Foto inopangidza zvakaita cikuwa
1922—Makore Zana Adarika
“MWARI . . . anotibetsera . . . kuti tikunde . . . nge ndaa ya Djesu Kristu.” (1 Ako. 15:57, Versão Rei Jaime) Iyi yainga iri tsamba ye gore ra 1922, masoko aya aiedzurira afundi e Bhaibheri kuti Djehovha aizokomborera kugondeka kawo. Mu gore irona, Djehovha wakadzadzisa cipikirhwa icona paakakomborera aparidzi aya aishingaira ku imprimiri mabhuku awo kamare. Uye kuseenzesa radhiyo kuti aparidzire nayo masoko o Umambo. No kuhamba ke nguwa mu gore irona ra 1922, Djehovha wakapasa cikomborero cimweni anhu ake. Afundi e Bhaibheri akaungana pa gungano rinokosha pa Cedar Point, Ohio, ku Estados Unidos. Zviro zvakaitika pa gungano irona, zvinopasa simba sangano ra Djehovha dakara nyamasi uno..
“NZERO YAKASISIRA”
Patainyasa kuparidzira taitoda mabhuku akawanda. Hama dzaiseenzesa magrafika asiripi awo kuti aimprimiri, hino paakanonoka kutipasa grafika ke mwedzi dzakawanda zvecibviringidza basa rekuparidzira, Hama Rutherford akabvunzisa Robert Martin muonereri we grafika kuti zvainga zveciita here ku imprimiri mabhuku amweni.
Gráfica, na Rua Concord ku Brooklyn, Nova York
Hama Martin, akabhuya kuti “yainga iri nzero yakanaka ngekuti zvaireya kufungurhwa ke grafika yese ye zviro zvakasiyana-siyana, re galvanoplastia, ku imprimiri, uye ku enkadhernari.” Hama dzakaarugari mbuto ku Rua Concord, 18 ku Brooklyn uye akatenga zvaidikana pa basa irona.
Asi aanhu esepi akapfara ndizvo. Mukuru wo empresa yai imprimiri mabhuku edu wakavhakacira grafika yedu. Iyena wakabhuya kuti: “Onai basi anarume aya no grafika yawo yakaterera, apana munhu umwe hake unoona zvainobetsera. Mumasure mekudarika mwedzi mitanhatu, zvese zvinonga zvisikacaseenzi.”
Hama Martin akati: “Zvamareketa zvinomusoro,” asi amuzi kurangarirawo Tenzi; ayena nguwa yese anesu.” Hama Martin ainga ari mugwanza. Mumasure mekudarika mazuwa padoko basi rinya ipsva yo ku enkardhenari, yaigadzira mabhuku anokwana kuita 2000 pa zuwa.
Hama dziri pamucini Linotype we Gráfica
AKAWANDA AIZWIRA MU RADHIYO
Pane ku imprimiri basi mabhuku edu, anhu a Mwari akatanga kuseenzesa mushobo mupsva wekuparidzira—radhiyo broadcasting. Mu Biningu cemasikati mu zuwa, 26 ya Fevrero ya 1922, Hama Rutherford akareketa mu radhiyo ke kutanga. Awona akaita mharidzo yainga ino musoro unoti “Mamirionji Ari Kurarama Zvino Aazombofizve” ku extasau yo radhiyo KOG ku Los Angeles, Califórnia, E.U.A.
Anhu anokwana kuita 25 000 akazwa mharidzo ii. Amweni akhona akatotumira tsamba ecitenda Hama Rutherford. Tsamba imwe yakhona yainga iri ya Willard Ashford, e ku Santa Ana, ku Califórnia. Iyena wakasimba mharidzo ya Hama Rutherford ecibhuya kuti “yakadakadza uye yaipfadza.” Uye wakatunhudzira eciti: “No anhu atatu ecirhwara kumba, zvaizoshupa kuzwa mharidzo yenyu kunyazi pari padhuze, asi zvakabvira ngekuti yainga iri radhiyo.”
Mharidzo dzimweni dzakazopeperuswa masumana akazoteera. Torre de Vigia (nyamasi uno waakuzwi Murindiri), yakakarkurari kuti dakara pakazopera gore irona “anhu anokwana kuita 300 000 akazwa masoko eciseenzesa [radhiyo].”
Nge ndaa ye kupfarira kaiita anhu, Afundi e Bhaibheri akasanangura kuwaka mbuto yokupeperusa masoko ku Staten Island, dhuze no Bheteri ro ku Brooklyn. Makore akazoteera mbuto iyona yoku peperusa masoko WBBR, yaizoseenzeswa maningi nge Afundi e Bhaibheri kuti aparidzire masoko e Umambo.
“ADV”
Murindiri wa 15 ya Junyo wa 1922 yakaziisa kuti kaizoizwa gungano ku Cedar Point, Ohio, mu zuwa 5 dakara 13 ya Setembro, ya 1922. Afundi e Bhaibheri ainga akapfara maningi paakaguma ku Cedar Point.
Pa mharidzo yawo yokutanga, Hama Rutherford akabhuya ku apurutani kuti: “Ndino rugondo rekuti Tenzi . . . acakomborera gungano iri, uye mucapupurira zvisati zvakamboizwa mu nyika yese.” Hama dzaiita mharidzo pa gungano irona, dzakakohomedzesa kakawanda kuti hama dzirumbwe dzeciparidzira.
Anhu akawanda ecipinda gungano ku Cedar Point, Ohio muna 1922
Pedzepo, mu Cishanu 8 ya Setembro, anhu anokwana kuita 8000 akadzara mu nyumbeyo ecietsera no cido cekuda kuzwa mharidzo ya Hama Rutherford. Awona aietsera kupanganidzirhwa maretra “ADV,” ainga ari pamupiko wawo. Anhu paakapera kugara pasi, anhu amweni pamweni akaona cimupumburu cidoko cakapombwa padenga pe cikuwa. Arthur Claus, wainga abva ku Tulsa, Oklahoma, E.U.A., kuti aende ku gungano, wakagumira mbuto yakanaka yainyasa kuzwika zvakanaka mharidzo, ngekuti mazuwa awona kainga kusina micini ye som.
“Tainyasa kuteya nzee pa masoko ese”
Kuti agare no cokwadi cekuti apana waizopingaidza, sacigaro wakaziisa kuti apana unodikana kupinda mu audhitorio Hama Rutherford eciita mharidzo. 9:30 dzemacibesi Hama Rutherford akatanga ngekubuya masoko a Djesu atinogumira pana Mateu 4:17 anoti: “Umambo we kudenga uri padhuze.” (Versão Rei Jaime) Paaireketa ngezve kuti anhu acaziya kudini ngezve Umambo uu, iyena wakati: “Iyena Djesu kamare wakati panguwa yaacazouya waizokorora anhu ake, uye pakukorora apa iyena waizounganidza anhu e zvirokwazvo uye akagondeka.”
Hama Claus, ainga ari muaudhitorio yekutanga, akati: “Tainyasa kuteya nzee soko rimwe na rimwe.” Kunyazi asikadi, Arthur wakabuda mu audhitorio ngekuti wainga asikazwi zvakanaka. Eciziya kuti wainga asikatenderhwi kuhwirirazve.
Asi mumasure me mecinguwa, iyena wainga woozwa zvirinane. Paainga woohwirira muaudhitorio iyena wakazwa anhu ecinyasa kuembera nyara. Iyena aazi kunyasa kuzvibata! Iyena wainga akatodzipira kukwira padenga pe nyumba kudai izvona zvaibvira, kuti apurutane dii rasara re mharidzo iyona yaidakadza. Hama Claus, ainga ano makore 23 mu nguwa iyona, akaona mushobo wokukwira nawo ku dii ro predhiyo. Majanera ainga akafununguka, iyena wakaona kuti na ipona paiita kuti “azwe zvakanaka mharidzo.”
Asi Arthur wainga asiripi ega. Shamwari dzake dzainga dziripoo padenga pe nyumba iyona. Umwe wakhona waizwi, Frank Johnson, wakaenda kaainga ari omubvunza kuti: “Iwewe uno cipanga cakapinza?”
Arthur, wakadaira kuti “ndinaco.”
Frank wakadaira kuti “iwewe uri mhinduro dze minamato yedu. Uri kuona mupumburu uwo wakakura? I faixa yakasungirhwa pa mapregu aya. Gara wakateya nzee ku Mutongi uu.a Iyena wakandobhuya basi kuti: ‘Ziisai, ziisai,’ iwe gura mapote marongomuna aya.”
Hino Arthur, wakaetsera cipangidzo no cipanga cake munyara. Mharidzo ya Hama Rutherford yakazoguma paya paietserhwa. Akanyasa kupfara nokushingaira, Hama Rutherford pamweni akareketa no izwi guru kuti: “Garai mupupuri wa Tenzi. Wakagondeka uye wezvirokwazwo, endererai mberi mecirhwa dakara zvese zvasara ku Bhabhironi zvatsakatiswa. Ziisai soko mu mbuto dzese. Nyika inodikana kuziya kuti Djehovha ndi Mwari uye Djesu Kristu ndi Mambo we madzimambo uye Tenzi wemadzitenzi. Iri izuwa guru re mazuwa ese. Onai Umambo waakutonga! Hino ziisai, ziisai, ziisai Umambo no Umambo wake!”
Arthur wakapanganidza kuti iyena no hama dzimweni akagura mapote, hino faixa yakasudzunuka ku dii no dii. Maererano no maretra “ADV,” kuziisa mucingezi faixa iyona yaibhuya kuti: “Ziisai Mambo uye no Umambo.”
“BASA RAKANAKA”
Gungano re ku Cedar Point rakabetsera hama kuti dzikande ndangariro dzawo pa basa iri rinokosha rekuparidzira masoko e Umambo, aya ainga ano mudzimu wekudzipira aida maningi kuitawo basa irona. Colporteur (unoziikanwa nyamasi uno kuti mupionero) weku Oklahoma, ku Estados Unidos, wakatara kuti: “Takaparidzira mu mbuto imweni yekuti anhu kweneyo anoseenza basa re mina yemarasha uye arombo maningi.” Kakawanda kakhona anhu paanozwa masoko e revhista A Idade de Ouro “awona [anotanga] kucema.” Iyena wakati: “Makomborero kunyaradza anhu awona.”
Afundi aya e Bhaibheri akaona kukosha ke masoko a Djesu ari pana Ruka 10:2 anoti: “Kukorora kukuru zvezvirokwazvo, asi aseenzi padoko.” Mukupera ke gore ra 1922 awona ainga akanyasa kudzipira zvaainga asati akamboita, eciziisa masoko e Umambo mu nyika yese.
a Hama Rutherford nguwa dzimweni aidainzwa “kuti Mutongi,” ngekuti akamboseenza hinga mutongi ku Missouri, ku Estados Unidos.