Erengai Matsamba—Kodi Bhaibheri Rinotifundisei?
FUNDO 1
MWARI NDIANI?
(Djobho 34:10-12) Ndiyo ndaa, ndipurutanei anarume anozwisisa: Mwari we zvirokwazvo aamboiti zvakashata, We Masimba Ese aazomboiti zviro zvisikazi kunaka. 11 Ngokuti acapasa munhu mubairo maererano no zviito zvake uye acaita kuti atambire zvinoenderana no makwanza ake. 12 Zvirokwazvo nge zvekuti Mwari aaiti zvakashata; We Masimba Ese aaiti zvisina unatsi.
(Pisarema 37:9-11) Ngokuti ashaishi acatsakatiswa, Asi aya anogonda Djehovha acagara nhaka ye nyika. 10 Katosara nguwa shomanani uye ashaishi aacazoonekizve; Ucanangira paainga ari, Uye awona anonga asisipo. 11 Asi anhu akapfawa acagara nhaka ye nyika, Uye acapfara maningi mu runyararo rakawanda.
(1 Pedru 5:7) mecikhandira zvese zvinokurhyai mwoyo kaari, ngokuti iyena anomucengetai.
(Zviito 17:11) Aya ainga ano ndangariro dzakanaka kupinda e ku Tesaronika, ngokuti akatambira soko no cido, uye ainyasa kukwarakwatisa Matarhwa mazuwa ese kuitira kuti aone kuti zviro zvaainga azwa zvainga zvino shwiro.
FUNDO 2
KODI BHAIBHERI — I BHUKU RA MWARI HERE?
(2 Timoti 3:16) Matarhwa ese akafemerhwa na Mwari uye anobetsera pa kufundisa, pa kusumurura, pa kugadzirisa zviro, pa kupanga zve unatsi,
(Isaya 48:17) Izvi ndizvo zvinobhuiwa na Djehovha, Mupukunyusi wako, Mucena we Israeri: “Inini, Djehovha, ndini Mwari wako, Uya anokufundisa zviro zvinokubetsera, Uya anokutungamirira mu gwanza raunodikana kuhamba.
(Isaya 44:27–45:2) Uya anoti ku mvura yakadzika, ‘Iphwa! Ndicaomesa mirambo yako yese’; 28 Uya anoti nge zva Siro: ‘Iyena ndi muushi wangu, Uye acaita zvese zvandinopfarira’; Uya anoti nge zve Djerusarema: ‘Irona ricawakwazve’, Uye nge zve tempuru: ‘Fundasau yako icawakwa.’”
45 Izvi ndizvo zvinobhuiwa na Djehovha ku mudzodziwa wake, kuna Siro, Wandinobata no muoko wangu kwawo, kuti ndinyise nyika dzakawanda ndeciseenzesa iyena, Kuti ndiite kuti madzimambo asare asina zvokurhwa nazvo, Kuti ndifungure pamberi pawo misiyo miiri, Kuitira kuti misiyo mikuru isazofungwe: 2 “Inini ndicakutungamirira, Uye ndicaphwanya ndozveredza matunhu. Ndicagura-gura misiyo yawo ye kobre uye ndicagura zvikhiyo zve misiyo zve simbi.
(Numero 23:19) Mwari amunhupi hake anoreketa manyepo, Uye aazi kuezana no mwana wo munhu anocinja mazano. Kana akareketa ciro, aaciiti here? Kana akareketa, anokonerhwa kuzvitondoedza here?
(Ahebheru 4:12) Ngokuti soko ra Mwari ripenyu uye rino simba, uye rakapinza maningi kupinda supada inoceka no kwese, uye rinobaya mukati-kati dakara panoparadzana zviri kunza no zviri mukati me munhu, uye panosongana makodo no urozvi, uye rinokwanisa kuzwisisa ndangariro dze munhu uye zviri kudikanwa no mwoyo wake.
FUNDO 3
NGEI MWARI AKASIKA NYIKA NO ANHU?
(Tiyago 1:13-15) Munhu paanonga eciedzwa, ngasabhuye kuti: “Ndiri kuedzwa na Mwari.” Ngokuti, Mwari aangaedzwi no zviro zvakashata, uye ayena aaedzi munhu. 14 Asi munhu umwe na umwe anoedzwa ngo kusiridzwa uye kutorhwa mwoyo no zvido zvake. 15 Hino, cido pacinokura, cinobara citema, uye citema pacinonga caizwa, cinobara rufu.
(Genesi 3:1-5) Nyoka ndiyo yainga yakangwara kupinda zvinyama zvese zve mushango zvainga zvakaizwa na Djehovha. Hino, iyona yakati ku mwanakadzi: “Ndizvodi kamare zvakabhuya Mwari, kuti amudikani kurhya micero ye miti yese ye mu munda?” 2 Hino, mwanakadzi akati ku nyoka: “Tingarhya hedu micero ye miti yo mu munda. 3 Asi, nge zve mucero we muti uri pakati pe munda, Mwari akati: ‘Musaurhye, kana kuubata, mukandodaro mucafa.’” 4 Hino, nyoka yakati ku mwanakadzi: “Zve zvirokwazvo amuzofi. 5 Ngokuti Mwari anoziya kuti zuwa rimwero ramucaurhya, madziso enyu acapenyeswa uye mucaita hingana Mwari, meciziya zvakanaka no zvakashata.”
(Aroma 5:12) Hino, ngo ndaa yo munhu umwe basi citema cakapinda mu nyika, uye rufu rakapinda ngo ndaa yo citema, ngokudaro rufu rakabararika ku anhu ese ngokuti ese ainga ashaisha—.
(Zvierengo 27:11) Mwana wangu, gara wakangwara upfadze mwoyo wangu, Kuti ndikwanise kudaira uya anondishora.
(Dhanyeri 2:44) “Mu mazuwa e madzimambo awona, Mwari we ku denga acaita kuti pamuke umambo usikazomboparadzwi. Umambo wakhona auzopaswani. Ucaputsa, wogumisa umambo wese uu, uye ndiwo woga ucagara uripo nokusikaperi,
(Juau 3:16) “Ngokuti Mwari akada maningi nyika, zvekuti akapasa Mwana wake umwe ega, kuitira kuti munhu wese anomutenda asaparadzwe, asi aone upenyu usikaperi.
(Juau 17:3) Kuti aone upenyu usikaperi, anodikana kuziya imwimwi, Mwari umwe basi we zvirokwazvo, no uya wamakatuma, Djesu Kristu.
(Isaya 32:18) Anhu angu acagara mu mbuto dzino runyararo, Mu mbuto dze kugara dzakacengeteka uye musina cekuthyira.
(Mika 4:4) Munhu umwe na umwe acazogara pasi pe muvhinyu wake ne pasi pe muonde wake, Pasina acaathyisa, ngokuti muromo wa Djehovha we anyahondo wazvireketa.
(Isaya 65:21-24) Awona acawaka madzinyumba uye ogaremo, Acasima mu munda miti dze mivhinyu uye worhya micero yayo. 22 Aazowaki kuti amweni agaremo, Kana kusima kuti amweni arhye. Ngokuti mazuwa e anhu angu acaita hingana mazuwa e muti, Uye anhu andakasanangura acapfadzwa zvekupfadzwa zviya no mabasa e nyara dzawo. 23 Aazosenzi zvakaoma pasina, Kana kubara ana acatambudzika, Ngokuti awona pamwepo no ana awo ndi anhu akakomborerwa na Djehovha. 24 Inini ndicaadaira, kunyazi asatoti adainzira, Ndicaazwa paanonga asatoti apedza kureketa.
(Zvakapangidzwa 11:18) Asi anhu e nyika dzese akashatirhwa, uye imwimwi makapangidzirawo hasha dzenyu, uye yakaguma nguwa yakasanangurhwa yekuti akafa atongwe uye mupase mubairo aseenzi enyu maphorofiti, kutobatanidzawo anhu akacena no anhu anothya zina renyu, akuru no adoko uye kuti muparadze aya ari kuparadza nyika.”
(Isaya 11:6-9) Mhumhi icagara no kabira, Uye khamba icawata pasi pamwepo no mbudzi; N’ombe doko, mhondoro no cinyama cakanuna zvicazohamba pamwepo; Uye kamurumbwana ndiko kacazozvitungamirira. 7 N’ombe ye kadzi no Urusu yo kadzi zvicarhya pamwepo, uye zviana zvazvo zvicawata pamwepo. Mhondoro icarhya uswa hingana n’ombe yo mukono. 8 Mwana aciri kuamwa acatamba panogara pfira, Mwana arumurhwa acapindisa nyara yake mu muparo me nyoka ino nveneno. 9 Azvizokuwadzi Kana kutsakatisa mu dunhu rangu rakacena, ngokuti zve zvirokwazvo nyika icadzara ngo kuziya Djehovha, Hingana kufukidzwa kunoithwa bahari no mvhura.
(Isaya 65:25) Mhumhi no kabira zvicarhya pamwepo, Mhondoro icarhya uswa hingana n’ombe yo mukono, Uye nyoka icarhya mavhu. Azvizokuwadzi kana kutsakatisa mu dunhu rangu rakacena,” anodaro Djehovha.
(Juau 5:28, 29) Musashamiswe nga izvi, ngokuti icakwana nguwa yekuti ese aya ari mumakuwa ekurangarirhwa acazwa izwi rake 29 obuda, aya akaita zvakana acamutsirhwa ku upenyu, uye aya akaita zvakashata acamutsirhwa kutongwa.
FUNDO 4
DJESU KRISTU NDIANI?
(Juau 3:13) Apana munhu akakhwira ku denga kunza ke uya wakaciteyo, Mwana we munhu.
(Juau 6:38) ngekuti ndakacita kudenga haiwa kuti ndiite kuda kangu, asi kuti ndiite kuda ka uya akandituma.
(Juau 6:62) Hino munozodini mukaona Mwana we munhu acihwirira kainga ari kare?
(Juau 17:4, 5) Ndakamukudzai pa nyika uye ndakapedza basa ramakandipasa kuti ndiite. 5 Zvino pano Baba, ndikudzei pa dii renyu no mbiri yandainga ndinayo naimwimwi nyika isati yasikwa.
(Juau 14:28) Mazwa zvandamubvunzai: ‘Ndiri kuenda uye ndicawhirirazve kamuri.’ Dai maindida, maizopfara kuti ndiri kuenda kuna Baba, ngokuti Baba akuru kupinda inini.
(Mateu 9:35, 36) Djesu akatanga kuhamba mu maguta ese ne mizi dzese, ecifundisa mu masinagoga awo, eciparidza masoko akanaka e Umambo uye ecirapa mishobo yese ye matenda uye urema. 36 Eciona anhu akawanda, iyena akaazwira usisi ngokuti aibathwa zvakashata uye ainga akabararika hingana mabira asina muushi.
(Afiripi 2:8) Kupinda izvi, paakauya hingana munhu, akadzidodosa uye akazwira dakara pa kufa, honde, kufa pa mutanda we kushuphikira.
FUNDO 5
RUSUDZUNURO—CIPO CIKURU CA MWARI
(Mateu 20:28) Zvimwezvoo, Mwana we munhu aazi kuuya kuzoseenzerhwa asi kuzoseenzera no kupasa upenyu wake kuti asudzunure ajinji.”
(Aroma 5:19) Ngo musikazwa we munhu umwe basi anhu akawanda akagara ashaishi, hino, ngo kuzwira ko munhu umwe basi anhu akawanda acagarawo anatsi.
(Aroma 3:23, 24) Ngokuti anhu ese akashaisha, uye akakonerhwa kupangidza mbiri ya Mwari, 24 uye Mwari anowaona hinga anatsi ngo ndaa ye mutengo wakaripa Kristu Djesu kuti aasudzunure. Ici ndico cipo cakapaswa ndi Mwari nge ndaa ye usisi wake ukuru.
(Ruka 22:19) Akatorawo pau, akaita munamato wokutenda, akaigura, akaapasa eciti: “Ii inoimirira muiri wangu, ucapiwa ngo kuda kenyu. Rumbwai meciita izvi kuti mundirangarire.”
FUNDO 6
PATINOFA TINOENDA KUPI?
(Muparidzi 9:5, 6) Ngokuti apenyu anoziya kuti acafa, asi akafa apana caanoziya, uye aacina kana mubairo, ngokuti zvese zvaiziikanwa nge zvawo zvakanganika. 6 Uyewo, rudo rawo uzondi wawo no bibvu rawo zvatopera, uye awona aacakwanisi kuita ciro cipi haco pa zvese zvinoizwa pasi pe zuwa.
(Muparidzi 9:10) Zvese zvaunokwanisa kuita no nyara dzako, zviite no simba rako rese, ngokuti ku Guwa kauri kuenda, akuna basa, kana kuronga mazano, kana ruziyo, kana ungwaru.
(Genesi 3:19) Ucarhya zvekurhya zve ziya re hope yako dakara wahwirira ku mavhu, ngokuti wakatorhwa kaari. Zvauri bukuta ucahwirira ku bukuta.”
(1 Juau 4:8) Munhu wese asikadi mudoni wake, aazii Mwari, ngokuti Mwari rudo.
FUNDO 7
AKAFA ACAMUTSWA!
(2 Akorinti 1:3, 4) Ngaasimbwe iyena Mwari uye Baba wa Tenzi wedu Djesu Kristu, Baba we usisi ukuru uye Mwari we kunyaradza kwese, 4 anotinyaradza pa matambudziko edu ese, kuti tikwanisewo kunyaradza amweni pa matambudziko awo ese, no kunyaradzwa kwatinoizwa ndi Mwari.
(Juau 11:41, 42) Ngokudaro, akabvisa buwe. Djesu eciringira kudenga akati: “Baba, ndinomutendai ngo kundizwa kamaita. 42 Zve zvirokwazvo, ndinoziya kuti munogara mecindizwa, asi ndareketa izvi nge ndaa ye anhu akawanda akandiunganira pano, kuitira kuti atendere kuti imwimwi makandituma.”
(Isaya 40:26) “Ringirai kudenga muone. Ndiani akasika zviro izvi? Ndiye Uya anozvibudisa hinga anyahondo no kuwanda kazvo, Iyena anozvidainza zvese nge mazina. Nge ndaa ye simba rake guru uye simba rake rinoshamisa, Apana ciro na cimwe haco cinoshota.
(Zviito 24:15) Uye inini ndino kariro kuna Mwari, kariro yokuti anhu anayoo, yekuti kucaoneka kumuka ke anhu anatsi no ashaishi.
(Isaya 25:8) Iyena acaparadza rufu zvacose, Uye Cangamire Tenzi Djehovha acapukuta misodzi ye hope dzese. Acabvisa pa nyika kupsverudzwa ke anhu ake, Ngokuti Djehovha kamare ndiye azvibhuya.
FUNDO 8
UMAMBO WA MWARI CINYI?
(Mateu 6:9-13) “Hino munodikana kunamata kudai: “‘Baba wedu muri kudenga, zina renyu ngariceneswe. 10 Umambo wenyu ngauuye, kuda kenyu ngakuizwe pa nyika hinga kudenga. 11 Tipasei zvokurhya zvedu zve zuwa ra nyamasi; 12 uye tirekererei zvishaishi zvedu hinga mushobo watinorekererawo anotishaishira. 13 Musatirekere tecipinda mu muedzo asi tinunurei pane wakashata.’
(Zvakapangidzwa 14:1) Ndakaona Bira rakaimira pa Dunhu re Zioni, pamwepo no anhu 144 000 ainga akatarhwa zina raro no zina ra Baba aro pa hope dzawo.
(Zvakapangidzwa 14:4) Aya ndiwo asikazi kudzisvipisa no anakadzi, zve zvirokwazvo, akaita hingana mhandwe. Aya ndiwo anogara eciteerera Bira, kese karinoenda. Akatengwa pakati pe anhu hinga zvibereko zvokutanga kuna Mwari no kuna Bira,
(Zvakapangidzwa 12:7-10) Hondo yakatanga kudenga: Migeri ne ngirozi dzake akarhwisa nyoka huru, uye nyoka huru ne ngirozi dzake akarhwisawo 8 asi awona akanyiswa, uye aazozi kuzoonazve mbuto yokugara kudenga. 9 Ngokudaro, nyoka huru yakakhandirhwa pasi, nyoka yo pakutanga, inozwi Dhiyabhurosi uye Sathani, uya ari kucengedza nyika yese inogarhwa. Iyena akakhandirhwa pa nyika, uye ngirozi dzake dzakakhandirhwawo pamwepo naye. 10 Ndakazwa izwi guru recibva kudenga reciti: “Zvinopano ruponeso ne simba ne Umambo wa Mwari wedu, ne simba ra Kristu wake zvazouya, ngokuti mupumhi we hama dzedu akhandirhwa pasi, iyena anodzipumha usiku ne masikati pamberi pa Mwari wedu!
(Pisarema 37:10) Katosara nguwa shomanani uye ashaishi aacazoonekizve; Ucanangira paainga ari, uye awona anonga asisipo.
FUNDO 9
NYIKA YAAKUDA KUPERA HERE?
(Ahebheru 10:24, 25) Uye ngatirangariranei umwe na umwe wedu, kuitira kuti tibambisane kupangidza rudo no kuita mabasa akanaka, 25 tisikarekeri kuungana kedu, hingana musambo uno amweni, asi tibambisane, maka-maka meciona kuti zuwa ra Mwari riri kuguma.
FUNDO 10
BHAIBHERI RINOTIFUNDISEI NGE ZVE NGIROZI?
(Genesi 6:2) ana a Mwari we zvirokwazvo akatanga kuona kuti ana e anhu ainga akarungama. Akatanga kutora ese aakasanangura kuti agare akadzi awo.
(2 Akorinti 2:11) kuti tisacengedzwe na Sathani, ngokuti makwanza aanoseenzesa kuti aticengedze tinoaziya.
(Dheuteronomiyo 18:10, 11) Pakati pako apadikani kuoneka munhu anopisa mwana wake we mwanarume kana we mwanakadzi pa muriro, kana munhu anoita zve kufembera, kana uya anoita zve masarapita, anotenda maninji, muroi, 11 kana munhu anokandira umweni wake mufuhwira, kana munhu unoenda ku n’anga, kana ku mufemberi, kana munhu anobudisa akafa.
(Zvierengo 18:10) Zina ra Djehovha i zinyumba rakabamba. Munatsi anogogomeremo odziirirhwa.
(Tiyago 4:7, 8) Hino, dzikandei pasi pa Mwari; asi rhwisanai na Dhiyabhorosi, uye iyena acamutizai. 8 Khwederai kuna Mwari, uye iyena acakhwedera kamuri. Cenesai nyara dzenyu imwimwi ashaishi, uye cenesai mwoyo yenyu, imwimwi muno mwoyo miiri.
FUNDO 11
NGEI PA NYIKA PAKADZARA NE MATAMBUDZIKO?
(2 Pedru 3:9, 10) Djehovha aanonoki kuita zvaakapikira hinga zvinorangarirhwa no anhu amweni kuti anonoka, asi iyena aamuitirii cinya, ngokuti apana waanoda kuti aparadzwe asi anoda kuti anhu ese acunyuke. 10 Asi zuwa ra Djehovha ricauya hinga mbavha, uye pa zuwa irona kudenga kucadarika nokukasika hinga kutinhira ke ciro, asi zviro zviri kudenga no zviro zviri pa nyika zvicanyunguruka nge ndaa yokupisa kukuru, uye nyika no mabasa ari mairi zvicabuda pamhene.
(1 Akorinti 10:13) Apana muedzo wakauya kamuri kunza ke iya inogara yecisongana no anhu ese. Asi Mwari akagondeka, uye aangamusiyi mecibatana no miedzo yamusikakwanisa kushingirira, asi pakuedzwa Mwari acamupsvakirai gwanza re kubuda naro kuti mukwanise kushingirira.
FUNDO 12
TINGAITEI KUTI TIGARE SHAMWARI YA MWARI?
(Pisarema 55:22) Khandira mutoro wako kuna Djehovha, Uye iyena acakutsigira. Aazomborekeri kuti munatsi adonhe.
(Pisarema 15:1-5) Djehovha, ndiani angagara murendo mu tenda yenyu? Ndiani angagara mu dunhu renyu rakacena? 2 Ndi uya anohamba asina ndaa, Anoita zvakanaka, Uye anoreketa zvirokwazvo mu mwoyo make, 3 Aasenzesi ririme rake kuti asvipise zina ro umweni, Aaitiri mudoni wake zvakashata, Uye aareyi shamwari dzake, 4 Anoramba munhu wese anoita zvakashata, Asi anoreremedza aya anothya Djehovha. Anoita zvaakapikira, kunyazi zvikazomushatira. 5 Aatoresi mare yake kuti ibarire, Aatendi kudyekerhwa kuti apase ndaa munhu asina ndaa. Munhu anoita zviro zvese izvi aazombozunguzwi.
FUNDO 13
REREMEDZAI UPENYU WAMAKAPASWA
(Pisarema 36:9) Kamuri ndiko kunobva upenyu; Nge ndaa yo ciedza cenyu, taakuona ciedza.
(1 Juau 3:15) Munhu wese anozonda hama yake muurayi, uye munoziva kuti apana muurayi anorumbwa ano upenyu usikaperi.
(Ekisodho 21:22, 23) “Kana anarume akapondana, okuwadza mwanakadzi ano pa muiri uye mwanakadziwo obara nguwa yake isati yakwana asi pasina afa, uya apara ndaa anodikana kuripa zvaanonga abvunzwa kuti aripe no mwamuna we mwanakadziwo; uye muripo wakhona unodikana kuriphwa peciseenzeswa atongi. 23 Asi kana pano munhu anonga afa, munodikana kuhwirinzira upenyu ne upenyu,
(Zviito 15:28, 29) Ngokuti mwiya mucena watibetsera kuti tiite cisananguro cekuti atidikani kumuremedzai no mitoro imweni, kunza ke zviro izvi zvamunodikana kuita: 29 kurumbwa muri kure no zviro zvakabairhwa mifanikiso inonamatwa, ngazi, nyama dzakabongonyorwa mutsipa, uye useki. Kana mukangwarira kuti musaite zviro izvi, zvicamuhambirai zvakanaka. Sarai zvakanaka!”
FUNDO 14
MHURI YENYU INGAONA KUDINI MUPFARO?
(Aefeso 5:25-29) Amuna, rumbwai mecida akadzi enyu, hingana kuda kakaita Kristu ungano, akadzipira kuifira, 26 kuti aicenese, eciicenesa no kuisambidza no mvura eciseenzesa soko, 27 kuitira kuti ungano irungame pa madziso ake, isina kana pakakhatika kana pakafunyana kana zviro zvimweni zvakaita hingana izvi, asi kuti igare yakacena isina payakashatiswa. 28 Amuna anodikanawo kuita zvimwezvo, ecida akadzi awo hingana miiri yawo. Mwamuna anoda mukadzi wake anodzida, 29 ngekuti apana mwanarume akambozonda muiri wake, asi anoupasa zvekurhya uye anoucengeta, hingana zvinoita Kristu kune ungano,
(Tito 2:4, 5) kuti akwanise kupangira anakadzi aciri madjaha kuti ade amuna awo, ade ana awo, 5 agare ne ndangariro dzakanaka, ano tsika dzakacena, anoita mabasa e panyumba, akanaka, anozwira amuna awo, kuti soko ra Mwari risashorhwe.
FUNDO 15
MUSHOBO UNODA MWARI KUTI TIMUNAMATE
(Juau 17:17) Acenesei meciseenzesa zvirokwazvo; soko renyu i zvirokwazvo.
(Juau 17:6) “Ndakaita kuti anhu amakandipasa pa nyika aziye zina renyu. Ainga ari enyu, mukandipasa, uye akacengeta soko renyu.
(Juau 13:35) Ese acaziya kuti muri afundi angu, kana muno rudo pakati penyu.”
(Juau 3:36) Anotenda mu Mwana ano upenyu usikaperi; asikapurutani Mwana aazooni upenyu, asi shungu dza Mwari dzinorumbwa dziri paari.
(Juau 18:36) Jesu akadaira kuti: “Umambo wangu auripi we nyika ino. Kudai Umambo wangu wainga uri we nyika ino, ateeri angu hingana arhwisa kuti Adjuda asandisunge. Asi zvirokwazvo nge zvekuti, Umambo wangu aubudi pa nyika ino.”
(Mateu 24:14) Uye masoko aya akanaka e Umambo acaparidzwa mu nyika yese inogarhwa, kuitira kupasa upupuri ku madzinza ese uye zvadaro mugumo ucauya.
FUNDO 16
SANANGURAI KUNAMATA MWARI
(Ekisodho 20:4, 5) “Audikani kudzigadzirira mifanikiso yakatsetswa, kana mifanikiso ye ciro cipi haco ciri kudenga ku musoro, kana ciri pa nyika pasi, kana ciri mu mvura pasi pe nyika. 5 Usazvikotamire kana kuzvinamata, ngokuti inini, Djehovha Mwari wako, ndiri Mwari anoda kudzipira kakadzara uye anophanica ana nge ndaa yo kushaisha ke madzibaba awo, dakara ku mubarirhwana wecitatu no we cirongomuna we aya anondizonda,
(Isaya 52:11) Budai, budai, budai imona, musabate ciro cizikazi kucena! Budai imona, rumbwai makacena, Imwimwi muri kuthwara midziyo ya Djehovha.
(Mateu 7:12) “Hino zviro zvese zvamunoda kuti anhu amuitirei, aitireiwo izvona. Izvi ndizvona kamare zvinorewa ne Mutemo ne Aprofita.
(Ahebheru 10:24, 25) Uye ngatirangariranei umwe na umwe wedu, kuitira kuti tibambisane kupangidza rudo no kuita mabasa akanaka, 25 tisikarekeri kuungana kedu, hingana musambo uno amweni, asi tibambisane, maka-maka meciona kuti zuwa ra Mwari riri kuguma.
FUNDO 17
MWARI ANOZWA MINAMATO HERE?
(Afiripi 4:6, 7) Musadzirhye mwoyo no ciro cipi haco, asi pa zviro zvese zvikumbiro zvenyu ngazviziiswe Mwari mucinamata uye mecideketera pamwepo nokutenda; 7 uye runyararo ra Mwari rinodarika kuzwisisa kese ricacengeta mwoyo yenyu no ndangariro dzenyu nokuda ka Kristu Djesu.
(Tiyago 2:26) Zve zvirokwazvo, muiri usina simba re upenyu wakafa, ndizvowo kutenda kusina mabasa kwakafawo.
(Mateu 6:9-13) “Hino munodikana kunamata kudai: “‘Baba edu muri kudenga, zina renyu ngariceneswe. 10 Umambo wenyu ngauuye. Kuda kenyu ngakuizwe, pa nyika, hingana kudenga. 11 Tipasei zvokuhrya zvedu zve zuwa ra nyamasi; 12 uye tirekererei zvishaishi zvedu hinga mushobo watinorekererawo anotishaishira. 13 Musatirekere ticipinda mu muedzo asi tinunurei pane akashata.’
(Zvakapangidzwa 14:6) Hino ndakaoma ngirozi imweni yecimburuka pakati pe denga, uye yainga ino masoko anopfadza anogara nokusikaperi ekuziisa ku anhu anogara pa nyika, ku madzinza ese no mareketero no anhu.
(Afiripi 4:13) Ndino simba re kuita zviro zvese ngo nyasha dza uya anondipasa simba.
FUNDO 18
NDINODIKANA KUDZIPIRA KUNA MWARI NDOBHABHATIDZWA HERE?
(Juau 17:3) Kuti aone upenyu usikaperi, anodikana kuziya imwimwi, Mwari umwe basi we zvirokwazvo, no uya wamakatuma Djesu Kristu.
(1 Pedru 4:2) kuti nguwa yake yasara ye kurarama pa nyama, atame kuraramira kuita kuda ke anhu asi kuti aite kuda ka Mwari.
(Mateu 28:19) Hino endai kune anhu e madzinza ese, afundisei kuti agare afundi angu, meciabhabhatidza mu zina ra Baba ne re Mwana ne re mwiya wakacena,
FUNDO 19
RUMBWAI MURI DHUZE NA DJEHOVHA
(Mateu 22:37) Iyena akati kaari: “‘Ida Djehovha Mwari wako no mwoyo wako wese no mwiya wako wese no ndangariro dzako dzese.’
(1 Juau 5:3) Ngokuti kuda Mwari kunooneka no kucengeta mitemo yake; uye mitemo yake airemi,
(1 Atesaronika 5:17) Namatai nguwa dzese.
(1 Akorinti 15:58) Hino hama dzangu dzinodiwa, garai makabamba, musikazunguzwi, nguwa dzese garai no zvakawanda zve kuita mu basa ra Tenzi, meciziya kuti basa ramunoita kuna Tenzi akuseenzerapi nyore.
(Akorosi 3:13) Rumbwai mecizwisisana uye mecirekererana no mwoyo wese, kunyazi kana pano munhu ano caakashaishirhwa no umweni wake. Hinga Djehovha akamurekererai no mwoyo wese, imwimwi itaiwo zvimwezvo.