Rumbwai Mecihamba mu Kutenda

1. Ngei muphostori Pauro wairingira sure ozwa mupfaro nge upenyu wake?

MUPHOSTORI Pauro waizviziya kuti wainga ooda kufa. Asi paakarangarira ngezve upenyu wake wese, iyena wakazwa mupfaro wakakura uye wakati: “Ndapedza makwikwi e kugogoma, ndararama maererano no kutenda.” (2 Ti. 4:6-8) Pauro wakaita zvisananguro no ungwaru mu upenyu wake hingana Mukristu uye waiziya kuti wainga wapfadza mwoyo wa Djehovha. Isusuwo tinoda kuita zvisananguro zvakanaka uye kugara no citenderhwa ca Djehovha. Hino tinodikana kuitei?

2. Zvinyi zvinoda kureya kuhamba no kutenda?

² Paaibhuya ngezvake kamare uye ngezve Akristu amweni, Pauro wakati: “Tiri kuhamba no kutenda, haiwa ngo zvatinoona.” (2 Ako. 5:7) Izvona zvinoda kureyei? Mu Bhaibheri, soko rokuti “kuhamba” pamweni paya rinoda kureya mushobo unosanangura munhu kurarama upenyu wake. Munhu paanohamba maererano no zviya zvaanoona iyena unoita zvisananguro zvinotsamira pa zviya zvaanokwanisa kuona, kupurutana uye kuzwa. Nge dii rimweni, munhu paanohamba no kutenda, iyena unoita zvisananguro maererano no zviya zvinorangarirhwa na Djehovha. Muitiro wake unopangidza kuti iyena uno rugondo rokuti Mwari acamukomborera uye kuti mazano a Djehovha atinogumira mu Bhaibheri nguwa dzese akamunakira.—Pis. 119:66; Aheb. 11:6.

3. Makomborero api atioona nge kuhamba no kutenda? (2 Akorinti 4:18)

³ Zviri pamhene kuti tese isusu tinoita zvisananguro zvinganani zvinotsamira pa zviya zvatinoona, zvatinopurutana uye zvatinozwa. Asi patinorangarira izvona basi tecida kuita zvisananguro zvinokosha, zvezvirokwazvo izvona zvicatiunzira matambudziko. Ngei? Ngekuti anguwapi dzese dzekuti tinodikana kugonda zviya zvatinoona, zvatinopurutana uye zvatinozwa. Kana tikahamba maererano no zviya zvatinoona ticazoita cisananguro cokuti Djehovha aazocipfariri. (Mup. 11:9; Mat. 24:37-39) Kana tikahamba no kutenda ticaita zvisananguro “zvinopfadza Tenzi.” (Aef. 5:10) Kusiya izvona, kuteerera nhungamiriro dza Mwari, zvicatipasa runyararo ro mukati uye mupfaro we zvirokwazvo. (Pis. 16:8, 9; Isa. 48:17, 18) Uye tikarumbwa tecihamba no kutenda ticararama nokusikaperi.—Erengai 2 Akorinti 4:18.

4. Munhu angaziya kudini kuti uri kuhamba no kutenda kana kuti no kuona?

⁴ Tingaziya kudini kuti tiri kuhamba no kutenda haiwa no zviya zvatinoona? Dzibvunzisei kuti: Zvinyi zvandinorangarira ndisati ndaita cisananguro? Kodi ndinondorangarira basi zviya zvandinokwanisa kuona? Kana kuti ndinoita cisananguro maererano no mazano a Djehovha? Mu fundo ino ticaona kuti tingarumbwa kudini tecihamba mu kutenda pa migariro mitatu inokosha: Patinonga tecisanangura basa, patinonga tecisanangura kuti ndiani waticazowakana naye, uye patinotambira nhungamiriro dze sangano ra Djehovha. Pa migariro yese mitatu ticaona kuti tinodikana kutanga tarangarirei kuti tiite cisananguro cakanaka.

PATINOSANANGURA BASA

5. Zvinyi zvatinodikana kutanga tarangarira patinosanangura basa?

⁵ Tese isusu tinoda kudziriritira uye kuita kuti mhuri yedu igare no zvekurarama nazvo. (Mup. 7:12; 1 Ti. 5:8) Mabasa amweni anopasa mare yakawanda kudarika amweni. Pa migariro iyona, zvinobvira kudziriritira uyewo kutoiga mare kuitira mune ramangwana. Asi mabasa amweni mare inotambirhwa ikona inondokwana basi kutenga zvokurhya zvinodikanwa ku mhuri. Izvirokwazvo kuti patinosanangura basa ticadikanawo kurangarira kuti ticatambira marei, asi kana tikarangarira izvona basi, tinonga tecihamba maererano no zviya zvatinoona.

6. Tingahamba kudini no kutenda patinosanangura basa? (Ahebheru 13:5)

⁶ Kana tikahamba no kutenda, ticarangarirawo kuti basa raticasanangura ricabata-bata kudini ushamwari wedu na Djehovha. Tingadzibvunzisa kuti: ‘Pa basa irona iri, ndicadikana kuita ciro cinozondwa na Djehovha here?’ (Zvie. 6:16-19) ‘Kodi ndicadikana here kuruza misangano kana kutama nguwa ye kubuda mu basa re kuparidzira uye kuerenga Bhaibheri?’ Kodi ndicadikana kupedza nguwa yakawanda ndiri kure no mhuri yangu here? (Afi. 1:10) Kana mhinduro yenyu ngeye kuti honde pa umwe ye mibvunzo idzi, zvinonga zvakanaka kutama kutenda basa irona kunyazi kana basa recishupha kugumira. Isusu tinohamba no kutenda ndiyo ndaa, tinoita zvisananguro zvinopangidza rugondo redu kuna Djehovha rokuti iyena acatiriritira.—Mat. 6:33; Erengai Ahebheru 13:5.

7-8. Hama imweni ye ku América do Sul yakahamba kudini no kutenda? (Onai foto.)

⁷ Onai kuti Javier,a hama imweni inogara ku América do Sul, yakatendera kudini kuti zvinokosha maningi kuhamba no kutenda. Iyona inoti: “Inini ndakaedza kupsvaka basa raizondipasa mare yakawanda maningi uye raizoita kuti inini ndizwe mupfaro wakakura.” Asi Javier waidawo maningi kugara mupiyonero. Iyena unoti: “Inini ndakakwanisa intrevhista no mukuru-mukuru we basa. Ndisati ndaita intrevhista, inini ndakanamata kuna Djehovha ndecikumbira rubetso ngokuti ndainga ndino rugondo rokuti Djehovha anozviziya kuti cinyi cakandinakira. Inini ndaida basa rakanaka uye raizondipasa mare yakawanda, asi ndainga ndisikazozviiti kana basero recindipingaidza kuti ndipase zvakanakisisa zvangu kuna Djehovha.”

⁸ Javier unoti: “Pa nguwa yo intrevhista mukuru-mukuruwo wakandibvunza kuti ndaizodikana kuita maningi hora extra. No rureremedzo ndakamupanganidzira kuti ndainga ndisikazozviiti nge ndaa ye kunamata kangu Djehovha.” Javier wakasanangura kuramba basero uye mumasure me masumana mairi iyena wakagara mupiyonero. Paapadarika nguwa, mugore irona kamare, iyena wakagumira basa raizoita kuti iyena aseenze padoko basi pa zuwa. Iyena unoti: “Djehovha akazwa minamato yangu uye akandibetsera kugumira basa rinoita kuti ndigare mupiyonero. Inini ndinopfara maningi ngokuti basa irona rinondipasa nguwa ye kuseenzera Djehovha uye hama dzangu.”

9. Zvinyi zvamafunda no esperiensiya ya Trésor?

⁹ Zvakadini kana tikazwisisa kuti basa ratinaro zvino, riri kutipingaidza kuti tihambe no kutenda? Onai zvakaitika no hama imweni ye ku Congo inozwi Trésor. Iyona inoti: “Inini ndainga ndino basa randaida maningi uye ndaitambira mare yakapethwa katatu kudarika mare yandaitambira ku basa rangu ro kare uye ndaireremedzwa maningi no anhu.” Asi Trésor wainga asikapindi misangano yese ngekuti waidikana kuita hora extra uyewo waibambidzirhwa kunyepa kuti akwanise kufisa zviro zvisikazi kutendeka zvaiizwa nge emprezewo. Trésor waida kubuda pa empreza asi iyena waithya kutama kugumira basa rimweni. Cinyi cakamubetsera? Iyena unoti: “Abhakuki 3:17-19 yakandibetsera kuzwisisa kuti Djehovha nguwa dzese aizondiriritira kunyazi inini ndasiya basero uye ndo ona mare padoko. Hino inini ndakabuda.” Iyena unopanganidza eciti: “Anhu akawanda anorangarira kuti aseenzi awo akagadzirira kuita basa ripi haro kuti akwanise kutambira mare yakawanda kunyazi izvona zvecibatanidza kugara kure no mhuri yawo uye kutama kuseenzera Mwari. Inini ndinopfara maningi ngekuti ndakakwanisa kudziirira ushamwari wangu no mhuri yangu uye na Djehovha. Mu gore rakazoteera, Djehovha akandibetsera kugumira basa rakanaka. Inini ndinotambira mare inokwana kuriritira mhuri yangu uye ndino nguwa yakawanda kuti ndiseenzere Djehovha. Kana isusu tikakanda Djehovha pa mbuto yokutanga mu upenyu, kunyazi zvakadaro tingakwanisa kubatana no cinetso co kutama mare. Asi Djehovha nguwa dzese acatiriritira.” Kana tikagonda mazano uye zvipikirhwa zva Djehovha, ticarumbwa tecihamba no kutenda uye tinorugondo rokuti iyena acatikomborera.

PATINOSANANGURA WE KUWAKANA NAYE

10. Munhu waizohamba kudini no kuona paanosanangura munhu wekuwakana naye?

¹⁰ Mucato i cipo ca Djehovha uye azvizi kushata kuwaka kana kuwakwa. Pakusanangura we kuwakana naye, hanzvadzi pamweni ingaringira unhu we hama, ciimo cawo, mushobo waanoziikanwa, mushobo waanoseenzesa mare, ubaba waanawo mu mhuri uye kuti unoipfadza here.b Zviro zvese izvi, zvinokosha asi hanzvadzi ikarangarira basi zviro izvona, inonga yecihamba maererano no zvainoona.

11. Zvinyi zvatinodikana kuita kuti tihambe no kutenda patinosanangura munhu we kuwakana naye? (1 Akorinti 7:39)

¹¹ Djehovha anodada maningi no hama uye hanzvadzi dzinoteerera mazano ake paanosanangura we kuwakana naye! Ngo muezaniso, awona anonyasa kuteerera nhungamiriro ye kuetsera “kupindiridza makore o kukura” asati atanga kunamorari. (1 Ako. 7:36) Awona anonyasa kuona kuti munhu waanoda kuwakana naye uno mawara anobhuiwa na Djehovha kuti mwamuna wakanaka no mukadzi wakanaka anodikana kugara nawo. (Zvie. 31:10-13, 26-28; Aef. 5:33; 1 Ti. 5:8) Awona aanamorari no munhu usiripi Mupupuri wa Djehovha. Pane kudaro, anotondowedza zano re kuwaka “muna Tenzi,” ratinogumira pana 1 Akorinti 7:39. (Erengai.) Awona anorumbwa ecihamba no kutenda uye ecigonda kuti Djehovha nguwa dzese acanyasa kuacengeta panecokuita no mu ndangariro kudarika munhu upi hake.—Pis. 55:22.

12. Mafundei no zviya zvakaitika na Rosa?

¹² Onai zvakaitika no hanzvadzi imweni ye ku Colombia inozwi Rosa. Nge ndaa ye basa rake, iyena wakaziyana no mwanarume umweni wainga asiripi Mupupuri wa Djehovha uye mwanarume iyena wakatanga kumuda. Rosa wakatanga kumudawo. Rosa unoti: “Iyena waiita hingana kuti i mwanarume wakanaka maningi. Waiita basa re kudzipira uye wairarama upenyu uri pakati no pakati. Kusiya izvona, iyena waindibata zvakanaka. Wainga uno zvese zvandaida ku mwamuna, asi iyena wainga usiripi Mupupuri wa Djehovha. Pa nguwa iyona, inini ndaizwa maningi ndiri ndega, uye ndaida kuwakwa asi ndainga ndisikazi kugumira we kuwakana naye mu sangano. Ndiyo ndaa, zvaishupha maningi kumuramba ngekuti ndaimuda maningi.” Kunyazi zvakadaro, Rosa aazi kuita maererano no mugariro wake uye aazi kuhamba no kuona. Iyena wakaima kuti arangaridzire kuti ushamwari wake na Djehovha unozogara wakadini kana iyena akanamorari no mwanarume uya. Hino, iyena wakasanangura kusama kushamwaridzanazve naye uye kukanda ndangariro dzake pa zviro zve kunamata. Pasikazi kutora nguwa yakareba iyena wakapikwa kuti aende ku Cikora ce Aparidzi e Umambo uye nyamasi uno uri kuseenza hingana mupiyonero espesiyari. Rosa wakati: “Mwoyo wangu uri kupipira no mupfaro nge ndaa ye makomborero andakapaswa na Djehovha.” Icokwadi kuti anguwa dzesepi zviri nyore kuhamba no kutenda maka-maka pa nyaya inobatanidza mazwiro edu, asi tikasiya Djehovha atitungamirire, mugumisiro wakhona nguwa dzese ungatinakira.

PATINOTAMBIRA NHUNGAMIRIRO DZE SANGANO RA DJEHOVHA

13. Zvinyi zvingatiitisa kuti tihambe no kuona patinotambira nhungamiriro dze sangano?

¹³ Zvakadjairika kutambira nhungamiriro dze sangano ra Djehovha idzo dzinotibetsera kuti tikwanise kumuseenzera nge mushobo wakanaka. Nhungamiriro idzona, dzingakwanisa kubva ku akuru e ungano, aonereri e nharaunda, ku Bheteri uye ku Dare Rinotungamirira. Asi zvakadini kana tikatama kuzwisisa nhungamiriro iyona? Pamweni isusu tingatotanga kurangarira zvinetso zvingaunzwa nge nhungamiriro iyona uyewo tingatangawo kuona kusama kukwana ke hama dzinonga dzapasa nhungamiriro idzona.

14. Zvinyi zvingatibetsera kuhamba no kutenda patinotambira nhungamiriro dze sangano? (Ahebheru 13:17)

¹⁴ Kana tikahamba no kutenda, tinogonda kuti Djehovha ari kutungamirira sangano rake uye kuti iyena anonyasa kuziya mugariro we umwe na umwe wedu. Ndiyo ndaa, tinozwira no kukasika nhungamiriro uye tinoita izvona no muitiro wakanaka. (Erengai Ahebheru 13:17.) Tinoziya kuti kuzwira kedu kunoita kuti mu ungano mugare no rubatano. (Aef. 4:2, 3) Kunyazi hama dzinotitungamirira dziri anhu asikazi kukwana, tinorugondo rokuti Djehovha acatikomborera kana tikazwira. (1 Sam. 15:22) Kana pakadikanwa kuzwi paizwe cinjo, Djehovha acazviita panguwa yakasisira.—Mik. 7:7.

15-16. Zvinyi zvakabetsera hama kuti ihambe no kutenda kunyazi payainga ino mubvunzo ngezve nhungamiriro dze sangano? (Onaiwo foto.)

¹⁵ Onai muezaniso unopangidza pazvakanakira kuhamba no kutenda uye kuzwira nhungamiriro dze sangano. Ku Peru, anhu akawanda anoreka Espanhol asi amweni akawanda anoreketawo mireketero dze ikona. Umwe we mureketero unozwi Quechua. Ke makore akawanda, hama dzirikupsvaka anhu anoreketa mureketero uwona. Asi kuti aite zviya zvaidiwa no anyautongi, pakaizwa cinjo inocokuita no mushobo we kugumira anhu anoreketa Quechua. (Aro. 13:1) Hama dzinganani dzakatanga kudzibvunzisa kuti cinjo iyona aizoiti here kuti basa risahambe zvakanaka. Sezvo hama dzakateerera nhungamiriro idzona, Djehovha akakomborera basa rawo re kupsvaka anhu aroketa Quechua.

¹⁶ Kevin, mukuru we ungano ye Quechua, wainga ari umwe we aya ainetseka. Iyena unopanganidza kuti: “Inini ndairangarira kuti: ‘Hino, ticaita kudini kuti tikwanise kugumira anhu anoreketa mureketero we Quechua?’” Kevin wakaitei? Iyena unoti: “Inini ndakanyasa kurangarira bhuku ra Zvierengo 3:5, uye no muezaniso wa Mozesi. Djehovha ainga amupasa nhungamiriro dzekuti dzaiita hingana kuti adzina musoro. Aisraeri paainga ecitiza ku Edjipitu, Djehovha akabvunza Mozesi kuti atore anhu kuti aende no gwanza raipinda no mu Bahari ro Kupsvuka. Zvaiita hingana kuti iwona aizogara asina pekubuda napo uye zvaizoita nyore kuti akwanise kubathwa nge Aedjipitu. Kunyazi zvakadaro, Mozesi wakazwira uye Djehovha akakomborera Aisraeri nge kuita cishamiso cinoshamisa maningi ce kuponesa Aisraeri.” (Eki. 14:1, 2, 9-11, 21, 22) Kunyazi no zvaiirangarira, Kevin wainga akagadzirira kuita cinjo inopindirana no nhungamiriro dziani. Ngaupi wakagara mugumisiro wakhona? Iyena unoti: “Zvinoshamisa maningi kuona ku komborerhwa ke takaithwa ndi Djehovha. Pakutanga, isusu taihamba maningi mu mbuto iyona asi taiona basi munhu umwe kana kuti airi. Parizvino, isusu tiri kuhamba mu mbuto ino anhu akawanda anoreketa Quechua. Nge kudaro, tiri kukwanisa kureketa no anhu akawanda, kuitisa marevhisita akawanda uye ne fundo dzakawanda. Kusiya izvona, numero ye anhu anopinda misangano yatunhudzirika.” Pasina mubvunzo, kana isusu tikahamba no kutenda, nguwa dzese Djehovha acatikomborera.

17. Mafundei mu fundo ino?

¹⁷ Isusu taona kuti tingarumbwa tecihamba no kutenda patinoita zvisananguro ngezve migariro mitatu inokosha. Asi tinodikana kurumbwa tecihamba no kutenda mu migariro yese ye upenyu wedu. Ngo muezaniso, patinosanangura zve kuaraidzwa nazvo, zvatinosanangura kuita no nguwa yatinonga takarerukirhwa, patinoita cisananguro ngezve ku cikora, formasau kuti tione basa uye ngezve kurera ana. Pazvisananguro zvedu zvatinoita mu upenyu, tinodikana kuita haiwa maererano no zvatinoona asi maererano no ushamwari wedu na Djehovha, mazano ake uye cipikirhwa cake cekuticengeta nguwa dzese. Tikaita izvona, “ticahamba mu zina ra Djehovha no kusikaperi.”—Mik. 4:5.