Akatarhwa na Mateu
14 Pa nguwa iyona, Herodhi mutungamiriri we Garireya, wakazwa ngezva Djesu, 2 uye wakati ku aseenzi ake: “Uu ndi Juau Mubhabhatidzi. Wamutswa kubva ku akafa, ndiyo ndaa uri kuita mabasa anoshamisa.” 3 Herodhi* wainga wabata Juau, womusunga womukanda mu kadheya nge ndaa ya Herodhiya, mukadzi we hama yake inozwi Firipi. 4 Ngokuti Juau waimubvunza kuti: “Amutenderhwi kuti mugare no mukadzi uu.” 5 Uye kunyazi Herodhi waida kumuuraya, waithya anhu, ngokuti awona aimuona hinga muphorofita. 6 Asi, pa zuwa rekupemberera kubarhwa ka Herodhi, mwana we mwanakadzi wa Herodhiya, wakatamba pamberi pe anhu ainga apikwa uye wakapfadza maningi Herodhi, 7 zvokuti wakamugondesa eciita zvekupika kuti waizomupasa cese caaizokumbira. 8 Hino, iyena wakakumbira zvaainga abvunzwa na mai ake, wakati: “Ndipei pano musoro wa Juau Mubhabhatidzi mu paratu.” 9 Kunyazi wakatsukwara, mambo wakatuma kuti aupaswe, nge ndaa yekureremedza zvaainga apikira, no anhu aairhya* nawo. 10 Hino wakatumira soko, wakaita kuti Juau agurhwe musoro mu kadheya. 11 Musoro wake wakakandwa mu paratu, wotambidzwa musikana, uye iyena wakautora woenda koupasa mai ake. 12 Afundi a Juau akazouya kootora mutumbi wake, oenda koukotsa; pedzepo, akaenda koobvunza Djesu zvainga zvaitika. 13 Djesu paakazvizwa, akapakira bharko oenda ku mbuto isina anhu kuti agare ega. Asi anhu paakazvizwa, akamuteera no tsoka ecibva mu mathaundi.
14 Paakacita mu bharko, iyena akaona anhu akawanda, uye akaazwira usisi. Pedzepo, iyena akaporesa ese airhwara pakati pawo. 15 Asi zuwa parakadoka, afundi ake akamukhwederera omubvunza kuti: “Mbuto ino iri kure no kunogara anhu uye kaakudoka. Bvunzai anhu aya kuti aende mu nharaunda dziri padhuze kuti adzitengere zvokurhya.” 16 Asi, Djesu akati kaari: “Awona aadikani kuenda kumba; apasei imwimwi zvokurhya.” 17 Awona akamudaira kuti: “Atina ciro pano, asi tino pau shanu no howe mbiri basi.” 18 Iyena akati: “Zviunzisei kuno.” 19 Pedzepo, iyena akabvunza anhu kuti agare pashango. Hino, akatora pau shanu no howe mbiri, uye akaringira kudenga oita munamato, akagura pau odzipasa afundi ake, uye afundi ake akadzipasa anhu ese. 20 Ngokudaro ese akarhya oguta, uye akaunganidza matimbu ainga asara, odzadza zvitengu 12. 21 Aya akarhya, anokwana kuita anarume 5000, pasikaerengwi anakadzi no ana adoko. 22 Nokukasika, iyena akabvunza afundi ake kuti akwire bharko, ngokuti iyena aida kuti atungamire kuenda n’ombera, pedzepo iyena akasara ecieneka anhu.
23 Paakapedza kueneka anhu, iyena akakwira ega mudunhu kuenda kooita munamato. Zuwa parakadoka, iyena ainga ari ega imona. 24 Pa nguwa ii, bharko rainga raakure* no pamuceto pe bahari, irona raibatana no cinetso cakakura nge ndaa ye mafungu, ngokuti aienda kwaibva mhepo. 25 Pakainga kwaakuda kuedza,* Djesu akaenda kune afundi ake ecihamba pamusoro pe mvura. 26 Paakamuona ecihamba pamusoro pe mvura, afundi ake akapatika uye akati: “Amunhupi uwo!” uye awona akatanga kukhuwa ngo kuthya. 27 Asi Djesu akaabvunza kuti: “Shingai! Ndini; musathye.” 28 Pedru wakamudaira kuti: “Tenzi, kana muri imwimwi, itai kuti ndiuye kamuri ndecihamba pamusoro pe mvura.” 29 Djesu akati: “Uya!” Ngokudaro, Pedru wakabuda mubharko, wotanga kuhamba ngo pamusoro pemvura ecienda kuna Djesu. 30 Asi paakaringira dutu, wakatanga kuthya. Uye paakatanga kundondomera, akadainzira eciti: “Tenzi, ndiponeseiwo!” 31 Djesu akatambanudza moko wake nokukasika omubata, omubvunza kuti: “Iwe une kutenda kudoko, ngei usikazi kugara no cokwadi?” 32 Mumasure me kukwira mubharko, dutu rakaima. 33 Hino, aya ainga ari mubharko naye akamugodamira, uye oti: “Zvezvirokwazvo imwimwi muri Mwana wa Mwari.” 34 Uye awona akabira, oguma ku mbuto inozwi Genezareti.
35 Anhu e mbuto iyona paakandomuziya, akatumira soko mu nyika yese iyona, no nharaunda yese yakaitenderedza, uye anhu akamuunzisira ese aya airhwara. 36 Uye aimudeketerera kuti andobate basi zviusaru zve macira ake, uye ese akazvibata, akaporeswa.