Akatarhwa na Mateu
8 Paakacita mu dunhu, anhu akawanda akamuteera. 2 Hino, kakauya mwanarume umweni wainga ano mapere omugodamira eciti: “Tenzi, kana mecida, mungandiporesa.”* 3 Djesu akatambanudza nyara yake, omubata, oti: “Ndinoda! Mapere ako ngaapere.” Ciriporipoco munhuwo wakatamba. 4 Pedzepo, Djesu akamubvunza kuti: “Ngwarira kuti usabvunze munhu zvandakuitira, asi enda koodzipangidza ku mupristi, wopasa cipo cakarekethwa no Mutemo wa Mozesi, kuti aone kuti waporeswadi.”
5 Paakapinda mu Kafarnau, mutungamiriri we masurudado wakaenda kaari ecimudeketerera, 6 eciti: “Tenzi, museenzi wangu wakawata kumbeyo nge nhenda ye kuoma mwiri, uye iyena uri kutambudzika maningi.” 7 Iyena akati kaari: “Kana ndikagumeyo, ndicamuporesa.” 8 Mutungamiriri we masurudado wakamudaira kuti: “Tenzi, andizi kusisira kuti mupinde mumba mangu, asi bhuyai soko rimwe basi, uye museenzi wangu ucaporeswa. 9 Ngokuti inini ndinosotumwawo, uye ndino masurudado ari pasi pangu, kana ndikabvunza umwe kuti: ‘Enda!’ iyena unoenda, kana ndikabvunza umweni kuti: ‘Uya!’ iyena unouya, uye kana ndikabvunza muranda wangu kuti: ‘Ita ici!’ iyena unoita.” 10 Djesu paakazwa izvona, akashamiswa uye akati kune aya aimuteera: “Ndinomubvunzai zvirokwazvo kuti, andizi kuona munhu ano kutenda kakakura kudai mu Israeri. 11 Asi ndinomubvunzai kuti, anhu akawanda anozobva kumabvazuwa no kumadokera, ouya korhya pa meza na Abrahamu, Izaki na Djakobo mu Umambo we kudenga; 12 ana e Umambo acakhandirhwa kunza ku cidima. Ikona ndiko kaacacema ecirumanisa mazino awo.” 13 Djesu akabvunza mutungamiriri we masurudado kuti: “Enda. Ngazviitike maererano no kutenda kawapangidza.” Museenzi wake wakatamba pa nguwa iyona kamare.
14 Djesu paakapinda mumba ma Pedru, akaona ambiya a Pedru akawata ngokuti ainga akaferuka. 15 Hino, Djesu akapsvasa nyara yawo, uye awona akatamba, pedzepo ambiyewo akatanga kuabikira. 16 Pakainga koodoka, akamuunzira anhu akawanda ainga ano madhimoni; uye iyena akadzingira mwiya iyona no soko rimwe basi, uye akaporesa ese airhwara, 17 kuti zvidzadzike zvakarekethwa no muphorofita Isaya kuti: “Iyena akatora nhenda dzedu uye akathwara kurhwadziwa kedu.”
18 Djesu paakaona kuti anhu akawanda ainga amutenderedza, iyena akabvunza afundi ake kuti abire aende n’ombera. 19 Uye mutari umweni wakauya kaari, omubvunza kuti: “Mufundisi, ndicamuteerai kwese kamunoenda.” 20 Djesu akati kaari: “Imbwa dze mushango dzino mapako adzinogara, shiri dzo kudenga dzino masaki, asi Mwana we munhu aana pokuwata.” 21 Umwe we afundi wakati kaari: “Tenzi, ndisiyei ndimbotange kuenda kookotsa baba angu.” 22 Djesu akati kaari: “Rumbwa wecinditeera, uye siya kuti akafa akotsane oga.”
23 Iyena akapakira bharko uye afundi ake akamuteera. 24 Dutu rakakura rakatanga kuvhuvhuta mu bahari, zvokuti bharko rakatanga kufukidzwa no mafungu, asi Djesu ainga akawata. 25 Uye afundi ake akaenda koomutsungudza, eciti: “Tenzi, tiponesei, taakuda kufa isusu!” 26 Asi iyena akati kaari: “Ngei muri kuthya kudaro, imwi mune kutenda kudoko?” Iyena akamuka uye akasumurura dutu no bahari, zvese zvakateramira. 27 Awona akashamisika, oti: “Mwanarume uu ndiani, wekuti kunyazi dutu no bahari zvinomuzwira?”
28 Paakaguma n’ombera ko bahari mu mutanha we Agadharene, anarume airi ainga ano madhimoni akaenda kuna Djesu ecibva ku makuwa.* Awona ainga ano shungu maningi, zvekuti apana munhu waikwanisa kupinda nge gwanza irona. 29 Awona akatanga kukhuwa eciti: “Uri kudei na isusu iwewe Mwana wa Mwari, wauya kuzotitambudza nguwa isati yakwana?” 30 Nge cekure no paainga ari, kainga kuno nguruwe dzakawanda dzaiushwa. 31 Hino, madhimoni akatanga kumudeketerera eciti: “Kana mukatidzingira, titumirei ku nguruwe.” 32 Iyena akati kaari: “Endai!” Ndipo paakabuda, opinda mu nguruwe, uye idzona dzakatanga kugogoma dzodzvika pa gwirindi, dzombwerera mu bahari uye dzofiremo. 33 Aushi e nguruwe akatiza, oenda mu thaundi, akapanganidza zvese zvainga zvaitika, kutobatanidza zvainga zvaitika no anarume ainga ano madhimoni. 34 Anhu ese e mu thaundi akaenda kuna Djesu, paakamuona, akamudeketerera kuti abude mu mutanha mawo.