MUSORO WE KUFUNDA 35
NGOMA 121 Tinodikana Kudzibata
Imwimwi Mungakwanisa Kurhwisa Cido Cekuda Kuita Zviro Zvakashata
“Musasiye citema cecirumbwa cecimutongai hinga mambo mu mwiri yenyu inofa kuti muteedzere zvido zvayo.”—ARO. 6:12.
CINANGWA
Kupangidza kuti ngei tisikadikani kuora mwoyo patinonga tino zvido zvakashata uye kuti tingazvirhwisa kudini.
1. Tese isusu tinodikana kurhwisana nei?
MAKAMBOGARA no cido cakakura ce kuda kuita ciro cisikatenderhwi na Djehovha here? Kana zvakamboitika kamuri, musaore mwoyo. Bhaibheri rinoti: “Apana muedzo wakauya kamuri kunza ke iya inogara yecisongana no anhu ese.” (1 Ako. 10:13)a Izvi zviri kuda kureya kuti, pasinei nokuti ndi papi pamakarembera, imwimwi amuripi mwega. Amweni ari kurhwisanawo nazvo uye no rubetso ra Djehovha, imwimwi mungakunda zvamuri kubatana nazvo.
2. Afundi anganani e Bhaibheri, angarhwisana no miedzo yakadini? (Onaiwo mifanikiso.)
2 Bhaibheri rinoti: “Munhu umwe na umwe unoedzwa nge kusirira kake uye wotorhwa mwoyo nge zvido zvake.” (Tig. 1:14) Kana kuti ciro cingagara muedzo ku amweni cingatama kugara muedzo ku amweni. Ngo muezaniso, Akristu anganani anozwa eciedzwa nge kuda kuita zve pamaponde, zvakadai hingana mwanarume kuda kuita no mwanakadzi kana kuti mwanakadza kuda kuita no mwanarume asi anganani anotozwa cido icona kumunhu we nhengo imweyo. Anhu amweni ekuti kareko akamboona pornografiya, pamweni angazwa cido cakakura cekuda kuhwirirazve kuda kuzviita uye akawanda ekuti akaima kuseeenzesa mitombo inoraradzisa kana kuti kumwa maningi, ari kubatanawo no zvakada kutodzana. Izvi zvitsinzwa zvinganani zvokuti Akristu kutobatanidzawo afundi e Bhaibheri ari kubatanawo nazvo. Izvirokwazvo kuti tese isusu pa mugariro umweni mu upenyu wedu, takambozwa mazwiro amwewo akazwa Muphostori Pauro okuti: “Pandinoda kuita zvakanaka, zvakashata zvinotanga kundiuira.”—Aro. 7:21.
Muedzo ungakwanisa kuuya paya patisikakariri uye pa mbuto ipi hayo (Onai ndima 2)d
3. Munhu unorhwisana no cido cakashata ke nguwa yakareba ungazwa kudini?
3 Kana imwimwi muri kubatana no cido cakashata ke nguwa yakareba, pamweni mungazwa makaremba kuita hingana musikacakwanisi kukurira muedzo uona. Pamweni mungaona hingana musikacabetseri uye morangarira kuti Djehovha aacatenderi kunamata kenyu nge ndaa ye cido icona cakashata. Asi mungagara no cokwadi cokuti azvirokwazvopi! Kuti tizwisise izvona, fundo ino icadaira mibvunzo miiri: (1) Ngei pamweni imwimwi mungazwa hinga makaremba uye mecidziona hingana musikacabetseri? (2) Mungarhwisa kudini cido cekuda kuita zviro zvakashata?
“SATHANI” UNODA KUTI TIRANGARIREI
4. (a) Sathani unoda kuti tirangarirei paya patinoedzwa? (b) Ngei tingagara no rugondo rokuti tingakwanisa kukunda miedzo?
4 Paya patinoedzwa, Sathani unoda kuti tirangarire kuti takaremba. Djesu akasiya pamhene kuti sathani waizotiedza paya paakafundisa ateeri ake kunamata kuti: “Musatirekere tecipinda mu muedzo, asi tinunurei pano wakashata.” (Mat. 6:13) Muzondi iyena, aana cokwadi ce kuti anhu acarumbwa ecizwira Djehovha paanonga ecibatana no miedzo. (Djobo 2:4, 5) Ngei Sathani unorangarira kudaro? Sathani ndiyena wakapauswa nge zvido zvake uye iyena, aazi kurumbwa akagondeka kuna Djehovha. Ngo ndaa yazvo, iyena unorangarira kuti isusu takaezana naye uye kuti ticasiya kuseenzera Djehovha kana tikaedzwa. Sathani wakaguma pakurangarira kuti waikwanisa kuedza mwana wakakwana wa Mwari kuti aite zviro zvakashata! (Mat. 4:8, 9) Asi cimborangarirai: Kodi isusu takarembadi kamare uye kuti atina simba re kukurira zvido zvakashata? Zvezvirokwazvo haiwa! Isusu tinotenderana no Muphostori Pauro paakatara kuti: “Ndino simba rokuita zviro zvese ngokuti pane anondipasa simba.”—Afi. 4:13.
5. Cinyi cinopangidza kuti Djehovha anogonda kuti isusu tingakwanisa kukunda zvido zvakashata?
5 Djehovha akasiyana maningi na Sathani, iyena anogonda kuti isusu tinokwanisa kurhwisana no cido cedu cekuda kuita zviro zvakashata. Tinoziya kudini izvona? Iyena akabhuya kuti anhu akawanda akagondeka aizokwanisa kupona pa dambudziko guru. Rangaridzai kuti izvona zvinoda kureyei. Djehovha Mwari asikanyepi akabhuya kuti anhu akawanda—haiwa cikwata cidoko—‘aizophadza macira awo akareba, uye aizodzicenesa eciseenzesa ngazi yo Bira.’ Kana kuti anhu akawanda, acagara akacena pamberi pa Djehovha uye acapinda mu nyika ipsva. (Zvak. 7:9, 13, 14) Zvinogara pamhene kuti Djehovha aarangariri kuti isusu atikwanisi kurhwisana no zvido zvedu zvakashata.
6-7. Sathani unoda kuti isusu tirangarireizve?
6 Sathani aadi basi kuti tizwe hinga kuti takaremba. Iyena unodawo kuti tirangarire kuti atibetseri—uye torangarira kuti Djehovha aatenderi kunamata kedu nge ndaa ye zvido zvedu zvakashata. Asi onaizve kuti ngei Sathani ecirangarira kudaro? Iyena ndiyena usikabetseri kamare, iyena wakarambwa na Djehovha uye aacapaswi upenyu usikaperi. (Gen. 3:15; Zvak. 20:10) Zvezvirokwazvo Sathani unoda kuti tirangarirewo kuti atibetseri—maka-maka eciona kuti isusu tino kariro yaakaruza, kariro ye kurarama nokusikaperi. Asi isusu tinokosha kuna Djehovha uye Bhaibheri rinogondesa kuti Djehovha anoda kutibetsera haiwa kutitsakatisa. Iyena “apana waanoda kuti atsakatiswe, asi anoda kuti anhu ese acinyuke.”—2 Ped. 3:9.
7 Hino patinonga tecibatana no zvido zvakashata, uye totendera kuti isusu takaremba uye aticabetseri, tinonga tecirangarira nge mushobo unoda Sathani kuti tirangarire. Hino izvona, zvaizoita kuti isusu tisagarezve no simba uye tisapete masimba kuti tikunde Sathani.—1 Ped. 5:8, 9.
KUTAMA KUKWANA KUNGATIITISA KUTI ISUSU TIRANGARIREI
8. Pane kureya basi ciro cakashata, soko rokuti citema ringakwanisa kureyeizve? (Pisarema 51:5) (Onaiwo dii rakazwi “Nyasai Kuzwisisa.”)
8 Pane kurhwisana basi na Sathani, cinyizve cingatiitisa kuti tizwe takaremba kana kuti tisikabetseri? Kutama kukwana katakagara nhaka kubva ku abereki edu ekutanga.b—Djobo 14:4; erengai Pisarema 51:5.
9-10. (a) Cinyi cakaitika na Adhamu na Evha paakagara anhu asikazi kukwana? (Onaiwo mufanikiso.) (b) Kusama kukwana kunotibata-bata kudini?
9 Rangarirai zvakaitika na Adhamu na Evha paakagara anhu asikazi kukwana. Mumasure mekuti asiya kuzwira Djehovha, awona akaenda koofindara uye oedza kupsvaka zvekupfeka. Recibhuya ngezve muitiro wawo, Bhuku rinozwi Perspicaz, rinoti: “Citema cakaita kuti azwe ecidzipasa ndaa, ecinetseka, asikazi kucengeteka uye ecipsveruka.” Zvaiita hingana kuti Adhumu na Evha ainga akafungirhwa mu nyumba mekuti ainga asikadikani kubudazve kunza asi aidikana kundohambira imona basi. Iwona ainga asina mushobo wekubuda pa mugariro iwona we kusama kukwana.
10 Zviri pamhene kuti mugariro wedu wakasiyana, nge ndaa ye rusudzunuro—rekuti ariseenzi kuna Adhamu na Evha—isusu tingakwanisa kurekererhwa zvitema zvedu uye kugara no hana yakacena. (1 Ako. 6:11) Kunyazi zvakadaro, isusu takagara nhaka ye kusama kukwana. Hino zvinoita kuti tizwisise kuti ngei isusuwo tinozwa mazwiro ekudzipasa ndaa, kunetseka, kuzwa tisikazi kucengeteka uye kupsveruka. Bhaibheri rinotobhuya kuti citema ciri kurumbwa cecibatabata anhu, “kunyazi aya asikazi kushaisha hinga kushaisha kakaita Adhamu.” (Aro. 5:14) Izvirokwazvo kuti mugariro uu ungatiitisa kuti tizwe takaora mwoyo asi atidikani kuzwa kuremba kana kurangarira kuti atibetseri. Isusu tinokwanisa kuramba mazwiro iwona akashata. Tingazviita kudini?
Citema cakaita kuti Adhamu na Evha azwe mazwiro e kudzipasa ndaa, kunetseka, kutama kucengeteka uye kupsveruka (Onai ndima 9)
11. Paya patinozwa takaremba cinyi catisikadikani kuita, uye ngei? (Aroma 6:12)
11 Patinorangarira kuti: Inini ndakaremba—kana kuti inini andikwanisi ku kurira zvido zvakashata—zvinoita hingana kusama kukwana kedu “kecireketa.” Asi atidikani kuzvipurutana. Ngei? Ngokuti Bhaibheri rinofundisa kuti atidikani kusiya citema cecirumbwa ‘cecitonga hinga mambo’ katiri. (Erengai Aroma 6:12.) Izvona zvinoda kureya kuti isusu tinokwanisa kusanangura kusama kupfadza zvido zvedu zvakashata. (Aga. 5:16) Djehovha anogonda kuti isusu tinokwanisa kushingirira miedzo. Kudai ainga asikatigondi, iyena ainga asikazotikumbiri kuti tiite izvona. (Dhe. 30:11-14; Aro. 6:6; 1 Ate. 4:3) Hino, isusu tinokwanisa kurhwisana no zvido zvedu zvakashata.
12. Patinorangarira kuti tiri anhu asikabetseri, cinyi catisikadikani kuita uye ngei?
12 Ngo mushobo umwewo, patinozwa cido cekuda kuita zviro zvakashata, torangarira kuti inini andicabetseri—kana kuti Djehovha aacatambiri manamatiro angu—zvinoita hingana kuti kusama kukwana kedu kunonga “kecireketa,” asi atidikani kupurutana izvona. Ngei? Ngokuti Bhaibheri rinofundisa kuti Djehovha anozwisisa kuti tiri anhu asikazi kukwana. (Pis. 103:13, 14) Iyena “anoziya zviro zvese” nge zvedu, kutobatanidza mishobo yakasiyana siyana yekuti kusama kukwana kedu kunoita kuti tigare no cido cekuda kuita zviro zvakashata. (1 Juau 3:19, 20) Kana tikarhwisana no cido cedu cekuda kuita zviro zvakashata uye tosama kuita zviro zvakashata, tinokwanisa kugara akacena pamberi pa Djehovha. Ngei tingagara no rugondo irona?
13-14. Kugara no zvido zvakashata zvinoda kureya kuti aticatenderhwi na Djehovha here? Panganidzai.
13 Bhaibheri rinopangidza kuti pano musiyano wakakura pakati pe kugara teciita zvakashata (ciro catinokwanisa kucionerera) uye kuda cakashata (ciro cinoitika tisikadi). Ngo muezaniso, anganani e Akristu ekutanga e ku Korinti, ainga ari anarume aiita zvepamaponde no anarume amweni. Zvekuti Muphostori Pauro wakatara kuti: “Amweni enyu ainga akadaro.” Kodi izvona zvinoreya kuti awona aazizve kumbogara no cido cekuda kuita zvepamaponde no anarume amweni here? Atidikani kuetsera izvona, ngokuti cido icona, i cido cekuti cakanyasa kudzika mu mwoyo me munhu. Asi Akristu aikwanisa kudzibata uye akaramba kuita zviro maererano no zvido zvawo zvakashata, aazi kutongwa na Djehovha. Kuna Djehovha, Akristu awona ainga “asukwa.” (1 Ako. 6:9-11) Uye zvimwezvo zvingakwanisawo kuitika na imwimwi.
14 Azvinei kuti muri kurhwisana no cido cipi haco cakashata, zvinobvira kukunda cido icona kunyazi musikakwanisi kukunda zvacose zvido izvona. Imwimwi mungakwanisa kudzibata uye kuramba ‘kugutsa cido ce nyama uye ce ndangariro.’ (Aef. 2:3) Ngatione kuti tingaita kudini izvona?
TINGAKUNDA KUDINI ZVIDO ZVAKASHATA
15. Kuti tikunde zvido zvakashata, ngei tinodikana kunyasa kudziziya?
15 Kuti mukwanise kukunda zvido zvakashata, munodikana kudziziya pacenyu kamare uye kuziya pamakarembera. Ngwarirai kuti musadzicengedze no “marangariro e manyepo.” (Tig. 1:22) Ngo muezaniso, munhu unomwisa maningi doro—pamweni ungaona kuti cinetso cake acizi kukura maningi nge kurangarira kuti: ‘Kuno anhu anomwisa maningi kudarika inini.’ Kana kuti mwanarume unoona pornografiya, pamweni ungaedza kupasa ndaa munhu umweni—iyena ungarangarira kuti: ‘Kudai mukadzi wangu ainyasa kundipangidzira rudo, inini ndainga ndisikadi kugara no cido ce kuona pornografiya.’ Mushobo iwona we kurangarira, ungaitisa kuti muwire pamuedzo. Hino, musaedze kupumha amweni nge ndaa ye zvishaishi zvenyu kunyazi pamarangariro. Tendai mugumisiro we zvishaishi zvamaita.—Aga. 6:7.
16. Mungabambisa kudini cisananguro cenyu cekuita zviro zvakanaka?
16 Pane kuziya pemakarembera, imwimwi munodikana kubambisa cisananguro cenyu ce kuita zviro zvakanaka. (1 Ako. 9:26, 27; 1 Ate. 4:4; 1 Ped. 1:15, 16) Rangarirai zviro zvinomuitisa kuti muite zviro zvakashata uye nguwa yazvinoitika. Pamweni, pano muedzo unomuitisai kuti muite izvona kana kuti nguwa yakasisira pazuwa. Ngo muezaniso, kodi zvinomushupira here kukunda muedzo paya pamunonga makaremba here? Kana kuti izvona zvinoitika usiku maningi here? Gadzirirai mushobo wamucakunda muedzo iwona uye rangarirai mushobo wamucazviita. Nguwa yakanaka yo kuita izvona, nge iya yokuti muedzo iwona, unonga usati wauya.—Zvie. 22:3.
17. Tinofundei no muezaniso wa Zuzee? (Genesi 39:7-9) (Onaiwo mifanikiso.)
17 Rangarirai muezaniso wa Zuzee, mukadzi wa Potifari paakamuedza iyena wakakasika kubhuya kuti haiwa. (Erengai Genesi 39:7-9.) Izvona zvinotifundisei? Asati aedzwa no mukadzi wa Potifari, Zuzee wainga aita kare cisananguro cekuti iyena wainga asikazombowati no mukadzi we mwanarume umweni. Ngo mushobo umwewo, imwimwi mungakwanisa kubambisa rugondo renyu rekuita zviro zvakanaka muedzo usati waguma. Ngo kudaro, kana imwimwi mukaedzwa, zvicaita nyore kuita maererano no cisananguro camunonga maita.
Kuita hingana Zuzee, rambai nokukasika miedzo! (Onai ndima 17)
“RUMBWAI MECIDZIONGORORA PACENYU KAMARE”
18. Imwimwi mungakunda kudini zvido zvakashata? (2 Akorinti 13:5)
18 Kuti mukunde zvido zvakashata, imwimwi munodikanawo ‘kurumbwa mecidziongorora’ pacenyu kamare—kana kuti, imwimwi munodikana kurumbwa mecidziongorora kuti muone kuti muri kubudirira kudini. (Erengai 2 Akorinti 13:5.) Nguwa no nguwa, dziongororei mushobo wenyu we kurangarira, we kuita zviro uye itai cinjo dzinodikanwa. Ngo muezaniso, kunyazi mecikwanisa kukunda muedzo, imwimwi mungadzibvunzisa kuti: ‘Ndatora nguwa ngana kuti ndirambe muedzo iwona?’ Mukazwisisa kuti manonoka kuramba muedzo, musadzitonge. Pane kudaro, torai matanho anodikanwa kuti muzokwanise kudzidziirira pa muedzo umweni. Dzibvunzisei kuti: ‘Kodi inini ndingathurudza nguwa yandinotora kuti ndirambe marangariro akashata here? Zviro zvandinoita kuti ndi araidzwe zvinondikanda pa muedzo here? Pandinoona mifanikiso inocokuita no uhure ndinodusa nokukasika here? Kunyazi zvecishupha kudzibata kodi inini ndinozwisisa kuti kuzwira Djehovha nguwa dzese kakandinakira here?’—Pis. 101:3.
19. Zvisananguro zvakashata pa zviro zvidoko zvingabata-bata kudini kurhwisana katiri kuita no zvido zvakashata?
19 Pamunonga mecidziongorora, musaedze kudzidziirira pazvishaishi zvenyu. Bhaibheri rinoti: “Mwoyo unocengedza maningi kupinda zviro zvese uye wakashata maningi.” (Djer. 17:9) Djesu akabhuya kuti “mu mwoyo muno buda marangariro akashata.” (Mat. 15:19) Ngo muezaniso, munhu wakamboima kuona pornografiya, mumasure mekacinguwa pemweni iyena ungarangarira kuti: ‘Azvizi kushata kuona mafoto anoita kuti munhu arangarire zvepamaponde kana idzona dzisikapangidzi umitu. Pamweni iyena ungarangarira kuti ‘Azvizi kushata kurangarira ndeciita zviro zvakashata asi cakashata ngecekuguma pa kuita ciro icona.’ Ngo mushobo uri wese, mwoyo we munhu iyena unonga ‘wecirangarira kupfadza zvido zvo nyama.’ (Aro. 13:14) Tingaita kudini kuti izvona zvisaitike? Ngwarirai pazvisananguro zvenyu, zvisananguro zvakashata kunyazi pa zviro zvidoko kunotiitisa kuti tiite zvisananguro zvakashata pa zviro zvakakura. Ngo muezaniso, kutendera muedzo.c Rambai marangariro kana kuti ‘ndangariro dzese dzakashata’ dzingamuitai kuti mupsvake zvikonzero pa maitiro akashata.
20. Ikariro ipi yatinayo mune ramangwana uye rubetso ripi ratinaro?
20 Hingana zvetafunda, Djehovha anotipasa simba kuti tikunde miedzo. Uye nge rusudzunuro, tinorekererhwa zvitema zvedu uyewo kugara no kariro ye kurarama nokusikaperi mu nyika ipsva. Zvicapfadza maningi kuseenzera Djehovha tisikarhwisani no marangariro uye mazwiro akashata. Asi dakara ikona, tingagara no rugondo rekuti isusu atiripi anhu akaremba, uye atiripi anhu asikabetseri. Tikapeta masimba uye no makomborero a Djehovha tingakwanisa kukunda uye kurhwisa zvido zvakashata!
NGOMA 122 Garai Makabamba, Musikazungunuki!
a Bhaibheri mu Mureketero wa Nyamasi rinoturikira vhersikuro ii reciti kudai: “Miedzo yamuri kubatana nayo, ndiimweyo iri kubatanawo no amweni.”
b NYASAI KUZWISISA: Mu Bhaibheri, soko rokuti “citema” kakawanda kakhona rinonga recibhuya zviro zvakashata hingana kuba, kuita uhure kana kuti kuuraya munhu. (Eki. 20:13-15; 1 Ako. 6:18) Asi mumatsamba manganani, “citema” cinonga cecireya kusama kukwana ketakagara nhaka mumasure mekubarhwa kunyazi tisikazi kuita ciro cakashata.
c Onai kuti mudjaha unobhuiwa pana Zvierengo 7:7-23 wakaita zvisananguro zvakashata pa zviro zvidoko uye mumasure mazvo wakazopedzesera ngekuita cisananguro cakashata maningi cekuita uhure.
d KUPANGANIDZWA KE MAFOTO : Moko boshwe: Hama yecidjaha yakagara pa mbuto inomwiwa kafe, yeciona anarume airi ecipangidzirana rudo rinopangidzirhwa ku mwamuna no mukadzi. Moko kwawo: Hanzvadzi yeciona anhu airi ecibhema.