Akatarhwa na Mateu
2 Mumasure me kubarhwa ka Djesu mu Bheterehema re Djudhiya mu mazuwa a Mambo Herodhi,* azii e nyeredzi e Kumabvazuwa akaguma mu Djerusarema, 2 eciti: “Aripi uya wakabarhwa kuti agare mambo we Adjudha? Ngokuti takaona nyeredzi yake patainga tiri Kumabvazuwa, uye tauya kuzomuhwararira.” 3 Paakazwa izvi, Mambo Herodhi pamwepo no ese ainga ari mu Djerusarema akapatika maningi. 4 Iyena wakaunganidza akuru e apristi ese pamwepo no atari, uye akaabvunzisa kaizobarirhwa Kristu.* 5 Awona akamudaira kuti: “Mu Bheterehema re Djudhiya, ngokuti ndizvo zvakatarhwa no muphorofita kuti: 6 ‘Iwewe Bheterehema re nyika ye Djudha, audikani kuoneka hinga thaundi risikanyanyi kukosha pakati pe atungamiriri e Djudha, ngokuti mukati mako munozobuda mutungamiriri, unozousha anhu angu, Aisraeri.’”
7 Herodhi wakadainza azii e nyeredzi pacifise-fise, oabvunzisa kuti nyeredziyo yakabuda nguwai kamare. 8 Paakaatuma kuti aende ku Bheterehema, akaabvunza kuti: “Endai koonyasa kupsvaka mwana uu, uye kana mukamuona, uyai koondibvunza kuti ndiendewo komuhwararira.” 9 Mumasure me kuzwa zvainga zvabhuiwa na mambo, awona akaenda, asi nyeredzi yaainga aona paainga ari Kumabvazuwa yakaenda mberi kawo, yoenda kooima pamusoro pe mbuto yainga ino mwanewo. 10 Paakaona nyeredzi ii, awona akapfara maningi. 11 Paakapinda mumba, akaona mwana na mai ake Mariya, awona akagodama uye akamuhwararira. Akadusa zviro zvaainga anazvo uye akamupasa oro, oribhano* uye mira. 12 Asi, ngokuti akapaswa ngwadzo inobva kuna Mwari mu hope kuti asahwirirezve kuna Herodhi, awona akahwirira ku nyika yawo eciseenzesa gwanza rimweni.
13 Mumasure mekuti aenda, ngirozi ya Djehovha* yakadzipangidza kuna Zuzee mu hope, yeciti: “Muka, tora mwana na mai ake utizire ku Edjipitu, ugare ikona dakara ndakubvunza kuti uhwirire, ngokuti Herodhi ari kupsvaka mwana uu kuti amuuraye.” 14 Ngokudaro, Zuzee wakamuka cousiku otora mwana na mai ake oenda ku Edjipitu. 15 Akagareyo dakara kufa ka Herodhi. Izvi zvakadzadzisa zvainga zvarekethwa na Djehovha* eciseenzesa muphorofita wake, eciti: “Ndakadainza mwana wangu kuti abude mu Edjipitu.”
16 Herodhi paakaona kuti wainga acengedzerhwa no azii e nyeredzi, wakanyangadzwa maningi. Ngokudaro, iyena wakatuma anhu kuti auraye ana ese e anarume mu Djerusarema no e mu nharaunda dzese, kubvira ku ana ainga ano makore mairi zveciterera, maererano no nguwa yaakabvunzwa no azii e nyeredzi. 17 Ngokudaro, zvakadzadzika zvakabhuiwa no muphorofita Djeremiya, paakati: 18 “Izwi rakazwika ku Rama, kucema uye kutsumba kukuru. Ndi Rakeri waicema ana ake, uye wairamba kunyaradzwa, ngokuti ana ake ainga apera.”
19 Mumasure me kufa ka Herodhi, ngirozi ya Djehovha* yakadzipangidza kuna Zuzee mu hope, ku Edjipitu 20 uye yakati: “Muka, tora mwana na mai ake uhwirire ku nyika yo Israeri, ngokuti ese aipsvaka kuuraya mwana uu, apera kufa.” 21 Ngokudaro, iyena wakamuka otora mwana na mai ake uye akahwirira ku nyika yo Israeri. 22 Asi, paakazwa kuti Arkerau ndiyena wainga aakutonga mu Djudhiya pa mbuto pa baba ake Herodhi, Zuzee wakathya kuenda ikona. Ngokuti Mwari ainga amupasa ngwadzo mu hope, wakaenda ku Garireya. 23 Iyena wakaenda koogara mu thaundi re Nazareta, kuti adzadziswe masoko akarekethwa no aphorofita kuti: “Iyena unozodainzwa kuti Munazareta.”*