MUSORO WE KUFUNDA 16
NGOMA 87 Misangano Inotibambisa
Kugara no Ushamwari Wakabamba no Hama Dzedu Zvakatinakira!
“Onai kunaka kazvakaita uye kupfadza kazvinoita kana hama dzikagara pamwepo uye dzakabatana!”—PIS. 133:1.
CINANGWA
Kuona mushobo watingabambisa ushamwari wedu no hama dzedu uye makomborero atingatambira ngekuita izvona.
1-2. Ngacipi cimwe ce ciro cinokosha kuna Djehovha, uye iyena anotikohomedzesa kuti tiitei?
MAKAMBOIMA here kuti murangarire mushobo unokoshesa Djehovha mabatire atinoita amweni? Djesu akafundisa kuti tinodikana kuda mudoni wedu hinga mushobo watinodziita. (Mat. 22:37-39) Izvona zvinobatanidza kupangidza unaki kunyazi ku aya asikaseenzeri Djehovha. Patinoita kudaro, tinonga teciteedzera Mwari wedu, ‘anoita kuti zuwa rake ribudire anhu akashata ne akanaka uye anoita kuti mvura inaire anatsi ne asiripi anatsi.’—Mat. 5:45.
2 Djehovha anoda tese isusu, asi anonyanya kuda aya anoita zviro zvakanaka. (Juau 14:21) Iyena anoda kuti isusu tigare hingana iyena. Ndiyo ndaa, iyena anotikohomedzesa kuti “tide maningi” hama no hanzvadzi dzedu “no mwoyo wese.” (1 Ped. 4:8; Aro. 12:10) Masoko aya anoreya ngezve rudo ratinozwa ku nhengo ye mhuri, kana ku shamwari ye pa mwoyo.
3. Tinodikana kuedzurirei ngezve rudo?
3 Rudo rakaita hingana muti unoda kucengethwa kuti ukure. Muphostori Pauro wakapasa Akristu zano rokuti: “Rumbwai mecidanana hinga hama.” (Aheb. 13:1) Djehovha anoda kuti rudo redu ku hama no hanzvadzi rirumbwe recikura. Mu fundo ino ticaona kuti ngei tecidikana kubambisa ushamwari wedu no hama no hanzvadzi dzedu uye kuti tingarumbwa kudini teciita izvona.
NGEI TECIDIKANA KUGARA NO USHAMWARI NO HAMA DZEDU
4. Tingaitei kuti tirumbwe tecikoshesa rubatano ratinaro no hama dzedu? (Pisarema 133:1) (Onaiwo mafoto.)
4 Erengai Pisarema 133:1. Isusu tinotenderana no mutari we pisarema paakabhuya kuti “zvakanaka” uye “zvinopfadza” kugara shamwari we aya anoseenzera Djehovha. Asi pano citsinzwa. Rangarirai ngezve munhu wekuti mazuwa ese unopinda no pano muti wakakura uye wakarungama. Nokuhamba ke nguwa, iyena ungasiya kukoshesa kurungama ke muti uu hinga mushobo waaiita kare. Ngo mushobo umwewo, isusu tinoonana no hama dzedu kakawanda pa sumana, ndiyo ndaa, tingatanga kutama kukoshesa rubatano ratinaro nawo. Zvinyi zvatingaita kuti izvi zvisaitike? Rudo ratinaro ku hama dzedu ricakura kana tikabvisa nguwa kuti tirangarire kuti umwe na umwe wawo unokosha kudini ku ungano uye katiri.
Musambosiye kukoshesa rubatano ratinaro pakati pe hama no hanzvadzi dzedu (Onai ndima 4)
5. Cinyi cinoitika anhu paanoona rudo ratinaro pakati pedu?
5 Anhu anganani paanopinda musangano wedu kekutanga, awona anoshamisika maningi ngekuona rudo ratinopangidzirana ku umwe na umwe wedu. Uye nguwa dzimweni, izvona zvinotokwana kuti awona agume pakutendera kuti isusu tiri Akristu e zvirokwazvo. Djesu wene wakati: “Mukaita kudaro, ese acaziya kuti muri afundi angu, kana mukagara no rudo pakati penyu.” (Juau 13:35) Onai muezaniso wa Chaithra, mufundi we ku univhersidhadhe uye waifunda Bhaibheri no Apupuri a Djehovha. Iyena wakatenda mupiko wekupinda gungano hope no hope. Mumasure me zuwa rekutanga, iyena wakabvunza mufundisi wake kuti: “Abereki angu aasati akambondikhumbatira. Asi pa gungano renyu, inini ndakumbatirhwa kanokwana kuita 52 pa zuwa rimwe basi! Inini ndazwa rudo ra Djehovha nge ndaa ye zviya zvakaizwa no hama uye ndiri kuda kugara dii re mhuri ii.” Chaithra wakarumbwa ecibudirira uye wakabhabhatidzwa mu gore ra 2024. Izvi zvinopangidza kuti kakawanda kakhona, anhu anopfarira paanoona zviito zvakanaka zvatinazvo, kutobatanidzawo rudo ratinaro ku umwe na umwe wedu, awona anogara no cido cekuseenzera Djehovha.—Mat. 5:16.
6. Ngei ushamwari wakabamba no hama dzedu ungatidziirira?
6 Kugara no ushamwari wakabamba no hama uye hanzvadzi dzedu, zvigagara cidziiriro katiri. Pauro wakapasa Akristu zano rekuti: “Rumbwai mecibambisana zuwa no zuwa . . . kuitira kuti pasaoneke munhu unoomesa mwoyo nge ndaa yo simba ro ucengedzi we citema.” (Aheb. 3:13) Nguwa dzimweni, isusu tingakwanisa kutsukwara maningi uye totanga kusiya makwanza a Djehovha. Asi hama ingakwanisa kuzviona uye Djehovha angaiseenzesa kuti itipase rubetso ratinoda. (Pis. 73:2, 17, 23) Zvezvirokwazvo, mushobo uu wekubetserhwa uye wekubambiswa wakatinakira maningi.
7. Rudo ringatibetsera kudini kuti tigare no rubatano? (Akorosi 3:13, 14)
7 Isusu tiri dii re anhu anopeta masimba kuti apangidzire rudo ku umwe na umwe wawo, uye izvona zvinounzisa makomborero akawanda. (1 Juau 4:11) Ngo muezaniso, rudo rinotibetsera kuti ‘tirumbwe tecishingirirana,’ uye izvona zvinoita kuti paoneke rubatano ratinaro pakati pedu. (Erengai Akorosi 3:13, 14; Aef. 4:2-6) Mugariro we rudo uye we runyararo ratinaro pa misangano yedu, azvioneki kumweni. Apana grupo rimweni pa nyika rinokwanisa izvona.
REREMEDZANAI UMWE NA UMWE WENYU
8. Djehovha anotibetsera kudini kuti tigare no rubatano?
8 Rubatano riri pakati pe hama no hanzvadzi mu nyika yese icishamiso ca Djehovha, ngekuti tese tiri anhu asikazi kukwana. (1 Ako. 12:25) Bhaibheri rinobhuya kuti isusu ‘tinofundiswa na Mwari kuti tidanane.’ (1 Ate. 4:9) Kana kuti, mu Soko rake, Djehovha anotibvunza zvatinodikana kuita kuti tibambise ushamwari ku umwe na umwe wedu. Asi kuti “tifundiswe ndi Mwari” tinodikana kunyasa kufunda uye kuita zviya zvaanotifundisa. (Aheb. 4:12; Tig. 1:25) Uye Apupuri a Djehovha anopeta masimba kuti aite izvona kamare.
9. Zvinyi zvinobatanidzwa pakukudza umwe na umwe wedu? (Aroma 12:9-13)
9 Bhaibheri rinobhuyei ngezve kugara no ushamwari wakabamba no amweni? Onai zvakabhuiwa na Pauro zvinooneka pana Aroma 12:9-13. (Erengai.) Cimwe ce ciro cinokosha cakabhuiwa na Pauro ngece ‘kugara wekutanga pakukudza amweni.’ Izvi zvinobatanidza kugara wekutanga pakupangidza “rudo no mwoyo wese” kana kuti, kuda hama dzedu no masoko uye zviito. Tingakwanisa kuita izvona nge mishobo yakawanda. Ngo muezaniso ngekugara anhu anorekerera, anotambira amweni zvakanaka uye ano rupo. (Aef. 4:32) Imwimwi amudikani kuetsera kuti hama itange ndiyo pakubambisa ushamwari na imwimwi. Pane kudaro, munoonawo kudini kugara “wekutanga” pakubambisa ushamwari naye? Kana mukadaro, mucaona kuti Djesu aibhuya zvirokwazvo paakati: “Kupasa kuno mupfaro kudarika kutambira.”—Zvii. 20:35.
10. ‘Tingakudza kudini umwe na umwe wedu’ tisikazviitiri nungo? (Onaiwo foto.)
10 Onai kuti mumasure mekuti Pauro wareketa ngezve kugara wekutanga pakukudza amweni, iyena wakati: “Seenzai no simba, musaite nungo.” Munhu unoseenza no simba, unobatikana pa zviya zvaanoita. Iyena unobata no nyara mbiri mabasa aanopaswa uye unopeta masimba kuti apedzese basa raanopaswa. Zvierengo 3:27, 28 inotikohomedzesa kuti: “Usasiye kuitira zvakanaka ku uya waunodikana kubetsera kana wecikwanisa kuzviita.” Hino, kana tikaona kuti pano munhu urikuda rubetso, tinoita ciito nokukasika. Atisii kumubetsera tecirangarira kuti uripo ucamubetsera.—1 Juau 3:17, 18.
Tinodikana kugara wekutanga pakubetsera hama no hanzvadzi dzedu dzinoda rubetso (Onai ndima 10)
11. Ngaupi mushobo umweni wekukudza hama dzedu?
11 Mushobo umweni wekukudza hama dzedu, ngewe kurekerera nokukasika aya anotishaishira. Aefeso 4:26 inoti: “Musasiye kuti zuwa ridoke mucakanyangadzwa.” Ngei zvecikosha kuita izvona? Ngekuti vhersikuro 27 inopanganidza kuti kuita izvona zvingakwanisa ‘kupasa mukana Dhiyabhurosi.’ Uye isusu tinozviziya kuti mu Bhaibheri, Djehovha anotikohomedzesa kakawanda kuti tirekerere amweni. Akorosi 3:13 inotobhuya ngezve ‘kurumbwa . . . tecirekererana no mwoyo wese.’ Kurekerera munhu, ndi umwe we mushobo wekubambisa ushamwari watinawo naye. Kana tikaita izvona zvicatibetsera “kucengeta kubatana ke mwiya mu cisungo ce runyararo.” (Aef. 4:3) Fundo ngere kuti, rurekerero ndi ciro cinodikana maningi kuti paoneke runyararo uye rubatano pakati pe anhu a Djehovha.
12. Djehovha anotibetsera kudini kuti tirekerere amweni?
12 Izvirokwazvo kuti zvingashupha kurekerera munhu watirhwadzisa. Asi zvinokwanisika no rubetso re mwiya mucena wa Mwari. Mumasure mekubhuya kuti tinodikana ‘kudanana no mwoyo wese’ uye ‘kuseenza no simba,’ Bhaibheri rinotikohomedzesa kuti: “Pipirai mu mwiya.” Soko rakaseenzeswa apa rokuti “kupipira” rinoreya ngezve “kupsvetekera, kudjeka pakushingaira uye cidaka-daka cinouya nge ndaa ye zviito” zve ku mwiya. (Onai masoko e kufunda ari pana Aroma 12:11.) Izvi zvinoda kureya kuti mwiya mucena wa Mwari ungatibetsera pakupangidza rudo ku hama dzedu no masoko uye zviito, uye kudzirekerera no mwoyo wese. Hino, tinoda kudeketerera Djehovha kuti tikwanise kuita izvona.—Ruka 11:13.
“NGAPASAONEKE KUPARADZANA PAKATI PENYU”
13. Cinyi cingaparadzanisa ungano?
13 Mu sangano ra Djehovha tinogumira “mishobo yese ye anhu.” (1 Ti. 2:3, 4) Umwe na umwe wedu wakarerhwa uye wakabatana no zviro zvakasiyana-siyana mu upenyu wake. Izvi zvinonyasa kudjekesa kuti ngei tingaita zvisananguro zvakasiyana no amweni zvakadai hinga mushobo wedu wekupfeka, zviya zvaticasanangura kuti tiwaraidzwe uye zviya zvaticasanangura panocokuita no marapirhwe aticaizwa. Kana tikatama kungwarira, musiyano uu ungakwanisa kuita kuti ungano iparadzane. (Aro. 14:4; 1 Ako. 1:10) Asi Djehovha anotifundisa kuti munhu ano rudo, aarumbwi ecirangarira kuti zvisananguro zvake zvakanaka kudarika zve amweni.—Afi. 2:3.
14. Tinodikana kurumbwa tecipeta masimba pakuitei, uye ngei?
14 Isusu tingasakurirawo rubatano mu ungano ngekurumbwa teciita zviro zvinodakadza uye zvinobambisa amweni. (1 Ate. 5:11) Mumakore akadarika, anhu akawanda ainga asikacaiti mabasa e Cikristu kana kuti ainga abviswa, akahwirira mu ungano. (2 Ako. 2:8) Onai zvakaitika no hanzvadzi imweni, iyo yainga yaano makore 10 isikaiti mabasa e Cikristu. Payakahwirira mu ungano, iyona yakati: “Anhu ese akandicungamidza uye akandinyemwerera.” (Zvii. 3:19) Zviro izvi zvakaita hingana zvidoko, zvakaita kuti hanzvadzi ii izwe kudini? Iyona inoti: “Zvaiita hingana kuti Djehovha arikundihwirinzazve mu gwanza re mupfaro.” Paya patinopeta masimba kuti tirumbwe tecibambisa amweni, tingaseenzeswa na Kristu kuti tibambise aya ari “kuseenza no simba uye kuremerhwa.”—Mat. 11:28, 29.
15. Ngacipizve cingatibetsera pakugara no rubatano no hama dzedu? (Onaiwo foto.)
15 Zviya zvatinobhuya zvinoitawo kuti paoneke rubatano pakati pe hama. Djobo 12:11 inoti: “Nzee aizwi here masoko kuitawo hinga rurumi rinoraira zvokurhya?” Munhu unobika zvakanaka, asati apasa amweni zviya zvaabika, iyena unoraira kuti azwe kuti zviri kunaka here. Ngo mushobo umwewo, tisati tareketa ciro, tinodikana kunyasa kurangarira. (Pis. 141:3) Nguwa dzese tinoda kugara no rugondo rekuti zviya zvaticabhuya zvicapfadza uye zvicabambisa kuitira kuti ‘anoazwa abetsereke.’—Aef. 4:29.
Nyasai kurangarira musati mabhuya ciro (Onai ndima 15)
16. Ndiani unodikana kunyanya kungwarira zviya zvaacareketa?
16 Maka-maka amuna uye abereki anodikana kungwarira zviya zvaacabhuya. Awona anodikana kureketa nge mushobo unobambisa mhuri yawo. (Ako. 3:19, 21; Tito 2:4) Akuru, ano ubaba we kuusha, anodikana kupfadza uye kunyaradza mabira a Djehovha. (Isa. 32:1, 2; Aga. 6:1) Nguwa dzese tinoda kuedzurira zvinobhuiwa pana Zvierengo 15:23 inoti: “Rinobetsera maningi soko rinobhuiwa pa nguwa kwayo!”
DANANAI “NO ZVIITO UYE ZVIROKWAZVO”
17. Tingaitei kuti tide hama no hanzvadzi dzedu zvecibva mukati me mwoyo wedu?
17 Muphostori Juau unotibvunza kuti: “Atidikani kundodanana no masoko uye rurumi, asi no zviito uye zvirokwazvo.” (1 Juau 3:18) Tinoda kubambisa rudo ku hama no hanzvadzi dzedu zvecibva mukati me mwoyo medu. Tingazviita kudini? Paya patinotora nguwa kuti tigare pamwepo no hama uye hanzvadzi dzedu, zvicaita kuti ushamwari uye rudo ratinaro ku umwe na umwe wedu ritunhudzire. Hino, psvakai mukana wekugara no hama uye hanzvadzi dzenyu, ngo muezaniso pa misangano uye pa basa re kuparidzira. Uyewo, psvakai nguwa dzekuavhakacira. Kana mukadaro, munonga mecipangidza kuti “munofundiswa na Mwari kuti mudanane.” (1 Ate. 4:9) Kusiya izvona, ticarumbwa teciona “kunaka kazvakaita uye kupfadza kazvinoita kana hama dzikagara pamwepo uye dzakabatana!”—Pis. 133:1.
NGOMA 90 Bambisanai