Djehovha Ari Kutigondesa kuti Nyika Icagara Paraizo

1. Masoko api akabvunzwa Aisraeri ndi Isaya?

MUPHOROFITA Isaya wakati: Djehovha ndi “Mwari we cokwadi.” Soko rakaturikirhwa kuti “cokwadi” rinoda kureya kamare kuti “ameni.” (Isa. 65:16, masoko e pasi) Soko rekuti “ameni” rinoda kureya kuti “ngazviitike,” kana kuti “izvirokwazvo.” Soko rekuti “ameni” parinobhuiwa mu Bhaibheri recida kubhuya ngezva Djehovha na Djesu rinotipasa rungondo rekuti zviro izvi izvirokwazvo. Ndiyo ndaa, masoko a Isaya ku Aisraeri ainga akadjeka: Pese Djehovha paanobhuya kuti anoda kuita ciito, zvinoitikadi izvona. Cokwadi ngecekuti Djehovha anodzadzisa zvese zvaanopikira.

2. Ngei tecidikana kugonda zvipikirhwa zva Djehovha zvaakaita ngezve ramangwana redu uye mibvunzo dzipi dzaticadaira mu fundo ino?

² Tingagonda kuti zvipikirhwa zva Djehovha zvaakagondesa ngezve ramangwana zvicaitikadi here? Makore 800 nguwa ya Isaya yaayadarika, muphostori Pauro wakareketa kuti, ngei tecidikana kugara no rungondo rekuti zvipikirhwa zvakaizwa na Mwari zvicadzadzika. Pauro wakati: “Azviiti kuti Mwari anyepe.” (Aheb. 6:18) Kuita hingana cimbo cisingakwanisi kubudisa mvura inonaka no mvura ino munyu panguwa imwe imweyo, ndizvonawo na Djehovha, Manyuku e zvirokwazvo, aanganyepi. Ndiyo ndaa, tinogonda Djehovha pa zvese zvaanobhuya, zvinobatanidza zvipikirhwa zvese zvaakagondesa ngezve ramangwana. Mufundo ino, ticadaira mibvunzo miiri: Djehovha akagondesa kutipasei mune ramangwana? Rugondo ripi ratakapaswa na Djehovha rekuti zvicaitikadi kamare?

DJEHOVHA AKAGONDESEI?

3. (a) Cipikirhwa cipi ca Djehovha cinokosha maningi katiri? (Zvakapangidzwa 21:3, 4) (b) Anhu amweni anozwa kudini patinoabvunza ngezve cipikirhwa ici?

³ Ngationei cipikirhwa cinokosha maningi katiri tese. (Erengai Zvakapangidzwa 21:3, 4.) Djehovha akabhuya kuti “apacazoonekizve rufu, kana kutsukwara, kana kucema, kana kurhwadziwa.” Akawanda edu tinoerenga mavhersikuro aya anokosha kuti tinyaradze anhu mu basa re kuparidzira uye kuti tipangidze anhu kuti upenyu unozonga wakadini mu Paraizo. Asi anhu amweni anotambira kudini masoko aya? Pamweni angati: “Izvi zvakanaka maningi kuti zvigare zve chokwadi.”

4. (a) Djehovha paakaita cipikirhwa ici ce Paraizo, cinyi caaiziya kuti caizoitika? (b) Pane kuita cipikirhwa ici basi, Djehovha akaiteizve?

⁴ Djehovha paakafemera muphostori Juau kutara cipikirhwa ici ce Paraizo, iyena ainga aakuziya kuti isusu taizoseenzesa mavhersikuro aya mazuwa ano, patinonga teciparidzira masoko akanaka e Umambo ku anhu amweni. Djehovha ainga aakutoziyawo kuti anhu akawanda zvaizoashuphira kutenda kuti ‘zviro zvaizocinja’ mune ramangwana. (Isa. 42:9; 60:2; 2 Ako. 4:3, 4) Hino, tingabetsera kudini anhu kuti agume pakuziya kuti zvipikirhwa zvinobhuiwa pana Zvakapangidzwa 21:3, 4 zvicadzadzika? Uye isusu tingabambisa kudini rugondo redu kuna Djehovha uye no zvipikirhwa zvake? Djehovha akatipasa zvikonzero zvakabamba zvekuti titende kuti iyena acadzadzisa zvipikirhwa zvake. Zvikonzero zvipi izvona? Djehovha anotigondesa kuti acadzadzisa zvipikirhwa zvake.

DJEHOVHA ANOTIGONDESA KUTI ACADZADZISA CIPIKIRHWA CAKE

5. Mavhersikuro api anotibetsa kugonda mucipikirhwa ca Mwari uye awona anobhuyei?

⁵ Mu bhuku ra Zvakapangidzwa tinogumira zvikonzero zvinganani zvekuti tigonde zvipikirhwa zva Djehovha zvinocokuita no Paraizo. Apona tinoerenga kuti: “Uya ainga akagara pacigaro ce Umambo akati: ‘Ona! Ndiri kuita kuti zviro zvese zvigare zvipsva.’ Uye akatizve: ‘Tara, ngokuti masoko aya akatendeka uye ngee zvirokwazvo.’ Uye iyena akandibvunza kuti: ‘Zvaitika! Inini ndini Arfa uye Omega, wokutanga uye wokupedzesera.’”—Zvak. 21:5, 6a.

6. Ngei gondeso yatinogumira pana Zvakapangidzwa 21:5, 6 inobambisa rugondo redu mu zvipikirhwa zva Djehovha?

⁶ Ngei matsamba aya e Bhaibheri ecibambisa rugondo redu kuna Djehovha? Pa matsamba aya tinoona kuti: “Zviri kuizwa na Djehovha zvingaezaniswa no kuasinari dhokumento rinotigondesa kuti acadzadzisa cipikirhwa cake.”b Bhuku ra Zvakapangidzwa 21:3, 4 rinotibvunza zviro zvatakagondeswa na Djehovha. Asi pa mavhersikuro 5 na 6, tinogumira asinatura ya Djehovha inotigondesa kuti cipikirhwa ici cicadzadzika. Ngationei zvino kuti Djehovha anotigondesa kudini kuti tigonde naye.

7. Masoko ari pa vhersikuro 5 ngeani uye ngei anokosha maningi?

⁷ Pakutanga pe vhersikuro 5 panobhuya kuti: “Uya ainga akagara pacigaro ce umambo akati.” (Zvak. 21:5a) Masoko aya anokosha ngekuti Djehovha akareketa katatu mubhuku ra zvakapangidzwa. Apona anoti: Aingirozipi kana kuti Djesu akapasa rugondo iri, asi Djehovha kamare! Izvona zvinopangidza kuti tinodikana kugonda no zvaakareketa pa vhersikuro 5. Ngei? Ngekuti Djehovha “aanyepi.” (Tito 1:2) Hino tingagonda no masoko ari pana Zvakapangidzwa 21:5, 6.

“ONA! NDIRI KUITA KUTI ZVIRO ZVESE ZVIGARE ZVIPSVA”

8. Masoko api anoseenzeswa na Djehovha anopangidza kuti acadzadzisa cipikirhwa cake? (Isaya 46:10)

⁸ Soko rinoteera rinorekethwa na Djehovha ngerekuti “Ona!” (Zvak. 21:5) Mu Cigrego soko rakaturikirhwa kuti “ona!” rinoseenzeswa kakawanda mu bhuku ra Zvakapangidzwa. Referensiya imweni inobhuya kuti soko iri pamwepo no cipangidzo ce kushamisika rinoseenzeswa kuti “zvibetsere aerengi kuti akwanise kuzwisisa zviro zvinoteera.” Uye Djehovha akazobhuyei mumasure mazvo? Iyena akati: “Ndiri kuita kuti zviro zvese zvigare zvipsva.” Djehovha acaita zviro izvi mune ramangwana, asi iyena ano rugondo rese rekuti acadzadzisa zvese zvaakapikira. Iyena ari kutobhuya hingana kuti cinjo idzi dzakatoitika kamare.—Erengai Isaya 46:10.

9. (a) Masoko e kuti “ndiri kuita kuti zviro zvese zvigare zvipsva” anoreyei? (b) Zvinyi zvicaitika no “denga” uye “nyika”?

⁹ Ngationgorore masoko atinogumira pana Zvakapangidzwa 21:5. Ipona Djehovha anoti: “Ndiri kuita kuti zviro zvese zvigare zvipsva.” Izvona zvinoreyei? Mukapituro ii, masoko aya anoda kureya zviro zviiri zvicaizwa na Djehovha. Cekutanga, Djehovha acatsakatisa nyika ii yakashata. Cecipiri, iyena acaunzisa nyika ipsva. Pana Zvakapangidzwa 21:1, isusu tinoerenga kuti: “Denga rokare no nyika yokare zvainga zvadarika.” “Denga rokare” ririkubhuiwa apa rinoreya anyautongi ari kutungamirirhwa na Sathani uye no madhimoni ake. (Mat. 4:8, 9; 1 Juau 5:19) Mu Bhaibheri soko rekuti, “nyika” ringaseenzeswa pakuda kureya agari e nyika. (Gen. 11:1; Pis. 96:1) Ngokudaro, “nyika yokare” zvinoreya anhu anoita zvakashata. Djehovha aaedzi kuda kugadzirisa “denga uye nyika” zvekuti zviripo zvino, ngokudaro iyena acazvitsakatisa zvacose. Uye pambuto pazvo, iyena acaunzisa “denga ripsva no nyika ipsva”—kana kuti, utongi upsva ucaonerera anhu anatsi.

10. Djehovha acaita kuti zviro zvese zvigare zvipsva nge mushobo upi?

¹⁰ Pana Zvakapangidzwa 21:5, tinoerenga zvinobhuiwa na Djehovha ngezve zviro zvaacaita kuti zvigare zvipsva. Onai kuti Djehovha aazi kubhuya kuti: “ Ndirikuita zviro zvese zvipsva.” Pano kudaro, akati: “ Ndiri kuita kuti zviro zvese zvigare zvipsva.” Djehovha acagadzirisa nyika uye oita kuti anhu agare akakwana. Hinga zvinobhuiwa no uphorofiti uri pana Isaya, Djehovha acaita kuti Nyika yese igare yakarungama hinga zvainga zvakaita munda we Edheni. Kugadziriswa uku kucatobatanidzawo no anhu. Djehovha anotigondesa kuti acatiporesa pa matenda ese. Mapofu no asikazwi uye akaremara acaporeswa uye kunyazi no akafa acatomutswawo.—Isa. 25:8; 35:1-7.

“MASOKO AYA AKAGONDEKA UYE NGEE COKWADI. . . . AWONA AKADZADZIKA!”

11. Djehovha akakumbira Juau kuti aitei uye cikonzero cipi caakamupasa?

¹¹ Zvinyi zvimweni zvakabhuiwa na Mwari zvinotipasa rugondo rekuti tingagonda mu zvipikirhwa zvake? Djehovha akabvunza muphostori Juau kuti: “Tara, ngokuti masoko aya akatendeka uye ngee zvirokwazvo.” (Zvak. 21:5) Pane kukumbira Juau kuti “atare” basi, iyena akamupangidza kuti ngei waidikana kuzvitara. Djehovha akatunhudzira kuti: “Masoko aya akatendeka uye ngee zvirokwazvo”—izvona zvinoda kubhuya kuti masoko a Mwari akagondeka. Isusu tinotenda maningi nge kuzwira kakaita Juau kuti “azvitare.” Nge ndaa yazvo, nyamasi uno tinokwanisa kuerenga ngezve kariro ye Paraizo uye kunyasa kurangarira ngezve makomborero anoshamisa atiri kuetsera.

12. Ngei Djehovha akati: “Zvaitika!”

¹² Djehovha akabhuyeizve? Iyena akati: “Zvaitika!” (Zvak. 21:6) Pa tsamba ii, Djehovha ari kubhuya hingana kuti zviro zvese zvaakagondesa ngezve Paraizo zvakatodzadzika. Djehovha angabhuya nge mushobo uu, ngekuti apana cingapingaidza cinangwa cake kuti cisadzadzike. Pedzepo, iyena akabhuya ciro cimwenizve cinotigondesa kuti zvipikirhwa zvake zvicadzadzika zvezvirokwazvo. Zvinyi?

“ININI NDIRI ARFA UYE OMEGA”

13. Ngei Djehovha akati: “Inini ndini Arfa uye Omega”?

¹³ Hinga zvatamboreketa, Djehovha pacake akabhuya katatu kese pa zviono zva Juau. (Zvak. 1:8; 21:5, 6; 22:13) Pa mugariro umwe na umwe we zviitiko izvi, Djehovha akaseenzesa masoko amwewo e kuti: “Inini ndini Arfa uye Omega.” Soko rekuti Arfa ndi bhii rokutanga mu Cigrego uye Omega rokupedzesera. Ecibhuya kuti ndini “Arfa uye Omega,” Djehovha anopangidza kuti paanotanga kuita ciro, iyena anociita kuti cibudirire.

14. (a) Djehovha akabhuya rini, “Arfa” uye acabhuyazve rini “Omega”? (b) Rugondo ripi ratinogumira pana Genesi 2:1-3?

¹⁴ Mumasure me kusika Adhamu na Evha, Djehovha akabhuya kuti ngacipi cainga ciri cinangwa cake ku anhu uye ku nyika. Bhaibheri rinobhuya kuti: “Mwari akaakomborera uye akaabvunza kuti: ‘Baranai, muwande, mudzadze nyika uye muitonge.’” (Gen. 1:28) Djehovha paakabhuya cinangwa cake, zvaiita hingana akabhuya kuti “Arfa.” Cinangwa ca Djehovha cicadzadzika kana abarirhwana a Adhamu na Evha e kuti akazwira acagara akakwana, odzadza nyika uye oicinja kuti igare Paraizo, pa zuwa irona kana izvi zvikaitika zvinoita hingana Djehovha ecibhuya kuti “Omega.” Djehovha paakapedza kusika “denga no nyika no zvese zviri mazviri,” iyena akapasa rugondo. Rugondo irona tinorigumira pana Genesi 2:1-3. (Erengai.) Djehovha akabhuya kuti zuwa reci 7 icena. Izvona zvinoda kureyei? Izvona zvinopangidza kuti cinangwa ca Djehovha ku anhu no kunyika cicanyasa kudzadzika pakupera ke zuwa reci 7.

15. Ngei pamweni Sathani wakarangarira kuti waizokwanisa kupingaidza Djehovha kuti asakwanise kudzadzisa cinangwa cake?

¹⁵ Mumasure mekuti Adhamu na Evha asiya kuzwira Djehovha, awona akagara ashaishi uye akapasa citema no rufu ku ana awo. (Aro. 5:12) Pamweni zvaizopangidza kuti Sathani wainga akwanisa kuita kuti Djehovha asadzadzise cinangwa cake cekudzadza nyika no anhu akakwana uye no anhu anozwira. Pamweni zvaizoshupha kuti Djehovha adzadzise soko rake rokuti “Omega.” Pamweni Sathani wakarangarira kuti Djehovha aisazokwanisa kudzadzisa cipikirhwa cake. Pamweni iyena wairangarira kuti Djehovha aizoparadza Adhamu na Evha, osikazve kazado imweni yakakwana kuti adzadzise cinangwa cake ku anhu. Asi kudai Djehovha akaita kudaro, hinga zvakabuda pamhene zvakabhuiwa na Sathani zvekuti Djehovha munyepi. Ngei? Ngekuti, maererano na Genesi 1:28, Djehovha ainga akabvunza Adhamu na Evha kuti ana awo aizodzadza nyika.

16. Ngei Sathani pamweni wakarangarira kuti waizokwanisa kupumha Djehovha kuti wakaremba?

¹⁶ Ciro cipi cimweni cekuti pamweni cakarangarirhwa na Sathani kuti caizoizwa na Djehovha? Pamweni iyena wakarangarira kuti Djehovha aizotendera Adhamu na Evha kuti agare no ana asi ainga asikazogari akakwana. (Mup. 7:20; Aro. 3:23) Pasina mubvunzo, Sathani ungadai akabhuya kuti Djehovha aazi kubudirira. Ngei? Ngekuti pamugariro wakadai Mwari angadai asikazi kukwanisa kudzadzisa cinangwa cake uye nyika yainga isikazogari Paraizo yakadzara no anhu anozwira uye akakwana.

17. Djehovha akagadzirisa kudini kupanduka ka Sathani uye ka Adhamu na Evha, uye kucazogara no mugumisiro upi pakupedzesera? (Onaiwo mufanikiso.)

¹⁷ Asi Sathani wainga asikazombokwanisi kurangaridza zviro zvaizoizwa na Djehovha. Djehovha akagadzirisa zviro nge mushobo wakakwana kuitira kuti cinangwa cake cidzadzike. (Pis. 92:5) Djehovha akatendera kuti Adhamu na Evha abare ana. Ngo mushobo uwona, iyena akapangidza kuti ainga asiripi munyepi. Iyena akaita gadziriro ye “mubarirhwana” waizosudzunura ana anozwira a Adhamu na Evha uye wakagara no cokwadi cekuti cinangwa cake caizodzadzika. (Gen. 3:15; 22:18) Ngo mushobo uu, Djehovha angadai asikazi kupumhwa hinga akaremba! Mubarirhwana akapikira Djehovha aizopasa upenyu wake hinga rusudzunuro kuti aponese anhu. Sathani aazi kumborangarira ngezve kugadziriswa uku. Ngei? Ngekuti rusudzunuro rinotsamira pa rudo rakakura ra Djehovha. (Mat. 20:28; Juau 3:16) Sathani aana wara iri re rudo ngekuti iyena unorangarira ngezvake basi. Hino cinyi cicaitika nge ndaa ye rusudzunuro? Mukupera ke kutonga ke makore 1000 Akristu, mibarirhwana inozwira uye yakakwana ya Adhamu na Evha icadzadza nyika inonga yaa Paraizo hingana zvakabhuiwa na Djehovha kuti zvaizoitika. Panguwa iyona zvinoita hingana Djehovha ecibhuya kuti, “Omega.”

TINGABAMBISA KUDINI RUGONDO REDU MUCIPIKIRHWA CA DJEHOVHA CE PARAIZO

18. Djehovha anotigondesa zviro zvipi zvitatu? (Onai bhokisi rakazwi: “Zvikonzero Zvitatu Zvekuti Tigonde mu Zvipikirhwa zva Djehovha.”)

¹⁸ Mu fundo ino, taona zviro zvakawanda zvinotipasa zvikonzero zvakawanda zvinoita kuti titende kuti nyika ino icagara Paraizo. Hino tingaitei kuti tibvunze aya ari kudzibvunzisa kuti izvona zvicaitikadi? Cekutanga, Djehovha pacake ndiye anoita cipikirhwa ici. Bhuku ra Zvakapangidzwa rinoti: “Uya ainga akagara pa cigaro ce umambo akati: ‘Ona! Ndiri kuita kuti zviro zvese zvigare zvipsva.’” Djehovha ano uzii, simba uye cido cekudzadzisa zvese zvaakapikira. Cecipiri, mumaonero a Djehovha zvese zvaakapikira zvakaita hinga zvakatoitika. Ndiyo ndaa, iyena akabhuya kuti: “Masoko aya akatendeka uye ngee zvirokwazvo. . . . Zvaitika!” Cecitatu, Djehovha paanotanga kuita ciro, iyena anociita kuti cibudirire. Ndiyo ndaa, iyena akabhuya kuti: “Inini ndini Arfa uye Omega.” Pakupedzesera, zvicagara pamhene kuti Sathani ndiye munyepi uye aana simba, haiwa Djehovha.

19. Cinyi camungaita kana anhu akaona kuti zvinoshupha kutenda mu cipikirhwa ca Mwari ce Paraizo?

¹⁹ Edzurirai kuti pese paya pamunoreketa no munhu mu basa re kuparidzira kuti iyena angagonda mu zvipikirhwa zva Djehovha, imwimwi munonga mecitobambisawo rugondo renyu kamare mu zvipikirhwa izvona. Hino pamucazoerengazve ngezve cipikirhwa cinoshamisa ce Paraizo ye ramangwana iri pana Zvakapangidzwa 21:4 uye munhu umweni omubvunzai kuti: “Izvona zvakanaka maningi kuti zvigare zvezvirokwazvo.” Imwimwi mungaitei? Mungaerenga uye mungapanganidza ngezve mavhersikuro 5 na 6 mocedzesana kuti munhuwo anyase kurangarira kuti zvaiita hinga Djehovha wene kamare ndiye aasinari ecigondesa kuti acadzadzisa zvese zvaakapikira.—Isa. 65:16.