Tingakwanisa Kurarama Nokusikaperi

1. Cinyi cinoitika patinonyasa kurangarira nge zve upenyu usikaperi?

DJEHOVHA anogondesa kuti aya anomuzwira acagara no “upenyu usikaperi.” (Aro. 6:23) Djehovha anotida maningi, uye ayena anoda kugara na umwe na umwe wedu nokusikaperi. Patinonyasa kurangarira nge zve kariro yatakapaswa na Djehovha, rudo redu kaari rinonyasa kubamba.

2. Kariro ye upenyu usikaperi inotibetsera kudini?

² Kariro ye upenyu usikaperi yatinopaswa ndi Mwari inotibetsera kuti tishingirire zvenetso zvatinosongana nazvo. Kunyazi azondi edu akatithyisidzira kuda kutiuraya, isusu atizosii kuseenzera Djehovha. Ngei? Ngekuti tinoziya kuti kana tikafa takagondeka kuna Djehovha, ayena acazotimutsa uye tinogara nokariro yekuti aticazofizve. (Juau 5:28, 29; 1 Ako. 15:55-58; Aheb. 2:15) Asi rugondo ripi ratinaro rekuti titende kuti ticararama nokusikaperi? Ngatione zvinganani zvakhona.

DJEHOVHA ANOGARA NOKUSIKAPERI

3. Ngei tingagara no rugondo rekuti Djehovha anokwanisa kuita kuti tirumbwe tecirarama nokusikaperi? (Pisarema 102:12, 24, 27)

³ Isusu tinozviziya kuti Djehovha anokwanisa kuita kuti tirumbwe tiri apenyu ngekuti ayena ndi Manyuko e upenyu uye anogara nokusikaperi. (Pis. 36:9) Ngatione mavhersikuro manganani e Bhaibheri anopangidza kuti Djehovha akarumbwa ariyo uye acarumbwa ariyo. Pisarema 90:2 inoti Djehovha ndi Mwari “kubvira nariini dakara na nariini.” Mavhersikuro amweni e tsamba ya Pisarema 102 anonyasa kudjekesa nyaya ii. (Erengai Pisarema 102:12, 24, 27.) Muphorofita Abhakuki wakatarawo ngezva Djehovha eciti: “Haiwa Djehovha, amuzi kugara muriyo nokusikaperi here? Haiwa Mwari wangu, Mucena wangu, imwimwi amufi.”—Abha. 1:12.

4. Kodi tinodikana kunetseka here kana zvecitishuphira kuzwisisa kuti Djehovha akagara ariyo? Panganidzai.

⁴ Kamuri, zvinomushuphira here kutendera kuti Djehovha agara ariyo “nokusikaperi”? (Isa. 40:28) Izvona zvinoitika. Eriu wakabhuya ngezva Djehovha kuti: “Kuwanda ke makore ake akupanganidziki.” (Djobo 36:26) Zviro zvimweni zvinoshupha kuzwisisa, asi kunyazi zvakadaro, azvireyi kuti izvona angezve cokwadipi. Ngo muezaniso, kune akawanda edu zvinotishuphira kuzwisisa kuti magetsi anoseenza kudini. Asi izvona zvinoreya kuti akuna magetsi here? haiwa! Zvimwe-zvimwezvoo, Djehovha ndi Mwari nokusikaperi uye izvona izvirokwazvo pasinei nokuti tinonyasa kuzvizwisisa here kana kuti haiwa. (Aro. 11:33-36) Pasi pano pasati pasikwa ciro cipi haco—kutobatanidzawo zuwa uye nyeredzi—Djehovha agara ariyo. Tinorugondo rekuti Djehovha ndiyena “akasika nyika no simba rake.” Honde, ayena ainga ariyo asatoti “atatamura denga.” (Djer. 51:15; Zvii. 17:24) Cikonzero cipizve cinoita kuti titendere kuti ticararama nokusikaperi?

TAKASIKWA KUTI TIRARAME NOKUSIKAPERI

5. Adhamu na Evha aizoonei kudai akazwira Djehovha?

⁵ Kodi Djehovha akasika zvisikwa zvese zvipenyu kuti zvirarame nokusikaperi here? Haiwa. Anhu basi ndiwona akasikwa kuti ararame nokusikaperi. Kunyazi zvakadaro, Djehovha akabvunza Adhamu kuti: “Audikani kurhya mucero we muti wekuziya zvakanaka no zvakashata ngekuti zuwa raunourhya, zvezvirokwazvo ucafa.” (Gen. 2:17) Kudai Adhamu na Evha akapurutana Djehovha, awona angadai asikazi kufa. Uye pamweni pakupedzesera Djehovha aizotendera kuti awona arhye “muti we upenyu.” Ngekudaro, Djehovha aizoagondesa kuti awona “aizorarama nokusikaperi.”b—Gen. 3:22.

6-7. (a) Cinyi cinopangidza kuti Djehovha aazi kusika anhu kuti afe? (b) Zviro zvipi zvamucada kuzoita mu nyika ipsva? (Onai mifanikiso.)

⁶ Kajinji kakhona anhu anorarama makore 70 kana kuti 80. Masiyentista amweni akaona kuti urozvi we munhu unokwanisa kucengeta masoko ke makore akawanda. Muna 2010 fundo imweni ye revhista inozwi Scientific American Mind yakabhuya kuti anhu amweni akaona kuti urozvi unokwanisa kucengeta madjigabhaiti angaita mamirionji 2.5, uye izvona zvinoenderana no nguwa inokwana kuita mamirionji 3 e mavhidhiyo akagravharhwi. Kana tikabatanidza nguwa yese ii, iyona ingadarika (makore 300) asi zvingaita kuti urozvi ungatocengeta masoko akatowanda kamare kudarika apona. Kukwanisa kucengeta masoko akawanda kunoita urozvi, zvinopangidza kuti Djehovha akatisika kuti tirarame nguwa yakareba maningi kudarika makore 70 kana kuti 80 basi.—Pis. 90:10.

⁷ Djehovha akatisika no cido cakakura cekuti tirumbwe tecirarama. Bhaibheri rinobhuya kuti Mwari “akatokanda nguwa isikaperi” mu mwoyo ye anhu. (Mup. 3:11) Ndiyo ndaa tinozonda rufu. (1 Ako. 15:26) Ngo muezaniso, munhu paanorhwara maningi, iyena aacatoiti ciro cinodikanwa kuti atambe uye unondoimira kufa here? Zviri pamhene kuti haiwa. Iyena unopsvaka medhiko uye unotanga kumwa mitombo kuitira kuti apore pa utenda wake. Zvezvirokwazvo, tese isusu tinosongwarira kuti tisafe. Asi munhu watinoda paanofa, isusu tinotsukwara uye tinorhwadziwa maningi pasinei no thunga rake andizvopi? (Juau 11:32, 33) Zvezvirokwazvo, Mwari wedu ano rudo ainga asikazotipasi cido cakakura cekurarama nokusikaperi kudai ayena aida kuti anhu ararame ke cinguwa cidoko basi. Asi isusu tino zvikonzero zvimwenizve zvekuti titendere kuti tingararama nokusikaperi. Ngatione zviro zvinganani zvakaizwa ndi Djehovha kareko uye zvaacirikuita mazuwa ano zvinoita kuti titendere kuti ayena aazi kucinja cinangwa.

CINANGWA CA DJEHOVHA ACIZI KUCINJA

8. Isaya 55:11, inotifundisei ngezve cinangwa ca Djehovha?

⁸ Adhamu na Evha akaita citema, ndiyo ndaa tese isusu tinofa. Kunyazi zvakadaro, Djehovha aazi kucinja cinangwa cake. (Erengai Isaya 55:11.) Ayena acirikuda kuti anhu akagondeka ararame nokusikaperi. Isusu tingakwanisa kuona izvi kana tikanyasa kurangarira zviro zvakarekethwa uye zvakaizwa ndi Djehovha kuti adzadzise cinangwa cake.

9. Djehovha akapikirei? (Dhanyeri 12:2, 13)

⁹ Djehovha akapika kumutsa anhu aya akafa uye kuapasa kariro ye upenyu usikaperi. (Zvii. 24:15; Tito 1:1, 2) Djobo, museenzi wakagondeka wa Mwari wainga ano rugondo rekuti Djehovha anocisuwo ce anhu aya akafa uye kuti anoda maningi kuamutsa. (Djobo 14:14, 15) Muphorofita Dhanyeri waizviziya kuti Anhu aizomutswa kuti agare no mukana wekurarama nokusikaperi. (Pis. 37:29; erengai Dhanyeri 12:2, 13.) Adjudha e mu nguwa ya Djesu aizviziya kuti aseenzi akagondeka a Mwari aizogara no “upenyu usikaperi.” (Ruka 10:25; 18:18) Uye Djesu akabhuya nge zve kariro ii kakawanda uye ayena kamare akatomutswa ndi Djehovha.—Mat. 19:29; 22:31, 32; Ruka 18:30; Juau 11:25.

10. Rumuko rakaitika kare rinopangidzei? (Onai mufanikiso.)

¹⁰ Djehovha ndi Manyuku e Upenyu uye ayena ano simba rekumutsa aya akafa. Djehovha akapasa simba muphorofita Eriya rekuti amutse mwana we mufirhwakadzi weku Zarefati. (1 Mad. 17:21-23) Nokuhamba ke nguwa, Djehovha akabetsera muphorofita Erizeu kuti amutse mwana we Musunamita. (2 Mad. 4:18-20, 34-37) Rumuko iri pamwepo no rumuko rinosorekethwa mu Bhaibheri, anopangidza kuti Djehovha ano simba rekumutsa aya akafa. Djesu paainga ari pasi pano akapangidzawo kuti Baba ake akatomupasawo simba irona. (Juau 11:23-25, 43, 44) Parizvino, Djesu atori kudenga uye “akapaswa masimba ese . . . kudenga no pa nyika.” Ndiyo ndaa ayena anokwanisa kudzadzisa cipikirhwa cekumutsa anhu “ese ari mumakuwa e anorangarirhwa” ano kariro yekurarama nokusikaperi.—Mat. 28:18; Juau 5:25-29.

11. Rusudzunuro rinoita kudini kuti tirarame nokusikaperi?

¹¹ Ngei Djehovha akatendera kuti Mwana wake Djesu afe zvinorhwadza? Djesu wene akabhuya kuti: “Mwari akada maningi nyika, zvekuti akapasa Mwana wake umwe ega, kuitira kuti munhu wese anomutenda asaparadzwe, asi aone upenyu usikaperi.” (Juau 3:16) Cibairo ce rusudzunuro ra Djesu cakaita kuti Djehovha atirekerere zvitema zvedu uye atipase upenyu usikaperi. (Mat. 20:28) Muphostori Pauro wakapanganidza nge zve dii iri rinokosha re cinangwa ca Mwari eciti: “Ngekuti rufu rakauya nge ndaa ye munhu umwe basi, kumutswa ke akafa kucauyawo nge munhu umwe basi. Ngekuti ese ari kufa nge ndaa ya Adhamu, ese acaonawo upenyu nge ndaa ya Kristu.”—1 Ako. 15:21, 22.

12. Djehovha acaseenzesa kudini Umambo wake kuti adzadzise cinangwa cake?

¹² Djesu akafundisa ateeri ake kuti anamate ecikumbira kuti Umambo wa Mwari uuye uye kuti kuda ka Mwari kuizwe panyika. (Mat. 6:9, 10) Uye cimwe ce cinangwa ca Mwari nge cekuti anhu ararame nokusikaperi pa nyika pano. Kuti izvona zviitike, Djehovha akagadza Mwana wake Djesu kuti agare Mambo we Umambo wa Mesiya. Djehovha arikuunganidza anhu anokwana kuita 144 000 anobva mu nyika dzese kuti abatane na Djesu pakudzadzisa cinangwa cake.—Zvak. 5:9, 10.

13. Djehovha arikuitei kuti adzadzise cinangwa cake, uye isusu tingaiteiwo kuti izvona zviitike?

¹³ Djehovha ari kuunganidza “cikwata cikuru” ce anhu uye arikurowedza anhu awona kuti ararame pasi pe Umambo wake. (Zvak. 7:9, 10; Tig. 2:8) Nyamasi uno, anhu arikurarama mu nyika isikazi kubatana nge ndaa ye uzondi uye hondo, asi anhu ese anobatanidzwa pa cikwata cikuru anopeta masimba kuti akunde uzondi uye rusananguro ringaoneka mu mwoyo. Zvinoita hingana kuti aakutocinja masupada awo kuti agare miromo ye magedjo. (Mik. 4:3) Pane kuti abatanidzwewo mu hondo dzinobara tsaona uye rufu, awona arikufundisa anhu ngezva Mwari uye nge zve cinangwa cake kuti abetsere anhu kuti agumire “upenyu wezvirokwazvo.” (1 Ti. 6:19) Ngekutsigira Umambo wa Mwari, awona angaphikiswa no mhuri yawo uye kutokonerhwa zviro zvekurarama nazvo, asi Djehovha anogara eciapasa zvese zvaanoda. (Mat. 6:25, 30-33; Ruka 18:29, 30) Zvese izvi zvinopangidza kuti Umambo wa Mwari uriyodi kamare uye ucarumbwa wecidzadzisa cinangwa ca Djehovha.

RAMANGWANA RAKANAKISISA

14-15. Djehovha acadzadzisa kudini cipikirhwa cake cekupedza rufu nokusikaperi?

¹⁴ Nyamasi uno, Djesu ndi Mambo kudenga uye akagadzirira kudzadzisa zvipikirhwa zvese zvakaizwa ndi Djehovha. (2 Ako. 1:20) Kubvira muna 1914, Djesu arikukunda azondi ake. (Pis. 110:1, 2) Mbaimbai pano, ayena no anhu anokwana kuita 144 000 acaparadza anhu ese anoita zvakashata.—Zvak. 6:2.

¹⁵ Mukutonga ke Makore Ciuru, Djesu acamutsa anhu aya akafa uye acabetsera anhu anozwira Mwari kuti agare anhu akakwana. Mumasure me muedzo wekupedzesera, anhu ese anonga atongwa hingana anatsi “acagara nhaka ye nyika uye acararamemo nokusikaperi.” (Pis. 37:10, 11, 29) Uye pakupedzesera, “muzondi wekupedzesera, acaparadzwa i rufu.”—1 Ako. 15:26.

16. Cikonzero cipi cikuru cinodikana kutiitisa kuti tiseenzere Djehovha?

¹⁶ Hinga zvataona mu fundo ino, kariro yedu ye upenyu usikaperi yakawakirhwa mu Soko ra Mwari. Uye kariro ii ingatibetsera kuti tirumbwe takagondeka kuna Djehovha mu mazuwa ano anoshupha ekupedzesera. Asi kuti tipfadze Djehovha atidikani basi kumuseenzera ngekuda upenyu usikaperi. Cikonzero cikuru cinodikana kuita kuti tigare takagondeka kuna Djehovha na Djesu cinodikana kugara rudo redu kaari. (2 Ako. 5:14, 15) Rudo iri ricaita kuti titeedzere mawara a Djehovha na Djesu uye tibvunzewo amweni nge zve kariro yatinayo. (Aro. 10:13-15) Kana tikafundira kusama kurangarira nge zvedu basi uye togara anhu ano rupo, Djehovha acagara shamwari yedu nokusikaperi.—Aheb. 13:16.

17. Umwe na umwe wedu unodikana kusanangurei? (Mateu 7:13, 14)

¹⁷ Kodi isusu tiri pakati pe aya acararama nokusikaperi here? Djehovha anotipasa mukana uwona. Hino zvinotsamira ku umwe na umwe wedu kusanangura kurumbwa ari mu gwanza re upenyu. (Erengai Mateu 7:13, 14.) Asi kurarama nokusikaperi kucange kakadini? Ticaona mhinduro ye mubvunzo uu mu fundo inoteera.