Onai bhokisi rakazwi “Zvatinofunda Nyamasi Uno.”)

¹¹ Tafundei dakara zvino? Taona kuti zvinokosha maningi kunamata Djehovha nge mushobo waanotendera. Kana pano ciro catiri kuita cisikapfadzi Djehovha, tinodikana kuita cinjo nokukasika kuti titenderhwe naye. (Zvak. 2:5, 16; 3:3, 16) Djesu akabhuyazve zviro zvimweni ku ungano idzi. Ngazvipi zvaakabhuya?

GARAI MAKAGADZIRIRA KUTEERERHWA

12. Tinofundei kubva pa zviro zvakarekethwa ndi Djesu ku hama dze ungano dze ku Esmirna uye Firadhefiya? (Zvakapangidzwa 2:10)

¹² Ngationei zvino zviro zvakarekethwa ndi Djesu ku ungano dze ku Esmirna uye Firadhefiya. Ayena akabvunza hama kuti dzisathye kuteererhwa ngekuti Djehovha aizoakomborera kana akarumbwa akagondeka. (Erengai Zvakapangidzwa 2:10; 3:10) Tinofundei? Isusu ticateererhwa uye tinodikana kugara takagadzirira izvona. (Mat. 24:9, 13; 2Ako. 12:10) Ngei ciedzuriro ici cecikosha?

13-14. Anhu a Mwari anobathwa-bathwa kudini no zviitiko zviri pana Zvakapangidzwa kapituro 12?

¹³ Bhuku ra Zvakapangidzwa rinopangidza kuti anhu a Mwari aizoteererhwa mu mazuwa edu ano—“zuwa ra Tenzi.” Zvakapangidzwa kapituro 12 inobhuya kuti Djesu paakagadzwa kuti agare Mambo, kudenga kakaitika hondo. Migeri—anokudzwa Djesu Kristu—no ngirozi dzake akarhwisana na Sathani ne madhimoni ake. (Zvak. 12:7, 8) Azondi a Mwari akakundwa uye odzingirhwa ouya pasi pano. Ndiyo ndaa, pasi pano pano matambudziko uye zvinetso zvakawanda. (Zvak. 12:9, 12) Asi zviro zvese izvi zvinobata-bata kudini anhu a Mwari?

¹⁴ Bhuku ra Zvakapangidzwa rinobhuya zvaizoizwa ndi Sathani. Iyena aacakwanisi kukwira kudenga, ndiyo ndaa, unotsungurira shungu dzake dzese ku hama dzakadzodzwa dziri pasi pano. Hama dzakadzodzwa dzinoimirira Umambo wa Mwari uye awona “ano basa rekupasa upupuri nge zva Djesu.” (Zvak. 12:17; 2Ako. 5:20; Aef. 6:19, 20) Uphorofiti wese uu uri kudzadzika kudini?

15. “Apupuri airi” e mu bhuku ra Zvakapangidzwa kapituro 11 anoimirira ani, uye ngazvipi zvakaitika nawo?

¹⁵ Sathani wakaseenzesa azondi a Mwari pasi pano kuti arhwise hama dzakadzodzwa dzaitungamirira basa rekuparidzira. Anarume aya aiimirirhwa no “apupuri airi” e mu bhuku ra Zvakapangidzwa akauraiwa.b (Zvak. 11:3, 7-11) Muna 1918, anarume asere e cikwata ici akapumhwa kunyazi asina ndaa uye akatongerhwa makore akawanda kuti agare mu karaboso. Anhu akawanda airangarira kuti basa raiizwa no hama dzakadzodzwa “ratoperera ipona.”

16. Ciro cipi cainga cisikakarirhwi cakaitika mu gore ra 1919, asi Sathani aazi kuima kuitei?

¹⁶ Uphorofiti uri mu bhuku ra Zvakapangidzwa kapituro 11 unopangidzawo kuti “apupuri airi” aizoraramazve mu masure mecinguwa cidoko. Uphorofiti uu wakadzadzika nge mushobo usikakarirhwi pasatoti papera gore rimwe mu masure mekuti hama idzi dzakandhwa mu karaboso. Mukutanga ke gore ra 1919, hama idzi dzakadzodzwa dzakaduswa mu karaboso uye kupumhwa kaakaizwa kakazotopfudzwa. Hama idzi dzakahwirira nokukasika kuti dzitungamirire basa rekuparidzira no rekufundisa. Asi izvona, azvizi kuita kuti Sathani aime kurhwisa anhu a Mwari. Kubvira pa nguwa iyona, iyena uri kurumbwa ecitungamirira “murambo” wekuteerera anhu a Mwari. (Zvak. 12:15) Ndiyo ndaa, tese isusu “tinodikana kushingirira uye kutenda” muna Djehovha.—Zvak. 13:10.

ITAI ZVESE ZVAMUNOKWANISA PA BASA RATAKAPASWA NA DJEHOVHA

17. Anhu a Mwari anosotambira rubetso ripi risikakarirhwi?

¹⁷ Bhuku ra Zvakapangidzwa kapituro 12 rinopangidza kuti anhu a Mwari aizotambira rubetso kubva pa mbuto isikakarirhwi. Zvaizoita hingana kuti “nyika” yamedza “murambo” wekuteererhwa. (Zvak. 12:16) Uye ndizvona kamare zvakaitika. Pamweni paya, matii amweni e mu nyika ya Sathani akadai hinga aya anobatana no shwiro dzekutonga anorerutsira hama dzedu zviro, otoguma pakubetsera anhu a Mwari. Ke makore akawanda, anhu a Mwari anosowina mu matribhunari, uye opaswa citenderhwa cekunamata akasudzunuka. Awona anoseenzesa kudini rusudzunuku irona? Ngekukhorovhera mikana ipi hayo kuti aite basa raakapaswa na Djehovha. (1Ako. 16:9) Asi i basa ripi irona?

18. I basa ripi rinokosha maningi ratinodikana kuita mu mazuwa ano e kupedzesera?

¹⁸ Djesu akaphorofita kuti anhu a Mwari aizoparidza “masoko akanaka e Umambo wa [Mwari]” mu myika yese mugumo usati waguma. (Mat. 24:14) Kuti azvikwanise, awona aizobetserhwa no ngirozi kana kuti grupu rakakura re ngirozi dzino “masoko akanaka anogara nokusikaperi e kuziisa ku anhu anogara pa nyika, ku mishobo yese ye anhu, madzinza, mireketero no anhu.”—Zvak. 14:6.

19. Masoko apizve amweni anodikana kuparidzwa no aya anoda Djehovha?

¹⁹ Anhu a Mwari aandoparidziri basi masoko akanaka e Umambo. Awona anotsigirawo basa rinoizwa ne ngirozi rakatarhwa pana Zvakapangidzwa kapituro 8 dakara kapituro 10. Ngirozi idzona, dzinoziisa mundandanda we matambudziko ku aya anoramba Umambo wa Mwari. Ndiyo ndaa, Apupuri a Djehovha anoparidzira masoko anoezaniswa no “masanza uye muriro,” anoreketa nge zve mutongo wa Mwari mu nyika yakashata ya Sathani. (Zvak. 8:7, 13) Anhu anodikana kuziya kuti mugumo waa padhuze uye kuti awona anodikana kuita cinjo mu upenyu kana ecida kupona pa zuwa rekutsamwa ka Djehovha. (Zef. 2:2, 3) Asi anhu aapfariri kuzwa masoko aya. Ndiyo ndaa, tinodikana kushinga kuti tiite izvona. Mukati me kutambudzika kukuru, masoko e kutonga e kupedzesera acarhwadza maningi.—Zvak. 16:21.

TONDOWEDZAI MASOKO ARI PANA ZVAKAPANGIDZWA

20. Ticaonei mu fundo mbiri dzicateera?

²⁰ Isusu tinodikanadi kutondowedza “masoko e uphorofiti uu” ngekuti tinobatanidzwawo pakudzadzika ke zviro zvakatarhwa mu bhuku ra Zvakapangidzwa. (Zvak. 1:3) Asi tingarumbwa kudini takagondeka kuna Djehovha kunyazi teciteererhwa uye teciparidzira no ushingi? Ticabambiswa no zviro zviiri: cekutanga, kuziya zvinorekethwa no bhuku ra Zvakapangidzwa zvakaringana no azondi a Mwari uye cecipiri, kuziya makomborero aticatambira mune ramangwana kana tikarumbwa takagondeka. Ndizvona zvaticaona mu fundo mbiri dzicateera.