MUSORO WE KUFUNDA 33
NGOMA 4 “Djehovha Ndiye Muushi Wangu”
Tendai Rudo ra Djehovha
“Inini ndakakukweera kandiri no rudo risikacinji.”—DJER. 31:3.
CINANGWA
Kuona kuti ngei zvinokosha kugara no rugondo rokuti Djehohva anotida uye kuona kuti tingatunhudzira kudini rugondo redu pa cokwado icona.
1. Ngei imwimwi makadzipira kuna Djehovha? (Onaiwo mufanikiso.)
MURIKUEDZURIRA here pamakadzipira kuna Djehovha? Imwimwi makaita cisananguro icona ngekuti maiziya Djehovha uye makatanga kumuda. Imwimwi makagondesa Djehovha kuti maizokanda kuda kake pa mbuto yokutanga mu upenyu menyu uye kuti nguwa dzese maizomuda no mwoyo wese, no mwiya wenyu wese, no ndangariro dzenyu dzese uye simba. (Mark. 12:30) Kubvira ipona, rudo renyu kaari rakarumbwa recitunhudzira. Hino, maizodaira kudini kana munhu akamubvunzisai kuti: “Kodi imwimwi munodadi kamare Djehovha?” No rugondo rese imwimwi maizomudaira kuti: “Honde, inini ndinoda maningi Djehovha kudarika ciro cipi haco kana kuti munhu upi hake!”
Kodi muciri kuedzurira rudo ramainga munaro kuna Djehovha pamakadzipira upenyu wenyu kaari uye mobhabhatidzwa here? (Onai ndima 1)
2-3. (a) Djehovha anoda kuti isusu tigare no rugondo rei? (Djeremiya 31:3) (b) Zvinyi zvaticaona mu fundo ino?
2 Imwimwi maizodaira kudini kana munhu akamubvunzisai kuti: “Munocokwadi cokuti Djehovha anomudai here?” Kodi imwimwi maizorangarira kairi kuti mumudaire, pamweni mecirangarira kuti amuzi kusisira rudo ra Djehovha here? Hanzvadzi imweni yakarerhwa nge mushobo unoshupha inoti: “Inini ndinozviziya kuti Djehovha anondida uye ndino cokwadi nazvo. Asi kakawanda kakhona ndinokanakana kuti kodi Djehovha anondidadi here.” Mungaziya kudini zvinorangarirhwa na Djehovha nge zvenyu?
3 Djehovha anoda kuti imwimwi mugare no rugondo rokuti iyena anomudai. (Erengai Djeremiya 31:3.) Cokwadi ngecekuti Djehovha ndiye akamukweerai kaari. Pamakadzipira uye mobhabhatidzwa imwimwi makagara no cipo cinokosha maningi—rudo rakagondeka ra Djehovha. Izvona zvinoreya kuti iyena anomudai maningi uye aazombomusii. Rudo irona ndirona rinoita kuti Djehovha aone anamati ake hingana “pfuma inokosha” kutobatanidzawo imwimwi. (Mara. 3:17, masoko e pasi) Djehovha anoda kuti imwimwi muzwe hingana zvakazwa muphostori Pauro. Iyena wainga ano rugondo rese rekuti Djehovha aimuda zvekuti wakatara kuti: “Ngokuti ndino rugondo kuti kunyazi rufu, upenyu, ngirozi, utongi, zviro zviriyo zvino, zviro zvicauya, masimba, kukwirira, kudzika, kana cisikwa cipi haco azvizokwanisi kutiparadzanisa mu rudo ra Mwari riri muna Kristu Djesu Tenzi wedu.” (Aro. 8:38, 39) Mu fundo ino ticada kuona kuti ngei tinodikana kutunhudzira rugondo redu rekuti Djehovha anotida uye kuti zvinyi zvingatibetsera kuti tiite izvona.
NGEI ZVINOKOSHA KUGARA NO RUGONDO ROKUTI DJEHOVHA ANOTIDA
4. Tingarhwisana kudini no imwe ye mirau ya Sathani?
4 Patinogara no rugondo rokuti Djehovha anotida, tinokwanisa kurhwisa “mirau” ya Sathani. (Aef. 6:11) Sathani ucaita zviri zvese kuti atiitise kuti tiime kuseenzera Djehovha. Imwe ye mirau yaanoseenzesa, manyepo e kuti Djehovha aatidi. Musambokanganwe kuti Sathani unondopsvaka zvakamunakira basi. Iyena unoita izvona paya pekuti tiri kunetseka mu ndangariro nge ndaa ye zviro zvakaitika kare, zvinetso zvatiri kubatana nazvo zvino uye kunetseka nge ndaa ye ramangwana. (Zvie. 24:10) Sathani wakaita hingana mhondoro inokhorovhera kubata cinyama paya painonga iri yoga. Paya patinonga takaora mwoyo, Sathani unokhorovhera mukana uwona kuti atiitise kuti tisiye kuseenzera Djehovha. Asi, tikarumbwa tecibambisa rugondo redu rokuti Djehovha anotida, ticakwanisa kuwina pa mirau ya Sathani.—1 Ped. 5:8, 9; Tig. 4:7.
5. Ngei tinodikana kuzwa tecidiwa uye tecikosheswa na Djehovha?
5 Patino rugondo rokuti Djehovha anotida zvinoita kuti tikhwedere dhuze naye. Ngei tingabhuya izvona? Ngekuti Djehovha akatisika no cido co kuda amweni uye cekudiwa. Paya patinodiwa isusu tinopangidzira rudo rimwero ku aya anotida. Hino, paya patinozwa kuti Djehovha anotida uye anotikoshesa, isusu tinonyasawo kumuda. (1 Juau 4:19) Uye paya patinyasa kumuda, iyena acanyasawo kutida. Bhaibheri rinonyasa kubhuya izvona parinoti: “Khwederai dhuze na Mwari, uye iyena acakhwedera kamuri.” (Tig. 4:8) Asi tingabambisa kudini rugondo redu rekuti Djehovha anotida?
CINYI CINGATIBETSERA KUTENDA RUDO RA DJEHOVHA?
6. Kuti titende rudo ra Djehovha, cinyi catinodikana kukumbira pa minamato yedu?
6 Rumbwai meciita munamato uye mecinyasa kubhuya zvamunoda. (Ruka 18:1; Aro. 12:12) Kumbirai Djehovha kuti amubetserei kudziona hinga mushobo waanomuonai. Itai izvona kakawanda pa zuwa kana zvecidikanwa. Izvirokwazvo kuti azviri nyorepi kuimisa mwoyo wekuti nguwa dzese uri kurumbwa wecititongesa. Asi edzurirai kuti Djehovha mukuru kudarika mwoyo yenyu. (1 Juau 3:19, 20) Iyena anonyasa kumuziyai kupinda imwimwi kamare uye iyena anoona zviro kamuri zvekuti imwimwi pamweni amutokwanisi kuzviona. (1 Sam. 16:7; 2 Mak. 6:30) Hino, musasiye kudurura mazwiro enyu kuna Djehovha mecikumbira rubetso kuti mutende rudo rake. (Pis. 62:8) Mumasure me kuita munamato, zvinokosha maningi kuteerera matanho manganani anokosha. Ngatione kuti ngaapi.
7-8. Mapisarema anopangidza kudini kuti Djehovha anotida?
7 Gondai zvinobhuiwa na Djehovha. Djehovha akafemera atari e Bhaibheri kuti anyase kupanganidza kuti iyena akadini. Onai kuti Dhavhidhi akapanganidza kudini no rudo kuti Djehovha anotikoshesa maningi. “Djehovha ari dhuze no aya akaora mwoyo; Anoponesa aya akatsukwara.” (Pis. 34:18, masoko e pasi) Paya pamunozwa makatsukwara, imwimwi mungarangarira kuti apana munhu angazwisisa mazwiro enyu. Asi, Djehovha anogondesa kugara dhuze nemwi, ngekuti pa nguwa iyona iyena anoona kuti imwimwi munoda maningi kubetserhwa naye. Pa Pisarema imweni, Dhavhidhi wakatara kuti: “Kandai misodzi yangu mu cigubu co dehwe.” (Pis. 56:8) Djehovha anomuonai paya pamunonga makatsukwara uye pamunonga mecitambudzika. Iyena anonetseka maningi na imwimwi uye anozwa kurhwadziwa kamunonga mecizwa. Kuita hingana kukosha ke donho re mvura ku uya uri kuita rhwendo ku renje, misodzi yedu inokosha maningi kuna Djehovha. Pisarema 139:3, inoti: “Imwimwi [Djehovha] munonyasa kuziya makwanza angu.” Djehovha anoona zvese zvamunoita, asi iyena anokanda ndangariro dzake pa zviya zvakanaka. (Aheb. 6:10) Ngei? Ngekuti iyena anokoshesa maningi zvese zvamunoita kuti mumupfadze.a
8 Eciseenzesa matsamba aya e mu Bhaibheri anonyaradza, zvinoita hingana kuti Djehovha ari kumubvunzai kuti: “Ndinoda kuti uziye kuti inini ndinokuda uye ndinonetseka maningi newe.” Asi hingana zvataona pakutanga, Sathani unoda kutiitisa kuti isusu tirangarire kuti Djehovha aatidi. Hino, kana mukakana-kana mecirangarira kuti Djehovha aamudi, cimboimai morangarira kuti: ‘Ndinodikana kutenda zvinobhuya ani—“baba e manyepo here” kana kuti “Mwari we zvirokwazvo”?’—Juau 8:44; Pis. 31:5.
9. Djehovha anogondesei ku ese aya anomuda? (Ekisodho 20:5, 6)
9 Nyasai kurangarira kuti Djehovha anodaira kudini rudo ratinopangidza kaari. Rangarirai zvakabvunza Djehovha Mozesi uye no Aisraeri. (Erengai Ekisodho 20:5, 6.) Djehovha anogondesa kuti anorumbwa ecipangidzira rudo rake rakagondeka ku aya anomuda. Masoko aya, anopangidza kuti Djehovha anoda aya anomuda. (Nee. 1:5) Hino, kana imwimwi mukatanga kukana-kana kuti Djehovha anomudadi kamare, imai morangarira kuti: ‘Inini ndinoda Djehovha here?’ Kana imwimwi mecida Djehohva uye meciita zvese zvamunokwanisa kuti mumupfadze, iyena anomugondesai kuti anomuda maningi. (Dha. 9:4; 1 Ako. 8:3) Nge masoko amweni, kana imwimwi musikakani-kani kuti munoda Djehovha, hino ngei maizokana-kana kuti Djehovha anomudai? Isusu tinodikana kugonda rudo, uye kugondeka ka Djehovha.
10-11. Djehovha anoda kuti imwimwi muone kudini rusudzunuro? (Agaratiya 2:20)
10 Nyasai kurangarira ngezve rusudzunuro. Cibairo ce rusudzunuro ca Djesu Kristu e cipo cakakura maningi ca Djehovha ku anhu. (Juau 3:16) Asi icona cingagarawo cipo kamuri imwimwi pacenyu here? Honde! Ngo muezaniso, rangarirai ngezva muphostori Pauro. Iyena wainga wakaita zviro zvakawanda zvakashata uye kunyazi mumasure mekuti wagara Mukristu, iyena waindodikana kurumbwa ecirhwisana no kutama kukwana kake. (Aro. 7:24, 25; 1 Ti. 1:12-14) Asi iyena waiona rusudzunuro hingana cipo caakapaswa iyena pacake na Djehovha. (Erengai Agaratiya 2:20.) Edzurirai kuti ndi Djehovha akafemera muphostori Pauro kuti atare masoko aya uye zvese zviri mu Bhaibheri zvakatarhwa kuti zvitifundise. (Aro. 15:4) Hino, masoko a Pauro anopangidza kuti Djehovha anoda kuti imwimwi muone kudini rusudzunuro? Hingana cipo cinokosha kamuri. Pamunoona rusudzunuro ngo mushobo uwona, imwimwi munobambisa rugondo renyu rokuti Djehovha anomudai maningi.
11 Isusu tinotenda maningi Djehovha ngo kutuma kaakaita Djesu pa nyika kuti atifire. Asi cikonzero cimweni cakaita kuti Djesu auye pa nyika, ngocokubhuya no amweni cokwadi ngezva Djehovha. (Juau 18:37) Cokwadi ici cinobatanidza rudo rakakura rina Djehovha ku ana ake.
DJESU ANOTIBETSERA KUDINI KUTI TITENDE RUDO RA DJEHOVHA
12. Ngei tingagonda zviya zvakabhuiwa na Djesu ngezva Djehovha?
12 Djesu paainga ari pa nyika, iyena aipfarira maningi kupanganidzira anhu kuti Djehovha ndi Mwari akadini. (Ruka 10:22) Isusu tinozvikonzero zvakawanda kuti tigonde zvakabhuya Djesu ngezva Djehovha, ngokuti iyena akagara ke nguwa yakareba na Djehovha kudenga asati auya pa nyika. (Ako. 1:15) Djesu wene aizwa ecidiwa maningi na Djehovha uye iyenawo akaona mushobo waida Djehovha ana Ake akatendeka. Hino Djesu anotibetsera kudini kuti tigare no rugondo rekuti Djehovha anotida?
13. Djesu anoda kuti isusu tione kudini Djehovha?
13 Djesu anotibetsera kuti tione Djehovha hingana mushobo waanoona. Mu maevhangeri Djesu akadainza Djehovha kuti “Baba” kanokwana kuita 160. Uye, paaireketa no ateeri ake aidainza Djehovha kuti “Baba enyu” kana kuti “Baba enyu e kudenga.” (Mat. 5:16; 6:26) Masoko e kufunda mu ciputukezi pana Mateu 5:16 anoti: “Aseenzi a Djehovha akararama Djesu asati auya pa nyika akaseenzesa mazina ekureremedza Mwari kuti apanganidze ngezva Djehovha uye kuti arekete naye. Mazina akaita hingana ‘Wemasimba Ese,’ ‘Mukurusa,’ uye ‘Musiki Wakakura.’ Asi Djesu aiseenzesa kakawanda soko rokuti ‘Baba’ rainga risikashuphi uye rinozikanika. Na izvona, iyena akapangidza kuti Mwari anoda kuti anamati ake azwe ari dhuze naye.” Zviri pamhene kuti Djesu anoda kuti isusu tione Djehovha hingana mushobo waanoona—hingana Baba ano unaki, anoda maningi ana awo. Ngatione miezaniso miiri inopangidza kuti Djesu akaseezesa kudini soko rokuti “Baba” ecireya ngezva Djehovha.
14. Djesu akapangidza kudini kuti umwe na umwe wedu unokosha kuna Djehovha? (Mateu 10:29-31) (Onaiwo foto.)
14 Cokutanga, onai zvakabhuiwa na Djesu pana Mateu 10:29-31. (Erengai.) Zvishiri izvona, azvina mazwiro ekuda Djehovha kana kuti kumuseenzera. Kunyazi zvakadaro, Baba edu anozvikoshesa maningi uye anozviziya paya pazvinombwera. Rangaridzai kuti Djehovha anotikoshesa zvakadini uye anonetseka maningi na umwe na umwe wedu unomuseenzera no rudo. Ecireketa ngezve soko rokuti “kunyazi tsitsi riri mu musoro menyu, rakaerengwa rese,” masoko ekufunda mu ciputukezi e vhersikuro 30 anoti: “Kunyasa kuziya kunoita Djehovha afundi a Djesu, kunopangidza kuti Djehovha anoada maningi.” Apana mubvunzo kuti Djesu anoda kuti isusu titende kuti umwe na umwe wedu anokosha maningi kuna Baba edu e kudenga.
Djehovha anokoshesa maningi cishiri zvekuti anociona paya pacinombwera pasi. Zvakadini imwimwi muno munamata makatendeka uye munomuda! (Onai ndima 14)
15. Masoko a Djesu anotifundiseizve ngezva Baba edu e kudenga? (Juau 6:44)
15 Onai muezaniso umweni unopangidza kuti pa nguwa ipi yekuti Djesu akaseenzesa soko rokuti “Baba.” (Erengai Juau 6:44.) Djehovha wene, no rudo uye unaki ndiye akamukweerai ku cokwadi. Ngei iyena akaita izvona? Ngekuti Baba enyu e kudenga akaona kuti imwimwi mainga muno mwoyo wakanaka uye mawara akanaka. (Zvii. 13:48) Masoko ekufunda mu ciputukezi ari pana Juau 6:44 anobhuya kuti pamweni Djesu aitsamira pa masoko a Djeremiya ari pa tsamba yakawakira fundo ino: “Inini ndakakukweera kandiri no rudo risikacinji [kana kuti, ndakarumbwa ndecikupangidzira rudo risikacinji].” (Djer. 31:3; masoko e pasi; ezanisai na Oze. 11:4.) Onai kuti izvona zvinoda kureyei. Baba edu ano rudo e kudenga, anorumbwa eciona mawara enyu akanaka kunyazi pamweni imwimwi musikakwanisi kuaona.
16. (a) Djesu anotifundisei ngezva Djehovha uye ngei tinodikana kutenda zvaanobhuya? (b) Mungabambisa kudini rugondo renyu rokuti Djehovha i Baba akanaka amungagara nawo? (Onai bhokisi rakazwi “Baba okuti Tese Isusu Tinodikana Kugara Nawo.”)
16 Paakabhuya ngezva Djehovha hingana Baba edu, zvaiita hingana kuti Djesu ainga ecibhuya kuti: “Djehovha Aababapi angu basi; iyena i Baba enyuwo. Inini ndinomugondesa kuti iyena anomudai maningi uye anonetseka maningi nemwi.” Hino, kana imwimwi mukazokana-kana nge ndaa ye rudo ra Djehovha, cimboimai mudzibvunzisa kuti: ‘Azvizi kunaka here kuti inini ndigonde masoko a Djesu wekuti anonyasa kuziya zvakanaka Baba edu kudarika munhu upi hake uye anoreketa cokwadi?’—1 Ped. 2:22.
RUMBWAI MECIBAMBISA RUGONDO RENYU
17. Ngei tinodikana kurumbwa tecibambisa gondeso redu rokuti Djehovha anotida?
17 Isusu tinodikana kuita zviri zvese kuti tibambise rugondo redu rekuti Djehovha anotida. Hingana zvataona mu fundo ino, Sathani i muzondi mukuru anoda maningi kuti tirembe uye tisiye kuseenzera Djehovha. Iyena anoita zviri zvese uye acarumbwa ecitiedza kuti tisagare no rugondo rokuti Mwari anotida. Atidikani kuwira pa murau uwona!—Djobo 27:5.
18. Mungabambisa kudini gondeso renyu mu rudo ra Djehovha?
18 Kuti mubambise rudo renyu kuna Djehovha, rumbwai meciita munamato kuti iyena amubetserei kudziona nge mushobo waanomuonai. Nyasai kurangarira ngezve mavhersikuro e mu Bhaibheri anopangidza rudo rakakura ra Djehovha uye kunetseka kaanoita no aya anomuda. Edzurirai kuti Munhu paanoda Djehovha, azvibviri kuti iyena asadewo munhuwo. Musakanganwe kuti rusudzunuro i cipo ca Djehovha kamuri pacenyu. Uye gondai zvakabhuya Djesu kuti Djehovha ndi Baba enyuwo e kudenga. Hino munhu angamubvunzisai kuti: “Imwimwi muno cokwadi cekuti Djehovha anomudadi here?” Imwimwi amuzorangariri kairi kuti mudaire kuti: “Honde iyena unondida! Inini ndinoita zvandinokwanisa mazuwa ese kuti ndipangidzire rudo rangu kaari!”
NGOMA 154 Rudo Arimboperi
a Kuti muone tsamba dzimweni dzinonyaradza uye dzinogondesa rudo ra Djehovha katiri, onai pakazwi: “Kusama Kugara no Rugondo” mu bhuku rinozwi Matsamba e Bhaibheri Anobetsera pa Kurarama ke Cikristu.