Akatarhwa na Mateu
13 Pa zuwa irona, Djesu akabuda pa nyumba oenda koogara mu muceto me bahari. 2 Uye anhu akawanda akamuunganira zvokuti iyena akakwira mu bharko ogara pasi, uye anhu ese akaimira mu muceto me bahari. 3 Iyena akaabvunza zviro zvakawanda eciseenzesa miezaniso. Iyena akati: “Murimi umweni wakaenda kookusa mbeu. 4 Paainga ecikusa, mbeu dzimweni dzakambwerera pa muceto pe gwanza, uye shiri dzakauya dzopera kurhya. 5 Dzimweni dzakambwerera pa mbuto ino mapuwe, pasina mataka akawanda, idzona dzakamera nokukasika, ngokuti painga pasina mataka akawanda. 6 Asi zuwa parakabuda, dzakapsva uye dzakaoma, ngokuti dzainga dzisina midzi. 7 Mbeu dzimweni dzakambwerera pakati pe minzwa, minzwa padzakakura dzakapingaidza kukura ke mbeu dziya. 8 Dzimweni dzakhona dzakambwerera pa mataka akanaka uye dzakatanga kubara zvibereko, idzi zvakapethwa ka 100, idzo ka 60, dzimweni ka 30. 9 Ano nzee ngaazwe.”
10 Ngokudaro, afundi ake akauya omubvunzisa kuti: “Ngei munoreketa nawo meciseenzesa miezaniso?” 11 Djesu akaadaira kuti: “Imwimwi munotenderhwa kuzwisisa zvakaigika zva Mwari zve Umambo we kudenga, asi awona aatenderhwi. 12 Ngokuti aya anazvo, anozopaswa zvakawanda; asi aya asina, anozotorerhwa kunyazi zvidoko zvaanazvo. 13 Ndiyo ndaa, ndecireketa nawo ndeciseenzesa miezaniso; ngokuti anoringira, asi aaoni, uye anopurutana, asi aazwi uye aazwisisi. 14 Uye masoko e muphorofita Isaya ari kudzadzika paari ekuti: ‘Zvezvirokwazvo imwimwi mucazwa, asi amuzozwisisi; mucaringira, asi amuzooni. 15 Ngokuti mwoyo ye anhu aya yakaoma, awona akafunga nzee dzawo,* uye akafunga madziso awo, kuitira kuti asaone no madziso awo uye asazwe no nzee dzawo, kana kuzwisisa no mwoyo yawo, otendeuka uye kuti inini ndiaporese.
16 “Asi, munopfara ndimwi, ngokuti madziso enyu anoona uye nzee dzenyu dzinozwa. 17 Ndinomubvunzai zvirokwazvo kuti, aphorofita akawanda no anatsi aida kuona zviro zvamuri kuona, asi aazi kuzviona, uye aida kuzwa zvamuri kuzwa, asi aazi kuzvizwa.
18 “Zvino cimbozwai ngezve muezaniso we murimi wakakusa mbeu. 19 Munhu paanozwa masoko e Umambo otama kuazwisisa, Dhiyabhurosi* unouya, obvita zvinonga zvasimwa mu mwoyo make; mbeu idzi, ndidzo dziya dzakambwerera pa muceto pe gwanza. 20 Mbeu dzakambwerera pa mbuto ino mapuwe, dzinoimirira uya anozwa soko, okasika kuritambira no mupfaro. 21 Asi iyena aana midzi yakadzika, anotoenderera mberi kecinguwa, asi kana akabatana no cinetso kana kuteererhwa nge ndaa ye soko, anokuhunyika nokukasika. 22 Mbeu dzakambwerera pakati pe minzwa, dzinoimirira uya anozwa soko, asi nge ndaa ye kudzirhya mwoyo nge zviro zve nyika ino,* no kucengedza ke upfumi, zvinopingaidza kukura ke soko, rotama kubara micero. 23 Mbeu dzakambwerera pa mataka akanaka, dzinoimirira uya anozwa soko, orizwisisa, otanga kubara micero zvakapethwa, uwo ka 100, uwo ka 60, uye umweni ka 30.”
24 Iyena akaaitira muezaniso umweni eciti: “Umambo we kudenga, ungaezaniswa no munhu wakakusa mbeu yakanaka mu munda make. 25 Anhu paainga akawata, muzondi wake wakauya, wokusa masora pakati pe trigu, uye wotoenda. 26 Trigu payakakura yobara micero, masora akatangawo kubudikira. 27 Hino, aseenzi e muridzi we munda akauya koomubvunzisa kuti: ‘Tenzi, amuzi kukusa mbeu yakanaka mu munda menyu here? Hino masora azobvepi?’ 28 Iyena akaadaira kuti: ‘Pano muzondi waita izvi.’ Aseenzi akamubvunza kuti: ‘Munoda kuti tiende koobvita masora, toaunganidza?’ 29 Iyena wakati: ‘Haiwa, ngokuti pamunonga mecibvita masora, mungazobvitawo no trigu. 30 Zvisiyei zvikure zvese dakara pa nguwa yekukorora, uye pa nguwa yekukorora ndicati ku aya acakorora: Tangai kuunganidza masora moasunga kuti muapise; pedzepo unganidzai trigu mu muturika wangu.’”
31 Iyena akaabvunzazve muezaniso umweni eciti: “Umambo we kudenga wakaezana no tsangu yo mostardha, yakatorhwa no munhu umweni woisima mu munda make. 32 Zvezvirokwazvo, mbeu ii idoko-doko pa mbeu dzese, asi painokura inopinda zvirimwa zvese, yogara muti, shiri dzinouya dzoona pekugara pa nhai dzawo.”
33 Akaabvunzazve muezaniso umweni eciti: “Umambo we kudenga wakaezana no mbiriso yakatorhwa no mwanakadzi umweni, oivhenganidza no mipimo mitatu yo ufu, dakara mukanyiwa wese wafufuma.”
34 Djesu akabvunza anhu zvese izvi eciseenzesa miezaniso. Zvezvirokwazvo, apana caaiabvunza asikaseenzesi muezaniso, 35 kuti adzadzike masoko e muphorofita ekuti: “Ndicazofungura muromo wangu ndeciseenzesa miezaniso; ndinozoziisa zviro zvakaigika kubvira pakutanga.”
36 Paakapedza kueneka anhu, iyena akapinda mumba. Afundi ake akauya kaari oti: “Tipanganidzirei muezaniso we masora ari mu munda.” 37 Iyena akaadaira kuti: “Mukusi we mbeu yakanaka, ndi Mwana we munhu; 38 munda i nyika. Mbeu yakanaka, ndi ana e Umambo, asi masora, ndi ana a Dhiyabhurosi,* 39 uye muzondi wakasima masora, ndi Dhiyabhurosi. Kukorora, ndi kupera ko nyika,* uye akorori i ngirozi. 40 Hino, hinga kuunganidzwa kunoizwa masora kuti apiswe pa muriro, ndizvo zvicaitika pa kupera ke nyika.* 41 Mwana we munhu acatuma ngirozi dzake, uye idzona dzicaunganidza, dzobudisa mu Umambo wake zviro zvese zvinokuhunyisa, ne anhu asikateereri mutemo, 42 uye idzona dzicaakhandira pa coto ce muriro, imona ndimo maacacema ecirumanisa mazino awo. 43 Pa nguwa iyona, anatsi acadjeka hingana zuwa mu Umambo wa Baba awo. Ano nzee ngaazwe.
44 “Umambo we kudenga wakaezana no upfumi wakaigwa mu munda, wakaonekwa no munhu ouigazve; uye nokupfara kaaiita, akaenda kootengesa zviro zvese zvaainga anazvo, otenga munda iwona.
45 “Umambo we kudenga wakaezanazve no mutengesi waihamba ecipsvaka maperora akanakisisa. 46 Paakaona perora re mutengo wakakura, wakaenda kootengesa zviro zvese zvaainga anazvo nokukasika, woritenga.
47 “Uyezve, Umambo we kudenga wakaezana no maricera ekukokota anokhandirhwa mu bahari ecibata howe dzakasiyana-siyana. 48 Paakadzara, akaakweera pa muceto pe bahari, uye akagara pasi, eciunganidza howe dzakanaka ecidzikanda mu mudziyo, asi akapsveta dzisikazi kunaka. 49 Izvi ndizvo zvicaitikawo pa kupera ke nyika.* Ngirozi dzicaparadzanisa akashata no anatsi 50 uye dzicakhandira anhu akashata pa coto co muriro. Imona, ndimo maacacema no kurumanisa mazino awo.
51 Djesu akaabvunzisa kuti: “Mazwisisa here zvazvinoreya zvese izvi?” Awona akadaira kuti: “Honde.” 52 Hino iyena akaabvunza kuti: “Kana zvakadaro, mufundisi wese unofundiswa ngezve Umambo we kudenga, wakaita hinga muridzi we nyumba anobudisa mu upfumi wake zviro zvipsva no zviro zvekare.”
53 Djesu paakapedza kuita miezaniso ii, akabudepo. 54 Paakaguma mu thaundi rake, akatanga kufundisa anhu mu masinagoga awo, zvokuti akashamiswa, uye akatanga kuti: “Munhu uu akauonerepi ungwaru uu no simba rokuita zvishamiso izvi? 55 Uu andiepi here mwana we mutsetsi we matabwa? Mai ake andiopi Mariya, uye hama dzake andiopi Tiyago, Zuzee, Simoni na Djudha? 56 Uye hanzvadzi dzake, andidzopi dzatinadzo pano here? Hino iyena wakazvionepi zvese izvi?” 57 Ngokudaro, awona akatanga kukuhunyika nge ndaa yake. Asi Djesu akaabvunza kuti: “Muphorofita, aareremedzwi mu nharaunda yake no e pamuzi pake.” 58 Uye iyena aazi kuita zvishamiso zvakawanda imona, ngo ndaa ye kutama kutenda kawo.