FUNDO 22
Mungaparidzira Kudini Amweni Masoko Akanaka?
Pamuri kufunda cokwadi kudai, pamweni maakutorangarira kuti: ‘Anhu ese anodikana kuzwa masoko aya!’ Zvirokwazvodi, anhu ese anodikanadi kuzwa masoko aya! Kunyazi zvakadaro, pamweni mungathya kubvunza amweni zvamuri kufunda. Mu fundo ino, ticaona zvamungaita kuti mukunde kuthya uye zvamungaitawo kuti mugare no mupfaro we kubvunza amweni nge zve masoko akanaka ari mu Bhaibheri.
1. Mungareketa kudini ne anhu amunoziya zviro zvamakafunda?
Afundi a Djesu akati: “Isusu atingasii kureketa nge zve zviro zvatakaona no kuzwa.” (Zviito 4:20) Awona aireremedza zvaakafunda kubva kuna Djesu zvekuti aida kuaparidzira ku anhu akawanda. Munozwawo kudaro here? Kana zvakadaro, khorovherai mikana iri wese kuti mubvunze anyaukama enyu no madzishamwari nge zvamunofunda.—Erengai Akorosi 4:6.
Matangiro amungaita
Pamunonga mecicedza no anyaukama enyu, mungareketa nge zve Bhaibheri meciti: “Pano ciro candidakadza candafunda sumana ino.”
Pangidzai tsamba ye Bhaibheri kuti munyaradze shamwari yenyu iri kurhwara kana kuti iri kunetseka mu mwoyo.
Kana adoni enyu e ku basa akamubvunzisa kuti mapeto e biningu ainga akadini, abvunzei zvamakafunda mu fundo yenyu ye Bhaibheri kana kuti kumusangano.
Pangidzai shamwari dzenyu site jw.org.
Pikai amweni ku fundo yenyu ye Bhaibheri kana kuti pangidzai kuti angakumbira kudini fundo ye Bhaibheri mu jw.org.
2. Ngei zvakanaka kuparidzira no ungano?
Afundi a Djesu ainga asikareketi basi masoko akanaka ku anhu aaiziya. Djesu “akaatuma mberi kake ari airi airi mu mathaundi ese” kuti aparidzire. (Ruka 10:1) Izvi zvakapasa mukana anhu akawanda kuti azwe masoko akanaka. Kusiya izvi, kuparidzira pamwepo no anhu amweni kaipasa mupfaro mukuru ku afundi. (Ruka 10:17) Mungaparidzirawo no ungano here?
FUNDAI ZVAKAWANDA
Onai zvamungaita kuti mukunde kuthya uye zvamungaitawo kuti mugare no mupfaro we kuparidzira masoko akanaka.
3. Djehovha acamubetsera
Anhu amweni anoda kuparidzira asi anothya kuti anhu acarangarirei kana kuti acatambira kudini masoko awo.
Munothya kureketa no amweni nge zviya zvamunofunda here? Ngei?
Ridzai VHIDHIYO, pedzepo cedzai nge zve mubvunzo unoteera.
Madjaha aya e Apupuri a Djehovha akakunda kudini kuthya?
Erengei Isaya 41:10, uye pedzepo cedzai nge zve mubvunzo unoteera:
Pamunothya kuparidzira ngei mecidikana kuita munamato?
Maizviziya here?
Apupuri a Djehovha akawanda aimbothyawo kuparidzira amweni masoko akanaka. Umweni waithya ndi Sergey we ku Rússia, waizwa asikabetseri uye waiwona kuparidzira hinga ciro cinoshupha. Asi kubvira ipona wakatanga kufunda Bhaibheri. Iyena unoti: “Kunyazi ndaithya, ndakatanga kureketa no amweni nge zve Bhaibheri. Zvakandishamisa ngekuti kureketa no anhu amweni nge zve Bhaibheri kakatunhudzira rugondo rangu. Uyezve kakabambisa zvandinotenda mu mwoyo mangu.”
4. Reremedzai anhu
Pamunoparidzira masoko akanaka amudikani kundorangarira zvamucareketa basi asi kuti mucareketa kudini. Erengai 2 Timoti 2:24 uye 1 Pedru 3:15, pedzepo cedzai nge zve mibvunzo dzinoteera:
Mungaseenzesa kudini tsamba idzi pamunonga mecireketa no anhu zviri mu Bhaibheri?
Zvingaita kuti anyaukama kana kuti shamwari dzenyu dzingasama kutenderana nemwi. Cinyi camaizoita? Uye ngazvipi zvamusikadikani kuita?
Ngazvipi zviri nani: Kuita mibvunzo no usisi kana kuedza kubambidzira anhu kuti atenderane na imwimwi? Ngei?
5. Kuparidzira masoko akanaka kunounza mupfaro
Djehovha akapasa Djesu basa rekuparidzira masoko akanaka. Djesu airiona kudini basa iri? Erengai Juau 4:34, pedzepo cedzai nge zve mibvunzo dzinoteera:
Kurhya kunoita kuti tirumbwe tiri apenyu uye kunotipasa mupfaro. Ngei Djesu akaezanisa kuita kuda ka Mwari, kubatanidza basa rekuparidzira no cokurhya?
Kuparidzira masoko akanaka kunotipasa kudini mupfaro?
Zvamunodikana kuita
Pamusangano we pakati pe sumana, fundai kuti mungafundira kudini kureketa ne anhu.
Reketai no mufundisi wenyu kuti mukwanise kupinda pacikora pa musangano we pakati pe sumana. Matii anopaswa afundi angakwanisa kumubetsera kuti mugare no rugondo re kureketa no anhu amweni nge zvamuri kufunda.
Senzesai mabhokisi akazwi, “Anhu Amweni Anoti” kana kuti “Kana Munhu Akamubvunzisa” kuti mufundire madairire amungaita mibvunzo uye kana munhu asikatenderani no zvamunonga mecireketa.
KANA MUNHU AKAMUBVUNZISA: “Majinji api aunawo?”
Mungaseenzesa kudini mukana uu kuti mumubvunze zvamakafunda mu fundo yenyu ye Bhaibheri?
MUCIGWAGWA
Kuparidzira masoko akanaka kunounzisa mupfaro uye zviri nyore maningi kupinda zvamunorangarira.
Mibvunzo yekuhwirinzira
Ngei tinodikana kubvunzawo amweni nge zve masoko akanaka?
Mungazviita kudini no usisi?
Mungakunda kudini kuthya kuparidzira?
ZIYAI ZVAKAWANDA
Onai makwanza marongomuna ari nyore ekuparidzira masoko akanaka meciseenzesa kartau ye kuvhakacira saite ye jw.org.
Onai mawara marongomuna angamubetsera kuti muparidzire masoko akanaka.
“Makagadzirira kuti Mugare Aedzi e Anhu Here?” (Murindiri wa Mavhuvhu 2020)
Onai kuti muezaniso uu we mu Bhaibheri ungatibetsera kudini kuti tigare no ushingi we kuparidzira, kunyazi tiri madjaha.
Fundai zvamungaita kuti mucedze nge zve Bhaibheri no anyaukama enyu asikazii Djehovha.
“Kubatsira Voukama Kuti Vave Zvapupu” (Murindiri wa 15 ya Nyaonga wa 2014, mu ciShona)