Djehovha Anotibetsera Kudini kuti Tishingirire?

1. Ngei tecidikana kushingirira, uye ndiyani acatibetsera? (1 Pedru 5:10)

NGEKUTI upenyu mazuwa ano ekupedzesera uri kushupha maningi, tese isusu tinodikana kushigirira. Amweni ari kutambudzika nge nhenda yakakura. Amweni ari kunetseka nge kufirhwa no munhu waanoda. Uye amweni ari kubatana no kuphikiswa mu mhuri uye no anyautongi. (Mat. 10:18, 36, 37) Asi mungagara no rugondo rekuti pasinei no dambudziko ramuri kubatana naro, Djehovha angamubetserai kuti mushingirire.—Erengai 1 Pedru 5:10.

2. Ndiani anotibetsera kuti tikwanise kushingirira?

² Kushingirira zvinoda kureya kurumbwa makabamba uye musikaruzi kariro kunyazi tecibatana no zvitsinzwa, kuteererhwa uye miedzo. Asi atingakwanisi kushingirira no simba redu kamare tinokwanisa kushingirira ngekuti; Djehovha anotibetsera iyena anotipasa “simba rakakura rinodarika re anhu.” (2 Ako. 4:7) Mu fundo ino, ticaona mishobo mirongomuna inoseenzeswa na Djehovha kuti atibetsere pakushingirira. Kusiya izvona ticaonawo kuti tingakhorovhera kudini mushobo umwe na umwe waanoseenzesa kuti atibetsere.

MUNAMATO

3. Ngei tingabhuya kuti munamato cishamiso cekuti tikwanise kubhuya na Djehovha?

³ Djehovha anoita zviro zvinoshamisa kuti atibetsere kushingirira. Iyena akaita kuti kunyazi isusu anhu anocitema, tikwanise kureketa naye. (Aheb. 4:16) Rangarirai zvinoteera: Isusu tingakwanisa kuita munamato kuna Djehovha, pa nguwa ipi hayo uye ngezve nyaya ipi hayo. Tingakwanisa kureketa naye mu mureketero upi hawo, pambuto ipi hayo, kunyazi tiri pedu tega kana kuti takasungwa. (Djon. 2:1, 2; Zvii. 16:25, 26) Patinozwa takaora mwoyo uye tecishuphika kuda kumubvunza mazwiro edu, kunyazi zvakadaro Djehovha angakwanisa kuzwisisa zvatinoda kumubvunza. (Aro. 8:26, 27) Zvezvirokwazvo munamato, unoita kuti isusu tirekete na Djehovha icona icishamiso!

4. Tinoziya kudini kuti kuita mutamato tecikumbira kushingirira zvinoenderana no kuda ka Djehovha?

⁴ Mu Bhaibheri Djehovha anotigondesa kuti, “kana tikakumbira ciro cipi haco maererano no kuda kake iyena anotizwa.” (1 Juau 5:14) Kodi zvinoita here kuti tiite mumamato kuna Djehovha tecikumbira kuti atibetsere kushingirira? Honde! Kuita izvona kunoenderana no cido cake. Tinoziya kudini izvona? Patinoshingirira kunyazi tecisongana no muedzo tinoita kuti Djehovha adaire uya anomushora, Sathani Dhiyabhurosi. (Zvie. 27:11) Kusiya izvona, Bhaibheri rinobhuya kuti Djehovha anoda maningi “kupangidza simba rake ecibetsera aya ano mwoyo wakaperara kaari.” (2 Mak. 16:9) Hino tingagara no rugondo rokuti Djehovha ano simba rekutibetsera kuti tishingirire uye iyena anoda kuita izvona.—Isa. 30:18; 41:10; Ruka 11:13.

5. Munamato unotibetsera kudini kuti tizwe runyararo? (Isaya 26:3)

⁵ Bhaibheri rinobhuya kuti patinofunungura mwoyo wedu kuna Djehovha, “runyararo ra Mwari rinodarika kuzwisisa kese rinocengeta mwoyo yedu no ndangariro dzedu.” (Afi. 4:7) Awona i makomborero akakura maningi. Anhu asikaseenzeri Djehovha anosonganawo no matambudziko uye akawanda akhona anoedza kugumira runyararo re mu ndangariro nge mushobo wakasiyana-siyana. Ngo muezaniso, anganani anoedza kuseenzesa mushobo umweni we kunyasa kurangarira kuti aduse zvese zviri mu ndangariro dzawo, kubatanidzawo zviro zvinoita kuti aore mwoyo. Asi kudusa zvese zviri mundangariro dzedu, kunokanda pangozi kunamata kedu. (Ezanisai na Mateu 12:43-45.) Kusiya izvona, runyararo ratinopaswa na Djehovha paya patinoita munamato, rakakura maningi kudarika runyararo rinogara no munhu paya paanoita zvese kuti aduse zviro zvinomuitisa kuti aore mwoyo. Patinoita munamato tinopangidza kuti tinonyasa kugonda Djehovha uye mugumisiro wakhona iyena anotipasa “runyararo risikaperi.” (Erengai Isaya 26:3.) Iyena anozviita kudini? Umwe we mushobo ngewe kutibetsera kuedzurira tsamba dzinotigondesa kuti Djehovha anotida uye anoda kutibetsera. Kuedzurira matsamba aya kunoita kuti tizwe runyararo re mundangariro uye re mu mwoyo.—Pis. 62:1, 2.

6. Munganyasa kukhorovhera kudini cipo ce kuita munamato? (Onaiwo foto.)

⁶ Cinyi camungaita. Pamunoedzwa kutenda kenyu, “khandirai zvese zvinomushuphai kuna Djehovha” uye itai munamato kaari mecikumbira runyararo. (Pis. 55:22) Kumbiraiwo ungwaru wamunoda kuti mukwanisane no dambudziko ramuri kubatana naro. (Zvie. 2:10, 11) Kusiya izvona, pamunoita munamato musakanganwe kutenda Djehovha. (Afi. 4:6) Onai zvamuri kubetserhwa na Djehovha pazuwa rimwe na rimwe uye tendai nge zvaari kumuitirai. Musasiye kuti zvitsinzwa zvamuri kubatana nazvo zvimuitisei kuti musaone makomborero amuri kupaswa na Djehovha.—Pis. 16:5, 6.

SOKO RA MWARI

7. Ngei kufunda Bhaibheri kecitibetsera kushingirira?

⁷ Djehovha akatipasa Soko rake kuti ritibetse kushingirira. Patinonga tecifunda Bhaibheri ticagumira tsamba dzakawanda dzinotigondesa kuti Djehovha acatibetsera. Onai muezaniso unopangidza izvona. Mateu 6:8 inoti: “Ngokuti Baba enyu anoziya zvamunoda musati matoakumbira.” Akabhuya masoko aya ndi Djesu, iyena ndiye anonyasa kuziya Djehovha kudarika munhu upi hake. Hino tingagara no rugondo rese rekuti patinobatana no zvinetso, Djehovha anoziya zvese zvatinoda uye acaticengeta. Bhaibheri rino matsamba akawanda akaita hingana aya anokwanisa kutipasa simba kuti tishingirire.—Pis. 94:19.

8. (a) Pasai muezaniso we cokwadi cisikacinji ce Bhaibheri cingatibetsera kushingirira? (b) Cinyi cingatibetsera kuti tiedzurire zvokwadi zve Bhaibheri paya patinonga tecida?

⁸ Zvokwadi zve Bhaibheri zvinotibetsera kuti tishingirire. Izvona, zvinotipasa uzii kuti tiite zvisananguro zvakanaka. (Zvie. 2:6, 7) Ngo muezaniso, Bhaibheri rinotibvunza kuti tisanetseke no zviro zvicaitika mune ramangwana, asi tigonde Djehovha mazuwa ese. (Mat. 6:34) Kana tino musambo wekuerenga Bhaibheri uye kunyasa kurangarira zvicagara nyore kuedzurira zvokwadi zve Bhaibheri paya patinonga tecida.

9. Ngano dze mu Bhaibheri dzinotibetsera kudini?

⁹ Mu Bhaibheri tingakwanisawo kuona ngano dze anhu akaitawo hingana isusu akagonda Djehovha uye akabetserhwa naye. (Aheb. 11:32-34; Tig. 5:17) Kunyasa kurangarira ngezve ngano idzi, kuno tunhudzira rugondo redu kuna Djehovha rekuti iyena: “Ndiye mbuto yedu ye kutizira no simba redu, nguwa dzese iyena akagadzirira kutibetsera patinotambudzika.” (Pis. 46:1) Kuona miezaniso yakanaka ye aseenzi akatendeka kunotikohomedzesa kuti titeedzere kutenda kawo uye kushingirira kawo.—Tig. 5:10, 11.

10. Mungabetsereka kudini no Soka ra Mwari?

¹⁰ Cinyi camungaita. Erengai Bhaibheri mazuwa ese uye garai no mundandanda we matsamba angamubetserai. Anhu akawanda anoona kuti zvakanaka kutanga zuwa nge kuongorora matarhwa e zuwa no zuwa. Ngekuita izvona, aona angakwanisa kurangarira zviro zvinobetsera mukati mo zuwa. Ndizvona zvakazwa hanzvadzi imweni inozwi Mariea baba ayo na mai ayo paakabatana no nhenda yo kanseri. Cinyi cakaibetsera kuti ishingirire payaicengeta abereki ayo mu mwedzi dzekupedzesera we upenyu wawo? Iyona inobhuya kuti: “Mazuwa ese ndai Ongorora Matarhwa e Zuwa no Zuwa uye ndainyasa kurangarira ngezve tsamba ye zuwa irona.” Iyena unobhuyazve kuti: “Musambo uwona waindibetsera kuti ndikande ndangariro dzangu mu tsamba yo Bhaibheri uye kuti ndisarangarire nge zvangu basi uye ngezve mugariro unoshupha wandaibatana nawo.”—Pis. 61:2.

HAMA DZEDU

11. Tinozwa kudini patinorangarira ngezve kushingirira kuri kuita hama no hanzvadzi dzedu?

¹¹ Djehovha anoseenzesa hama no hanzvadzi dzedu kuti dzitibetsere kushingirira. Kuziya kuti: ‘Matambudziko atiri kubatana nawo ari kubatanawo no hama dzedu dziri mu nyika yese’ kunotipasa rungondo rekuti isusu atiripi tega. (1 Ped. 5:9) Mu nyika yese mune hama dzirikubatanawo no zvinetso zvimwezvo zvatiri kubana nazvo uye dziri kushingirira. Izvona zvinopangidza kuti pasinei no matambudziko atiri kubatana nawo, isusu tingakwanisa kushingirira!—Zvii. 14:22.

12. Hama no hanzvadzi dzedu dzingatibetsera kudini uye isusu tingaabetserawo kudini? (2 Akorinti 1:3, 4)

¹² Hama no hanzvadzi dzedu dzinokwanisawo kutibetsera kuti tishingirire ngo zviya zvaanobhuya uye zvaanoita. Muphostori Pauro wakabetserhwawo no hama. Kakawada kese mu tsamba yake iyena wakatenda rubetso raakapagidzirhwa no hama no hanzvadzi paainga akasungwa uye akatobhuya mazina adzo mu tsamba dzeke. Idzona dzakamunyaradza, dzakamubambisa uye dzakamupasawo zviya zvaaida. (Afi. 2:25, 29, 30; Ako. 4:10, 11) Nyamasi uno, tiri kubatanawo no mugariro wakaezana. Patinodikana kushingirira, hama dzedu dzinogara ku dii redu dzecitibetsera uye idzona padzinoda rubetso isusu tinogarawo ku dii radzo tecidzibetsera. —Erengai 2 Akorinti 1:3, 4.

13. Cinyi cakabetsera Maya kuti ashingirire?

¹³ Mugore ra 2020 mapurisiya manganani e ci Russia akacesa mumba me hanzvadzi imweni inozwi Maya. Pedzepo aona akaitora kwenda nayo kutribhunari nge ndaa yekuti iyona yaibhuya zvainotenda no anhu amweni. Pamugariro uu hama dzakabambisa maningi maya. Iyana unopanganidza kuti: “Pano nguwa imweni yekuti ndaizwa ndakaremba uye ndakatsukwara uye hama no hanzvadzi dzakandifonera uye dzakanditarirawo tsamba dzecindibvunza kuti dzaindida. Inini daizviziya kuti ndainga ndino mhuri yakakura maningi uye inondida. Asi kubvira muna 2020, ndaa kuona kuti aona anondikoshesa maningi.”

14. Tinganyasa kudini kukhorovhera rubetso re hama no hanzvadzi dzedu? (Onaiwo foto.)

¹⁴ Cinyi camungaita. Kana imwimwi mecibatana no zvinetso, garai padhuze no hama. Musapsveruke kukumbira rubetso ku akuru e ungano. Aona angakwanisa kugara “mbuto yekutizira mhepo uye mbuto yekufindarira mvura ino dutu.” (Isa. 32:2, masoko e pasi) Kupinda izvona, edzurirai kuti hama dzirikubatanawo no zvinetso. Kana imwimwi mukabetsera hama irikuda rubetso mucakwanisa kuona zviro ngo mushobo wakanaka uye uri pakati no pakati uye izvona zvingamubetserai kuti mushingirire.—Zvii. 20:35.

KARIRO YEDU

15. Kariro yakabetsera kudini Djesu uye iyona ingatibetserawo kudini? (Ahebheru 12:2)

¹⁵ Kariro yatakapaswa na Djehovha ngo yo zvirokwazvo uye inotibetsera kuti tishingirire. (Aro. 15:13) Ndizvona zvakaitikawo na Djesu. Iyena waiziya kuti kudai aizorumbwa akatendeka zvaizomubetsera kuti arumbwe ecidziirira zina ra Djehovha. Djesu ainga ano cido cakakura cekugarazve na Baba ake kudenga uye no kuhamba ke nguwa, ozotonga pamwepo no hama dzake. Kariro ii yakamubetsera kuti ashingirire nguwa inoshupha ye upenyu wake paainga ari pa nyika. (Erengai Ahebheru 12:2.) Ngo mushobo umwewo kariro yedu yatinayo ye kurarama nekusikaperi munyika ipsva, inotibetsera kuti tishingirire zvinetso zvipi hazvo zvatinobatana nazvo mu nyika ino ya Sathani.

16. Kariro yakabetsera kudini hanzvadzi imweni kushingirira uye mafundei no zvayakabhuya?

¹⁶ Onai kuti kariro ye kurarama mu nyika ipsva yakabetsera kudini hanzvadzi imweni inogara ku Russia inozwi Alla. Mwamuna wayo akakadwa mu kadheya yeciimira kuti itongwe. Izvona pazvakaitika, Alla wakabhuya kuti: “Kuita munamato ngezve kariro yedu ye ramangwana uye kunyasa kurangarira ngezvayo zvakandibetsera kuti ndisaore mwoyo. Inini ndinoziya kuti mbai-mbai pano miedzo idzi dzicapera. Djehovha acawina uye isusu ticakunda.”

17. Tingaitei kuti tibetsereke no kariro yatinopaswa na Djehovha? (Onaiwo foto.)

¹⁷ Cinyi camunodikana kuita. Dusai nguwa yekunyasa kurangarira ngezve ramangwana rinoshamisa ririkutigondesa Djehovha. Edzai kurangaridza muri mu nyika ipsva uye rangarirai zvikonzero zvicaita kuti mupfare. Ngekuita kudaro, citsinzwa cipi haco catingasongana naco zvino cicaita hinga ce nguwa doko uye “cakareruka.” (2 Ako. 4:17) Kusiya izvona, itai zvese zvamunokwanisa kuti murekete no amweni ngezve kariro iyona. Rangarirai kuti zvinoshuphira kudini anhu kurhwisana no zvinetso mu nyika ino ya Sathani, asina kariro yatinopaswa na Mwari mune ramangwana. Kunyazi kucedza ke nguwa doko basi, zvinoita kuti anhu apfarire kariro iyona.

18. Ngei tecidikana kugonda zvipikirhwa zva Djehovha?

¹⁸ Mumasure mekushingirira matambudziko akawanda, Djobo akabvunza Djehovha kuti: “Uye zvino ndaa kuziya kuti munokwanisa kuita zviro zvese uye apana camunorangarira kuita cotama kuitika.” (Djobo 42:2) Djobo wakafundira kuti apana cingapingaidza Djehovha kuti adzadzisa cinangwa cake. Cokwandi icona, cingakwanisa kutipasa simba kuti tishingirire. Rangarirai ngezve muezaniso unoteera, mwanakadzi umweni urikurhwara iyena wakaora mwoyo ngokuti wakaenda kune mamedhiko akawanda asi apana kana umwe hake wakwanisa kumurapa. Asi parizvino, waona medhiko umweni uno esperiensiya uye waanogonda. Medhikowo unoona nhenda ino mwanakadziwo uye unomupanganidzira kuti angaraphwa kudini. Kunyazi eciziya kuti ucapedza nguwa yakareba kuti iyena apore, mwanakadziwo unozwa kurerukirhwa. Cinobetsera mwanakadziwo kuti ashingirire, i kariro inoshamisa yaanayo, kariro yekuti iyena ucatamba. Ngo mushobo umwewo, kugara no rugondo kuti kariro yedu ye ramangwana icadzadzika, kunotibetsera kuti tishingiririe.

19. Tinodikana kuitei kuti tishingirire?

¹⁹ Hinga zvataona, munamato, Soko ra Mwari, hama dzedu uye kariro yatinayo, i rubetso ratinopaswa na Djehovha kuti tikwanise kushingirira. Kana tikanyasa kukhorovhera rubetso rimwe na rimwe ticakwanisa kuzwa kubetserhwa, katinoizwa na Djehovha pacinetso cipi haco uyewo ticakwanisa kushingirira dakara razoguma zuwa rekuti matambudziko ese anokonzerhwa no nyika ino ya Sathani azopera.—Afi. 4:13.