Ngei Tecidikana Kuthya Djehovha?

1-2. Maererano na Pisarema 25:14, tinodikana kuitei kana tecida kugara no ushamwari wakabamba na Djehovha?

MAWARA api amunoona kuti anokosha maningi pa ushamwari? Pamweni maizoreketa kuti shamwari dzakanaka dzinodikana kutsigirana uye kudanana. Pamweni imwimwi mainga musikazoreketi kuti kuthya i wara rinokosha pa ushamwari wakanaka. Asi, hingana zviri kupangidzwa pa tsamba iri kutungamirira fundo ino, aya anoda kugara no ushamwari wakabamba na Djehovha anodikana “kumuthya.”—Erengai Pisarema 25:14.

² Azvinei nokuti taano nguwa yakadini teciseenzera Djehovha, tese tinodikana kumuthya no mushobo wakanaka. Asi zvinoda kureyei kuthya Mwari? Tingafundira kudini kuthya Djehovha? Uye tingafundei ngezve kuthya Mwari kubva ku Mutungamiriri Obhadhiya, Mupristi Mukuru Djeoyadha na Mambo Djoashi?

ZVINODA KUREYEI KUTHYA MWARI?

3. Panganidzai kuti kuthya kungatidziirira kudini.

³ Kakawanda kakhona, tinothya kana pangaitika ciro cakashata. Uye mushobo uu wekuthya wakanaka ngekuti ungatibetsera kuti tiite zvisananguro zvakanaka. Ngo muezaniso, kuthya kumbwera kungaita kuti tinyase kungwarira patinonga tecihamba pakateerera. Kuthya ku kuwadzika kunoita kuti titize mugariro uno ngozi. Uye kuthya kuruza shamwari yatinoda kungatibetsera kuti tisarekete kana kuita ciro cingarhwadzisa munhuwo.

4. Sathani unoda kuti isusu tithye Djehovha ngo mushobo upi?

⁴ Sathani unoda kuti isusu tithye Djehovha ngo mushobo wakashata. Sathani unoda kuti tigare hinga Erifaz wairangarira kuti Djehovha anogara akandotsamwa, anobvinga uye kuti azvibviri kumupfadza. (Djobo 4:18, 19) Cinangwa ca Sathani ngecekuti isusu tithye maningi Djehovha zvekuti pakupedzesera tosiya kumuseenzera. Kuti tisabathwe no murau uu tinodikana kusakurira mushobo wakanaka wekuthya Djehovha.

5. Zvinoda kureyei kuthya Mwari?

⁵ Kuthya Djehovha kunoreya kumuda maningi uye kutama kuita ciro cingakuwadza ushamwari wedu Naye. Ngo muezaniso, Djesu ainga ano mushobo uu “wekuthya Mwari.” (Aheb. 5:7) Iyena wainga asikathyi Djehovha ngo mushobo wakashata. (Isa. 11:2, 3) Zvezvirokwazvo, iyena waida maningi Djehovha uye waida kumuteerera. (Juau 14:21, 31) Kuita hingana Djesu, isusu tinoreremedza uye tinoshamiswa maningi ndi Djehovha ngekuti tinoziya kuti iyena uno rudo, ungwaru, unatsi, uye simba. Isusu tinoziyawo kuti Djehovha anotida maningi uye kuti zvese zvatinoita zvinganyangadza kana kupfadza mwoyo wake.—Pis. 78:41; Zvie. 27:11.

FUNDIRAI KUTHYA MWARI

6. Tinodikana kufundira kuthya Djehovha ngo mushobo upi? (Pisarema 34:11)

⁶ Isusu atizi kubarhwa teciziya kuthya Djehovha; zvinoda kufundira kuzviita. (Erengai Pisarema 34:11.) Mushobo umweni wekuita izvona nge we kuona zvisikwa. Patinoona “zviro zvakaizwa” ndi Djehovha kana kuti zvisikwa, tinoona ungwaru wake, simba rake uye rudo rikuru raanaro katiri, uye izvona zvinotunhudzira rudo redu uye rureremedzo kaari. (Aro. 1:20) Hanzvadzi imweni inozwi Adrienne inoti: “Pandinoona zviro zvese zvakaizwa ndi Djehovha uye ungwaru wake izvona zvinoita kuti ndiziye kuti zvezvirokwazvo iyena anoziya zvakandinakira. Hino kana iyena ari Musiki wangu ngei ndaizoita zviro zvingakuwadza ushamwari wangu naye? Inini andidi kuita ciro cinga kuwadza ushamwari wangu na Djehovha.” Munoonawo kudini kudusa nguwa sumana ino kuti murangarire ngezve cisikwa ca Djehovha? Kuita izvona kucamubetsera kuti mutunhudzire rureremedzo uye rudo renyu kuna Djehovha.—Pis. 111:2, 3.

7. Munamato ungatibetsera kudini kuti tithye Djehovha?

⁷ Kuita munamato kuna Djehovha kakawanda, nge umwe we mushobo unotunhudzira kuthya kedu Djehovha. Patinorumbwa teciita munamato kuna Djehovha, tinonyasa kumuziya. Patinoita munamato kuna Djehovha tecikumbira simba kuti tishingirire tinozwa rubetso rake, uye tinoedzurira kuti iyena ano simba zvakadini. Patinotenda Djehovha nge cibairo ce Mwana wake, tinoedzurira kuti iyena anotida zvakadini. Patinobatana no matambudziko todeketera kuna Djehovha kuti atibetsere kuti tione pokubuda napo, tinoedzurira kuti iyena ano ungwaru zvakadini. Minamato yakadai inotunhudzira rureremedzo redu kuna Djehovha uye inobambisa cisananguro cedu cekusama kuita ciro cingakuwadza ushamwari wedu naye.

8. Tinodikana kuitei kuti tirumbwe tecithya Djehovha?

⁸ Kuti tisaruze kuthya kedu Djehovha tinodikana kufunda Bhaibheri tino cinangwa cekufundira no miezaniso dzakanaka uye dzakashata. Parizvino ngatirekete ngezve muezaniso we aseenzi airi a Djehovha Obhadhiya wainga ari mutungamiriri we nyumba ya Mambo Akabhi, uye Mupristi Mukuru Djeoyadha. Pedzepo tozoreketa ngezve muezaniso wa Mambo Djoashi we Djudha wakatanga kuita zvakanaka asi pedzepo wakazosiya kuseenzera Djehovha.

GARAI MAKASHINGA HINGANA OBHADHIYA

9. Kuthya Djehovha kakabetsera kudini Obhadhiya? (1 Madzimambo 18:3, 12)

⁹ Bhaibheri parinotanga kubhuya ngezva Obhadhiyab irona rinoti: “Obhadhiya waithya maningi Djehovha.” (Erengai 1 Madzimambo 18:3, 12.) Kuthya Djehovha kakakura uku kakabetsera kudini Obhadhiya? Tinozviya kuti iyena wakagara mwanarume wakatendeseka uye wakathembeka. Ndizvona zvakaitisa kuti mambo amugadze hinga mutungamiriri we nyumba ya mambo. (Ezanisai na Neemiya 7:2.) Kuthya uku ndikona kakapasa Obhadhiya ushingi wakakura uye zviri pamhene kuti iyena waizoda maningi wara iri. Ngei? Ngekuti waitonga panguwa iyona wainga ari Mambo Akabhi. Iyena “waiita zviro zvakashata maningi pamberi pa Djehovha kupinda ese akamutangira.” (1 Mad. 16:30) Kusiya izvona, mukadzi wa Akabhi wainamata Bhaari. Iyena waizonda maningi Djehovha zvekuti wakaedza kutsakatisa zvacose kunamata ke cokwadi ke madzinza gumi e Aisraeri. Iyena wakatoguma pakuuraya aphorofita akawanda a Djehovha. (1 Mad. 18:4) Apana mubvunzo kuti Obhadhiya wainamata Djehovha panguwa inoshupha maningi.

10. Ushingi wakabetsera Obhadhiya kuti aitei?

¹⁰ Ushingi wakabetsera Obhadhiya kuitei? Djezabheri paakatanga kuteerera aphorofita a Mwari uye kuauraya, Obhadhiya wakatora 100 awo uye oafindarisa “mu zvikwata zvinokwana kuita 50 uye akaariritira no pau uye no mvura.” (1 Mad. 18:13, 14) Kudai Djezabheri wakazviziya zvezvirokwazvo Obhadhiya waizouraiwa. Pamweni Obhadhiya wakathya ngekuti waizouraiwa. Asi rudo raainga anaro kuna Djehovha uye ku aya aimuseenzera, rainga rakakura maningi zvekuti wainga akagadzirira kuruza upenyu wake kudai zvaidikanwa.

11. Aseenzi a Djehovha e mazuwa ano anoteedzera kudini Obhadhiya? (Onaiwo mufanikiso.)

¹¹ Aseenzi a Djehovha akawanda nyamasi anorarama mu mbuto yekuti basa redu rakarambidzwa. Kuita hingana Obhadhiya hama no hanzvadzi idzi dzinodiwa dzinorumbwa dzecipangidza rureremedzo ku aya ano masimba, asi awona anopasa Djehovha ciro Caanosisira—kudzipira kakadzara. (Mat. 22:21) Awona anopangidza kuti anothya Djehovha ngekumuteerera pane kuteerera anhu. (Zvii. 5:29) Awona anorumbwa eciparidzira uye ecipinda misangano no ungwaru. (Mat. 10:16, 28) Kusiya izvona awona anoita zvaanokwanisa kuitira kuti hama ne hanzvadzi dzawo dzione zvekurhya zvekunamata zvakakwana. Onai muezaniso wa Henri, iyena unogara ku África ku mbuto yakarambidzwa basa redu ke cinguwa. Panguwa iwona, Henri wainga akagadzirira kuti apase hama no hanzvadzi mabhuku. Iyena wakati: “Inini ndiri munhu unopsveruka maningi. Ndiyo ndaa ndinorugondo rekuti rureremedzo rikuru randinaro kuna Djehovha ndirona rakandibetsera kuti ndigare no ushingi.” Imwimwi munorangarirawo kuti mungagara no ushingi wainga una Henri here? Honde asi kana mukathya Djehovha nge mushobo wakanaka.

GARAI MUNHU WAKAGONDEKA HINGANA DJEOYADHA

12. Djeoyadha no mukadzi wake akapangidza kudini kuti ainga akagondeka kuna Djehovha?

¹² Mupristi Mukuru Djeoyadha waithya maningi Djehovha uye kuthya uku ndikona kakamubetsera kuti agare munhu wakagondeka uye kuti adziirire kunamata kakacena. Izvona zvakagara pamhene Atariya mwana wa Djezabheri paakatanga kutonga ku Djudha zvisiripi pamutemo. Anhu ainga ano zvikonzero zvakanaka zvekuti athye Atariya. Iyena wainga akashata mwoyo uye wainga ano makaro uye waida maningi kugara mambokadzi zvekuti zvakaguma pakutouraya azukuru ake kamare kuti akwanise zvaaida! (2 Mak. 22:10, 11) Asi umwe we azukuru ake Djoashi wakakwanisa kupona ngokuti Djeoyazabhati mukadzi wa Djeoyadha wakamuiga. Iyena no mwamuna wake akaiga mwana uu uye akamucengeta. Ngekuita kudaro Djeoyadha na Djeoyazabhati akabetsera pakudziirira dzinza re madzimambo raizobva kuna Dhavhidhi. Panguwa iyona, Djeoyadha pamweni wainga aano makore anodarika 100. Kunyazi zvakadaro, iyena wakagondeka kuna Djehovha uye aazi kusiya kuti kuthya kumupingaidze kuita zvainga zvakanaka.—Zvie. 29:25.

13. Djoashi paainga ano makore 7 Djeoyadha wakapangidzazve kudini kugondeka kake kuna Djehovha?

¹³ Djoashi paainga ano makore 7 Djeoyadha wakapangidzazve kuti wainga akagondeka kuna Djehovha. Iyena wakagara no zano rekuita kuti Djoashi mubarirhwana wa Dhavhidhi agare mambo. Kudai zano iri arizi kubudirira zviri pamhene kuti Djeoyadha waizouraiwa. Asi no makomborero a Djehovha zvese zvakabuda maererano no zvainga zvakarongwa. No rubetso re Arevhi uye no atungamiriri amweni, Djeoyadha wakakwanisa kuita kuti Djoashi agare mambo uye Atariya auraiwe. (2 Mak. 23:1-5, 11, 12, 15; 24:1) Hino Djeoyadha “wakaita kuti mambo no anhu aite citenderano na Djehovha cekuti aizorumbwa ari anhu a Djehovha.” (2 Mad. 11:17) Iyena “wakakandawo arindi pamisuwo ye nyumba ya Djehovha kuti pasaoneke munhu upi hake usikazi kucena ungapinda.”—2 Mak. 23:19.

14. Djeoyadha wakakomborerhwa kudini nge kugara ecikudza Djehovha?

¹⁴ Djehovha akabhuya kare kuti: “Ndicakudza aya anondikudza.” Uye ndizvona kamare zvaakaita na Djeoyadha. (1 Sam. 2:30) Ngo muezaniso, iyena akaita kuti ngano ya Djeoyadha itarhwe mu Bhaibheri kuti tifunde ngezvake. (Aro. 15:4) Uye Djeoyadha paakafa iyena wakagara no cikomborero cokuigwa “mu Thaundi ra Dhavhidhi pamwepo no madzimambo ngekuti wainga aita zviro zvakanaka mu Israeri pa zviro zvinocokuita na Mwari we cokwadi pamwepo no nyumba Yake.”—2 Mak. 24:15, 16.

15. Ngazvipi zvatingafunda no ngano ya Djeoyadha? (Onaiwo mufanikiso.)

¹⁵ Ngano ya Djeoyadha ingatibetsera kuti titunhudzire kuthya kedu Djehovha. Akuru angateedzera Djeoyadha ngekugara ecipsvaka mishobo ye kudziirira ungano. (Zvii. 20:28) Aya acembera angafunda no muezaniso wa Djeoyadha kuti kana akathya Djehovha uye orumbwa akagondeka, Djehovha acaaseenzesa kuti aite kuda Kake. Iyena aazombotisii. Uye madjaha angafunda no muezaniso wa Djehovha nge kubata no rureremedzo aya akura hinga mabatire akaita Djehovha Djeoyadha kunyanya aya aano makore akawanda ecimuseenzera. (Zvie. 16:31) Uye isusu tese pano zvatingafunda kubva ku Arevhi no atungamiriri amweni akatsigira Djeoyadha. Ngatitsigire takagondeka “aya anotungamirira” nge kuwateerera.—Aheb. 13:17.

MUSAGARE HINGANA MAMBO DJOASHI

16. Cinyi cinopangidza kuti Djoashi wainga asikadi Djehovha?

¹⁶ Djeoyadha wakabetsera mambo Djoashi kuti agare munhu wakanaka. (2 Mad. 12:2) Ndiyo ndaa paainga ari djaha, Djoashi waida kupfadza Djehovha. Asi mumasure mekuti Djeoyadha wafa, Djoashi wakatanga kupfuridzirhwa no macinda ainga asikateereri. Migumisiro yakhona ngeye kuti awona “akatanga kuseenzera miti yekudira uye zvidhori.” (2 Mak. 24:4, 17, 18) Djehovha akanyangadzwa maningi ndizvona. Kunyazi zvakadaro, iyena “akarumbwa ecituma aphorofita pakati pawo kuti aahwirinze kuna Djehovha . . . , asi awona aazi kuapurutana.” Awona aazi kutombopurutana Zakariya mwana wa Djeoyadha wainga ari hama ya Djoashi uyezve muphorofita uye mupristi wa Djehovha. Kudai ainga asiripi mhuri ya Zakariya, Djoashi ungadai asikazi kurarama. Asi iyena aazi kurangarira izvona, aazi kupangidza kutenda uye wakauraisa Zakariya.—2 Mak. 22:11; 24:19-22.

17. Cinyi cakaitika na Djoashi nge kusama kuthya Djehovha?

¹⁷ Djoashi wainga asikathyi Djehovha nge mushobo wakanaka, ndiyo ndaa, wakatanga kubatana no zviro zvakawanda zvakashata. Djehovha ainga akabhuya kuti: “Aya anondishora acashorhwawo.” (1 Sam. 2:30) Pakupedzesera kunyazi wainga ano cikwata ce anya hondo cakakura, Djoashi “wakanyiswa” ngo cikwata cidoko ce Asiriya uye “cakamukuwadza maningi.” Asiriya paakahwirira Djoashi wakauraiwa no aseenzi ake kamare ngekuti wakauraya Zakariya. Iyena wainga ari mambo wakashata maningi zvekuti aazi kuguma pakuigwa “pa makuwa e madzimambo.”—2 Mak. 24:23-25; onai “mwana wa Bharakiya” pa masoko e pasi ekufunda ari pana Mateu 23:35.

18. Maererano na Djeremiya 17:7, 8, tinodikana kuitei kuti tisagare hingana Djoashi?

¹⁸ Tingafundei no muezaniso wa Djoashi? Muti uno nzinde dzisikazi kubamba unodikana kutsigirhwa kuti urumbwe wakaima. Kana uwona ukasama kutsigirhwa dutu ricauwisira pasi. Ndizvona zvakaitika na Djoashi. Iyena waitsigirhwa ndi Djeoyadha uye mumasure mekuti Djeoyadha afa, iyena wakapfuridzirhwa nge anhu akapauka uye wakawa pakunamata uye wakagara munhu usikazi kugondeka nuka Djehovha. Kuezanisa uku kunopangidza kuti atidikani kuteerera Djehovha ngekuti mu mhuri medu kana kuti mu ungano muno anhu ano miezaniso yakanaka uye anotikohomedzesa kuti tiite izvona. Kana tecida kugara no ushamwari wakabamba na Djehovha, tinodikana kubambisa rudo uye kuthya kedu Djehovha ngekufunda Bhaibheri, kunyasa kurangarira uye kuita munamato.—Erengai Djeremiya 17:7, 8; Ako. 2:6, 7.

19. Djehovha anotikumbira kuti tiitei?

¹⁹ Zvezvirokwazvo zvatinokumbirhwa na Djehovha kuti tiite azvishuphi. Zvaanoda zvakatarhwa nge mucigwagwa pana Muparidzi 12:13, inoti: “Ithya Mwari we cokwadi uye cengeta mitemo yake, ngekuti ici ndico ciro cikuru cinodikana kuizwa no munhu.” Kana tikathya Djehovha ticakwanisa kukunda muedzo upi hawo kana cinetso cingatiwira mune ramangwana hingana zvakaizwa na Obhadhiya na Djeoyadha. Apana ciro cipi haco kana munhu ucakwanisa kukuwadza ushamwari wedu na Djehovha.