Juau Wekutanga
1 Soko re upenyu ndiro rainga riripo kubvira pakutanga, ratakazwa, ratakaona nge madziso edu, ratakanyasa kuringira uye kubata no nyara dzedu, 2 (honde, upenyu watakapangidzwa, isusu takauona, uye tiri kupasa upupuri no kumuziisai upenyu usikaperi wainga una Baba uye watakapangidzwa), 3 zvatakaona no zvatakazwa tiri kuzviziisawo imwimwi, kuitira kuti mugarewo mu rubatano na isusu. Uye isusu tiri mu rubatano na Baba uye no Mwana wawo, Djesu Kristu. 4 Tamutarirai zviro izvi kuitira kuti mupfaro wedu udzadzike.
5 Aya ndiwo masoko atakazwa naye uye atiri kumuziisai: Mwari ndi ciedza, uye mukati make amuna cidima. 6 Kana tecibhuya kuti: “Tiri mu rubatano naye,” asi tecirumbwa tecihamba mu cidima, tiri kunyepa uye atiripi kuita zviro maererano no cokwadi. 7 Asi kana tecihamba mu ciedza hinga iyena ari mu ciedza, tinonga takabatana umwe na umwe wedu, uye ngazi yo Mwana wake, Djesu, inoticenesa pa zvitema zvese.
8 Kana tikabhuya kuti: “Atina citema,” tinonga tecidzinyepera uye cokwadi aciripi matiri. 9 Kana tikapupura zvitema zvedu, iyena akatendeka uye ndi munatsi kuti arekerere zvitema zvedu uye aticenese pa zviro zvese zvakashata. 10 Kana tikabhuya kuti: “Isusu atishaishi,” tinonga teciita hingana kuti Mwari ndi munyepi, uye soko rake rinonga risiripi matiri.