Garai Makagadzirira Zuwa ra Djehovha

1. Tinodikana kuitei kuti tipone pa zuwa ra Djehovha?

MU BHAIBHERI soko rokuti “zuwa ra Djehovha,” rinoreya nguwa yekuti Djehovha anotonga azondi ake uye ounzisa ruponeso ku anhu ake. Izvona zvakamboitika mu nguwa yokare. (Isa. 13:1, 6; Ezek. 13:5; Zef. 1:8) Mumazuwa edu ano, “zuwa ra Djehovha” ricatanga atungamiriri e nyika paacarhwisa Bhabhironi Guru uye ricapedzesera no hondo ye Amagedhoni. Kuti tipone pa “zuwa” irona, tinodikana kudzigadzirira zvino. Djesu akafundisa kuti tinodikana kurumbwa takagadzirira kuitira “dambudziko guru,” uye izvona zvinodikana “kurumbwa zveciizwa.”—Mat. 24:21; Ruka 12:40.

2. Ngei masoko a Pauro aakatarira Atesaronika anokosha katiri nyamasi uno?

² Mutsamba yake yekutanga yakafemerhwa yaakatarira Atesaronika, Pauro wakaseenzesa miezaniso yakawanda kuti abetsere Akristu kuti arumbwe akagadzirira kuitira zuwa guru rokutonga ka Djehovha. Pauro waizviziya kuti zuwa ra Djehovha rainga risikazouyi pa nguwa iyona. (2 Ate. 2:1-3) Kunyazi zvakadaro, iyena wakakohomedzesa hama dzake kuti dzigare dzakagadzirira kuitira zuwa irona hingana kuti raadhuze, uye isusu tingaseenzesawo zano iri. Ngatione zvakapanganidzwa ndi Pauro ngezve: (1) zuwa ra Djehovha ricauya kudini, (2) ndiani asikazoponi pa zuwa irona, uye (3) tingadzigadzirira kudini kuti tizopone.

ZUWA RA DJEHOVHA RICAUYA KUDINI?

3. Zuwa ra Djehovha ricauya hingana mbavha ce usiku nge gwanza ripi? (Onaiwo mufanikiso.)

³ “Hingana mbavha usiku.” (1 Ate. 5:2) Uu mu muezaniso wekutanga pa miezaniso mitatu yakaseenzeswa ndi Pauro kuti abhuye ngezve kuti zuwa ra Djehovha ricauya kudini. Kakawanda kakhona mbavha dzinoba nokukasika uye dzinozviita no usiku, anhu paanonga asikatozvikariri. Zuwa ra Djehovha ricauya nokukasika, uye akawanda asikatozvikariri. Zviro zvicaitika nokukasika zvekuti pamweni Akristu ecokwadi acatoshamisikawo. Asi kusiyana no anhu anoita zvakashata, isusu atitsakatiswi.

4. Zuwa ra Djehovha rakaita hingana marhwadzo ekubara nge gwanza ripi?

⁴ “Kuita hingana marhwadzo e mwanakadzi uri kuda kubara.” (1 Ate. 5:3) Mwanakadzi paanonga ane pamwiri, iyena aaizii nguwa kamare yaacabara asi iyena unozviziya kuti izvona zvicaitika. Asikakariri, iyena unotanga kuzwa marhwadzo okubara, uye marhwadzo awona anobambirira. Ngo mushobo umwewo, isusu atizii zuwa uye nguwa icatanga zuwa ra Djehovha. Asi, isusu tino rugondo kuti irona ricauya. Kutonga ka Djehovha kucauya nokukasika uye anoita zvakashata aazoponi.

5. Dambudziko guru rakaita hingana kubuda ke zuwa nge gwanza ripi?

⁵ Hinga kubuda ke zuwa. Pa muezaniso wecitatu Pauro unoreketazve ngezve mbavha inoba usiku. Asi zvino zvinoita hinga kuti iyena uri kuezanisa zuwa ra Djehovha no kubuda ke zuwa, haiwa no mbavha. (1 Ate. 5:4) Mambavha angabatikana maningi pakuba zvekuti aatooni nguwa yecipinda. Zuwa ringadjeka asikakariri uye awona angaonekwa ne anhu amweni. Dambudziko guru ricapangidzawo aya akaita hingana mambavha, anorumbwa ari mucidima eciita zviro zvisikapfadzi Mwari. Mukusiyana nawo, isusu tinodikana kugara takagadzirira kuti tisaite ciro cipi haco cisikapfadzi Djehovha uye topsvaka kuita “zviro zvakanaka, zvino unatsi uye zvecokwadi.” (Aef. 5:8-12) Mumasure mazvo, Pauro unoseenzesa miezaniso miiri kuti apangidze aya asikazoponi pa zuwa ra Djehovha.

NDIANI ASIKAZOPONI PA ZUWA RA DJEHOVHA?

6. Anhu akawanda ari kuwata nge gwanza ripi? (1 Atesaronika 5:6, 7)

⁶ “Aya ari kuwata.” (Erengai 1 Atesaronika 5:6, 7.) Pauro unoezanisa aya asikazoponi pa zuwa ra Djehovha no anhu ari kuwata. Awona aoni nguwa yecipinda uye kunyazi zviri kuitika. Ndiyo ndaa, awona aazwisisi ciro cinokosha pacinoiitika uye anorumbwa asikaiti ciro. Anhu akawanda nyamasi ari kuwata pa zvekumwiya. (Aro. 11:8) Awona aatenderi kuti tiri kurarama mu “mazuwa ekupedzesera” uye kuti dambudziko guru raa dhuze kuguma. Pakunoitika zviro mu nyika zvakaita hingana hondo no matenda, awona anomuka opangidza cido ku masoko e Umambo. Asi pane kuti arumbwe akamuka, awona anohwirirazve kuwata. Kunyazi munhu unoteendera zuwa rokutonga, unoona hingana kuti zvicanonoka kuti zviitike. (2 Ped. 3:3, 4) Asi, isusu tinozviziya kuti zvinokosha maningi kuti tirumbwe takamuka.

7. Anhu asikazoponi pa zuwa ra Djehovha anoezaniswa no anhu akararadza nge gwanza ripi?

⁷ “Anhu anoraradza.” Pauro wakaezanisa aya acatsakatiswa ndi Mwari no anhu anomwisa doro. Munhu wakararadza unononoka kuita ciito pazviro zvinonga zveciitika, uye unoita zvisananguro zvakashata. Ngo mushobo umwewo, anhu anoita zvakashata aaiti ciito pa zviziiso zva Mwari. Awona anosanangura upenyu ucaaendesa pakutsakatiswa. Asi Akristu anodikana kurumbwa akabamba kana kuti kugara akagadzirira kuita zvisananguro zvakanaka. (1 Ate. 5:6) Mukwarakwatisi umweni we Bhaibheri unopanganidza eciti: Munhu wakabamba “unorumbwa akaterama uye aapatiki, iyena unokwanisa kurangarira zvakadjeka uye unoita zvisananguro zvakanaka.” Asi ngei izvona zvecikosha maningi? Kuitira kuti tisapindire mune zvematongerhwe e nyika uye mu migariro we nyika ino. Patinorumbwa tecikhwedera dhuze no zuwa ra Djehovha, ticabambidzirhwawo maningi kuti tigare no dii ratinotsigira pa nyaya idzi. Asi atidikani kunyanya kunetseka nazvo. Mwiya mucena wa Djehovha ucatibetsera kuti tigare takaterama uye kuti tiite zvisananguro zvakanaka.—Ruka 12:11, 12.

TINGADZIGADZIRIRA KUDINI KUITIRA ZUWA RA DJEHOVHA?

8. Maererano na 1 Atesaronika 5:8, tingadzigadzirira kudini kuitira zuwa ra Djehovha? (Onaiwo mufanikiso.)

⁸ “Ngatipfeke cifukidzo ce paditi . . . uye no . . . kapaseti.” Pauro wakatiezanisa no masurudado akamuka uye akanyasa kugadzirira kuti aende ku hondo. (Erengai 1 Atesaronika 5:8.) Mu hondo, musurudado unodikana kugara akagadzirira kuti arhwise pa nguwa ipi hayo. Ndizvona zvinoitikawo na isusu. Kuti tigare takagadzirira kuitira zuwa ra Djehovha, tinodikana kusimira cifukidzo ce paditi co kutenda uye ce rudo no kapaseti ye kariro. Mawara aya angatibetsera maningi.

9. Kutenda kedu kunotidziirira kudini?

⁹ Cifukidzo ce paditi caidziirira mwoyo we musurudado. Kutenda uye rudo kunodziirira mwoyo wedu wekuezanisira. Mawara aya acatibetsera kuti tirumbwe teciseenzera Mwari uye teciteerera Djesu. Kutenda kunoita kuti tigare no rugondo rokuti Djehovha acakomborera aya anomupsvaka no mwoyo wese. (Aheb. 11:6) Kutenda kunotiitisawo kuti tirumbwe takagondeka ku Mutungamiriri wedu Djesu, kunyazi patinosongana no zvinetso. Kuti tibambise kutenda kedu uye kushingirira, tinodikana kufundira no muezaniso we hama dzedu dzakarumbwa dzakagondeka kunyazi padzaiteererhwa uye padzaibatana no matambudziko ekukonerhwa mare. Uye tingaita kuti tisadzikande pa ngozi yekudisa zvakawanda, nge kuteedzera muezaniso we hama dzedu dzakasanangura kugara no upenyu usina zvakawanda kuti akande Umambo wa Mwari pa mbuto yekutanga.b

10. Rudo ratinaro kuna Mwari uye kumudoni wedu rinotibetsera kudini kuti tishingirire?

¹⁰ Rudo rinokosha maningi kuti tirumbwe takamuka uye takabamba. (Mat. 22:37-39) Rudo ratinaro kuna Mwari rinotibetsera kuti tishingirire mu basa re kuparidzira kunyazi izvona zveciita kuti tibatane no matambudziko. (2 Ti. 1:7, 8) Isusu tinopangidzawo rudo ku aya asikaseenzeri Djehovha, ndiyo ndaa isusu tinorumbwa teciparidzira mu ndima yedu, teciseenzesawo turufunu uye tsamba. Isusu atiruzi kariro yekuti ricaguma zuwa rekuti anhu angacinja otanga kuita zviro zvakanaka.—Ezek. 18:27, 28.

11. Rudo redu ku hama dzedu rinotibetsera kudini? (1 Atesaronika 5:11)

¹¹ Kuda mudoni kunobatanidzawo kuda hama dzedu. Tingaita izvona “ngekubambisana no kubetserana.” (Erengai 1 Atesaronika 5:11.) Kuita hingana masurudado anoseenza akabatana ku hondo, isusu tinobambisana. Izvirokwazvo kuti musurudado, ungakuwadza umweni wake pa hondo, asi iyena wainga asikazozviiti ngekuda. Ngo mushobo umwewo, atidi kurhwadzisa hama dzedu teciita zvokuda kamare kana kuhwirinzira cakashata no cakashata. (1 Ate. 5:13, 15) Isusu tinopangidzawo rudo redu ngekureremedza hama dzakagadzwa kuti dzitungamirire ungano. (1 Ate. 5:12) Pauro paakatarira tsamba Atesaronika, ungano iyona yainga isina gore yaayaumbwa. Pamweni anarume ainga agadzwa ainga asina maesperiyensiya uye pamweni akaita zviro ngo mushobo usiriwopi. Kunyazi zvakadaro, awona aisisira kureremedzwa. Maka-maka paya patinonga tiri dhuze no dambudziko guru, ticadikanawo kugonda akuru e ungano uye kuteerera nhungamiriro dzaanonga atipasa. Pamweni atizokwanisi kutambira nhungamiriro dzinobva ku sedhi mundiyari kana ku Bheteri, ndiyo ndaa zvinokosha maningi kuti tifundire kuda uye kureremedza akuru e mu ungano yedu kubvira zvino. Azvinei no zvicaitika, ticarumbwa takabamba, uye atikandi ndangariro dzedu pakusama kukwana ke hama dzedu, tinodikana kukanda ndangariro dzedu pakuti Djehovha na Djesu ndiwo ari kutungamirira hama idzi dzakatendeka.

12. Kariro yedu inodziirira kudini ndangariro dzedu?

¹² Kuita hingana kapaseti yaidziirira musoro we musurudado, kariro yedu ye ruponeso inodziirirawo ndangariro dzedu. Kariro yedu yakabamba, inoita kuti tiziye kuti apana catingapaswa no nyika ino cinobetsera. (Afi. 3:8) Kariro yedo inotibetsera kuti tirumbwe takaterama uye takabamba. Ndizvona zvakaitika na Wallace uye na Laurinda, anoseenzera ku África. Pa masumana matatu basi, awona ari airi akafirhwa ngo umwe we abereki awo. Uye nge ndaa ye nhenda ye korona vhiru, awona ari airi aazi kukwanisa kuhwirira kumba kuti agare no mhuri yawo. Wallace unoti: “Kariro ye rumuko inondibetsera kuti ndiarangarire haiwa ngo mushobo waainga ari asati afa, asi ngo mushobo waacagara paacararamazve mu nyika ipsva. Kariro ii inondibetsera kuti ndigare ndakaterama pandinonga ndakatsukwara maningi ngo zvese zvakaitika.”

13. Tinodikana kuitei kuti titambire mwiya mucena?

¹³ “Musadzimise muriro we mwiya.” (1 Ate. 5:19) Pauro wakaezanisa mwiya mucena no muriro uri mukati medu. Patinonga tino mwiya wa Mwari, isusu tinogara no cido cakakura ce kuita zviro zvakanaka uye no simba rakakura re kuseenzera Djehovha. (Aro. 12:11) Asi tinodikana kuitei kuti titambire mwiya mucena? Isusu tinganamata tecikumbira mwiya mucena, kufunda Soko ra Mwari, uye kuita dii re sangano. Kuita izvona kucatibetsera kuti tisakurire “zvibereko zve mwiya mucena.”—Aga. 5:22, 23.

14. Ngazvipi zvatisikadikani kuita kuti tirumbwe tecitambira mwiya wa Mwari? (Onaiwo mufanikiso.)

¹⁴ Mumasure mekuti Djehovha atipasa mwiya mucena wake, tinodikana kungwarira kuti “tisadzimise muriro we mwiya.” Djehovha anopasa mwiya mucena wake ku aya akacena mu ndangariro uye mu maitiro. Iyena aatipasi mwiya wake kana tikagara tecirangarira zviro zvakashata kana kuita zviro zvaasikatenderi. (1 Ate. 4:7, 8) Kusiya izvona, kuti tirumbwe tecitambira mwiya mucena, tinodikana kuteerera mutemo we “kureremedza zvipikirhwa.” (1 Ate. 5:20) “Zvipikirhwa” izvi zvinobatanidza masoko atakapaswa ndi Mwari eciseenzesa mwiya wake, ngezve zuwa ra Djehovha uye kukasika ke mazuwa edu. Isusu ationi hingana kuti Amagedhoni icanonoka maningi kuti iitike. Ngekudaro, isusu tino cidaka-daka kuti iitike nokukasika. Tinoita izvona nge kurumbwa tino muhambiro wakanaka uye nge “kubatikana pakuita ma mabasa ekudzipira kuna Mwari” mazuwa ese.—2 Ped. 3:11, 12.

“GARAI NO COKWADI CE ZVIRO ZVESE”

15. Ngazvipi zvatingaita kuti tisacengedzerhwe no masoko ekunyepa uye no masoko anocengedza e madhimoni? (1 Atesaronika 5:21)

¹⁵ Mune ramangwana azondi a Mwari acaziisa kuti: “Runyararo no kucengeteka!” (1 Ate. 5:3) Madhimoni acabararisa masoko ekunyepa mu nyika yese, acacengedzera anhu akawanda. (Zvak. 16:13, 14) Asi zvakadini na isusu? Isusu atizocengedzerhwi kana tikagara no “cokwadi [kana kuti “tikaongorora”] zviro zvese.” (Erengai 1 Atesaronika 5:21; onai masoko e pasi ekufunda.) Soko reci Grego rakaturikirhwa apa kuti “kuedza” rinoseenzeswa pakupanganidza mishobo yaiizwa no anhu kuti aedze simbi yakaita hingana oro no prata, kuti aone kuti zvainga zviri zvecokwadi here kana kuti haiwa. Ndiyo ndaa tinodikana kuongorora kuti tione kuti zvatazwa kana kuti zvataerenga ngezve cokwadi here kana kuti haiwa. Izvi zvaikosha ku Atesaronika, uye zvinokoshawo maningi katiri nyanye-nyanye dambudziko guru zvariri kukhwedera. Pane kugara hingana anhu asikazii ciro uye totendera zese zvinorekethwa no anhu, tinodikana kuseenzesa kukwanisa kedu kurangarira kuti tiezanise kuti zvataerenga no zvatazwa, zvinopindirana here no zvinorekethwa no Bhaibheri uye no sangano ra Djehovha. Ngekuita izvona atizocengedzerhwi nge masoko ekunyepa uye anocengedza e madhimoni.—Zvie. 14:15; 1 Ti. 4:1.

16. Tino rugondo ripi ngezve ramangwana, uye ngazvipi zvatinoda kuita?

¹⁶ Isusu tinozviziya kuti hingana cikwata, aseenzi a Mwari acapona pa dambudziko guru, asi atizvizii kuti cinyi cicaitika no umwe na umwe wedu. (Tig. 4:14) Azvinei nokuti tinonga ticakapona here pa dambudziko guru, kana kuti tinonga tafa izvona zvisati zvaitika, kana tikarumbwa takatendeka, Djehovha acatikomborera no upenyu usikaperi. Akadzodzwa acararama na Kristu kudenga. Mabira amweni acararama mu paraizo pa nyika. Hino tinoda kukanda ndangariro dzedu pa kariro yedu inoshamisa uye kugara takagadzirira kuitira zuwa ra Djehovha!