Tingaitei kuti Rudo Redu ku Hama no Hanzvadzi Rirumbwe Rakabamba

1-2. (a) Ngei muphostori Pauro unobhuya kuti rudo i wara “rakakura” kudarika amweni ese? (b) Ticadaira mibvunzo dzipi?

MUPHOSTORI Pauro paaireketa ngezve kutenda, kariro uye rudo, iyena wakapedzesa zvaaireketa eciti: “Cikuru pa zvese i rudo.” (1 Ako. 13:13) Asi ngei Pauro wakabhuya izvi? Ngokuti mune ramangwana zvipikirhwa zva Mwari ngezve nyika ipsva zvinonga zvadzadzika, hino tinonga tisikacadizve kutenda uye kariro. Asi ticadikana kundorumbwa tecipangidza rudo kuna Djehovha uye ku anhu. Zvezvirokwazvo rudo redu kaari ricarumbwa recikura nokusikaperi.

² Ngekuti rudo ricarumbwa riri wara rinokosha mu upenyu wedu, ngatidaire mibvunzo mitatu. Wekutanga, ngei tecidikana kuda umwe na umwe wedu? Wecipiri, tingapangidza kudini kuti tinoda umwe na umwe wedu? Wecitatu, tingaita kudini kuti rudo redu ku umwe na umwe wedu rirumbwe rakabamba?

NGEI TECIDIKANA KUDA UMWE NA UMWE WEDU?

3. Zvikonzero zvipi zvatinazvo kuti tipangidze rudo ku umwe na umwe wedu?

³ Ngei zvecikosha katiri kuda umwe na umwe wedu? Ngekuti kana tikapangidza rudo ku umwe na umwe wedu tinopangidza kuti tiri Akristu e zvirokwazvo. Djesu akati ku afundi ake: “Mukaita kudaro, ese acaziya kuti muri afundi angu, kana mukagara no rudo pakati penyu.” (Juau 13:35) Kusiya izvona, rudo rinoita kuti tirumbwe takabatana. Pauro wakati, rudo “cisungo cakakwana ce rubatano.” (Ako. 3:14) Asi, pacino cikonzero cimweni cinoita kuti tipangidze rudo ku umwe na umwe wedu. Muphostori Juau wakatara kuti: “Uya anoda Mwari anodikanawo kuda hama yake.” (1 Juau 4:21) Kana tikapangidza rudo ku umwe na umwe wedu, tinopangidza kuti tinoda Mwari.

4-5. Panganidzai kuti rudo redu kuna Mwari rakabatana kudini no rudo redu ku hama dzedu.

⁴ Rudo redu na Mwari rakabatana papi no rudo ratinopangidza ku hama no handzadzi dzedu? Rangarirai mubatano uripo, pa mwoyo wedu no matii amweni e mwiri. Nguwa dzimweni, mamedhiko anoseenzesa moko wedu kuti aone mapondere ari kuita mwoyo, ngekuita izvona anokwanisa kuona kuti mwoyo wedu uri kuponda nokukasika here kana kuti haiwa. Muezaniso uu, unotifundisei ngezve rudo?

⁵ Kuitawo hinga medhiko unokwanisa kuona kuponda ke mwoyo we munhu ngekupima pa moko pake, isusu tinokwanisawo kuziya kuti rudo redu na Mwari rakabamba kudini nge madire atinoiita amweni. Kana tikaziya kuti rudo redu ku hama dzedu riri kutonhora, pamweni izvona zvingapangidza kuti rudo redu na Djehovha riri kupunguka. Asi kana tikarumbwa tecipangidza rudo ku hama dzedu, zvinopangidza kuti rudo redu na Djehovha rakabamba.

6. Ngei tecidikana kunetseka kana rudo redu ku hama no hanzvadzi recipunguka? (1 Juau 4:7-9, 11)

⁶ Kana rudo redu ku hama dzedu rikatanga kupunguka, ici i cinetso cakakura maningi. Ngei? Ngekuti ici cipangidzo cekuti ushamwari wedu na Djehovha uri kupera. Muphostori Juau wakazvibudisa pamhene paakati: “Uya asikadi hama yake, yaanoona, aangakwanisi kuda Mwari, uya waasikaoni.” (1 Juau 4:20) Izvona zvinotifundisei? Zvinotifundisa kuti tinokwanisa basi kupfadza Djehovha kana “tikada umwe na umwe wedu.”—Erengai 1 Juau 4:7-9, 11.

TINGAPANGIDZA KUDINI RUDO KU UMWE NA UMWE WEDU?

7-8. Tingapangidza kudini kuti tinoda umwe na umwe wedu?

⁷ Mu Soko ra Mwari, kakawanda tinogumira mutemo wekuti, “dananai.” (Juau 15:12, 17; Aro. 13:8; 1 Ate. 4:9; 1 Ped. 1:22; 1 Juau 4:11) Asi rudo, i wara rinobva mu mwoyo, mazwire ari mukati medu uye apana munhu unokwanisa kuona zviri mu mwoyo medu. Hino, amweni angaziya kudini kuti tinoada? Nge masoko edu uye nge zviito zvedu.

⁸ Kuno mishobo yakawanda yatingapangidza nayo kuti tinoda hama no hanzvadzi dzedu. Ngatione miezaniso minganani: “Reketai cokwadi ku umwe na umwe wenyu.” (Zak. 8:16) “Rumbwai muri murunyararo pakati penyu.” (Mark. 9:50) “Pa kureremedzana, umwe na umwe wenyu ngaatange ndiye.” (Aro. 12:10) “Tambiranai.” (Aro. 15:7) “Rumbwai . . . mecirekererana.” (Ako. 3:13) “Rumbwai mecithwarirana mitoro.” (Aga. 6:2) “Rumbwai mecinyaradzana.” (1 Ate. 4:18) “Rumbwai mecibetserana.” (1 Ate. 5:11) “Itiranai munamato.”—Tig. 5:16.

9. Ngei zvecikosha kunyaradza hama no hanzvadzi dzedu? (Onaiwo mafoto.)

⁹ Ngatione umwe we mushobo watingapangidza nawo rudo ku umwe na umwe wedu. Mu ndima yadarika taona kuti Pauro wakapasa zano rekuti: “Rumbwai mecinyaradzana.” Ngei zvecikosha kunyaradza hama no hanzvadzi dzedu? Mabhuku amweni anopanganidza ngezve Bhaibheri, anopanganidza kuti soko rakaseenzeswa na Pauro rekuti “kunyaradza” rinoreya “kugara ku dii re munhu kuti timubambise paanonga ecibatana no matambudziko.” Hino, kana tikanyaradza hama dzedu tinodzibetsera kuti dzimuke, dzirumbwe dzecihamba mu gwanza re upenyu. Paya patinocema pamwepo no hama yedu, tinopangidza kuti tinoida maningi.—2 Ako. 7:6, 7, 13.

10. Rubatano ripi riripo pakati pe usisi no kunyaradza?

¹⁰ Munhu paanozwira usisi munhu umweni uri kubatana no matambudziko, acada kumunyaradza uye kumubetsera. Hino, pakutanga tinomuzwira usisi, pedzepo tomunyaradza. Ngatione kuti Pauro wakaezanisa kudini usisi wa Djehovha no nyaradzo Yaanotipasa. Pauro wakabhuya kuti: Djehovha ndi “Baba e usisi ukuru uye Mwari wekunyaradza kese.” (2 Ako. 1:3) Masoko e pasi atinogumira mu Bhaibheri rekufunda pa vhersikuro ii, anopanganidza kuti Pauro unoseenzesa masoko e kuti “usisi ukuru” kuti apanganidze mazwiro e usisi ku amweni. Hino, “Mwari anodaizwa kuti Baba kana kuti Manyuku e usisi ukuru, nge ndaa ye usisi waanozwa ku anhu.” Uye usisi iwona unomuitisa kuti atinyaradze “pa matambudziko edu ese.” (2 Ako. 1:4) Kuitawo hingana mbuto inobuda mvura yakacena inobambisa munhu uri kuzwa mukaha, Djehovha anotinyaradza uye anotipasa simba paya patinonga tecibatana no matambudziko. Tingateedzera kudini Djehovha nge kuzwira usisi amweni uye kuanyaradza? Umwe we mushobo wekuita izvona, ngewe kusakurira mawara mu mwoyo wedu, anotibetsera kunyaradza amweni. Ndiapi mawara manganani akhona?

11. Maererano na Akorosi 3:12 uye 1 Pedru 3:8, ngaapi mawara amweni atinodikana kusakurira kuti tirumbwe tecida uye kunyaradza hama dzedu?

¹¹ Cinyi cicatibetsera zuwa no zuwa “kurumbwa” tecida uye kunyaradza umwe na umwe wedu? Tinodikana kupangidza mawara manganani akaita hingana usisi, unaki uye kudanana hinga hama. (Erengai Akorosi 3:12; 1 Pedru 3:8.) Mawara aya angatibetsera kudini? Kana tikapangidza usisi ku hama dzedu uye toapangidzira kuti zvezvirokwazvo tinoakoshesa, ticagara no cido cakakura cekuanyaradza paanosongana no matambudziko. Hingana zvakabhuiwa na Djesu paakati: “Muromo unobhuya zvakadzara mu mwoyo. Munhu wakanaka unobudisa zviro zvakanaka pa upfumi wake wakanaka.” (Mat. 12:34, 35) Kunyaradza hama no hanzvadzi dzedu padzinosongana no matambudziko, zvezvirokwazvo ndi mushobo wakanaka wekupangidza kuti tinoada.

TINGAITEI KUTI RUDO REDU KU UMWE NA UMWE WEDU RIRUMBWE RAKABAMBA?

12. (a) Tinodikana kungwarirei? (b) Ticadaira mubvunzo upi?

¹² Tese isusu tinoda ‘kurumbwa tecidanana.’ (1 Juau 4:7) Asi tinodikana kuedzurira kuti Djesu akabhuya kuti ‘rudo re ajinji raizotonhora.’ (Mat. 24:12) Djusu ainga asikabhuyi kuti akawanda e afundi ake aizosiya kupangidzira rudo ku umwe na umwe wawo. Asi tinodikana kungwarira kuti kutama rudo kuri mu nyika kusapfuridzire mushobo watinobata hama dzedu. Tecirangarira izvona, ngatione mubvunzo umweni unoti: Tingakwanisa kudini kuziya kuti rudo redu ku hama dzedu rakabamba?

13. Cinyi cingaedza rudo redu ku hama no hanzvadzi dzedu?

¹³ Umwe we mushobo wekuziya kuti rudo redu ku hama dzedu rakabamba kamare, i kuongorora zvatinoita mu migarire yakasiyana-siyana ye upenyu. (2 Ako. 8:8) Izvi zvinonyasa kudjeka pa masoko akarekethwa no muphostori Pedru, iyena wakati: “Kudarika zvese, idai maningi umwe na umwe wenyu, ngokuti rudo rinofukidza zvitema zvakawanda.” (1 Ped. 4:8) Kana kuti kuremba no kutama kukwana ke amweni, kungaedza rudo ratinaro.

14. Maererano na 1 Pedru 4:8, tinodikana kugara no mushobo upi we rudo? Panganidzai.

¹⁴ Ngatinyase kuongorora zvakabhuiwa no muphostori Pedru. Dii rekutanga re vhersikuro 8 rinoreketa ngezve mushobo we rudo watinodikana kugara nawo—“kuda maningi.” Soko raseenzeswa no muphostori Pedru rekuti “maningi” rinoda kureya “ciro cakatatamurhwa.” Dii recipiri re vhersikuro, rinopangidza kuti ngazvipi zvaticaita kana tikagara no rudo rakakura ku amweni, ricafukidza kana kuti kuita kuti tisakande ndangariro dzedu pa zvishaishi zve hama dzedu. Izvona zvakaita hingana: Kubata djira rinotatamuka, toritatamura, kunyasa kuritatamura kamare dakara tafukidza haiwa cishaishi cimwe kana kuti zviiri, asi “zvishaishi zvakawanda” zve hama dzedu. Pa mugariro uu “kufukidza” kunoreya kurekerera. Kuita hinga djira rinofukidza pakasvipa uye kuremara, nge mushobo umwewo rudo redu rinofukidzawo kutama kukwana uye kuremba ke hama dzedu.

15. Kana rudo redu ku hama dzedu rakabamba, zvinyi zvaticakwanisa kuita? (Akorosi 3:13)

¹⁵ Rudo redu rinodikana kunyasa kubamba roita kuti tikwanise kurekerera kutama kukwana ke hama dzedu kunyazi izvona zvecishupha. (Erengai Akorosi 3:13.) Patinorekerera amweni, tinopangidza kuti rudo redu rakakura uye kuti tinoda kupfadza Djehovha. Asi, cinyizve cingatibetsera kuti tikande kumuceto kutama kukwana ke hama dzedu?

16-17. Ciro cipi cimweni cicatibetsera kukanda pamuceto zvishaishi zve amweni? Panganidzai. (Onaiwo mafoto.)

¹⁶ Tinodikana kukanda ndangariro dzedu pa mawara akanaka e hama dzedu, haiwa pakutama kukwana kawo. Cimborangarirai muezaniso unoteera. Rangaridzai kuti muri pamabiko no hama no hanzvadzi dzinganani. Imwimwi muri ku waraidzwa uye muri kudakadzwa. Pakupera ke mabiko, imwimwi munorangarira kudusa foto imwe. Zvezvirokwazvo imwimwi munodusa mbiri, mozodusazve imwe mecirangarira kuti pamweni pa foto dzamadusa imweni yadzo aizobudi zvakanaka. Parizvino, imwimwi maano foto dzitatu. Asi pa imwe ye foto idzi, imwimwi munoona kuti pano hama isikazi kubuda zvakanaka. Munoitei no foto iyona? Imwimwi munopfudza foto iyona, ngekuti mune dzimweni mbiri uye pa mbiri idzi, anhu ese abuda zvakanaka kutobatanidzawo hama iya yainga isikazi kubuda zvakanaka.

¹⁷ Parizvino, ezanisai mafoto amadusa no zviedzuriro zvamunazvo. Zvezvirokwazvo imwimwi mono zviedzuriro zvakanaka zve nguwa yamakapedza no hama no hanzvadzi dzenyu. Asi, pamweni pa nguwa iyona hama kana kuti hanzvadzi yakareketa zviro zvisikazi kunaka. Maizoitei no zviedzuriro izvona? Ngei amuedzi kuzvipfudza, hingana kupfudza kamakaita foto isikazi kubuda zvakanaka? (Zvie. 19:11; Aef. 4:32) Kana imwimwi mukakanda ndangariro dzenyu pa zviro zvakanaka zvamakaita no hama iyona, ciro ciya cakashata acizomutsukwarisi uye imwimwi munoda kuiga muzviedzuriro zvenyu zviro zviya zvakanaka.

NGEI RUDO RECIKOSHA MANINGI MAZUWA ANO

18. Mafundei ngezve rudo mu fundo ino?

¹⁸ Ngei tinodikana kurumbwa tino rudo rakabamba ku umwe na umwe wedu? Hingana zvataona, patinopangidza rudo ku hama no hanzvadzi dzedu, tinopangidzirawo rudo kuna Djehovha. Asi tingapangidza kudini rudo ku hama no hanzvadzi dzedu? Mushobo umweni wekuita izvona ngewe kuanyaradza uye usisi ndiwo ucaita kuti “tirumbwe tecinyaradzana.” Asi tingarumbwa kudini tecibambisa rudo redu ku umwe na umwe wedu? Nge kupeta masimba kuti tirekerere zvishaishi zve hama no hanzvadzi dzedu, kunyazi paya pazvinoshupha.

19. Ngei zvecikosha maningi mazuwa ano kupangidza rudo ku umwe na umwe wedu?

¹⁹ Ngei nyamasi uno zvecinyanya kukosha kupangidzira rudo ku umwe na umwe wedu? Muphostori Pedru wakabhuya cikonzero cakhona paakati: “Kupera ke zviro zvese kaapadhuze. Hino, . . . idai maningi umwe na umwe wenyu.” (1 Ped. 4:7, 8) Mugumo we nyika ino yakashata uri kukhwedera nokukasika. Teciziya izvona, tinodikana kuetserei? Djesu akapasa ngwadzo inoteera ku afundi ake paakati: “Imwimwi mucazondhwa no anhu e madzinza ese nge ndaa yo zina rangu.” (Mat. 24:9) Kuti tikwanise kushingirira kuzondwa kese uku, tinodikana kurumbwa takabatana. Kana tikaita izvona, Sathani aazokwanisi kutiparadzanisa ngekuti tinonga takanyasa kubatana no rudo “cisungo cakakwana ce rubatano.”—Ako. 3:14; Afi. 2:1, 2.