Akatarhwa na Mateu

27 Pakainga kaedza, atungamiriri e apristi no akuru e anhu, akaungana kuti apangane kuti aizouraya kudini Djesu. 2 Mumasure me kumusunga, akamutora oenda koomukanda mu nyara dze mutungamiriri waizwi Pirato.

3 Djudhasi, uya wakamutengesa, paakaona kuti Djesu ainga atongerhwa rufu, wakatsumba uye wakahwirinza mare yo prata inokwana 30 ku atungamiriri e apristi no akuru, 4 eciti: “Ndakashaisha pandakatengesa ngazi isina ndaa.” Awona akati: “Tinei nazvo isusu? Nge zvako izvo!” 5 Ngokudaro, iyena wakakhandira mare yo prata mu tempro, wobuda. Pedzepo, wakaenda koodzitsungira. 6 Asi, atungamiriri e apristi akatora mare yakhona yo prata, oti: “Azvitenderhwi kutora mare ii kakuikanda munocengeterhwa upfumi we mbuto yakacena, ngokuti iyona mutengo we ngazi.” 7 Mumasure mekupangana pacawo, awona akatora mareyo, oenda kootenga munda we muumbi, kuti azokotseremo anhu e nyika dzimweni. 8 Ndiyo ndaa, munda iwona unodainzwa kuti Munda we Ngazi dakara nyamasi. 9 Ngokudaro, zvakadzadzika zvakarekethwa no muphorofita Djeremiya kuti: “Awona akatora mare yo prata inokwana kuita 30, mutengo waicadjirhwa munhu, mutengo uu, wakacadjwa no ana anganani e Israeri, 10 uye akatenga nayo munda we muumbi maererano no zvandakabvunzwa na Djehovha.”*

11 Djesu ainga ari pamberi pe mutungamiriri, mutungamiririwo wakamubvunzisa kuti: “Ndiwe Mambo we Adjudha?” Djesu akamudaira kuti: “Ndimwi muri kuzvibhuya.” 12 Asi paainga ecipumhwa no atungamiriri e apristi no akuru, iyena aazi kudaira ciro. 13 Pirato wakamubvunzisa kuti: “Auripi kuzwa zvese zvauri kupumhwa here?” 14 Iyena aazi kumudaira kunyazi soko rimwe haro, zvekuti mutungamiriri wakashamisika maningi.

15 Pa mutambo wese we Paskwa, mutungamiriri waibudisa musungwa umwe, waisanangurhwa no anhu kuti abudiswe. 16 Pa nguwa iyona, painga pano musungwa wainyanya kuziikanwa ngo kuita zvakashata, waizwi Bharabhaa. 17 Hino paainga akaungana, Pirato wakati kaari: “Munoda kuti ndisudzunure upi, Bharabhaa kana kuti Djesu unozwi Kristu?” 18 Pirato waizviziya kuti awona akamuunzisa kaari nge ndaa yo bibvu. 19 Asi, paainga akagara mu tribhunari, mukadzi wake wakamutumira masoko, eciti: “Musapindire mu ndaa yo mwanarume uu munatsi, ngokuti usiku ndakarota ndecitambudzika maningi nge ndaa yake.” 20 Asi atungamiriri e apristi no akuru, akakohomedzesa anhu kuti akumbire kuti Bharabhaa abude, asi Djesu auraiwe. 21 Mutungamiriri wakati kaari: “Pa airi aya, ndiupi wamunoda kuti ndimusudzunurirei?” Awona akati: “Bharabhaa.” 22 Pirato wakaabvunzisa kuti: “Munoda kuti ndiitei na Djesu, unozwi Kristu?” Ese akati: “Ngaakhomerhwe pa mutanda!” 23 Iyena wakati: “Ngei? Iyena washaishei?” Asi, awona akabambirira kukhuwa eciti: “Ngaakhomerhwe pa mutanda!”*

24 Eciona kuti zvainga zvisikabetseri, asi pane kudaro paitooneka woyo-woyo, Pirato wakatora mvura wokarawa nyara pamberi pe anhu, eciti: “Andina ndaa yo ngazi ye munhu uu. Nge zvenyu izvo.” 25 Anhu ese akadaira kuti: “Ngazi yake ngaiwire patiri no ana edu.” 26 Hino, akasudzunura Bharabhaa, asi akaita kuti Djesu aende koobvengwa uye kuti auraiwe pa mutanda.

27 Masurudado e govhernadhori akatora Djesu oenda naye kumba ke mutungamiriri, uye masurudado ese akamuunganira. 28 Mumasure me kumukhumura macira, akamupfekedza djira re kupsvuka, 29 akaruka korowa yo minzwa oikanda mu musoro make uye akamubatisa ndonga ku moko kwawo wake. Uye akamugodamira, ecimupsvinyira eciti: “Mucaita wani Mambo we Adjudha!” 30 Hino, awona akamupfirira mata, otora ndonga otanga kumuponda nayo mu musoro. 31 Pakupedzesera, mumasure me kumuseka, akamukhumura djira re kupsvuka uye akamupfekedzazve macira ake. Pedzepo, akamutora kuti aende koomukhomera pa mutanda.

32 Paainga ecibuda, akasongana no mwanarume umweni we ku Sirene waizwi Simoni. Akabambidzira mwanarumewo kuti athware mutanda.* 33 Paakaguma pa mbuto inozwi Gorokota, zvinoreya kuti, Mbuto ye Dehenya, 34 akamupasa vhinyu yakavhenganidzwa no muti unowawa unozwi feri, kuti amwe; asi paakairaira, akaramba kuimwa. 35 Mumasure me kumukhomera pa mutanda, akakhandira mudjenya kuti akowanisane macira ake, 36 uye akagarepo ecimurinda. 37 Uye akakhomera kacitabwa ngo pamusoro pake cakatarhwa masoko okupumha okuti: “Uu ndi Djesu Mambo we Adjudha.”

38 Mbavha mbiri dzakakhomerhwawo pa mutanda, imwe ku moko wake kwawo uye imweni ku moko we boshwe. 39 Aipinda ndipona, aimutuka ecidzungudza misoro yawo 40 eciti: “Iwewe waiti waizophwanya tempro, woiwaka mu mazuwa matatu, dziponese! Kana uri Mwana wa Mwari, cita pa mutanda!”* 41 Ngo mushobo umwewo, atungamiriri e apristi, atari no akuru, akatanga kumusekawo eciti: 42 “Akaponesa amweni, asi iyena aakwanisi kudziponesa! Iyena ndi Mambo we Israeri; ngaacite pa mutanda we kutambudzikira, uye isusu ticatenda maari. 43 Iyena waigonda Mwari; Mwari wakewo ngaamuponese kudai ecimuda, ngokuti iyena waireketa kuti ‘Ndiri Mwana wa Mwari.’” 44 Ngo mushobo umwewo, kunyazi mbavha dzainga dzakakhomerhwa pa mutanda pa muceto pake, dzaimutukawo.

45 Kubvira padzaikhwedera kuita nguwa 12* dze masikati, pakaitika cidima cakafukidza nyika yese iyona, dakara 15* dze masikati. 46 Padzaikhwedera 15 dze masikati, Djesu akadainzira no izwi guru eciti: “Eri, Eri, rama sabhakitani?” zvinoreya kuti: “Mwari wangu, Mwari wangu, ngei mandisiya ndega?” 47 Anhu amweni ainga aripo paakazwa izvi, akatanga kuti: “Munhu uu uri kudainza Eriya.” 48 Nokukasika, umwe wawo wakagogoma, wakabata shiponja, woinyika mu vhinyu inojaja, woikanda pa cimuti, uye wakamupasa kuti amwe. 49 Asi amweni ese akati: “Musiyei akadaro! Tione kana Eriya acauya kuzomuponesa.” 50 Djesu akaphindazve kukhuwa no izwi guru, pedzepo akafa.

51 Pa nguwa iyona, djira re mbuto yakacena rakamweka pakati no pakati, kubva kumusoro dakara pasi, nyika yakatekenyeka uye mapuwe akaphwanyika. 52 Makuwa akafunguka uye mitumbi yakawanda yo anhu a Mwari, yakamburumbukira* kunza, 53 uye yakaonekwa no anhu ajinji (uye anhu ainga ecibva mu makuwa mumasure me kumutswa ka Djesu, akapinda mu thaundi rakacena). 54 Asi, mutungamiriri we masurudado no aya ainga ari naye ecirinda Djesu paakaona cigidhi-gidhi no izvi zvaiitika, akathya maningi uye akati: “Zvezvirokwazvo uu, wainga ari Mwana wa Mwari.”

55 Painga pano anakadzi akawanda aizviona nge kure, awona ainga aperekedza Djesu kubva ku Garireya, kuti amuseenzere; 56 Pakati pawo, painga pana Mariya Madharena, Mariya mai a Tiyago na Djosesi, uye mai e ana a Zebhedheu.

57 Zuwa parainga roodoka, mwanarume umweni we ku Arimateya, wainga ari mupfumi waizwi Zuzee, uwo wainga aa mufundiwo wa Djesu, wakauya. 58 Iyena wakaenda kuna Pirato kookumbira mutumbi wa Djesu. Pirato wakatuma masurudado kuti aupaswe. 59 Zuzee wakatora mutumbi, wouputiridza no djira ro mutengo wakakura, 60 wakaukanda mu guwa rake ripsva, rainga rakacerhwa pa buwe. Wakasiya wamburumbudzira buwe guru pa musuwo pe guwa, uye wakaenda. 61 Asi Mariya Madharena na Mariya umweni akasarepo, akagara pamberi pe guwa.

62 Pa zuwa rakateera, pa zuwa re Kugadzirira Sabudu, atungamiriri e apristi no Afarisi akaungana pamberi pa Pirato, 63 uye akati: “Tenzi, ticiri kuedzurira kuti mucengedzi uya paainga aciri mupenyu, waibhuya kuti: ‘Mumasure me mazuwa matatu, ndicamutswa.’ 64 Hino, tumai anhu kuti aende koorinda guwa rake dakara pa zuwa rocitatu, kuitira kuti afundi ake asauye koba mutumbi wake obvunza anhu kuti: ‘Iyena amutswa kubva ku akafa!’ Ngokudaro, manyepo aya okupedzesera anozoshatisisa kupinda okutanga.” 65 Pirato wakati kaari: “Torai masurudado muende. Munyase kurinda guwero hingana mushobo wamunoda.” 66 Hino awona akaenda, akaita kuti guwa rakhona rinyase kucengetedzwa, uye akanama buwe rakhona uye akaita kuti pagare arindi.