Akatarhwa na Marko
11 Paaikhwedera ku Djerusarema, Djesu akaguma pa Dunhu re Miorivhi, raioneka ku Bhetifajee no Bhetanya, iyena akatuma afundi ake airi 2 uye akaabvunza kuti: “Endai mu mutanha wamuri kuona uu, uye pamunopinda imona, mucagumira kadhongi kakasungirhwa kekuti apana munhu wakambokakwira. Kasudzunurei mokaunzisa kandiri. 3 Kana munhu akamubvunzisai kuti: ‘Muri kuitirei izvona?’ Mubvunzei kuti: ‘Kari kudiwa na Tenzi uye acakahwirinza kuno nokukasika.’” 4 Ngokudaro akaenda uye akagumira kadhongi kakasungirhwa pa musuwo, nge kunza pa gwanza uye akakasudzunura. 5 Asi anhu anganani ainga ari ipona akaabvunzisa kuti: “Zvinyi zvamuri kuita, muri kusudzunurirei kadhongi?” 6 Awona akaabvunza zvaainga abvunzwa na Djesu, uye anhuwo akaasiya ecienda.
7 Akauya no kadhongi kuna Djesu, uye akakanda macira awo pa musana pe kadhongi, uye Djesu akakapakira. 8 Uyezve, anhu akawanda akawarira macira awo mu gwanza, asi amweni aitema nhai dze miti dze mushango.* 9 Uye anhu aihamba mberi kake no aimuteera, aidainzira eciti: “Tinomukumbirai kuti mumuponese! Akakomborerhwa munhu anouya mu zina ra Djehovha!* 10 Wakakomborerhwa Umambo ucauya wa baba edu Dhavhidhi! Tinomukumbirai kuti mumuponese, muri kumusoro-soro!” 11 Uye akapinda mu Djerusarema, oenda mu tempro uye akanyasa kuona zvese, asi ngokuti kainga kadoka, iyena akabuda oenda ku Bhetanya no afundi ake 12.
12 Pa zuwa rakazoteera paainga ecibuda mu Bhetanya, Djesu akatanga kuzwa nzara. 13 Nge cekure, iyena akaona muonde wainga uno masakani, uye akaenda koona kuti wainga uno mucero here. Asi paakaguma padhuze, aazi kuona ciro, kunza ke masakani basi, ngokuti yainga isiripi nguwa yo maonde. 14 Hino iyena akati kauri: “Ngapasaonekezve munhu anorhya micero yako.” Uye afundi ake ainga ecizvizwa.
15 Akaguma mu Djerusarema. Kweneyo iyena akapinda mu tempro uye akatanga kudzingirisa ese aitenga no kutengesa mu tempro, akaminura mameza e aya aicinja mare no makadera e aya aitengesa njiwa, 16 uye apana munhu waaitendera kupinda no pa tempro akathwara ciro. 17 Iyena aifundisa, eciabvunza kuti: “Azvizi kutarhwa here, kuti ‘Nyumba yangu icadainzwa nyumba yo minamato ku madzinza ese’? Asi imwimwi makaiita nyumba yo mambavha.” 18 Atungamiriri e apristi no atari akazvizwa, uye akatanga kupsvaka mukana wekumuuraya; ngokuti aimuthya, sezvo anhu aishamiswa no zviya zvaaifundisa.
19 Zuwa parakadoka, awona akabuda mu thaundi. 20 Asi comacibesi paainga ecipinda ngo pa muonde, akaona kuti iwona wainga waoma kubvira ku midzi. 21 Pedru wakazviedzurira uye wakamubvunza kuti: “Rabhi, onai! muonde uya wamakatuka waoma.” 22 Djesu akamudaira eciti: “Tendai muna Mwari. 23 Ndinomubvunzai zvirokwazvo kuti munhu wese anobvunza dunhu iri kuti: ‘Buda pano wodzikhandira mu bahari,’ ane cokwadi nazvo mu mwoyo make uye ecitenda kuti zvaanoreketa zvicaitika, zvicaitika. 24 Ndiyo ndaa ndinomubvunzai kuti, zviro zvese zvamunokumbira mu munamato, tendai kuti matozvitambira, uye mucagara nazvo. 25 Uye pamunonga makaimira mecinamata, rekererai zviro zvese zvamakashaishirhwa no munhu, kuti Baba enyu ari kudenga amurekerereiwo zvishaishi zvenyu.” 26* ——
27 Akagumazve mu Djerusarema. Uye paainga ecihamba mu tempro, atungamiriri e apristi, atari no akuru akauya 28 uye akamubvunzisa kuti: “Uri kuita zvese izvi no simba raani? Uye ndiani akakupasa simba irona?” 29 Djesu akadaira kuti: “Ndiri kuda kumuitai mubvunzo umwe. Kana mukandidaira, ndinozomubvunzaiwo kuti simba randinoita naro zviro izvi rakabva kupi. 30 Rubhabhatidzo ra Juau rakabva kudenga here kana kuti ku anhu? Ndidairei.” 31 Hino awona akatanga kubvunzana pacawo, eciti: “Kana tikabhuya kuti: ‘Rakabva kudenga,’ iyena acati: ‘Hino ngei imwimwi musikazi kutenda maari?’ 32 Asi tingashinga here kuti: ‘Rakabva ku anhu’?” Awona aithya anhu, ngokuti zvezvirokwazvo ese aiona kuti Juau wainga ari muphorofita. 33 Ngokudaro, awona akadaira Djesu kuti: “Atizvizii.” Djesu akaabvunza kuti: “Hino andimubvunziiwo kakabva simba randinoita naro zviro izvi.”