Betserai Mufundi Wenyu kuti Asanangure Kuseenzera Djehovha

1-2. (a) Ngei afundi amweni e Bhaibheri ecithya kutsigira cokwadi ce Bhaibheri? (b) Ticaonei mu fundo ino?

PANO zviro zvakamuitisai kuti munonoke kugara Mupupuri wa Djehovha here? Pamweni imwimwi makathya kuti adoni enyu e kubasa, shamwari kana kuti anyaukama aizonyangadzwa kana mukagara Mupupuri wa Djehovha. Pamweni makarangarira kuti zvainga zvisikabviri kurarama maererano no zvinodiwa na Djehovha. Kana imwimwi makambozwa kudaro, zvinoita nyore kuzwisisa zviri kubatana no afundi.

² Djesu aiziya kuti zviro zvakaita hingana izvi zvaizopingaidza munhu kuseenzera Djehovha. (Mat. 13:20-22) Asi iyena akarumbwa ecibetsera afundi ake. Kuti aite izvona, akaabetsera kuziya kuti ngei zvaishupha kaari kusanangura kuseenzera Djehovha uye akaabetsera kuti ade maningi Djehovha. Iyenawo akaabetsera kukanda Djehovha pa mbuto ye kutanga mu upenyu wawo uye akaafundisa kuti zvinyi zvaaizoita kana akabatana no zvinetso. Tingateedzera kudini Djesu patinonga teciseenzesa bhuku ra Pfadzwai ne Upenyu Nokusikaperi! kuti tibetsere mufundi we Bhaibheri kuti atsigire cokwadi?

BETSERAI MUFUNDI WENYU KUZWISISA KUTI CINYI CIRI KUMUSHUPHIRA KUTI ASEENZERE DJEHOVHA

3. Cinyi cakashuphira Nikodhemo kuti agare muteeri wa Djesu?

³ Nikodhemo wainga ari mutungamiriri unokosha we Adjudha, iyena wakabatana no zvinetso kuti agare muteeri wa Djesu. Paa padarika mwedzi dzinokwana kuita 6, mumasure mekuti Djesu atanga basa rake re kuparidzira, Nikodhemo wakatendera kuti Djesu ainga ari muimiriri wa Mwari. (Juau 3:1, 2) Iyena wakasanangura kusongana na Djesu mucifise-fise, ngekuti “waithya Adjudha.” (Juau 7:13; 12:42) Pamweni iyena wairangarira kuti kana akazogara mufundi wa Djesu waizoruza basa rake.a

4. Djesu akabetsera kudini Nikodhemu kuzwisisa zviro zvaietserhwa na Djehovha kuti iyena aite?

⁴ Nikodhemo wainyasa kuzwisisa Mitemo yakapasa Djehovha Aisraeri, asi iyena waida rubetso kuti azwisise kuti Djehovha aietserei kaari. Hino Djesu akamubetsera kudini? Iyena ainga akagadzirira kureketa na Nikodhemo kunyazi cousiku. Uye Djesu akabvunza Nikodhemo zviro zvaaidikana kuita kuti agare mufundi. Iyena akati: ‘Cinyukai pa zvitema zvenyu, mobhabhatidzwa mu mvura uye garai no kutenda mu Mwana wa Mwari.’—Juau 3:5, 14-21.

5. Tingabetsera kudini mufundi we Bhaibheri kuona kuti cinyi ciri kumupingaidza kuti aseenzere Djehovha?

⁵ Kana mufundi we Bhaibheri ecinyasa kuzwisisa zvaari kufunda mu Matarhwa, pamweni iyena ungada kubetserhwa kuzwisisa kuti cinyi ciri kumupingaidza kuti aseenzere Djehovha. Ngo muezaniso, pamweni basa rake riri kuita kuti iyena asagare no nguwa uye pamweni mhuri yake iri kuita kuti asagare mupupuri wa Djehovha. Kuita hingana Djesu, psvakai nguwa kuti mubetsere mufundi wenyu. Imwimwi mungamupika kumba kenyu kuti mumbocedze. Pamunonga mecicedza, pamweni iyena ungamubvunza mazwiro ake uye imwimwi mungakwanisa kuona kuti zvinetso zvipi zvaari kubatana nazvo. Mumasure mazvo, mubetserei kuona cinjo dzaangaita uye muedzurirei kuti cinangwa cikuru nge ce kupfadza Djehovha haiwa kumupfadzai.

6. Imwimwi mungabetsera kudini mufundi wenyu kuseenzesa zviya zvaanonga ecifunda? (1 Akorinti 16:13)

⁶ Mufundi we Bhaibheri paanogara no rungodo rekuti Djehovha acamubetsera kurarama maererano no zvokwandi zve Bhaibheri, iyena ucagara no ushingi wekuseenzesa zviya zvaanofunda. (Erengai 1 Akorinti 16:13.) Mufundisi we Bhaibheri ungakwanisa kuezaniswa no profesori we kucikora. Pamainga mecifunda, ndiupi profesori wamaipfarira maningi? Pamweni ndi uya wakamubetserai kunyasa kuzwisisa zviya zvamaifunda. Ngo mushobo umwewo, mufundisi we Bhaibheri wakanaka aafundisi basi zviya zvinoda Djehovha kuti tiite asi unobetserawo mufundi kuziya kuti no rubetso ra Djehovha, iyena ungakwanisa kuita cinjo mu upenyu. Imwimwi mungazviita kudini?

BETSERAI MUFUNDI WENYU KUTI ATUNHUDZIRE RUDO RAKE KUNA DJEHOVHA

7. Djesu akabetsera kudini anhu aimupurutana kuti atunhudzire rudo rawo kuna Djehovha?

⁷ Djesu aiziya kuti rudo rainga rino afundi kuna Djehovha raizoita kuti awona aseenzese zviya zvaaifundira. Kakawanda kakhona, iyena aifundisa afundi ake zviro zvaiabetsera kuti atunhudzire rudo rawo kuna Baba awo e kudenga. Ngo muezaniso, iyena akaezanisa Djehovha no mwanarume unopasa zviro zvakanaka ku ana ake. (Mat. 7:9-11) Zvingaita kuti anganani aipurutana Djesu, pamweni ainga asina baba ainyasa kuapangidzira rudo. Rangaridzai kuti anhu aya akazwa kudini Djesu paainga ecibhuya ngezve muezaniso we baba akapangidzira rudo mwana wawo wainga apsveteka. Awona akakwanisa kuona usisi wa Djehovha ku ana ake e pa nyika.—Ruka 15:20-24.

8. Imwimwi mungabetsera kundini mufundi we Bhaibheri kuti anyase kutunhudzira rudo rake kuna Djehovha?

⁸ Imwimwi mungabetserawo mufundi we Bhaibheri kunyasa kutunhudzira rudo rake kuna Djehovha, ngekubhuya ngezve mawara a Mwari pamunonga mecifunda. Pamunonga mecifunda, betserai mufundi kuswisisa kuti zvaafunda zvinopangidza kudini kuti Djehovha anotida. Pamunonga mecifunda ngezve rusudzunuro mubetserei kuona kuti Djehovha akaita izvona ngekuti anonyasa kutida. (Aro. 5:8; 1 Juau 4:10) Zviri pamhene kuti mufundi paanozwisisa kuti Djehovha anomuda zvakadini, izvona zvinomubetsera kuti anyase kuda Djehovha.—Aga. 2:20.

9. Cinyi cakabetsera Michael kuti aite cinjo mu upenyu wake?

⁹ Onai zvakaitika na Michael, unogara ku Indonesia. Iyena wakafunda cokwadi paainga ecikura asi aazi kuda kubhabhatidzwa. Paainga ano makore 18, iyena wakaenda ku nyika imweni kuti aende kooseenza hinga motorista we karu. No kuhamba ke nguwa, iyena wakawaka mukadzi ku Indonesia asi wakasiya mhuri yake kuti arumbwe eciseenza ku nyika imweni. Pa nguwa iyona mukadzi wake no mwana wake, akatanga kufunda Bhaibheri uye kuseenzesa zviya zvaaifunda. Mumasure me kufa ka mai ake, Michael wakasanangura kuhwirira kumba kuti aenda koocengeta baba ake uye iyena wakatendera kufunda Bhaibheri. Paaifunda dii rakazwi “Fundai Zvakawanda” mu fundo 27 re bhuku ra Pfadzwai ne Upenyu Nokusikaperi! Michael wakabathwa-bathwa maningi no zvaaifunda. Paakanyasa kurangarira kuti Djehovha akazwa kudini paaiona Mwana Wake ecishuphika, Michael wakecema. Iyena wakazwisisa kuti Djehovha na Djesu anomuda maningi, wakatenda nge rusudzunuro, wakaita cinjo mu upenyu uye wakabhabhatidzwa.

BETSERAI MUFUNDI WENYU KUTI AKANDE DJEHOVHA PA MBUTO YE KUTANGA

10. Djesu akaitei kuti abetsere afundi ake kuita cinjo kuti anyase kuseenzera Djehovha? (Ruka 5:5-11) (Onaiwo mufanikiso.)

¹⁰ Afundi e kutanga a Djesu Kristu akaziya nokukasika kuti Djesu ainga ari Mesiya, asi aida rubetso kuti akande basa re kuparidzira pa mbuto ye kutanga. Pedru na Andreya ainga aa afundi, Djesu paakaapika kuti amuteere ke nguwa yakadzara. (Mat. 4:18, 19) Awona pamwepo na Tiyago uye Juau, aiseenza hingana abati e howe uye basa rawo rainyasa kubudirira. (Mark. 1:16-20) Pedru na Andreya “paakasiya basa rawo” kuti ateere Djesu mu nguwa yakadzara, awona akaita gadziriro kuitira kuti arumbwe eciriritira mhuri yawo. Cinyi cakaabetsera kuita kuti basa re kuparidzira rigare ciro cinokosha maningi kudarika mare? Djesu akaita cishamiso kuti aapangidze kuti Djehovha aizokwanisa kuariritira, pasinei ne zvaizoitika. Izvona zvakazoabetsera kugara no rugondo kuti Djehovha nguwa dzese aizoapasa zvaaida kuti akwanise kurumbwa ecimuseenzera.—Erengai Ruka 5:5-11.

11. Tingaseenzesa kudini maesperiensiya edu kuti tibambise kutenda ke mufundi wedu?

¹¹ Isusu atikwanisi kuita zvishamiso hingana Djesu, asi tingakwanisa kubvunzawo amweni maesperiensiya ekuti Djehovha anobetsera kudini anhu anokanda kuda kake pa mbuto yekutanga mu upenyu wawo. Ngo muezaniso, imwimwi muciri kuedzurira kuti Djehovha akamubetserai kudini pamakatanga kupinda musangano? Pamweni maidikana kubhuya no wamunoseenzera uye kumupanganidzira kuti ngei mainga musikadizve kuseenza nguwa yakawanda kana izvona zvecimupingaidzai kupinda misangano. Pamunonga mecibhuya maesperiensiya enyu ku mufundi wenyu, mupanganidzirei kuti kutenda kenyu kakabambiswa kudini pamakaona Djehovha ecimubetserai pamakasanangura kumukanda pa mbuto ye kutanga mu upenyu wenyu.

12. (a) Ngei zvecikosha kupika hama no hanzvadzi dzakasiyana-siyana patinonga tecienda kooitisa fundo ye Bhaibheri? (b) Mungaseenzesa kudini mavhidhiyo pamunonga meciitisa fundo ye Bhaibheri? Pasai muezaniso.

¹² Mufundi wenyu ucabetserekawo kana akazwa maesperiensiya e hama dzimweni. Hino pikai hama no hanzvadzi dzakasiyana-siyana kuti muende nawo kooitisa fundo dze Bhaibheri. Akumbirei kuti apanganidzire mufundi wenyu kuti akagumira kudini cokwadi uye kuti icinjo dzipi dzaakaita kuti akande Djehovha pa mbuto yekutanga mu upenyu wawo. Kusiya izvona, psvakai nguwa kuti muone no mufundi wenyu mavhidhiyo ari pa dii rakazwi “Fundai Zvakawanda” kana kuti “Ziyai Zvakawanda” mu bhuku ra Pfadzwai no Upenyu Nokusikaperi! Ngo muezaniso, pamunonga mecifunda pa fundo 37 uye kuona vhidhiyo yakazwi Djehovha Acatipasa Zvatinoda pa Kurarama, bhuyai ngezve vhidhiyo iyona uye mubetserei kuona kuti Djehovha acamubetsera kana iyena akamukanda pa mbuto yekutanga.

BETSERAI MUFUNDI WENYU KUZWISISA KUTI ZVINYI ZVAANGAITA PAANONGA ECIBATANA NOKUPHIKISWA

13. Djesu akagadzirira kudini afundi ake kuitira kuti abatane nokuphikiswa?

¹³ Djesu akabvunza ateeri ake kakawanda kuti awona aizobatanawo nokuphikiswa no amwemi kutobatanidzawo no anyaukama. (Mat. 5:11; 10:22, 36) Pa nguwa doko Djesu asati afa, akabvunza afundi ake kuti anganani awo aizouraiwa ngekuti aiseenzera Djehovha. (Mat. 24:9; Juau 15:20; 16:2) Iyena akabhuya kuti awona aidikanawo kungwarira mu basa rawo re kuparidzira. Akaabvunzawo kuti ainga asikadikani kureketedzana no aya aiaphikisa kuitira kuti arumbwe eciparidzira.

14. Tingabetsera kudini mufundi wedu kuitira kuti iyena akwanise kugadzirira kubatana nokuphikiswa? (2 Timoti 3:12)

¹⁴ Kuita hingana Djesu, tingakwanisa kubetsera mufundi wedu kuti aziye zvokuita kana akazophikiswa no adoni e ku cikora, e ku basa, mashamwari uye anyaukama. (Erengai 2 Timoti 3:12.) Adoni anganani e ku basa kunyazi anyaukama angakwanisa kushora mufundi wedu ngekuti iyena uri kuedza kurarama maererano no zvaari kufunda mu Bhaibheri. Kana tikakasika kubetsera afundi edu kuti akwanise kubatana nokuphikiswa, awona acagara akagadzirira kuitira nguwa iyona ikaguma.

15. Cinyi caizobetsera mufundi kubatana nokuphikiswa mu mhuri?

¹⁵ Kana mufundi wenyu eciphikiswa mu mhuri, mubetseri kuzwisisa kuti ngei anyaukama ake akanyangadzwa naye. Pamweni awona ari kurangarira kuti iyena wapauswa kana kuti ano maonero akashata ngezve Apupuri a Djehovha. Kunyazi Djesu akatobatanawo nokuphikiswa mu mhuri. (Mark. 3:21; Juau 7:5) Betserai mufundi wenyu kuti apangidze mwoyo unononoka kutsamwa uye kureketa no amweni nge mushobo wakanaka, kutobatanidzawo anyaukama.

16. Tingabetsera kudini mufundi wedu kuti arekete no rureremedzo ku amweni zvaari kufunda?

¹⁶ Kana anyaukama e mufundi wenyu, akada kuziya zvinganani ngezve Bhaibheri, zvakanaka maningi kuti mufundi wenyu asabhuye zvakawanda pa nguwa imwe basi. Kuitira kuti anyaukama ake asaremerhwe no masoka akawanda zvekuti awona asadezve kucedza naye ngezve Bhaibheri. Hino, betserai mufundi wenyu kuti acedze no amweni ngo mushobo unoita kuti awona azodezve kuzwa zvimweni. (Ako. 4:6) Pamweni mufundi wenyu angapika anyaukama ake kuti avhakacire musaiti jw.org. Izvona zvingaita kuti awona afundire zvakawanda ngezve Apupuri a Djehovha ngo mushobo waanoda.

17. Imwimwi mungabetsera kudini mufundi wenyu kuti akwanise kubatana no maonero akashata ano anhu ngezve Apupuri a Djehovha? (Onaiwo foto.)

¹⁷ Imwimwi mungaseenzesa jw.org pa dii rakazwi “Mibvunzo Inonyanya Kubvunzwa” kuti mubetsere mufundi wenyu kugadzirira mhinduro dze mubvunzo dzekuti adoni ekucikora angakwanisa kuiita. (2 Ti. 2:24, 25) Pakupedzesera ke fundo mungacedzesana ngezve dii rakazwi “Anhu Amweni Anoti” mu bhuku ra Pfadzwai no Upenyu Nokusikaperi! Betserai mufundi wenyu kuti adaire no masoko ake kamare. Kana zvecibvira mubetserei kuti akwanise kupanganidza zvaanotenda. Kana akaita izvona, zvicamubetsera kuti adziirire kutenda kake no rugondo.

18. Mungabetsera kudini mufundi wenyu kuti akwanise kubhuya ngezve kutenda kake mu basa re kuparidzira? (Mateu 10:27)

¹⁸ Djesu akabvunza afundi ake kuti aparidzire masoko akanaka ku anhu. (Erengai Mateu 10:27.) Mufundi paanotanga kuparidzira nyumba no nyumba, unoona rubetso ra Djehovha uye anonyasa kumugonda. Mungabetsera kudini mufundi wenyu kuti agare no cinangwa cokuita izvona? Kana mu ungano menyu mungaizwa ciziiso co kampanya ye kuparidzira, betserai mufundi wenyu kuti agare muparidzi asati abhabhatidzwa. Mupanganidzirei kuti ngei anhu akawanda anoona kuti zviri nyore kutangisa kuparidzira pa nguwa ye kampanya. Iyena ungabetserekawo no kurowedzwa kunoizwa nguwa yese mu ungano pakati pe sumana. Ngekuita zviri zvese kuti adzadzise cinangwa icona, iyena angakwanisa kubhuya zvaanotenda no rugondo rese.

PANGIDZAI KU MUFUNDI WENYU KUTI IMWIMWI MUNOTENDA KUTI IYENA UNODA KUPFADZA DJEHOVHA

19. Djesu akapangidza kudini kuti aigonda afundi ake uye isusu tingamuteedzera kudini?

¹⁹ Djesu asati aenda kudenga, akabvunza ateeri ake kuti aizogarazve ari ese pamwepo. Awona aazi kuzwisisa kuti Djesu aibhuya ngezve kuenda kake kudenga. Kunyazi zvakadaro, Djesu akakanda ndangariro dzake pakugondeka kawo haiwa pakutama kuzwisisa zviro zvinganani. (Juau 14:1-5, 8) Iyena aizviziya kuti awona aida nguwa yekunyasa kuzwisisa zviro zvinganani zvakaita hingana kariro yekuenda kudenga. (Juau 16:12) Isusuwo tingapangidza kuti tinogonda kuti afundi edu anoda kupfadza Djehovha.

20. Hanzvadzi imweni ye ku Malawi yakapangidza kudini kuti yaigonda mufundi wayo?

²⁰ Tino kariro yekuti mufundi wedu unoda kuita zviro zvakanaka. Ngo muezaniso, hanzvadzi imweni inozwi Chifundo inogara ku Malawi, yakatangisa fundo ye Bhaibheri no bhuku ra Pfadzwai no Upenyu Nokusikaperi! ku musikana umweni we ku Katorika unozwi Alinafe. Mumasure mekupedza kufunda fundo 14, Chifundo wakabvunzisa ku mufundi wake kuti waionawo kudini nyaya ye kuseenzesa zvidhori pa kunamata. Alinafe wakanyangadzwa maningi uye wakati: “Icona i cisananguro ce umwe na umwe!” Chifundo wakarangarira kuti Alinafe wainga asikazorumbwizve ecifunda ese Bhaibheri. Asi iyena no mwoyo unononoka kutsamwa wakarumbwa ecifunda na Alinafe, ecietsera kuti no kuhamba ke nguwa iyena waizocinja maonero ake. Mwedzi minganani yadarika, Chifundo wakaita mubvuzo pa fundo 34 kuti: “Zvamuri kufunda mu Bhaibheri ngezva Djehovha zviri kumubetserai kudini dakara zvino?” Ecidaira mhinduro iyona Alinafe wakareketa zviro zvakawanda zvakamushamisa, uye wakabhuyawo kuti: “Apupuri a Djehovha aaiti zviro zvisikatenderhwi no Bhaibheri.” Mumasure mazvo, Alinafe wakaima kuseenzesa zvidhori uye wakabhabhatidzwa.

21. Tingaita kudini kuti mufundi wedu asanangure kuseenzera Djehovha?

²¹ Kunyazi Djehovha ndiye anoita kuti ‘akure,’ isusu tino ubaba we kubetsera mufundi wedu we Bhaibheri kuti abudirire. (1 Ako. 3:7) Pane kumufundisa basi zviya zvinoda Mwari kuti iyena aite, isusu tinomubetserawo kuti iyena agare no rudo rakakura kuna Djehovha. Tinoita izvona nge kumubetsera kuti iyena apangidze rudo rake kuna Djehovha nge kumukanda pa mbuto yekutanga mu upenyu. Uyewo tinomubetsera kuti agonde Djehovha paanobatana no kuphikiswa. Patinopangidza mufundi wedu we Bhaibheri kuti isusu tinogonda kuti iyena unoda kupfadza Djehovha, tinomupasa simba re kusanangura kumuseenzera.