Korneriyo Wakatambira Mwiya Mucena wa Djehovha

Ku thaundi re Sezareya, kainga kune mwanarume umweni waizwi Korneriyo. Iyena wainga ari mukuru-mukuru we masurudado uye wainga asiripi Mudjudha, asi waireremedzwa maningi no Adjudha. Korneriyo wainga ano rupo uye waipfarira kubetsera arombo. Iyena waitenda muna Djehovha uye nguwa dzese wainamata kaari. Zuwa rimweni, ngirozi yakaenda kuna Korneriyo uye yakati: ‘Minamato yako uye rubetso raunopasa arombo zvaguma kuna Mwari hingana ciedzuriro. Hino tuma zvino anarume anganani kuti aende ku thaundi ro Jope, kuti aende kootora Pedru.’ Asikazi kutora nguwa yakareba, Korneriyo wakatuma anarume atatu kuti aende ku Jope.

Pa nguwa iyona, ari ku Jope, Pedru wakaona ciono. Iyena wakaona zvinyama zvainga zvisikarhyiwi no Adjudha. Ipona iyena wakazwa izwi recibhuya kuti iyena waidikana kurhya zvinyama zviya. Asi Pedru aazi kuda kuzvirhya ngekuti mutemo wairambidza. Izwiro rakabhuya kuti: ‘Usarangarire kuti zvinyamezvo azvizi kucena. Mwari akazvicenesa.’ Pedzepo, Mwari akabvunza Pedru kuti: ‘Pano anarume atatu ari pamusuwo ecikupsvaka. Enda nawo.’ Pedru wakaenda pamusuwo uye wakabvunzisa anarume atatu aya kuti: ‘Ngei imwimwi muri pano?’ Awona akadaira eciti: ‘Tatumwa na Korneriyo, Mukuru-mukuru we masurudado e Ciroma. Iyena wakumbira kuti muende kumba kake ku Sezareya.’ Hino anarume aya atatu akagara dakara pa zuwa rakazoteera pa nyumba painga pana Pedru. Pa zuwa rakazoteera, Pedru no anarume aya atatu uye no hama dzinganani dze ku Jope, akaenda ku Sezareya.

Pedru paakaguma, Korneriyo wakaenda kaari ogodama pamberi pake. Asi Pedru wakabhuya kuti: ‘Purumuka! Inini ndiri munhu hingana iwewe. Kunyanzi Adjudha asikapindi mu nyumba yo munhu usiripi mu Djudha, Mwari andituma kuti ndiuye kumba kako. Ndapota ndibvunze kuti ngei iwewe watuma anhu kuti auye koonditora.’

Korneriyo wakadaira eciti: ‘Pa mazuwa marongomuna adarika, inini ndainga ndecinamata pa nyumba pangu uye ngirozi yakabhuya kuti ndaidikana kukudainza kuti uuye pano. Ndapota, tifundisei zvese zvamunobvunzwa na Djehovha kuti mutibvunze.’ Pedru wakabhuya kuti: ‘Zvino ndaakunyasa kuzwisisa kuti Mwari aasananguri. Asi iyena anotendera uya anomuthya uye anoita zvakanaka.’ Pedru wakatanga kufundisa zvakawanda ngezva Djesu. Hino, Korneriyo no ese ainga anaye akatambira mwiya mucena uye akabhabhatidzwa.