MUSORO WE KUFUNDA 34
Fundai Kubva pa Uphorofita we Bhaibheri
“Aya ano ungwaru acazwisisa.”—Dha. 12:10.
NGOMA 98 Bhaibheri Cipo ca Mwari
ZVATICAFUNDAa
1. Cinyi cingatibetsera kupfarira kufunda uphorofita we Bhaibheri?
MUDJAHA umweni unozwi Ben wakati: “Inini ndinopfarira kufunda ngezve uphorofita we Bhaibheri.” Imwimwi munotenderana naye? Kana kuti imwimwi munorangarira kuti kufunda ngezve uphorofita we Bhaibheri zvinoshupha maningi? Pamweni imwimwi munorangarira kuti kufunda ngezve zviro izvi zvinonyangadza. Asi pamunozwisisa kuti ngei Djehovha akaita kuti uphorofita uu utarhwe mu Bhaibheri, pamweni imwimwi mungacinja nzero dzenyu.
2. Ticaonei mu fundo ino?
2 Mu fundo ino ticaona kuti ngei tecidikana kufunda ngezve uphorofita we Bhaibheri uye kuti tingazviitisa kudini. Isusu ticaongororawo uphorofita uiri wa Dhanyeri uye ticaona kuti kuzwisisa uphorofita uu kungatibetsera kudini mazuwa ano.
NGEI TECIDIKANA KUFUNDA UPHOROFITA WE BHAIBHERI?
3. Tinodikana kuitei kana tecida kuzwisisa uphorofita we Bhaibheri?
3 Kana tecida kuzwisisa uphorofita we Bhaibheri, tinodikana kubetswa no anhu amweni. Rangaridzai ngezve muezaniso unoteera. Ngatimboti muri kuvhakacira mbuto yamusikazii asi imwimwi muno shamwari yekuti inonyasa kuziya kamuri kuenda. Iyena unoziya pamuri zvino, uye kuti gwanza rimwe na rimwe rinoenda koobudira papi. Zvezvirokwazvo kugara no shamwari ii padhuze kaizobetsera maningi! Ngo mushobo umwewo, Djehovha akaezana no shamwari ii, iyena anoziya nguwa yatiri zvino uye anoziya zvicaitika mune ramangwana. Hino kana tecida kuzwisisa uphorofita we Bhaibheri tinodikana kudzidodosa uye tokumbira rubetso ra Djehovha.—Dha. 2:28; 2 Ped. 1:19, 20.
Kufunda uphorofita we Bhaibheri kucatibetsera kuti tigare takagadzirira pa zviro zvicaitika mune ramangwana (Onai ndima 4)
4. Ngei Djehovha akaita kuti mu Bhaibheri mutarhwe uphorofita? (Djeremiya 29:11) (Onaiwo foto.)
4 Kuita hingana madzibaba anoda zvakanakira ana awo, Djehovha anoda kuti ana ake agare no ramangwana rakanaka. (Erengai Djeremiya 29:11.) Asi mukusiyana no abereki e kunyama, Djehovha anoziya zvicaitika mune ramangwana. Uye zviro zvese zvinoitikadi, ndiyo ndaa Djehovha akaita kuti uphorofita wakaringana no ramangwana utarhwe mu Bhaibheri uye izvona zvinoita kuti tiziye pacino nguwa zviro zvicaitika mune ramangwana. (Isa. 46:10) Uphorofita uu i cipo ca Djehovha katiri. Asi tingagara kundini no rugondo rekuti uphorofita we Bhaibheri ucadzadzikadi?
5. Madjaha angafundei no esperiensiya ya Max?
5 Kucikora, madjaha akatenderedzwa no anhu ano ruziyo padoko no aya asina ruziyo ngezve Bhaibheri. Zvinoizwa uye zvinorekethwa no madjaha aya zvingaita kuti madjaha amweni agare aino mubvunzo. Onai zvakaitika no hama imweni inozwi Max. Iyona inoti: “Pandainga ndiri djaha ndakatanga kugara ndisina cokwadi kuti abereki angu aindifundisa zviro zvisiripi cokwadi kana kuti Bhaibheri rainga risiripi re cokwadi.” Abereki a Max akaitei? Iyena unopanganidza eciti: “Awona akarumbwa akaterama asi ndaizviya kuti ngece mukati awona ainetseka.” Abereki a Max akadaira mibvunzo yese yaainga anayo uye Max wakaitawo dii rake. Iyena unoti: “Inini ndakafunda uphorofita we Bhaibheri uye ndakanyasa kukwarakwatisa ngezve uphorofita uu uye ndakareketa ngezve uphorofita uu no anhu amweni.” Mugumisiro wakhona ngaupi? Max unoti: “Mumasure mekuita izvi, inini ndakanyasa kugara no cokwadi cekuti Bhaibheri rainga rakafemerwa na Mwari!”
6. Kana imwimwi musina cokwadi no zviro zvimweni munodikana kuitei uye ngei mecidikana kuita kudaro?
6 Kuita hingana Max, kana imwimwi mukatanga kutama kugara no rugondo rekuti zviro zvinobhuiwa no Bhaibheri ngezve cokwadi musadzipase ndaa. Asi pano zviro zvamunodikana kuita. Ngekuti kutama kugara no rugondo kakatodzana no furuju. Kana tikatama kungwarira, padoko no padoko furuju icakwanisa kukuwadza ciro cinokosha maningi. Kuti tibvise “furuju” kana kuti mibvunzo inonga yecitinetsa, imwimwi munodikana kudzibvunzisa kuti: ‘Inini ndinotenderadi zviro zvinobhuiwa no Bhaibheri ngezve ramangwana?’ Kana imwimwi musina cokwadi nazvo, munodikana kutanga kufunda ngezve uphorofita unoreketa ngezvazvo. Mungazviitisa kudini?
MUSHOBO WE KUFUNDA UPHOROFITA WE BHAIBHERI
Kuita hinga Dhanyeri, kuti tigonde na Djehovha tinodikana kufunda uphorofita we Bhaibheri tecidzidodosa, takangwarira uye no zvinangwa zvakanaka (Onai ndima 7)
7. Cinyi cakabetsera Dhanyeri kufunda uphorofita we Bhaibheri? (Dhanyeri 12:10) (Onaiwo foto.)
7 Dhanyeri wakapangidza muezaniso wakanaka wekufunda uphorofita we Bhaibheri. Iyena waifunda uphorofita we Bhaibheri nge cinangwa cakanaka, cekuda kuziya cokwadi. Dhanyeri waidzidodosa uye waiziya kuti Djehovha aizomubetsera kuzwisisa uphorofita we Bhaibheri kana akarumbwa ari dhuze na Djehovha uye ecimuteerera. (Dha. 2:27, 28; erengai Dhanyeri 12:10.) Dhanyeri wakapangidza kuti waidzidodosa ngokuti wakagonda rubetso ra Djehovha. (Dha. 2:18) Kusiya izvona, Dhanyeri wainyasa kufunda akangwarira. Iyena wainyasa kukwarakwatisa akangwarira uphorofita wainga wakatarhwa pa nguwa iyona. (Djer. 25:11, 12; Dha. 9:2) Isusu tingateedzera kudini Dhanyeri?
8. Ngei anhu amweni asikatenderi kuti uphorofita we Bhaibheri unodzadzika, uye isusu tinodikana kuitei?
8 Ongororai mwoyo wenyu. Fundai no cinangwa cakanaka. Imwimwi munofunda uphorofita we Bhaibheri ngekuti muri kudadi kuziya cokwadi here? Hino Djehovha acamubetsera. (Juau 4:23, 24; 14:16, 17) Asi anhu amweni anofunda Bhaibheri no zvinangwa zvimweni. Awona anofunda Bhaibheri kuti apsvake kuziya kuti irona arizi kufemerhwa na Mwari. Mu misoro ye anhu aya anorangarira kuti kana Bhaibheri risikazi kufemerhwa na Mwari aridikani kuteererhwa. Munhu unozvisanangurira ega zvakanaka uye zvakashaka. Ndiyo ndaa anhu anodikana kufunda Bhaibheri no zvinangwa zvakanaka. Kusiya izvona, pano wara rinokosha rinodikanwa kuti tikwanise kuzwisisa uphorofita we Bhaibheri.
9. I wara ripi rinodikanwa kuti tikwanise kuzwisisa uphorofita we Bhaibheri? Panganidzai.
9 Garai munhu unodzidodosa. Djehovha anobetsera munhu unodzidodosa. (Tig. 4:6) Hino tinodikana kuita munamato tecikumbira rubetso ra Djehovha kana tecida kuzwisisa uphorofita we Bhaibheri. Tinodikana kugara munhu unodzidodosa kuti titambire rubetso ratinopaswa no muranda akagondeka akangwara unosenzeswa na Djehovha kuti atipase zvekurhya panguwa yakasisira. (Ruka 12:42) Djehovha ndi Mwari akarongeka, ndiyo ndaa zvino musoro kuti tizwisise Djehovha eciseenzesa mushobo umwe basa wekutibetsera kuti tizwisise cokwadi ce Bhaibheri.—1 Ako. 14:33; Aef. 4:4-6.
10. Mungafundei kubva pa esperiensiya ya Esther?
10 Fundai makanyasa kungwarira. Sanangurai uphorofita wamunonyasa kupfarira pedzepo kwarakwatisai ngezvawo. Ndizvo zvakaizwa no hanzvadzi imweni inozwi Esther. Iyona yaida kuziya zvakawanda zvakaringana no uphorofita wekuuya ka Mesiya. Esther unoppanganidza kuti: “Pandainga ndino makore 15, inini ndaida kugara no rugondo rekuti uphorofita wakaringana na Djesu wakatrhwadi kamare iyena asati atombobarhwa here, ndiyo ndaa ndakatanga kukwarakwatisa.” Zvaakafunda ngezve mupumburu we Mar Morto, zvakaita kuti iyena agare no rugondo. Iyena unoti: “Ndakaona kuti mipumburu imweni yakatarhwa kare Djesu asati auya panyika, hino uphorofita uu wakafemerhwa na Mwari. Izvirokwazvo kuti inini ndaidikana kuerenga kakawanda zviro izvi kuti ndigume pakuzwisisa, asi zvino ndaano rugondo rekuti zviya zvinorekethwa no Bhaibheri ngezve cokwadi.” Mumasure mekufunda akangwarira uphorofita wakawanda we Bhaibheri, Esther wakapfara maningi ngekuona kuti kupeta masimba kese kaakaita kakamubetsera!
11. Ngei zvecikosha kuti tidzionere tega kuti Bhaibheri ngere cokwadi?
11 Patinoona kuti uphorofita umweni wakadzadzika kudini, tinotunhudzira kugonda Djehovha no nhungamiriro dzimweni dzaanotipasa. Uyewo uphorofita we Bhaibheri, unotibetsera kuti tikande ndangariro mu kariro yedu ye ramangwana, kunyazi zvino tecitobatana no dambudziko. Zvino ngatimboongorora uphorofita uiri wakatarhwa na Dhanyeri uri kudzadzika mumazuwa edu ano. Kuzwisisa uphorofita uu kucatibetsera kuti tiite zvisananguro zvakanaka.
NGEI IMWIMWI MECIDIKANA KUZIYA NGEZVE MURENJE WE SIMBI WAKABATANIDZWA NO DONGO?
12. Mirenje ye “simbi yakabatanidzwa no dongo” inoimirirei? (Dhanyeri 2:41-43)
12 Erengai Dhanyeri 2:41-43. Iyena wakapanganidzira Mambo Nabhukodhonozori kuti mirenje ye mufanikiso yainga “yakabatanidzwa no simbi uye dongo isikazi kubamba.” Patinoezanisa uphorofita uu no uphorofita umweni watinogumira mu bhuku ra Dhanyeri no ra Zvakapangidzwa, tinoguma pakuona kuti mirenje ii inoimirira Estados Unidos no Grã-Bretanha. Nyika idzi dzinoseenza dzakabatana uye dzakaumba utongi wakabamba we nyika yese kana kuti potensiya mundiyari. Ecireketa ngezve utongi uno simba we nyika yese kana kuti potensiya mundiyari, Dhanyeri wakabhuya kuti “umambo iwona waizogara wakabamba uye nge dii rimweni usikazi kubamba.” Asi ngei Dhanyeri wakareketa kuti ngo dii rimweni waizogara usikazi kubamba? Ngokuti anhu anoimirirhwa no dongo anopingaidza kukwanisa karo kuita zviro no simba.b
13. Izvokwadi zvipi zvinokosha zvatinofunda no uphorofita uu?
13 Isusu tingafunda zvokwadi zvinokosha kubva pa mufanikiso wakapanganidzwa ndi Dhanyeri, maka-maka kubva pa mirenje ye mufanikiso. Ngo muezaniso, tinofunda kuti utongi we Anglo-Americana unopangidza simba raro nge matii ese. Ngo muezaniso, Estados Unidos no Grã-Bretanha akawina Hondo Yekutanga no Yecipiri ye Nyika Yese. Asi padoko no padoko utongi uu urikupera simba uye zviro izvi zvirikurumbwa zvakandodaro ngekuti anhu awona arikurumbwa asikapindirani uye asikapfari no zviri kuizwa no utongi uu. Cokwadi cimweni catinofunda nge ce kuti uu ucagara utongi wekupedzesera unosimba ucatonga Djesu Kristu asati aparadza nyika yese. Nyika dzimweni dzinoedza kuparadza utongi uu uno simba asi aazozvikwanisi. Tinoziya izvona ngekuti utongi uu ucaparadzwa no Umambo wa Mwari unoimirirhwa no “buwe” ricaparadza mirenje ii inoimirira utongi uno simba ye Anglo-Americana.—Dha. 2:34, 35, 44, 45.
14. Ngei teciti kuzwisisa ngezve uphorofita unopanganidza ngezve mirenje yakabatanidzwa no dongo zvecitibetsera kuita zvisananguro zvakanaka?
14 Muno cokwadi cekuti uphorofita we mirenje yemufanikiso wa Dhanyeri iri kudzadzika mazuwa ano? Kana imwimwi muno cokwadi nazvo, izvi zvicabata-bata mushobo wamunonga mecirarama mazuwa ano. Imwimwi amuzopedzi nguwa yakawanda meciedza kugogoma sure ke zviro zvekunyama kana kuti kuedza kugara munhu ano pfuma, ngokuti munoziya kuti mbai-mbai pano nyika ino icaparadzwa. (Ruka 12:16-21; 1 Juau 2:15-17) Kuzwisisa uphorofita uu kucatibetserawo kuona kukosha ke basa re kuparidzira uye kufundisa. (Mat. 6:33; 28:18-20) Mumasure mekufunda uphorofita, mungadzibvunzisa kuti: ‘Zvisananguro zvandinoita mu upenyu wangu, zvinopangidza here kuti mbai-mbai pano Djehovha acaparadza utongi we anhu?’
NGEI IMWIMWI MUNODIKANA KUZIYA NGEZVA “MAMBO WE KAKUTSI” NA “MAMBO WE KATEMAIDUMBA”?
15. Ndiyani “mambo we kakutsi” na “mambo we katemaidumba” mazuwa ano? (Dhanyeri 11:40)
15 Erengai Dhanyeri 11:40. Kapituro 11 ya Dhanyeri, inoreketa ngezve madzimambo mairi kana kuti atungamiriri e zve matongerhwe e nyika anorhwisana pa nyaya ye kutonga. Patinoezanisa ne uphorofita umweni we Bhaibheri tinokwanisa kuona kuti “mambo we kakutsi” ndi Rússia no nyika dzinoitsigira uye “mambo we katemaidumba” ndi utongi uno Simba we Nyika Yese Anglo-Americana.c
Kuziya kuti kurhwisana ka “mambo we kakutsi” na “mambo we katemaidumba” kunodzadzisa uphorofita we Bhaibheri, kunobambisa kutenda kedu uye kunotibetsera kuti tirumbwe takaterama (Onai mandima 16-18)
16. “Mambo we kakutsi” unobata kudini aseenzi a Mwari?
16 Aseenzi a Mwari ari kutungamirirhwa na “mambo we kakutsi” ari kuteererhwa zvakananga. Hama no hanzvadzi dzedu dzimweni, dzakapondhwa uye dzakasungwa nge ndaa ye kutenda kawo. Pano kuti arembe, kuteererhwa uku kuri kubambisa kutenda kawo. Ngei? Ngekuti awona anoziya kuti izvi zviri kudzadzisa uphorofita wakawanda uri mubhuku ra Dhanyeri.d (Dha. 11:41) Kuziya izvi kunobambisa kariro yedu uye kunotibetsera kuti tirumbwe takagondeka kuna Djehovha.
17. Matambudziko api akasongana no aseenzi a Mwari pasi pe utoni we “umambo we katemaidumba”?
17 Kareko, “mambo we katemaidumba” wakateerera aseenzi a Mwari. Ngo muezaniso, kubvira mumakore 1900 dakara 1950 hama dzakawanda dzakasungwa uye ana awo amweni akagogomerhwa kucikora nge ndaa yekutama kugara no dii raanotsigira. Asi nyamasi uno mambo we katemaidumba unoedza kuteerera aseenzi a Mwari nge mushobo usikanyanyi kuzwisisika. Ngo muezaniso, mukati me kampanya yo mavhoto, Mukristu pamweni ungazwa ecibambidzirhwa kuti akwanise kutsigira dii kana kuti munhu waanopfarira. Izvirokwazvo kuti iyena aazoendi koovhota asi pamweni ngece mumwoyo make, pano dii raanotsigira kana kuti munhu waasanangura. Asi kuti tigare kamare tisina dii ratinotsigira tinodikana kungwarira pa zviro zvatinonga tecirangarira!—Juau 15:18, 19; 18:36.
18. Tinozwa kudini pa nyaya yo kunetsana kuri kuita “mambo we kakutsi” na “mambo we katemaidumba”? (Onaiwo foto.)
18 Anhu aya asikatendi pa zviya zvinorekethwa no uphorofita we Bhaibheri, angadzirhya mwoyo paanoona “mambo we kakutsi” eciedza “kurhwisa mambo we katemaidumba.” (Dha. 11:40, masoko e pasi) Madzimambo mairi aya, ano pfuti dzokurhwisa nadzo dzingakwanisa kuparadza zviro zvese zvinorarama panyika. Asi tinoziya kuti Djehovha aazotenderi kuti zviro izvi zviitike. (Isa. 45:18) Asi isusu atinyanyi kunetseka nge zviro zvicaitika mune ramangwana, zvezvirokwazvo kurhwisana kuri pakati pe “mambo we kakutsi” na “mambo we katemaidumba” kunobambisa kutenda kedu. Izvona zvipangidzo zvekuti taakurarama mumazuwa ekupedzesera e migariro ye nyika ino.
RUMBWAI MECIFUNDA NGEZVE UPHOROFITA WE MU BHAIBHERI
19. Tinodikana kuedzurirei ngezve uphorofita we Bhaibheri?
19 Isusu atinyasi kuziya kuti uphorofita umweni we Bhaibheri ucadzadzika kudini. Kunyazi muphorofita Dhanyeri wainga asikazwisisi zvairehwa no uphorofita imweni yaakatara. (Dha. 12:8, 9) Asi kutama kuziya kuti uphorofita ucadzadzika kudini azvirei kuti iwona audzadziki. Tingagara no rugondo rese rekuti Djehovha acatibetsera kuti tizwisise zviro zvese zvatinodikana kuziya hingana zvaakaita kare.—Amo. 3:7.
20. Uphorofita upi unoshamisa ucadzadzika mbai-mbai pano, uye tinodikana kurumbwa teciitei?
20 Ticazwa masoko akaringana no “runyararo nokucengeteka.” (1 Ate. 5:3) Pedzepo utongi we zve matongerhwe e nyika acarhwisa uye acaparadza magereja. (Zvak. 17:16, 17) Pedzepo acarhwisa aseenzi a Mwari. (Ezek. 38:18, 19) Zviitiko izvi zvicaitika dakara pakurhwisa ke kupedzesera ke hondo ye Amagedhoni. (Zvak. 16:14, 16) Tingagara no rugondo rekuti zviro zvese izvi zvicadzadzika. Tecietsera kuti zviro izvi zviitike, ngatirumbwe tecipangidza kutenda kedu kuna baba edu ngekufunda takangwarira uphorofita we Bhaibheri uye kubetsera amweni kuti aitewo zvimwezvo.
NGOMA 95 Ruvheneko Rinorumbwa Recivheneka
a Migariro ye munyika iri kubambirira kushata, asi tingagara ne rugondo rekuti mbaimbai pano zviro zvicagadzirisika. Tinorugondo irona ngekuti tinofunda ngezve uphorofita we Bhaibheri. Mu fundo ino ticaona zviro zvinganani zvinotiitisa kuti tifunde ngezve uphorofita we Bhaibheri. Kusiya izvona ticaongorora uphorofita miiri ya Dhanyeri uye toona kuti ngei zvakanaka kuzwisisa uphorofita uu.
b Onai fundo inoti: “Jehovha Anozivisa ‘Zvinhu Zvinofanira Kukurumidza Kuitika,’” mu Murindiri wa 15 ya Junyo wa 2012, mandi. 7-9, mu ciShona.
c Onai fundo inoti: “Ndiani ‘Mambo Wekuchamhembe’ Mazuva Ano?,” mu Murindiri wa Mayo wa 2020, mandi. 3-4, mu ciShona.
d Onai fundo inoti: “Ndiani ‘Mambo Wekuchamhembe’ Mazuva Ano?,” mu Murindiri wa Mayo wa 2020, mandi. 7-9, mu ciShona.