Imwimwi Mungagara no Rugondo Rekuti Djehovha Acamubetserai

1-2. (a) Mugariro upi wakatodzana no wedu wakabatana no Adjudha paakahwirira ku Djerusarema? (b) Panganidzai zvinetso zvinganani zvakasongana no Adjudha. (Onai bhokisi rakazwi: “Mu Mazuwa a Ajeu, Zakariya, uye Esdra.”)

NGUWA dzimweni, imwimwi munosombonetseka ngezve nguwa ye mberi here? Pamweni amuripi kuseenza uye amuzii kuti mucariritira kudini mhuri yenyu. Kana kuti muri kunetseka ngezve kucengeteka ke mhuri yenyu, nge ndaa ye kusama kugarisana zvakanaka ke zvematongerhwe e nyika, kuteererhwa kana kuti kuphikiswa mu basa re kuparidzira.

² Adjudha akararama ku Bhabhironi ke makore akawanda aidikana kugara no kutenda kakakura kuti akwanise kusiya upenyu wakanaka waainga anawo, kuti aende ku nyika yaainga asikatozii. Kubvira paakandoguma, awona akatanga kubatana no matambudziko nge ndaa ye kusama kugarisana zvakanaka ke zvematongerhwe e nyika, kusama mare uye kuphikiswa. Hino amweni zvakaashuphira kukanda nzero dzawo pa kuwakwazve ke tempro. Ndiyo ndaa, mumakore 520 K.A.A., Djehovha akatuma aphorofita airi kuti abetsere anhu kuti agarezve no simba pa kunamata Djehovha, Ajeu na Zakariya. (Ajeu 1:1; Zak. 1:1) Hingana zvaticaona, basa re aphorofita aya rakagara no mugumisiro wakanaka. Asi makore 50 akazoteera, Adjudha aya ainga ahwirira ku Djerusarema aidazve kubambiswa. Esdra, mutari ano uzii we Mutemo, akabva ku Bhabhironi ecienda ku Djerusarema koobambisa anhu a Mwari kuti akande kunamata kawo Mwari pa mbuto yekutanga.—Esdra 7:1, 6.

3. Mibvunzo dzipi dzaticaona? (Zvierengo 22:19)

³ Muphorofita Ajeu na Zakariya akabetsera anhu a Mwari kuti arumbwe ecigonda Djehovha mu nguwa dzinoshupha. Uphorofiti uu, ungatibetserawo kugara no rugondo rekuti Djehovha acatibetsera azvinei no matambudziko api hawo atingabatana nawo. (Erengai Zvierengo 22:19.) Patinoongorora masoko akabhuiwa ndi Ajeu na Zakariya uye kuona muezaniso wa Esdra, rangarirai ngezve mubvunzo dzinoteera: Adjudha akabathwa-bathwa kudini nge matambudziko aya? Ngei tinodikana kurumbwa tecikanda Umambo wa Mwari pa mbuto ye kutanga panomuka matambudziko mu upenyu wedu? Uye tingagonda kudini Djehovha pa nguwa dzinoshupha kudai?

MATAMBUDZIKO AKABATA-BATA KUDINI ADJUDHA

4-5. Cinyi cakaita kuti Adjudha aime kuwakazve tempro?

⁴ Adjudha paakaguma ku Djerusarema awona ainga ano basa rakawanda rekuti aite. Hino nokukasika awona akawakazve artari uye oita fundasao ye tempro. (Esdra 3:1-3, 10) Asi cido caainga anaco pakutanga cakatanga kupunguka. Ngei? Ngekuti panokuwaka basi tempro, awona aidikana kuwaka nyumba dzawo, kuonerera zvirimwa uye kuriritira mhuri dzawo. (Esdra 2:68, 70) Kusiya izvona, awona aiphikiswa no azondi aida kuimisa basa rawo rekuwaka tempro.—Esdra 4:1-5.

⁵ Pa zviro zvese izvi, Adjudha aidikana kubatana no kusama kugarisana ke zvematongerhwe e nyika uye kutama mare. Mbuto yaairarama yakatanga kutongwa no Umambo we Persiya. Uye mumasure me kufa ka Siro Mambo we Persiya, mu makore 530 K.A.A., mambo waizoteera waizwi Kambise waidawo kuzotonga Edjipitu. Paaienda ku Edjipitu, pamweni masurudado ake akakumbira Aisraeri kuti aabetsere ngezve kurhya, mvura uye pekugara, zvecitunhudzirazve matambudziko ku Adjudha. Mambo wakazoteera Dhariyo I, wakatanga kutonga. Pakutonga kake pakagara no apanduki uye no kutama kupindirana ke zvematongerhwe e nyika, zvese izvi zvakaita kuti Adjudha anetseke kuti aizoriritira kudini mhuri dzawo. Nge ndaa ye matambudziko aya, amweni akarangarira kuti yainga isati yaguma nguwa yekuti awakezve tempro.—Ajeu 1:2.

6. Maererano na Zakariya 4:6, 7, zvinetso zvipi zvimweni zvakabatana no Adjudha, uye Zakariya wakaagondesei?

⁶ Erengai Zakariya 4:6, 7. Pano kusama mare uye kusama kupindirana ke zvematongerhwe e nyika, Adjudha akabatanawo no kuteererhwa. Muna 522 K.A.A., azondi akakwanisa kuita kuti umambo we Persiya uimise kuwakwazve ke tempro. Asi Zakariya wakagondesa Adjudha kuti Djehovha aizoseenzesa simba Rake kuti aabetsere kuwakazve, kunyazi aizobatana no matambudziko. Muna 520 K.A.A., Mambo Dhariyo wakaatendera kuti awakezve tempro uye wakatoabetserawo no mare. Iyena wakatopasa mutemo wekuti madzimambo amweni e munharaunda aabetsere.—Esdra 6:1, 6-10.

7. Makomborero api akatambira Adjudha ngekukanda kuda ka Djehovha pa mbuto yekutanga?

⁷ Djehovha akapikira anhu ake eciseenzesa Ajeu na Zakariya kuti aizoabetsera kudai akakanda basa rekuwakazve tempro pa mbuto yekutanga. (Ajeu. 1:8, 13, 14; Zak. 1:3, 16) Adjudha akabambiswa maningi nge zvakabhuiwa no aphorofita aya uye akahwirirazve kuwaka tempro muna 520 K.A.A. Awona akakwanisa kupedza kuwaka tempro pasati patopera makore mashanu. Awona akatambira rubetso ra Djehovha uye makomborero pa zviro zve kumwiya uye zve kunyama nge kuti akakanda kuda ka Mwari pa mbuto ye kutanga pano kurangarira zvinetso zvawo. Nge ndaa yazvo, awona akakwanisa kunamata Mwari akapfara.—Esdra 6:14-16, 22.

RUMBWAI MAKABATIKANA PAKUITA KUDA KA MWARI

8. Masoko ari pana Ajeu 2:4 anotibetsera kudini kuti tirumbwe tecikanda ndangariro dzedu pakuita kuda ka Mwari? (Onaiwo masoko e pasi.)

⁸ No dambudziko guru riri kukhwedera, kubvira zvino kuenda mberi tinodikana kuteerera nhungamiriro ye kuparidzira masoko akanaka. (Mark. 13:10) Isusu tingaona hinga zvinotishuphira kukanda ndangariro dzedu pa basa re kuparidzira kana tisina zvekurarama nazvo uye teciphikiswa mubasa re kuparidzira. Cinyi cingatibetsera kuti tikande basa ra Djehovha pa mbuto yekutanga? Tinodikana kugonda kuti “Djehovha we anyahondo”b ari kudii redu. Iyena acatitsigira kana tikarumbwa tecikanda zvido zve Umambo pa mbuto ye kutanga. Hino atidikani kuthya ciro.—Erengai Ajeu 2:4.

9-10. Kazado imweni yakaona kudini kuti masoko ari pana Mateu 6:33 ngee zvirokwazvo?

⁹ Onai muezaniso wa Oleg na Irina,c kazado inoseenza hinga mapionero. Awona akafuruka kuti abetsere ungano iri ku ndima imweni, mumasure mazvo awona akapererhwa no basa ngekuti munyika iyona mainga maanocinetso cakakura ce mare. Awona aazi kukwanisa kuona basa ke gore rimwe, asi nguwa dzese akazwa rudo ra Djehovha uye nguwa dzimweni, aitotambira rubetso re hama no hanzvadzi. Awona akakwanisa kudini kubatana no matambudziko aya? Oleg, wekuti pakutanga wakaora mwoyo, wakati: “Kugara takabatikana mu basa rekuparidzira zvatibetsera kuti tikande ndangariro dzedu pa zviro zvinoyanya kukosha mu upenyu.”

¹⁰ Zuwa rimweni paaibva kooparidzira, akaona shamwari yaaida maningi yainga yakahamba makirometro 160 kuti iapase zvekurhya. Oleg unoti: “Zuwa irona, takaona kuti Djehovha anoticengeta uye kuti hama dze muungano dzinotida zvakadini. Isusu tino rugondo rekuti Djehovha aambokanganwi aseenzi ake, kunyazi mugariro weciita hingana kuti aucagadzirisiki.”—Mat. 6:33.

11. Kana tikakanda ndangariro dzedu pakuita kuda ka Mwari tingagara no rugondo rei?

¹¹ Djehovha anoda kuti tibatikane pa basa rinoponesa upenyu, re kuparidzira. Hingana zvataona mu ndima 7, Ajeu wakabambisa anhu a Mwari kuti asarangarire makore ese aya e kuti kuwakwazve ke tempro kainga kakaima uye kuhwirirazve kuwaka no mupfaro. Kudai akaita izvona, Djehovha akaapikira kuti ‘aizoakomborera.’ (Ajeu. 2:18, 19) Isusu tingagara no rugondo rekuti Djehovha acakomborera kupeta masimba kedu kana tikarumbwa tecikanda pa mbuto yekutanga basa raakatipasa.

TINGABAMBISA KUDINI RUGONDO REDU KUNA DJEHOVHA

12. Ngei Esdra no Adjudha amweni aakaita rhwendo nawo aidikana kugara no kutenda kakakura?

¹² Muna 468 B.C.E., Esdra wakaita rhwendo no cikwata cecipiri ce Adjudha, kubva ku Bhabhironi ecienda ku Djerusarema. Esdra no Adjudha amweni aainga anawo aidikana kugara no kutenda kakakura kuti aite rhwendo iri. Awona aidikana kuhamba no makwanza ainga ano ngozi yakakura maningi, ano oro no prata yakawanda yaainga apaswa kuti iwake tempro. Hino mukana wekuti abirhwe wainga wakakura. (Esdra 7:12-16; 8:31) Uye awona akaona kuti Djerusarema rainga risikazi kucengeteka. Kainga kusina anhu akawanda aigara ikona uye muru no portau zvainga zvisati zvagadziriswa. Tingafundei kuna Esdra ngezve kubambisa rugondo redu kuna Djehovha?

13. Esdra wakabambisa kudini rugondo rake kuna Djehovha? (Onaiwo masoko e pasi.)

¹³ Esdra wakaona ngezve kucengeta kunoita Djehovha anhu Ake mu nguwa dzinoshupha. Pasati paguma makore 484 K.A.A., pamweni Esdra wairaramira ku Bhabhironi Mambo Asuero paakapasa mutemo wekuti Adjudha ese aitongwa no Persiya auraiwe. (Est. 3:7, 13-15) Esdra no Adjudha ese ainga ari pa ngozi! Paakazwa ngezve mutemo uwona, awona akanetseka maningi “zvekuti akatanga kutsanya,” ecicema, ecinamata kuna Djehovha uye ecikumbira rubetso. (Est. 4:3) Cimborangaridzai kuti Esdra no Adjudha amweni akazwa kudini zviro pazvakacinja uye aya aida kuuraya Adjudha akauraiwa! (Est. 9:1, 2) Zvese izvi zvabetsera Esdra kuti azokwanisane no matambudziko aizouya mberi uye zvakaita kuti iyena agare no rugondo rekuti Djehovha angacengeta anhu Ake.d

14. Hanzvadzi imweni yakafundei payakazwa rudo ra Djehovha mu nguwa dzinoshupha?

¹⁴ Patinoona mushobo unoticengeta Djehovha pa nguwa yo matambudziko, rugondo redu kaari rinonyasa kubamba. Onai muezaniso wa Anastasia, unogara ku Leste Europeu. Iyena wakasiya basa ngekuti adoni ake e ku basa aimubambidzira kuti apindere mune zvematongerhwo e nyika. Iyena unoti: “Nguwa ii yainga iri ye kutanga kugara ndisina mare mu upenyu wangu. Ndakasiya nyaya ii mu nyara dza Djehovha uye ndakaona kundibetsera kaaiita no rudo. Kana rikaguma zuwa rekuti ndicapererhwazve no basa, inini andizothyi. Baba angu e kudenga paarikundicengeta zvino, zviri pamhene kuti acandicengetazve mune ramangwana.”

15. Cinyi cakabetsera Esdra kuti arumbwe ecigonda Djehovha? (Esdra 7:27, 28)

¹⁵ Esdra wakaona nyara ya Djehovha mu upenyu wake. Paairangarira mushobo waakabetserhwa kare, Esdra waigara no cokwadi cekuti Djehovha aizomubetserazve. Onai masoko aya: “Nyara ya Djehovha Mwari wangu yainga ina inini.” (Erengai Esdra 7:27, 28.) Esdra wakareketa masoko aya kanokwana katanhatu mu bhuku raakafemerhwa kuti atare.—Esdra 7:6, 9; 8:18, 22, 31.

16. Migariro ipi yatingaona nyara ya Djehovha mu upenyu wedu? (Onaiwo foto.)

¹⁶ Djehovha anokwanisa kutibetsera patinonga tecisongana no matambudziko. Ngo muezaniso, kana tikakumbira uya watinoseenzera kuti atipase mukana wekuzopinda gungano kana kukumbira kuti acinje nguwa yedu yatinoseenza kuti tikwanise kupinda misangano ye ungano, tinonga tecitofungura mukana wekuona nyara ya Djehovha mu upenyu wedu. Mugumisiro wakhona ungagara wakanaka maningi kupinda wataietsera ingagara. Pakupedzesera, rugondo redu kuna Djehovha ricanyasa kubamba.

17. Esdra wakapangidza kudini kudzidodosa paaisongana no zvinetso? (Onai foto ye pa kapa.)

¹⁷ Esdra wakadzidodosa uye wakanamata ecikumbira rubetso ra Djehovha. Pese paainetseka nge zviro zvaaida kuita, Esdra waikumbira rubetso ra Djehovha. (Esdra 8:21-23; 9:3-5) Aisraeri amweni akaona kuti Esdra waigonda kudini Djehovha uye akatanga kumutsigira uye kuteedzera kutenda kake. (Esdra 10:1-4) Patinonga takaora mwoyo ngekukonerhwa zve kurarama nazvo, kucengeteka ke mhuri kana zvinetso zvimweniwo, isusu tinodikana kunamata kuna Djehovha uye kumugonda.

18. Cinyi cingatibetsera kuti titunhudzire kugonda kedu Djehovha?

¹⁸ Kana tikadzidodosa ngekupsvaka rubetso ra Djehovha uye kusiya kuti hama dzedu dzitibetsere, kutenda kedu kunonyasa kubamba. Erika uno ana atatu wakarumbwa ecigonda kuti Djehovha aizomucengeta kunyazi paakabatana no tsaona. Pa nguwa doko basi mimba yake yakabuda uye mwamuna wake wakafa. Ecirangarira zviro zvese izvi iyena wakati: “Azviiti kuziya zvese zvicaizwa na Djehovha kuti atibetsere. Rubetso ringauya ngo mushobo unoshamisa. Djehovha akadaira minamato yangu ngezve zviro zvaiizwa uye zvairekethwa ngo shamwari dzangu. Pandinoreketa zvinetso zvangu ku shamwari dzangu, zvinoita nyore kuti dzindibetsere.”

RUMBWAI MECIGONDA DJEHOVHA DAKARA KU MUGUMO

19-20. Tinofundei ngezve Adjudha asikazi kukwanisa kuhwirira ku Djerusarema?

¹⁹ Isusu tingafunda ciro cinokosha kubva ku Adjudha asikazi kuhwirira ku Djerusarema. Amweni akhona, aazi kukwanisa kuhwirira ku Djerusarema ngekuti ainga akura maningi, pamweni ainga ecirhwara kana kuti ainga ecidikana kuriritira mhuri dzawo. Kunyazi zvakadaro, awona akabetsera pa zviro zvinocokuita no mare aya aihwirira ku Djerusarema. (Esdra 1:5, 6) Zvinoita hingana kuti mu makore 19 mumasure mekuti grupo rekutanga re Adjudha raguma ku Djerusarema, aya akasara ku Bhabhironi airumbwa ecitumira zvipo zvekudzipira ku Djerusarema.—Zak. 6:10.

²⁰ Kunyazi tisikakwanisi kuita zvese zvataida kuitira Djehovha, tingagara no rugondo rekuti iyena anoona kupeta masimba katinoita uye izvona zvinopfadza mwoyo wake. Ngei tingabhuya kudaro? Ngekuti mu mazuwa a Zakariya, Djehovha akakumbira muphorofita wake kuti aite hata ye oro no prata yainga yatumirhwa no Adjudha ainga asara ku Bhabhironi. (Zak. 6:11) “Hata yakakura” ii yaizoseenza hingana “ciedzuriro” ce mipiro yainga yaiizwa. (Zak. 6:14, masoko e pasi) Ngo mushobo umwewo, isusu tingagara no rugondo rekuti Djehovha aazombokanganwi kupeta kedu masimba kuti timuseenzere munguwa dzinoshupha.—Aheb. 6:10.

21. Cinyi cingatibetsera kuona ramangwana no rugondo?

²¹ Apana mubvunzo kuti isusu ticarumbwa tecisongana no matambudziko mu mazuwa ano e kupedzesera, uye migariro icabambirira kushata kubvira zvino kuenda mberi. (2 Ti. 3:1, 13) Asi atidikani kusiya kuti kuora mwoyo kuonerere upenyu wedu. Edzurirai masoko akabhuiwa ndi Djehovha ku anhu ake mu mazuwa a Ajeu: “Ndinemwi . . . Musathye.” (Ajeu. 2:4, 5) Isusu tingagarawo no rugo rekuti Djehovha acagara kudii redu kana tikarumbwa tecipeta masimba kuti timuseenzere. Kana tikaseenzesa mafundo ataona kubva ku muphorofita Ajeu na Zakariya, uye kuteedzera muezaniso wa Esdra, ticarumbwa tecigonda Djehovha, azvinei no zvinetso zvicauya mberi.