Imwimwi Muno Kutenda Here?

Kuti tipfadze Djehovha, isusu tinodikana kugara no kutenda. Asi Bhaibheri rinoti: “Ngokuti aa anhupi ese ano kutenda.” (2 Ate. 3:2) Muphostori Pauro paakareketa masoko aya, iyena waida kureya “anhu anoita zviro zvakashata,” kana kuti anhu aimuteerera. Asi zvaakabhuya ngezve kutenda zvinoseenzawo ku anhu amweni. Amweni aadi kutenda kuti kuno Mwari Akasika zviro zvese. (Aro. 1:20) Amweni angakwanisa kubhuya kuti anotenda ku ciro kana kuti ku munhu ano simba. Asi izvona azvikwani kuti tipfadze Djehovha, ngekuti ikona akutendapi ke zvirokwazvo.

Isusu tinodikana kugara no rugondo rekuti Djehovha ariyo uye kuti anokomborera aya ano kutenda kakabamba. (Aheb. 11:6) Kutenda i wara ro cibereko ce mwiya mucena. Kuti titambire mwiya mucena, isusu tinodikana kuita munamato kuti tiupaswe. (Ruka 11:9, 10, 13) Umwe we mushobo we kutambira mwiya mucena iwona ngewe kuerenga Soko ra Mwari rakafemerhwa. Hino tingarangarira zviya zvataerenga uye toseenzesa zvatinonga tafunda. Nge mushobo iwona, mwiya mucena wa Djehovha onokwanisa kupfuridzira upenyu wedu, wecitibetsera kuti tigare no kutenda kunopfadza Djehovha.