Upenyu Wedu Wese Tecifundiswa na Djehovha

MUEZANISO WE ABEREKI ANGU

Mukupera ke gore ra 1950, abereki angu akacinja kubva ku Itália kuti aende koogara ku Canadá ku thaundi re ku Kindersley, ku provhisiya ye Saskatchewan. Paa padarika nguwa doko, awona akafundira cokwadi, uye cokwadi cakagara ciro cinokosha maningi mu upenyu wedu. Ndiri kuedzurira kuti pandainga ndiri mwana, inini ndaipedza mazuwa akawanda ndeciparidzira pamwepo no anhu e mu mhuri yangu. Nguwa dzimweni, ndinoona hingana ndakatanga basa re “upionero we rubetso” pandainga ndino makore 8.

Abereki angu ainga ari arombo, kunyazi zvakadaro, awona akaita zviri zvese kuti aseenzere Djehovha uye akagara muezaniso wakanaka maningi kandiri. Ngo muezaniso, mu gore ra 1963, awona akatengesa zvese zvaainga anazvo kuti aone mare ye kuenda koopinda gungano re nyika yese ku Pasadena, Califórnia ku Estados Unidos. Paa padarika nguwa, muna 1972 isusu takaenda koogara ku thaundi re Trail ku provhisiya ye Colúmbia, Britânica ku Canadá. Thaundi irona, raigara kure ke makirometro anokwana kuita 1000 no kataigara. Takaenda koogara ikona kuti tibetsere anhu aireketa mureketero we Ciitariano. Baba angu aaita basa re kucenesa uye kugadzirisa mu bazari. Kakawanda kakhona, awona airamba kukhwidziridzwa pa basa ngokuti aida kunyasa kukanda ndangariro dzawo pa zviro zvinocokuita no kunamata.

Inini ndinotenda maningi nge muezaniso we abereki angu uye no hama dzangu nhatu. Muezaniso wawo wakandibetsera kuti ndiseenzere Djehovha. Awona akandifundisa kuti: Mu upenyu wangu wese ndinodikana kuedzurira kuti kana ndikakanda Umambo wa Mwari pa mbuto yekutanga Djehovha nguwa dzese acandicengeta.—Mat. 6:33.

KUTANGA KUSEENZA MU BASA RE NGUWA YAKADZARA

Muna 1980, inini ndakacata na Debbie, hanzvadzi yakarungama maningi uye yaibatikana mu basa ra Djehovha. Isusu taida maningi kuseenza mu basa re nguwa yakadzara. Hino, mumasure me mwedzi mitatu isusu tacata, Debbie wakatanga kuseenza hinga mupiyonera. Mumasure me gore rimwe, isusu takaenda ku ungano doko yekuti yaidiwa aparidzi akawanda uye inini ndakatangawo kuseenza hinga mupiyonero.

Nokuhamba ke nguwa, isusu takaruza mupfaro mu basa redu uye takarangarira kubuda ikona. Asi cokutanga, takaenda koocedza no muonereri we nharaunda, iyena wakatipangidzira rudo uye wakabhuya cokwadi cataidikana kuzwa. Iyena wakati: “Imwimwi muri kuita kuti mugariro wenyu ubambirire kushupha. Muri kukanda ndangariro dzenyu pa zvinetso zvamuri kubatana nazvo basi. Kana mukakanda ndangairo dzenyu pa zviro zviya zvinomupasai mupfaro pa basa renyu, mucapfara maningi.” Mazano awona ndiwona kamare ataida. (Pis. 141:5) Isusu takacinja maonero edu ciriporipoco uye takaona kuti painga pano zviro zvakawanda zvakanaka pa basa redu. Anhu akawanda mu ungano aida kupasa zvakawanda kuna Djehovha, kutobatanidzawo ana adoko uye hanzvadzi dzekuti dzainga dzino amuna ekuti ainga asiripi Apupuri a Djehovha. Izvona zvakatifundisa maningi. Takafundira kuona zviro zvakanaka pa mugariro watiri kubatana nawo uye kugonda kuti Djehovha acatibetsera kugadzirisa cinetso cipi haco catiri kubatana naco. (Mik. 7:7) Isusu takazogarazve no mupfaro pa basa redu uye zviro zvakatihambira zvakanaka.

Afundisi aitifundisa pa cikora ce mapiyonero ainga aseenzawo mu nyika dzimweni. Awona akatipangidza mafoto manganani uye akatibvunza ngezve makomborero uye zvinetso zvaakabatana nazvo pa basa rawo. Izvona zvakatisiya no cido cekudawo kuseenza hingana mamisiyonariyo. Hino, takasangura kugarawo no cinangwa icona.

Kuti cinangwa icona cekugara mamisiyonariyo cidzadzike, mu gore ra 1984 takacinja kuenda ku provhinsiya ye Quebec, kunorekethwa Cifrancês. Ku provhinsiya iyona iri ke makirometro 4000 kubva ku Colúmbia Britânica. Ku Quebec, isusu taidikana kudjairana no tsika ipsva uye mureketero mupsva. Cinetso cimweni cainga ciri cekuti tainga tisina mare yakawanda. Kakaguma nguwa yekuti tairhya basi madima atainongera mu munda me muridzi umweni we munda. Debbie waikwanisa kubika madima awona nge mishobo yakasiyana-siyana uye waiabika ngo mushobo unonaka. Kunyazi no zvinetso zvataibatana nazvo, isusu taikwaisa kushingirira no mupfaro uye cinokosha nge cekuti taikwanisa kuona kuti Djehovha aitiriritira.—Pis. 64:10.

Zuwa rimweni, takafonerhwa tecipikwa kuti tiende koseenza ku Bheteri ro Canadá. Isusu takapfara maningi, asi pa nguwa imweni tairangarira ngezve petisau yatakatumira kuti tiende koopinda Cikora ce Giriyadhi. Kunyazi zvakadaro, isusu takatenda mupiko uwona. Patakaguma ku Bheteri, isusu takabvunzisa Hama Kenneth Little nhego ye Dare ro Firiyari, teciti: “Zvakadini kana tikapikwa kuti tiende koopinda Cikora ce Giriyadhi?” Awona akadaira eciti: “Musanetseke, kana izvona zvikaitika ticaona zvaticaita.”

Uye ndizvona kamare zvakaitka mumasure me kudarika sumana imwe, inini na Debbie takapikwa kuti tiende koopinda Cikora ce Giriyadhi. Hino isusu taidikana kusanangura kuti tingaenda here kana kuti haiwa. Hama Kenneth akati: “Azvinei no zvamucasanangura nyamasi, pamweni no kuhamba ke nguwa mungarangarira kuti kudai tasanangura rimweni. Basa rese rinokosha uye Djehovha anokomborera mabasa ese.” Isusu takasanangura kuenda koopinda Cikora ce Giriyadhi uye nokuhamba ke nguwa takaona kuti masoko a Hama Kenneth ainga ari e cokwadi. Kakawanda kakhona tinosoobvunzawo mazano amwewo atakapaswa no hama Kenneth ku aya anoda kusanangura basa rakasiyana-siyana pa kuseenzera Djehovha.

TECISEENZA HINGANA MAMISIYONARIYO

Takagara no mupfara wakakura maningi nge kubatanidzwa pa afundi anokwana kuita 24 e turma 83 e Giriyadhi. Cikora ici cakatanga muna Abriri ya 1987 ku Brooklyn, Nova York. Ainyanya kutifundisa ainga ari Hama Ulysses Glass uye Jack. Mwedzi mishanu idzi dzakadarika nokukasika. Isusu takagradhuwari mu 6 ya Setembro ya 1987. Takagadzwa kuti tiende koosenza ku Haiti, pamweni na John uye Marie Goode.

Ku Haiti kainga kusina mamisiyonariyo abva ku Cikora ce Giriyadhi kubvira muna 1962 kubva pakadzingwa mamisiyonariyo e kupedzesera mu nyikeyo. Mumasure me masumana matatu, inini na Debbie takatanga kuseenza ku Haiti, ungano yedu yainga ino aparadzi 35 uye yaigara ku mbuto yainga ino matunhu. Isusu tainga tiri madjaha, tainga tisikazii zvakawanda uye taigara tega pa nyumba ye mamisiyonariyo. Anhu e kumutanha iwona ainga ari arombo uye akawanda akhona ainga asikakwanisi kuerenga. Pataigara ku Haiti, takabatana no zvinetso zve anyautongi, anhu anganani aiedza kurhwisa anyautongi, aiita mabongozozo uye kakawanda kakhona kaiitika dutu.

Kunyazi no zvese izvi, isusu takafunda maningi no ushingi uye mupfaro we hama no hanzvadzi dzo ku Haiti. Hama no hanzvadzi dzakawanda dzakhona dzainga dzino upenyu unoshupha, asi dzaida Djehovha uye basa re kuparidzira. Ndinoedzurira ngezve hanzvadzi imweni yainga yacembera, iyona ainga isikakwanisi kuerenga, asi yaiziya mavhersikuro e mu Bhaibheri anokwana kuita 150 nge mumusoro. Kushupha kaiita upenyu ku nyika iya, kakatiitisa kuti tirumbwe teciparidza kuti Umambo wa Mwari ndiwo oga unozopedza matambudziko e anhu. Atikwanisi kupanganidza makomborero atakagara nawo nge kuziya kuti afundi edu anganani akagara mapiyonero e nguwa dzese, mapiyonero espesiyari uye akuru e ungano.

Ku Haiti, ndakaziyana no mudjaha umweni unozwi Trevor waizeseenza hingana misiyonariyo mu gereja re kunyepa. Isusu takamboreketa ngezve Bhaibheri. Asi paa padarika makore manganani, ndakashamisika maningi pandakatambira tsamba yake yaiti: “Ndicabhabhatidzwa pa gungano rinoteera. Ndinoda kuhwirira ku Haiti kuti ndiseenze hingana mupiyonero espesiyari ku mbuto imwe-imweyo yandaiseenza hinga mumisiyonariyo we gereja re kunyepa.” Uye ndizvona kamare zvaakaita ke makore kawanda, pamwepo no mukadzi wake.

TAKASEENZA KU EUROPA UYE MUMASURE MAZVO, KU ÁFRICA

Mu nyika dzinganani dze ku Europa, basa re kuparidzira raitanga kutenderhwa, hino isusu takatumwa kuti tiende koseenza ikona. Muna 1992 takaguma ku Liubliana, Eslovênia thaundi rainga riri dhuze no mbuto yakakurira abereki angu asati aenda ku Itália. Lugoslávia yo kare yainga iciri mu hondo. Bheteri ro ku Áustria ku Viena, ro ku Croácia ku Zagreb uye ro ku Sérvia ku Belgrado, dzaionerera basa mu mbuto iyona. Asi pari zvino, nyika imwe na imwe yaidikana kugara no Bheteri rayo.

Kugara ku Eslovênia zvaireya kufundira tsika dzipsva uye mureketero mupsva. Anhu e ikona aibhuya kuti: “Jezik je težek,” zvecida kureya kuti: “Mureketero uu unoshupha maningi.” Uye waishuphadi kamare! Takashamisika maningi nge kuona kuti hama dzainga dzakagadzirira kutambira cinjo dzo sangano nokukasika uye takaona dzecikomborerhwa na Djehovha. Ngokudaro, takazwisisazve kuti Djehovha nguwa dzese anogadzirisa zviro no rudo rakakura uye pa nguwa yakasisira. Zvese zvatakafundira teciseenzera Djehovha, zvakatibetsera kuti tishingirire ku Eslovênia, uye takafundirazve zviro zvimweni zvipsva.

Asi cinjo dzakarumbwa dzeciitika. Mu gore ra 2000 takasanangurhwa kuti tiende kooseenzera ku Costa do Marfim yaigara ku África Ocidental. Pedzepo, mu Novembro ya 2002, nge ndaa ye zvinetso zve matongerhwo e nyika, takadikana kutiza kuenda ku Serra Leoa. Ikona, mugariro wainga waa nani ngekuti mabongozozo ainga abva kupera. Zvakashupha kubuda ku Costa do Marfim ciriporipoco. Asi zviro zvatainga tafundira zvakatibetsera kurumbwa tino mupfaro.

Ku Serra Leoa, anhu akawanda aida kufundira cokwadi. Hama dzainga dzino rudo uye dzainga dzashingirira ke makore akawanda. Nge ndaa yazvo, isusu takakanda ndangariro dzedu pa mawara awona akanaka. Kunyazi hama dzainga dziri arombo, idzona dzaida kupasawo amweni zviya zvadzainga dzinazvo. Hanzvadzi imweni yakapasa Debbie macira, asi Debbie wakapsveruka kuti atende macira awona. Hanzvadziyo yakamubambidzira uye yakamubvunza kuti: “Pa nguwa ye hondo, hama dze mu nyika dzimweni dzakatibetsera maningi. Hino pari zvino, isusu tinodawo kuita izvona.” Inini na Debbie takasanangura kuteedzera muezaniso wawo.

Nokuhamba ke nguwa takakwanisa kuhwirira ku Costa do Marfim, asi zviro zvakazoshatazve ikona. Pedzepo mu Novembro ya 2004 taidikanazve kutiza. Isusu takaenda no ndeka dakara ku mbuto inogara masurudado e Cifrancês. Umwe na umwe wedu, wainga ano pasta yairema 10 kiru uye takatowatira ipona kamare, pasi. Pa zuwa rakazoteera takakwira ndeka yakakura tecienda ku Suíça. Takaguma ku Bheteri pakati pe usiku, asi takatambirhwa no rudo rakakura maningi no hama dze Firiyari uye no afundisi e Cikora ce akuru no abati anoseenzera pamwepo no akadzi awo. Awona akanyasa kutikhumbatira, akatipasa zvokurhya uye akatipasa mashokorati e ku Suíça. Izvona zvakaita kuti tizwe kuti tinodiwa maningi.

Isusu takaseenza ku Gana uye pedzepo, takakwanisa kuhwirira ku Costa do Marfim mumasure mekuti mabongozozo ainga ambopunguka padoko. Unaki watakapangidzirhwa no hama dzedu, wakatibetsera kuti tikwanise kubatana no migariro dzinoshupha uye kucinja ciriporipoco. Inini na Debbie tinotendera kuti rudo i wara rinonyanya kuoneka pakati pe sangano ra Djehovha. Nge ndaa yazvo, tinoda kurumbwa tecinyasa kukoshesa zviya zvatinoizirhwa no hama dzedu. Nokuhamba ke nguwa, takazwisisa kuti zviro zvinoshupha zvataibatana nazvo, ndizvona kamare zvakatirowedza.

KU NYIKA INOZWI ORIENTE MÉDIO

Muna 2006 takatambira tsamba yaibva ku Sedhi Mundiyari yecibhuya kuti taizogara no basa ripsva, asi pari zvino taidikana kuenda ku Oriente Médio. Izvi zvaida kureya kuti taizorarama mugariro mupsva, zvinetso zvipsva uye taidikana kudjairana no mireketero uye tsika dzipsva. Isusu taiziya kuti tainga tino zviro zvakawanda zvataidikana kufundira ku mbuto iya yekuti yainga ino zvinetso ngo ndaa ye zvematongerhwe e nyika uye magereja. Zvaipfadza maningi kuona mireketero dzakasiyana-siyana mu ungano. Zvaigara pamhene kuti kunyazi no musiyano we tsika, hama dzainga dzakabatana maningi ngokuti dzaitondowedza nhungamiriro dze sangano ra Djehovha. Isusu taishamisika maningi no hama uye hanzvadzi ngokuti idzona dzainga dzino ushingi maningi uye dzaibatana no kuphikiswa mu mhuri, no anyacigarisano, adoni e kucikora uye e ku basa.

Mu 2012, isusu takaenda ku gungano rinokosha ku Tel-Aviv, ku Israeri. Iwona wainga uri musangano wekutanga wakakura maningi wekuti anhu a Djehovha akapedzesera kuuita pa Pentekosti ya 33 K.A. Zvezvirokwazvo musangano uu wakadakadza maningi zvekuti atizoukanganwi

Makore ese ataiseenzera ikona, takavhakacira nyika imweni yekuti basa redu rairambidzwa. Takatora mabhuku edu manganani, takaenda mu basa re kuparidzira uye takakwanisa kupinda magungano manganani. Ku dii rese-rese taikwanisa kuona masurudado ano pfuti aionerera. Asi taizwa takacengeteka ngokuti tainga tino hama dzedu.

TAKAHWIRIRA KU ÁFRICA

Mu 2013 tapaswa basa ratainga tisikakariri. Takabvunzwa kuti tiende koseenzera ku Firiyari ye Kinshasa ku Congo, nyika iyona yainga yakarungama maningi, asi yainyanya kuzikanikwa no urombo uye hondo. Pakutanga takarangarira kuti: “Sezvo tinoziya África, hino azvizotishuphiri maningi.” Asi tainga tino zvakawanda zvataida kufundira, maka-maka ngokuti taidikana kuita rhwendo mu makwanza asikazi kunyasa kugadzirhwa. Uye takaona zviro zvakanaka maningi ikona. Ngo muezaniso, hama dzaishingirira no mupfaro kunyazi no zvinetso zve mare, dzaida maningi basa re kuparidzira uye dzaipeta masimba kuti dzipinde misangano uye magungano. Takanyasa kuona kuti basa re kuparidzira raibudirira nge ndaa ye rubetso uye makomborero a Djehovha. Pataiseenza ku Congo, takafundira zviro zvinokosha maningi uye takagara no shamwari dzekuti dzakagara mhuri katiri.

Kupera ke gore ra 2017 takaenda ku África do Sul kuti tiite basa ripsva. Firiyari ye ikona yainga yakakura maningi kudarika mafiriyari amweni atakamboseenzera. Kunyazi mabasa ataipaswa ikona ainga ari mapsva. Izvona zvaidazve kureya kuti tainga ticino zvimweni zvataidinaka kufundira. Asi zvimweni zvatainga tafunda kare zvakatibetsera pa basa iri ripsva. Kubvira patakaguma takapfara maningi nge kuziya hama dzekuti dzaano makore akawanda dzecishingairira mu basa ra Djehovha. Zvinopfadza maningi kuona hama dze mhuri ye Bheteri dzeciseenza pamwepo dzakabatana, kunyazi dzecibva mu mbuto dzakasiyana-siyana. Aseenzi a Djehovha anopeta masimba kuti agare no unhu upsva uye kuti aseenzese zvokwadi zvisikacinji zve Bhaibheri, izvona zvinoita kuti Djehovha aakomborere no runyararo.

Pa makore ese aya, inini na Debbie takatambira mabasa anoshamisa maningi, takadjairana no tsika dzakasiyana-siyana uye takafundira mireketero mipsva. Anguwa dzesepi dzekuti izvona zvainga zviri nyore, asi nguwa dzese takazwa Djehovha ecitipangidzira rudo nge kuseenzesa sangano rake uye hama dzedu. (Pis. 144:2) Tino rugondo rekuti kuseenzesera Djehovha mu nguwa yakadzara zvakatibetsera kuti tigare aseenzi akanaka a Djehovha.

Ndinotenda maningi nge zvese zvandakafundiswa nge abereki angu, rubetso randakapaswa no mukadzi wangu Debbie uye muezaniso wakanaka we hama dze mu nyika yese. Tecirangarira zvicaitika mune ramangwana, inini no mukadzi wangu tashinga kurumbwa tecifundiswa no Mufundisi wedu Mukuru, Djehovha.