Akatarhwa na Mateu

21 Paainga ari dhuze no Djerusarema oguma ku Bhetifajee, pa Dunhu re Miorivhi, Djesu akatuma afundi airi, 2 oabvunza kuti: “Endai mu mutanha wamuri kuona uu, mucagumira dhongi rakasungirhwa rino mwana waro. Asudzunurei muaunzise kandiri. 3 Kana pakaoneka munhu ano zvaanoreketa, munodikana kumubvunza kuti: ‘Ari kudiwa na Tenzi.’ Munhuwo ciriporipoco acamusiyai kuti muuye nawo.”

4 Izvi zvakaitika kuti adzadzike masoko e muphorofita, okuti: 5 “Bvunzai mwana we mwanakadzi we Ziyoni kuti: ‘Ona! Mambo wako ari kuuya kauri, iyena akapfawa uye akapakira pa dhongi, honde, akapakira pa kadhongi, mwana we cinyama cinothwariswa zviro.’”

6 Hino, afundi akaenda uye akaita zvese zvaainga abvunzwa na Djesu. 7 Akauya no dhongi no mwana waro, akakanda macira awo pamusana pawo, uye Djesu akakwira pa kadhongi. 8 Anhu akawanda akawarira macira awo mu gwanza, amweni aitema nhai dzemiti ecidziwarira mu gwanza. 9 Uyezve, anhu aihamba mberi kake no aimuteera, aidainzira eciti: “Tinomukumbirai kuti mumuponese Mwana wa Dhavhidhi! Akakomborerhwa munhu anouya mu zina ra Djehovha!* Tinomukumbirai kuti mumuponese muri kumusoro-soro!”

10 Iyena paakapinda mu Djerusarema, anhu ese akapatika uye akati: “Uu ndiani?” 11 Anhu akawanda aidaira kuti: “Uu ndi Djesu, muphorofita wo ku Nazareta re ku Garireya!”

12 Djesu akapinda mu tempro, uye akadzingirisa ese aitenga no kutengesa mu tempro, akaminura mameza e aya aicinja mare no makadera e aya aitengesa njiwa. 13 Uye akaabvunza kuti: “Zvakatarhwa kuti: ‘Nyumba yangu icadainzwa nyumba yo minamato,’ asi imwimwi muri kuiita nyumba yo mambavha.” 14 Mapofu no anokhabinya akauyawo kaari mu tempro, uye iyena akaaporesa.

15 Atungamiriri e apristi no atari paakaona zviro izvi zvakanakisisa zvaaiita, uye paakazwa arumbwana ecikhuwa eciti: “Tinomukumbirai kuti muponese Mwana wa Dhavhidhi!” awona akanyangadzwa, 16 uye akati kaari: “Uri kuzwa here zvaari kureketa?” Djesu akati kaari: “Honde. Amusati makamboerenga here panoti: ‘Makaita kuti mu miromo ye ana adoko no acece mubude masoko e rukudzo’?” 17 Paakaasiya, iyena akaenda ku thaundi re Bhetanya, owatira ikona.

18 Paaihwirira ku thaundi comacibesi, Djesu akazwa nzara. 19 Iyena akaona muonde padhuze no pa gwanza, akaenda pauri, asi aazi kuona ciro kunza ke masakani basi, akati kauri: “Aucazobarizve micero dakara nariini.” Muonde wakhona wakaoma ciriporipoco. 20 Afundi paakazviona, akashamisika uye akati: “Muonde uu wazooma kudini ciriporipoco?” 21 Djesu akaadaira kuti: “Ndinomubvunzai zvirokwazvo kuti, kana mukagara no kutenda mogara no cokwadi, amuzoiti basi zvandaita ku muonde uu, asi munozobvunza dunhu iri kuti: ‘Buda pano wodzikhandira mu bahari,’ uye izvona zvicaitika. 22 Uye zvese zvamunokumbira mu munamato muno kutenda, mucazvitambira.”

23 Paakapinda mu tempro, atungamiriri e apristi no akuru e anhu akauya kaari paainga ecifundisa, uye akamubvunzisa kuti: “Uri kuita zvese izvi no simba raani? Uye ndiani akakupasa simba irona?” 24 Djesu akadaira kuti: “Ndiri kudawo kumubvunzisai ciro cimwe. Kana mukandidaira, ndinozomubvunzaiwo kuti simba randinoita naro zviro izvi rakabva kupi: 25 Rubhabhatidzo ra Juau rakabvepi? Kudenga here kana kuti ku anhu?” Asi awona akatanga kubvunzana pacawo, eciti: “Kana tikabhuya kuti: ‘Rakabva kudenga,’ iyena acatibvunza kuti: ‘Hino ngei imwimwi musikazi kutenda maari?’ 26 Asi kana tikati: ‘Rakabva ku anhu,’ tinothya anhu, ngokuti ese anoti Juau ndi muphorofita.” 27 Ngokudaro, awona akadaira Djesu kuti: “Atizvizii.” Iyena akaadairawo kuti: “Hino, andimubvunziiwo kakabva simba randinoita naro zviro izvi.

28 “Munoonawo kudini? Mwanarume umweni wainga ano ana airi. Wakaenda koobvunza mwana wokutanga kuti: ‘Mwanangu, nyamasi enda koosenza mu munda we uvha.’ 29 Mwanewo wakadaira kuti: ‘Andidi,’ asi wakazocinyuka, woenda. 30 Wakaenda kuno wocipiri, wakamubvunza zvimwe-zvimwezvo. Iyena wakadaira eciti: ‘Honde baba, ndicaenda,’ asi iyena aazi kuenda. 31 Ndiupi pa airi aya wakaita kuda ka baba ake?” Awona akati: “Wekutanga.” Djesu akati kaari: “Ndinomugondesai kuti, arongosi e musoho no mahure, ndiwo acatanga kupinda mu Umambo wa Mwari imwimwi musati mapinda. 32 Ngokuti Juau wakauya kamuri nge gwanza re unatsi, asi imwimwi amuzi kumutenda. Asi, arongosi e musoho no mahure akamutenda, uye kunyazi pamakazviona, amuzi kucinyuka kuti mumutende.

33 “Izwai muezaniso umweni: Kainga kuno mwanarume umweni, muridzi we nyumba, wakasima munda we uvha, wakautenderedza no ukutira, wakacera mu mundemo cisviniro ce uvha, wakagadzira nyumba yakareba ye kurindira; pedzepo wakausiira arimi, woita rhwendo. 34 Payakaguma nguwa yekuibva ke micero, muridzi we munda wakatuma aranda ake ku arimi kuti aende kootora micero yake. 35 Asi arimi akaabata, umwe omuponda, umwe omuuraya, umweni omufura no mapuwe. 36 Wakatumazve aranda amweni akawanda kupinda okutanga, asi arimi akaaitazve zvimwezvo. 37 Pokupedzesera wakatuma mwana wake, eciti: ‘Acareremedza mwana wangu.’ 38 Paakaona mwanewo, arimi akabvunzana pacawo eciti: ‘Uu ndiye mugari we nhaka. Uyai, ngatimuuraye, tosara no nhaka yake!’ 39 Ngokudaro, awona akamubata, omubvisa mu munda we uvha uye akamuuraya. 40 Hino, kana muridzi we munda we uvha akahwirira, ucaitei no arimi aya?” 41 Akati kaari: “Nge ndaa yekuti awona akashata, acaatsakatisa uye acapasa munda we uvha mu nyara dze arimi amweni, acamupasa micero pa nguwa yakasisira.”

42 Djesu akati kaari: “Amuzi kuerenga here mu Matarhwa kuti: ‘Buwe rakarambwa no awaki, ndiro rakazogara buwe guru re pakhona.* Irona rinobva kuna Djehovha,* uye rinoshamisa mu madziso edu’? 43 Ndiyo ndaa ndeciti kamuri, mucatorerhwa Umambo wa Mwari uye ucapaswa dzinza rimweni rinozobereka micero inodiwa. 44 Uyezve, uya anombwerera pa buwe iri, acaguka-guka. Uya anombwererhwa naro, acadzengenyeka.”

45 Atungamiriri e apristi no Afarisi paakazwa miezaniso yake, akaziya kuti ainga ecireketa nge zvawo. 46 Kunyazi aida kumusunga,* akathya anhu, ngokuti anhu aimuti muphorofita.