Zvakapangidzwa kuna Juau
9 Ngirozi yocishanu yakaridza tropito yayo. Uye ndakaona nyeredzi yainga yambwera pasi kubva kudenga, uye yakapaswa shavhi yo rindi rakadzikisisa. 2 Nyeredzi iyona yakafunungura rindi rakadzikisisa, murindimo makabuda cutsi, cutsi icona cakaita hingana cutsi cinobuda pa muriro wakakura; zuwa no mhepo zvakasvipa nge ndaa ye cutsi caibuda mu rindi. 3 Mu cutsi icona makabuda makwiza, makwiza awona akabararika pa nyika uye akapaswa simba rakaezana no simba rino zvinyakon’a zve pa nyika. 4 Akabvunzwa kuti asakuwadze zvinomera zve pa nyika, shango uye miti, asi akuwadze basi anhu aya asina cidhindo ca Mwari pa huma.
5 Makwiza awona aazi kutenderhwa kuti aauraye, asi aarhwadzise ke mwedzi mishanu, uye kurhwadzisa ikona kakaezana no kurhwadzisa kunoita cinyakon’a pacinoruma munhu. 6 Mu mazuwa awona anhu acapsvaka rufu, asi aazorioni, uye acada kufa, asi rufu ricaatiza.
7 Makwiza awona ainga akaita hinga makavharo akagadzirira kuenda koorhwa; mu musoro mawo mainga muno ciro cakaita hingana korowa ye oro, uye hope yawo yainga yakaita hingana hope dzo anarume, 8 asi ainga ano tsitsi rakaita hingana ro anakadzi. Mazino awo ainga akaita hingana o mhondoro, 9 uye ainga ano zvidziiriro zve pa diti zvakaita hingana zvo simbi. Kurira ke mabaphiro awo kaiita hingana ngoro dzaikweiiwa no makavharo ecienda ku hondo. 10 Uyezve, awona ainga ano mushwe dzinoruma maningi hingana zvinyakon’a, uye mu mushwemo ndimo mainga muno simba re kukuwadza anhu ke mwedzi mishanu. 11 Awona ano mambo wawo, mambo iyena i ngirozi yo rindi rakadzikisisa. Mu Cihebheru zina rayo rinozwi Abhadhoni,* asi mu Cigrego zina rayo rinozwi Aporiyoni.*
12 Nyathwa imwe yadarika. Ngwarirai! Nyathwa mbiri dziri kuuya mumasure me zviro izvi.
13 Ngirozi yocitanhatu yakaridza tropito yayo. Uye ndakazwa izwi raibva pakati po nyanga yo artari ye oro iri pamberi pa Mwari 14 yeciti ku ngirozi yocitanhatu yainga ino tropito: “Sudzunura ngirozi mirongomuna dzakasungwa pamwepo ku murambo mukuru we Eufrate.” 15 Uye ngirozi mirongomuna dzainga dzakagadzirirhwa kuguma ke nguwa, zuwa, mwedzi uye gore, dzakasudzunurhwa kuti dziuraye dii rimwe re matii matatu e anhu.
16 Numero ye anyahondo aihambisa makavharo, yainga iri ye mazana mairi e zviuru zvakawandisa maningi;* inini ndakazwa numero yawo. 17 Makavharo andakaona mu ciono cangu no anhu ainga akaapakira ainga akaita kudai: “Ainga ano cidziiriro ce pa diti cokupsvuka hingana muriro, bhurumu* hingana buwe rinozwi jasintu uye kori yo nzanya hingana enshofre; misoro ye makavharo yainga yakaita hingana misoro ye mhondoro, uye mu muromo madzo maibuda muriro, cutsi uye enshofre. 18 Dii rimwe re matii matatu e anhu rakapera kufa nge ndaa ye matambudziko matatu: Muriro, cutsi uye enshofre zvaibuda mu muromo madzo. 19 Uye simba ro makavharo aya, riri mukanwa uye ku mushwe kadzo, ngokuti mushwe wadzo wakaita hingana nyoka uye uno musoro, uye anokuwadza no mushwe dzawo.
20 Asi anhu amweni asikazi kuuraiwa no matambudziko aya aazi kucinyuka pa mabasa e nyara dzawo; aazi kusiya kunamata madhimoni, zvidhori zve oro, zve prata, zve kobre, zve mapuwe uye zve matabwa, zvekutoti azvikwanisi kuona, kuzwa kunyazi kuhamba. 21 Awona aazi kucinyuka pa maitiro awo e kuuraya, ekuita zve mudzimu,* e uhure* uye e kuba.