Akawanda Akagara Akristu

Djesu akatuma aphostori ake kuti aende kooparidzira masoko akanaka ku mbuto yese ye nyika uye aphostori akazwira nhungamiriro iyona. Mu gore ra 47 K.A., hama dze ku Antiyokiya dzakatuma Pauro na Bharnabhee pa rhwendo re kuparidzira. Pa rhwendo irona, Pauro na Bharnabhee akaparidzira ku mbuto dzakawanda ku Aziya Menori, dzakaita hinga Dherbhe, Ristra, uye Ikoniyo.

Pauro na Bhernabhee aireketa ngezve masoko akanaka ku anhu ese. Awona aiparidzira ku apfumi, arombo, madjaha uye acembera. Akawanda akatanga kutenda muna Djesu. Zuwa rimweni, Pauro na Bharnabhee akaparidzira kuna Serjo Pauro, wainga ari govhernadhori we ku Shipre. Asi muroyi umweni wakaedza kumurambidza. Pauro wakati ku muroyiwo: ‘Djehovha ari kurhwisana newe.’ Ciriporipoco, muroyiwo wakagara bofu. Govhernadhori paakaona izvi, zvakamushamisa uye wakasanangura kugara Mukristu.

Pauro na Bharnabhee aiparidza ku mbuto dzese. Awona aifundisa pa nyumba no nyumba, mbuto dzakadzara anhu, mu makwanza uye no mumasinagoga. Paakapinda mu thaundi re Ristra, Pauro na Bharnabhee akaporesa mwanarume wainga akaremara. Anhu paakaona cishamiso ici, akarangarira kuti awona ainga ari anamwari uye akatanga kuanamata. Asi Pauro na Bharnabhee akati: ‘Musaite izvona. Isusu tiri anhuwo hingana imwimwi, namatai Mwari basi!’ Pa nguwa iyona, Adjudha akatanga kureketa zvakashata ngezva Pauro na Bharnabhee ku anhu ainga ari ku Ristra. Ndiyo ndaa, awona akafura Pauro no mapuwe uye akamupfupfurudza oenda naye kunza ko thaundi. Asi awona airangarira kuti Pauro wainga afa, asi iyena wainga asikazi kufa. Mumasure me kanguwa, hama dzakauya koobetsera uye dzakatora Pauro omuhwirinza ku thaundi. Paa padarika cinguwa, Pauro wakahwirira ku Antiyokiya.

Mu gore ra 49 K.A., Pauro wakatanga rhwendo rake re kuparidzira. Pakutanga, iyena wakaendazve koona hama dze ku Aziya Menori. Pedzepo, wakaita rhwendo rake ecienda ku mbuto dzainga dziri kure ne Europa. Iyena wakaenda ku Atena, Efeso, Firipi, Tesaronika no ma thaundi amweni. Ruka na Sirasi uye ne mudjaha umweni waizwi Timoti akaenda pamwepo na Pauro. Awona akaumba ungano uye akabetsera kuti dzikure. Pauro wakagara gore no hafu ku Korinti kuti abambise hama dzo ikona. Iyena wakaparidza, wakafundisa uye wakatara tsamba dzakawanda ku ungano. Pauro waiitawo basa re kugadzira ma tenda. Paa padarika nguwa, Pauro wakahwirirazve ku Antiyokiya.

Mu gore ra 52 K.A., Pauro wakatanga rhwendo rake re citatu re kuparidzira. Iyena wakatanga ku Aziya Menori uye wakakwidza dakara ku Firipi. Mumasure mazvo wakateredza dakara ku Korinti. Pauro wakapedza makore akawanda ari ku Efeso eciparidza masoko akanaka, eciporesa anhu uye ecibetsera ungano. Iyena waienda nguwa dzese ku cikora cimweni kooita mharidzo. Akawanda aimupurutana akagara Akristu. Mumasure me kuparidzira ku mbuto dzakawanda, Pauro wakahwirira ku Djerusarema.