Mwari Akasika Denga no Nyika

Djehovha Mwari ndi Musiki wedu. Iyena akasika zvese zviripo. Djehovha akasika zviro zvatinoona no zvatisikaoni. Pakutanga, iyena akasika ngirozi dzakawanda maningi. Unoziya kuti cinyi cinozwi ngirozi? Ngirozi munhu wakaita hingana Mwari uye inoraramira kudenga. Isusu atikwanisi kuona ngirozi hinga mushobo watisikwanisiwo kuona Mwari. Ngirozi yokutanga yakasika Mwari, yakagara mubetseri wake. Ngirozi iyona yakabetsera Djehovha kusika nyeredzi, mapraneta uye no zviro zvimweni zvese. Imwe ye praneta idzi ndi nyika, mbuto yakarungama yatinorarama.

Djehovha akasika nyika kuti zvinyama uye anhu araramire imona. Iyena akaita kuti ciedza ce zuwa cigume pa nyika. Imona, iyena akasika matunhu, mabahari uye mirambo.

Pedzepo cinyi caakazosika? Djehovha akati: ‘Ndicasika mashango, micero uye miti.’ Ngokudaro, pakaoneka micero yakawanda, mashango, zvekurhya uye maruwa pa nyika. Pedzepo, Djehovha akasika zvinyama zvese. Iwewe unopfarira zvinyama? Ngacipi cinyama caunonyanya kupfarira? Djehovha ndiye akasika zvese izvi. Iyena akasika zvinyama zvinohamba, zvinomburuka, zvinosambirira uye zvinopsveremenda. Djehovha akasika zvinyama zvidoko, zvakaita hingana zvitsuro uye zvinyama zvakakura zvakaita hingana nzoo.

Mumasure mazvo, Djehovha akati ku ngirozi yekutanga yaakasika: “Ngatisike anhu kuti ararame pa nyika.” Anhu aya aizogara akasiyana no zvinyama. Aizokwanisa kuita zviro zvakasiyana-siyana. Awona aizokwanisa kureketa, kuseka uye kucedza na Mwari. Awonawo aizocengeta nyika uye zvinyama. Unoziya zina ro mwanarume wekutanga here? Ngationei.