Akatarhwa na Mateu
1 Bhuku rinoreketa ngezve upenyu wa Djesu* Kristu,* mwana wa Dhavhidhi, mwana wa Abrahamu:
2 Abrahamu wakabara Izaki;
Izaki wakabara Djakobo;
Djakobo wakabara Djudha no hama dzake;
3 Djudha wakabara Perezi na Zera, mai awo ainga ari Tamari;
Perezi wakabara Ezroni;
Ezroni wakabara Ramu;
4 Ramu wakabara Aminadhabhi;
Aminadhabhi wakabara Naasoni;
Naasoni wakabara Sarimoni;
5 Sarimoni no mukadzi wake Rakabhi akabara Bhoazi;
Bhoazi no mukadzi wake Rute akabara Obhedhi;
Obhedhi wakabara Djesee;
6 Djesee wakabara mambo Dhavhidhi.
Dhavhidhi wakabara Soromoni, mai a Soromoni ainga ari mukadzi wa Uriya;
7 Soromoni wakabara Robhoamu;
Robhoamu wakabara Abhiya;
Abhiya wakabara Aza;
8 Aza wakabara Djeosafati;
Djeosafati wakabara Djoramu;
Djoramu wakabara Uziya;
9 Uziya wakabara Djotamu;
Djotamu wakabara Akaji;
Akaji wakabara Ezekiya;
10 Ezekiya wakabara Manase;
Manase wakabara Amoni;
Amoni wakabara Djosiya;
11 Djosiya wakabara Djekoniya no hama dzake, mu nguwa yaakabambidzirhwa kuenda ku Bhabhironi.
12 Mumasure me kubambidzirhwa kuenda ku Bhabhironi, Djekoniya wakabara Saratieri;
Saratieri wakabara Zorobhabheri;
13 Zorobhabheri wakabara Abhiudhi;
Abhiudhi wakabara Eriakimu;
Eriakimu wakabara Azori;
14 Azori wakabara Zadhoki;
Zadhoki wakabara Akimu;
Akimu wakabara Eriudhi;
15 Eriudhi wakabara Ereazari;
Ereazari wakabara Matani;
Matani wakabara Djakobo;
16 Djakobo wakabara Zuzee, mwamuna wa Mariya, wakazobara Djesu anodainzwa Kristu.
17 Hino, kubva kuna Abrahamu dakara kuna Dhavhidhi mibarirhwana yese yainga iri 14; kubva kuna Dhavhidhi dakara pakabambidzirhwa Adjudha kuenda ku Bhabhironi, mibarirhwana yese yainga iri 14; kubva pakabambidzirhwa Adjudha kuenda ku Bhabhironi dakara Kristu, mibarirhwana yese yainga iri 14.
18 Kubarhwa ka Djesu Kristu kakaitika kudai: Pa nguwa yekuti Mariya wainga agondeswa kuwakwa na Zuzee, iyena wakaonekwa kuti wainga ano pamwiri nge mwiya mucena* asati agara ese. 19 Asi, ngokuti Zuzee mwamuna wa Mariya wainga ari munhu munatsi, uye wainga asikadi kumupsverusa, wakarangarira kurambana naye mucifise-fise. 20 Asi, mumasure mekurangarira izvi, ngirozi ya Djehovha* yakamuuira mu hope yomubvunza kuti: “Zuzee mwana wa Dhavhidhi, usathye kuwaka Mariya, ngokuti mimba yaanayo ngeye mwiya mucena. 21 Iyena ucabara mwana uye iwewe unodikana kumududza zina rokuti Djesu,* ngokuti iyena acaponesa anhu pa zvitema zvawo.” 22 Zvese izvi, zvakaitika kuti zvidzadzise masoko a Djehovha* aakabhuya eciseenzesa muphorofita wake, kuti: 23 “Onai! Mhandwe inozobata pamwiri, yobara mwana anozodainzwa kuti Emanuwere,” zina iri rinoreya kuti: “Mwari Anesu.”
24 Zuzee wakamuka mu hope uye wakaita maererano no zvaainga abvunzwa no ngirozi ya Djehovha,* wakatora mukadzi wake oenda naye kumba. 25 Asi iyena aazi kuwata naye dakara paakabara mwana, uye akazomududza zina rokuti Djesu.