Gidhiyoni Wakakunda Amidhiyani

Mumasure me kanguwa, Aisraeri akahwirirazve kunamata anamwari e kunyepa. Nge ndaa yazvo, ke makore anokwana kuita 7 Djehovha akasiya kuti Amidhiyani abe zvinyama zve Aisraeri uye atsakatise zvirimwa zvawo. Kuti atize Amidhiyani, Aisraeri aifindara mu mapako uye mu matunhu. Awona akadeketera kuna Djehovha kuti aabetsere. Ngokudaro, Djehovha akatuma ngirozi kuti irekete no mudjaha unozwi Gidhiyoni. Ngirozi yakati: ‘Djehovha akusanangura kuti ugare musurudado uno simba.’ Gidhiyoni wakabvunzisa kuti: ‘Inini? Ndicazviita kudini? Inini andiripi ciro!’

Hino, Gidhiyoni wakada kuziya kuti wainga asanangurhwadi na Djehovha here. Iyena wakatora dimbu re ukuse uye wakaukanda pasi uye wakanamata eciti: ‘Djehovha, kana mangwana ukuse uu ukagara wakatota asi pasi pakaoma, inini ndicaziya kuti imwimwi munoda kuti ndiponese Aisraeri.’ Pa zuwa rakazoteera, ukuse wainga wakatota asi pasi pakaoma! Asi Gidhiyoni waidazve cipangidzo cimweni. Ndiyo ndaa, wakakumbira Djehovha kuti aite zvakasiyana. Iyena wakakumbira kuti pa zuwa raizoteera, pasi pagare pakatota asi ukuse ugare wakaoma. Uye ndizvo kamare zvakaitika. Ngokudaro, Gidhiyoni wakagarawo no rugondo rekuti Djehovha ainga amusanangura. Hino iyena wakaunganidza masurudado uye wakaenda koorhwa no Amidhiyani.

Djehovha akabvunza Gidhiyoni kuti: ‘Inini ndicabetsera Aisraeri kuti akunde. Asi andidi kuti awona arangarire kuti akunda asina rubetso rangu. Ndiyo ndaa, siya kuti ese aya arikuthya ahwirire.’ Hino masurudado anokwana kuita 22 000 akahwirira kumba, uye pakasara basi masurudado anokwana 10 000. Djehovha akabvunza Gidhiyoni kuti: ‘Pacino masurudado akawanda maningi. Ita kuti masurudado aende koomwa mvura ku murambo. Asi tora masurudado aya basi anomwa mvura akarinda azondi awo.’ Anarume 300 basi ndiwo akaita izvona. Djehovha akagondesa kuti aizoseenzesa cikwata ici cidoko kuti akunde masurudado 135 000 e Amidhiyani.

Pa usiku uwona, Djehovha akabvunza Gidhiyoni kuti yainga yakwana nguwa yekuti aende koorhwisa Amidhiyani. Gidhiyoni wakapasa masurudado ake mabhozina, majaro akakura uye zviro zvekutunga nazvo zvainga zviri mukati me majaro. Uye wakaabvunza kuti: ‘Nyasai kuona zvandicaita uye itaiwo zvandicaita.’ Gidhiyoni wakaridza bhozina, wakapwanya jaro uye wakazunguza zviro zvekutunga nazvo okhuwa eciti: ‘Supada ya Djehovha uye ya Gidhiyoni!’ Anarume 300 akaitawo zvimwezvo. Amidhiyani akathya maningi uye akabuda ecigogoma ecienda ku matii akasiyana-siyana. Pakati pe woyo-woyo iyona, akatanga kuurayana pacawo. Djehovha akabetserazve Aisraeri kuti akunde azondi awo.