Akuru—Fundai no Muezaniso wa Gidhioni

1. Maererano na 1 Pedru 5:2, akuru ano makomborero api?

AKURU akapaswa ubaba we kuonerera mabira anokosha a Djehovha. Akuru anokoshesa maningi makomborero e kuseenzera hama ne hanzvadzi dzawo, ndiyo ndaa awona anopeta masimba kuti agare ‘aushi anousha ngo mwazvo.’ (Djer. 23:4; erengai 1 Pedru 5:2.) Isusu tinotenda maningi ngekugara no anarume aya anokosha mu ungano!

2. Akuru amweni pamweni arikubatanawo no zvinetso zvipi?

² Paanoita basa rawo, akuru anobatana no zvinetso zvakawanda. Ngo muezaniso, akuru anodikana kuseenza maningi kuti aonerere ungano. Tony, mukuru umweni we ku Estados Unidos, waidikana kufundira kugara no maonero ari pakati no pakati pane cokuita no kugara no mabasa akawanda. Iyena unoti: “Mukutanga ke nhenda ya COVID-19, inini ndaidikana kuseenza maningi kuti ndigadzirire musangano uye no basa re kuparidzira. Pasinei nokuti ndaiseenza kudini, paindorumbwa pecigara no basa rakawanda kuti ndiite. Mugumisiro wakhona, ndakatanga kusiya kuerenga Bhaibheri, kuita fundo ye munhu ega uye kuita minamato.” Kuna Ilir, mukuru umweni we ku Kosovo, cinetso cainga ciri cimweni. Paainga ari ku mbuto yaiitika hondo, iyena wakaona kuti zvaimushuphira kuteerera nhungamiriri dzo sangano. Iyena unoti: “Inini ndakathya pandakakumbirhwa no Bheteri kuti ndiende ku mbuto ino ngozi koocengeta hama no hanzvadzi dzo ikona. Ndinotendera kuti ndakashoterhwa no ushingi uye nhungamiriro ii yaiita hingana kuti aizobudiriri.” Kuna Tim, misiyonario umweni we ku Ásia, kurumbwa eciita zviro zve zuwa no zuwa zvaimushuphira. Iyena unoti: “Nguwa dzimweni, inini ndaizwa kuremba mu mwiya uye mu ndangariro.” Cinyi cingabetsera akuru ari kusonganawo no mugariro wakatodzana no uu?

3. Mutongi Gidhioni wakasiya muezaniso upi katiri?

³ Mutongi Gidhioni ndi muezaniso wakanaka ku akuru. (Aheb. 6:12; 11:32) Iyena waidziirira uye waiusha anhu a Mwari. (Ato. 2:16; 1 Mak. 17:6) Kuita hingana Gidhioni, akuru akapaswa ubaba wekucengeta anhu a Mwari panguwa dzinoshupha kamare. (Zvii. 20:28; 2 Ti. 3:1) Gidhioni wakapangidza muezaniso wakanaka wekugara no maonero ari pakati no pakati, kudzidodosa uye kuteerera. Iyena waidikana kushingirira paaiseenzera Djehovha. Tese isusu tingakoshesa basa re akuru azvinei nokuti tiri akuru kana kuti haiwa. Uyewo tingakwanisa kutsigira anarume aya anoseenza maningi kuti acengete ungano yese.—Aheb. 13:17.

PAZVINONGA ZVECISHUPHA KUGARA NO MAONERO ARI PAKATI NO PAKATI UYE KUDZIDODOSA

4. Gidhioni wakapangidza kudini kuti wainga ano maonero ari pakati no pakati uye kudzidodosa?

⁴ Gidhioni wainga ari munhu ano maonero ari pakati no pakati uye waidzidodosa.b Ngirozi ya Djehovha payakabvunza Gidhioni kuti wainga asanangurhwa na Djehovha kuti aponese Aisraeri mu nyara dze madzinza anosimba e Midhiani, iyena wakadaira ecidzidodosa. Iyena wakati: “Mhuri yangu idoko pakati pa Manasi, uye inini andikoshi pa ese e nyumba ya baba angu.” (Ato. 6:15) Gidhioni aazi kurangarira kuti wainga ano mawara kuti aite basa irona. Asi Djehovha anoziya zviro zvese uye iyena wakabetsera Gidhioni kuti akwanise kuita zvakanaka basa rake.

5. Migariro dzipi dzingashuphira akuru kuti agare no maonero ari pakati no pakati uye kudzidodosa?

⁵ Akuru anopeta masimba kuti arumbwe ano maonero ari pakati no pakati uye kudzidodosa. (Mik. 6:8; Zvii. 20:18, 19) Awona aagari ecipanganidza ngezve basa rawo uye kubudirira kaakamboita. Awona aarangaririwo kuti aabetseri nge ndaa ye zvishaishi zvaakamboita uye nge ndaa ye kusama kukwana kawo. Asi kuita kudaro nguwa dzese azviripi nyore. Ngo muezaniso, pamweni mukuru umweni ungatenda mabasa akawanda mu ungano asi pedzepo okonerhwa kuaita ese. Kana kuti pamweni ungasimbwa mumasure mekuita basa rimwe kana kushorhwa nge mushobo waanonga aita basa rake. Pamigariro yakadai akuru angateedzera kudini muezaniso wa Gidhioni?

6. Akuru angateedzera kudini muezaniso wekugara no maonero ari pakati no pakati hingana Gidhioni? (Onaiwo mufanikiso.)

⁶ Kumbirai rubetso. Munhu uno maonero ari pakati no pakati unoziya kuti pano zviro zvimweni zvaasikakwanisi kuita. Ngekudzidodosa, Gidhioni wakakumbira rubetso re amweni. (Ato. 6:27, 35; 7:24) Uye zvakanaka kuti akuru aitewo zvimwezvo. Tony wamborekethwa ngezvake unopanganidza eciti: “Nge ndaa ye marererhwe andakaizwa inini ndaitendera mabasa akawanda kunyazi ndisikazokwanisi kuaita. Hino ndakazorangarira kuti taidikana kufunda ngezve maonero ari pakati no pakati pakunamata kedu ke mhuri. Kusiya izvona, ndakabvunzisa mukadzi wangu kuti ndainga ndaakubudirira zvakadini. Inini ndakapindazve mu saiti jw.org koopsvaka vhidhiyo inoti Dzidzisa Vamwe, Vimba Navo, Uye Vape Zvokuita Uchitevedzera Zvinoitwa naJesu.” Tony wakatanga kupungurirana mabasa no hama dzimweni dze mu ungano. Mugumisiro wakhona? Tony unoti: “Ungano irikucengetedzwa zvakanaka, uye inini ndino nguwa yakawanda yekuti ndibambise ushamwari wangu na Djehovha.”

7. Akuru angateedzera kudini muezaniso wa Gidhioni paanonga ecishorhwa? (Tiyago 3:13)

⁷ Musagare no shungu pamunoshorhwa. Cinetso cimweni ku akuru cinocokuita no kushorhwa. Muezaniso wa Gidhioni ungakwanisazve kuabetsera. Kuziya kuti wainga ari munhu asikazi kukwana kakabetsera Gidhioni kuti arumbwe akaterama paakashorhwa no Aefremu. (Ato. 8:1-3) Gidhioni aazi kugara no shungu. Iyena wakapangidza kuti waidzidodosa mundangariro nge kupurutana zvaibhuiwa no anarume aya, nge kudaro wakaita kuti anhu aterame. Zvakanaka maningi kuti akuru ateedzere muezaniso wa Gidhioni paanonga ecishorhwa, nge kunyasa kupurutana uye kuita ciito akaterama. (Erengai Tiyago 3:13.) Nge kuita kudaro, awona anoita kuti mu ungano mugare no runyararo.

8. Akuru anodikana kuitei paanonga ecisimbwa? Pasai muezaniso.

⁸ Pasai rukudzo rese Djehovha. Paakasimbwa ngekuti akaponesa anhu a Djehovha mu nyara dze Amidhiyani, Gidhioni wakapasa rukudzo rese kuna Djehovha. (Ato. 8:22, 23) Akuru angateedzera kudini muezaniso wa Gidhioni? Awona angakwanisa kupasa Djehovha rukudzo rese nge zvese zvaanoita. (1 Ako. 4:6, 7) Ngo muezaniso, kana mukuru akasimbwa nge ndaa ye uzii wake wekufundisa, iyena ungakwanisa kupanganidza kuti zvabuda zvakanaka nge ndaa ye manyuku e fundiso, Soko ra Mwari kana kuti nge ndaa ye rowedzo yaakapaswa nge sangano ra Djehovha. Nguwa dzimweni akuru anodikana kuima kuti aongorore kuti aaripi kuita zviro kuti adzionese. Onai zvakaitika no mukuru umweni unozwi Timothy. Iyena wainga acatobva kugadzwa uye waipfarira maningi kuita mharidzo ku anhu ese. Iyena unoti: “Inini ndaigadzirira kutangisa mharidzo no miezaniso ino zviro zvakawanda. Nge ndaa yazvo, anhu akawanda aiuya koondisimba. Zvinotsukwarisa kuti pano kukudza Djehovha no Bhaibheri, inini ndainyanya kudzionesa.” Nokuhamba ke nguwa, Timothy wakazwisisa kuti waidikana kucinja mushobo wake wekufundisa kuti asanyanye kudzionesa. (Zvie. 27:21) Mugumisiro wakhona ndiupi? Iyena unoti: “Zvino hama dzinouya koondipanganidzira kuti mharidzo yandakaita yakaabetsera kudini pakukwanisana no zvinetso, kushingirira zvinetso uye kuita kuti agare no ushamwari wakabamba na Djehovha. Zvino ndinozwa mupfaro wakakura ngokuti hama dzinosimba mharidzo yandinonga ndaita, haiwa inini.”

PAZVINOSHUPHA KUPURUTANA UYE KUGARA NO USHINGI

9. Ngei zvainga zvisiripi nyore kuna Gidhioni kupurutana uye kugara ne ushingi? (Onai foto ye pa kapa.)

⁹ Mumasure mekuti Gidhioni wagadzwa hinga mutongi ku Israeri, iyena waidikana kugara munhu unopurutana uye uno ushingi. Asi izvona zvainga zvisiripi nyore. Iyena wakapaswa ubaba wainga uri pa ngozi we kuparadza artari yaiseenzeswa pakunamata Bhaari yainga iri ya baba ake. (Ato. 6:25, 26) Paapadarika nguwa, kairi kese Djehovha akabvunza Gidhioni kuti apungure masurudado ake. (Ato. 7:2-7) Uye iyena wakapaswawo mutemo we kuenda koorhwisa musasa we azondi pakati pe usiku.—Ato. 7:9-11.

10. Mugariro upi ungashuphira akuru kuteerera?

¹⁰ Akuru anodikana kugara “akagadzirira kuteerera.” (Tig. 3:17) Mukuru unoteerera aanonoki kuita zviya zvinobhuiwa no Bhaibheri uye no sangano ra Djehovha. Ngokuita izvona, awona anopasa muezaniso wakanaka ku amweni. Asi pa migariro imweni, azviripi nyore kuteerera. Ngo muezaniso, pamweni paya akuru anopaswa nhungamiriro dzakawanda, kana kuti idzona dzinocinja ciriporipoco. Nguwa dzimweni awona anogara no mubvunzo kuti nhungamiriro idzona dzinobudiriradi kamare here kana kuti haiwa. Pamweni paya awona anozviziya kuti kana akatenda ubaba anodzikanda pa ngozi ye kukandwa mu karaboso. Akuru angateedzera kudini muezaniso wa Gidhioni pa mugariro wakadai?

11. Cinyi cingabetsera akuru kuti agare anhu anoteerera?

¹¹ Nyasai kupurutana uye seenzesai nhungamiriro. Djehovha akabvunza Gidhioni mushobo waaidikana kutsakatisa artari ya baba ake, kaidikana kuwakira artari imweni uye kuti cinyama cipi caaidikana kupasa hinga cibairo. Gidhioni aazi kudziita mibvunzo nge ndaa ye nhungamiriro idzona, asi wakadziteerera. Nyamasi uno, sangano ra Djehovha rinotumira tsamba, zviziiso uye nhungamiriro dzinobetsera akuru kuti angabetsera kudini hama pa maitiro uye zve kumwiya. Isusu tinoda maningi akuru ngekuti awona anoteerera akatendeka nhungamiriro idzi. Uye izvona zvakanakira ungano yese.—Pis. 119:112.

12. Akuru angateerera kudini zano riri pana Ahebheru 13:17 paanopaswa nhungamiriro ipsva?

¹² Garai makagadzirira kuteerera mugariro we zviro paunocinja. Edzurirai mutemo wakapasa Djehovha Gidhioni. Iyena waidikana kuendesa kumba masurudado akawanda. (Ato. 7:8) Gidhioni pamweni waida kurangarira kuti: ‘Kodi ndinodikanadi kuita izvona kamare? Zvinobudiriradi?’ Kunyazi zvakadaro, Gidhioni wakateerera. Nyamasi uno akuru anoteedzera muezaniso wake ngekuita cinjo dzinobhuiwa no sangano ra Djehovha. (Erengai Ahebheru 13:17.) Ngo muezaniso, mu 2014 Dare Rinotungamirira rakacinja mushobo we kuriphwa ke maprojeto e Nyumba dze Umambo ne Nyumba dze Magungano. (2 Ako. 8:12-14) Kare ungano padzaida kuwaka nyumba dze umambo ne dze magungano, sangano ra Djehovha raikumbirisa mare pedzepo hama dzaizohwirinza. Nyamasi uno, hama dze mu nyika yese dzinoita mupiro uye sangano ra Djehovha rinotora mupiro idzona kuti dzitsigire basa rekuwaka, azvinei kuti ungano dzino mare yekuripa here kana kuti haiwa. José paakazwa ngezve cinjo iyona, iyena aazi kuzvitenda kuti izvona zvicabudirira. Iyena wakarangarira kuti: ‘Nge mushobo uwona azvitoiti kunyazi kuwaka Nyumba imwe ye Umambo. Mushobo uwona auseenzi kuno.’ Asi cinyi cakabetsera José kuteerera nhungamiriro ipsva ii? Iyena unoti: “Masoko ari pana Zvierengo 3:5, 6 akandiedzurira kuti ndaidikana kugonda Djehovha. Uye onai kuti mugumisiro wakhona waipfadza! Isusu tirikukwanisa kuwaka Nyumba dze Umambo dzakawanda. Asi andizvopi zvega, tiri kukwanisa kutsigira nge mishobo yakasiyana-siyana kuitira kuti kunyazi hama dzisina zvakawanda dzigarewo no Nyumba yawo ye Umambo.”

13. (a) Gidhioni wainga ano rugondo ripi? (b) Akuru angateedzera kudini Gidhioni? (Onaiwo mufanikiso.)

¹³ Garai no ushingi uye itai kuda ka Djehovha. Gidhioni wakateerera Djehovha kunyazi paaitya uye pazvaimukanda pa ngozi. (Ato. 9:17) Mumasure mekuti abambiswa na Djehovha, Gidhioni wakagara no rugondo rokuti Djehovha aizomubetsera kuti iyena acengete anhu ake. Akuru anogara ku mbuto yekuti basa redu ririkurambidzwa, anoteedzera muezaniso wa Gidhioni. Awona ano ushingi uye anotungamirira kuronga misangano uye kuparidza, kunyazi ecidzikanda pa ngozi ye kusungwa, kana kubvunziswa zvakawanda kuruza basa kunyazi kubathwa no bvinga.c Panguwa ye dambudziko guru akuru acadikana kugara no ushingi kuti ateerere nhungamiriro dzaanonga ecipaswa kunyazi kuita izvona zveciakanda pa ngozi. Nhungamiriro idzona dzingagara dze kuti tingaparidzira kudini masoko akabamba ekutongwa uye kuti tingaitei kuti tiponeswe pacarhwiswa Gogi we Magogi.—Ezek. 38:18; Zvak. 16:21.

PANGUWA YEKUTI ZVINOSHUPHA KUSHINGIRIRA

14. Mugariro upi wakashuphira Gidhioni kuti ashingirire?

¹⁴ Kuti aseenze hingana mutongi ku Israeri, Gidhioni waidikana kugara munhu wakabamba. Amidhiyani paakatiza paairhwisana pakati pe usiku, Gidhioni wakaateerera kubvira ku Bani re Djezreri dakara ku Murambo we Djorodhani, pamweni wainga wakatenderedzwa no zvimiti zvinominzwa. (Ato. 7:22) Zvinoda kureya kuti Gidhioni paakaguma mu Djorodhani iyena wakaima? Haiwa! Kunyazi ainga akaremba, iyena no anarume ake anokwana 300 akabira murambo uye akarumbwa eciateerera. Pakupedzesera, akaabata uye akakunda Amidhiyani.—Ato. 8:4-12.

15. Mugariro upi wekuti mukuru unodikana kushingirira?

¹⁵ Mukuru unodikana kushingirira kuti acengete ungano uye mhuri yake. Ubaba wakawanda ungakwanisa kusiya mukuru akaremba mu ndangariro, mwiri uye mwiya. Pa mugariro uwona akuru angateedzera kudini Gidhioni?

16-17. Cinyi cakabetsera Gidhioni kushingirira uye akuru anodikana kugara no rugondo rei? (Isaya 40:28-31) (Onaiwo mufanikiso.)

¹⁶ Gondai kuti Djehovha acamubambisa. Gidhioni wakagonda kuti Djehovha waizomupasa simba, uye ndizvona zvakaizwa na Djehovha. (Ato. 6:14, 34) Panguwa imweni Gidhioni no anarume ake akateera madzimambo mairi e Amidhiyani. Uye onai kuti awona aihamba no tsoka asi madzimambo aya pamweni aihamba no kamero. (Ato. 8:12, 21) No rubetso ra Djehovha, awona akakwanisa kuabata uye kuwina pakurhwisana uku. Akuru angakwanisawo kugonda Djehovha Mwari “asikamborembi.” Djehovha acaapasa simba raanoda.—Erengai Isaya 40:28-31.

¹⁷ Onai zvakaitika na Matthew, unoseenza pa Comissão de Ligação com Hospitais. Cinyi cakamubetsera kuti ashingirire? Matthew unoti: “Inini ndakanyasa kuzwisisa zviri pana Afiripi 4:13. Kakawanda pandainga ndakaremba zvekutoti ndisisinazve simba, inini ndainamata no simba rese kuna Djehovha. Ndaideketerawo kuti andipase simba re mu mwiri uye re mu ndangariro kuti ndikwanise kubetsera hama dzangu. Panguwa idzona, inini ndaizwa mwiya mucena wa Djehovha wecindipasa simba kuti ndikwanise kushingirira.” Kuita hingana Gidhioni, akuru anoseenza no simba kuti acengete anhu a Mwari kunyazi izvona zvisiripi nyore. Asi zviri pamhene kuti awona anodikana kuedzurira uye kureremedza kuti pano paanogumira. Uye awona angagara no rugondo rokuti Djehovha anoazwa paanonamata ecikumbira simba kuti ashingirire.—Pis. 116:1; Afi. 2:13.

18. Hinga zvataona mu fundo ino, akuru angateedzera kudini muezaniso wa Gidhioni?

¹⁸ Hingana zvataona, akuru angafunda zvakawanda no muezaniso wa Gidhioni. Akuru anodikana kugara no maonero ari pakati no pakati uye kudzidodosa paanosanangura kuti acagara no mabasa akawanda kudini mu ungano uye paanonga ecisimbwa. Awona anodikana kugara anoteerera uye akashinga, maka-maka mugumo we nyika ino paunokhwedera. Awona anodikana kugonda kuti Mwari ucaapasa simba pasinei no zvinetso zvaakasongana nazvo. Hingana zvinobhuiwa no Bhaibheri isusu “tinorumbwa tecireremedza anarume aya” uye tinoakoshesa maningi nge zvese zvaanoita.—Afi. 2:29.