FUNDO 02

Bhaibheri Rinopasa Kariro

Rakaizwa Zvekudindhwa

Anhu ese ari pa nyika ari kusongana ne matambudziko anoita kuti atsukware, adzirhye mwoyo uye arhwadziwe. Imwimwi makambosongana no zviro zvakadai here? Pamweni muri kuneseka nge ndaa ye nhenda kana kuti kufirhwa nge munhu wamunoda. Pamweni mungadzibvunzisa kuti, ‘Upenyu ucazombogara zviri nani here?’ Bhaibheri rinopasa mhinduro ye mubvunzo uu.

1. Bhaibheri rinopasa kudini kariro?

Bhaibheri aripanganidzi basi kuti ngei matambudziko eciitika mu nyika, asi rinopa masoko akanaka ekuti matambudziko ese acapera. Zvipikirhwa zve Bhaibheri zvingamupasa “ramangwana rakanaka no kariro.” (Erengai Djeremiya 29:11, 12.) Zvipikirhwa izvi zvinotibetsera kuti tishingirire matambudziko atiri kusongana nawo nyamasi uno, kuti tigare no maonero akanaka uye kuti tigumire mupfaro usikaperi.

2. Bhaibheri rinotipasa ramangwana rakadini?

Bhaibheri rinopanganidza nge zve ramangwana rokuti “rufu aricazoonekizve, kana kucema kana kuridza mhere kana kurhwadziwa.” (Erengai Zvakapangidzwa 21:4.) Matambudziko anoita kuti anhu agare asina kariro—nge ndaa ye urombo, kubatha zvisikazi kunaka, nhenda, uye rufu—zviro izvi azvizoonekizve. Bhaibheri rinogondesa kuti anhu acazopfara nokusikaperi mu Paraizo pasi pano.

3. Mungagara kudini no rugondo rokuti zvipikirhwa zve Bhaibheri nge zve cokwadi?

Anhu akawanda anokarira kuti zviro zvakanaka zviitike, asi awona aana cokwadi nazvo kuti zvicaitika. Asi Bhaibheri rinoreketa zviro zvinoitika. Isusu tingawakira rugondo redu pa zviro zvarinobhuya nge “kunyasa kukwarakwatisa Matarhwa.” (Zviito 17:11) Pamucafunda Bhaibheri, zvicaperera kamuri kutenda kana kuramba zvamucafunda nge zve ramangwana.

FUNDAI ZVAKAWANDA

Cimboongororai zvipikirhwa zvimweni zviri mu Bhaibheri nge zve ramangwana. Onai kuti kariro iri mu Bhaibheri iri kubetsera kudini anhu mazuwa ano.

Collage: Mifanikiso inopangidza musiano we migariro we anhu nyamasi ne migariro iri kupikirhwa ne Bhaibheri mune ramangwana. Mifanikiso inophindhwawo pa bhashu.

4. Bhaibheri rinotipasa kariro yekurarama upenyu usikaperi usina matambudziko

Onai zvipikirhwa zviri mu Bhaibheri zvinoteera. Zvipikirhwa zvipi zvamunonyanya kuda? Uye ngei?

Erengai matarhwa ari pamberi pe zvipikirhwa izvi, uye cedzai nge zve mibvunzo idzi:

Munorangarira kuti matarhwa aya angamubetsera here? Munorangarira kuti mhuri no shamwari dzenyu dzingabetsereka nge kufunda matarhwa aya here?

Cimborangarirai mecirarama mu nyika yakadai:

PASINA MUNHU . . .	UMWE NA UMWE . . .
ucazorhwadziwa, ucazocembera, kana kufa.—Isaya 25:8.	ucapfara nge kuona munhu waanoda ecimutswa, kuti araramezve pa nyika.—Juau 5:28, 29
ucazorhwara kana kuremara.—Isaya 33:24; 35:5, 6.	ucapfara ne uthongo wakanaka uye ucahwirirazve pa udjaha.—Djobho 33:25.
ucazoizirhwa zviro zvisina unatsi. —Isaya 32:16, 17.	ucagara no zvokurhya zvakawanda, nyumba dzakanyasa kunaka, uye basa rinopfadza.—Pisarema 72:16; Isaya 65:21, 22.
ucazoshuphika nge ndaa ye hondo. —Pisarema 46:9.	ucararama mu runyararo risikaperi.—Pisarema 37:11.
ucazoshuphika nge ndaa ye kurangarira zviro zvakadarika.—Isaya 65:17.	ucararama nokusikaperi mu migarire yakanaka.—Pisarema 37:29.

Ka mwana kainga ke cirhwara asi watamba uye kakhumbatira mai ake.

Mwanarume wainga akura asi zvino waa djaha ecindunda bhara rakadzara nge masenora uye no zvimweniwo.

5. Zvipikirhwa zve Bhaibheri zvingacinja upenyu

Anhu akawanda anodzirhya mwoyo kana kushatirhwa nge ndaa ye matambudziko aarikubatana nawo. Amweni anorhwa kuti aedze kucinja zviro kuti zvigare zviri nani. Onai kuti zvipikirhwa zve Bhaibheri zvakaringana nekuti zviro zvicagara zviri nani zviri kubetsera kudini anhu mazuwa ano. Ridzai VHIDHIYO, pedzepo cedzai nge zve mibvunzo dzinoteera.

VHIDHIYO: Ndaida Kurhwisa Rusananguro (4:07)

Vhidhiyo inozwi ‘Ndaida Kurhwisa Rusananguro.’ Rafika ecikaya thonje ne anhu e ganda rimwero paainga aciri musikana.

Mu vhidhiyo yetaona, Rafika wainetseka ngei?
Kunyazi ciro cainetsa Rafika cisikazi kupera, Bhaibheri rakamubetsera kudini?

Kana tikatenda zvipikirhwa zve Bhaibheri zvakaringana nge zve ramangwana zvicatibetsera kuti tigare ne kariro uye tecipfara kunyazi tecisongana ne matambudziko. Erengai Zvierengo 17:22 uye Aroma 12:12, pedzepo cedzai nge zve mibvunzo dzinoteera:

Imwimwi munorangarira kuti kariro iri mu Bhaibheri ingakwanisa kucinja upenyu wenyu zvino? Uye ngei?

ANHU AMWENI ANOTI: “Zvipikirhwa zviri mu Bhaibheri zvakaringana no ramwangwana zvakanaka maningi.”

Ngei zvecikosha kuti muzvionere mwega?

MUCIGWAGWA

Bhaibheri rinotipasa kariro uye rinotibetsera kuti tishingirire zvinetso ne kugonda ramangwana rakadzara ne mupfaro.

Mibvunzo yekuhwirinzira

Ngei anhu ecida kariro?
Bhaibheri rinobhuyei nge zve ramangwana?
Kugara ne kariro ye zve ramangwana kunotibetsera kudini mazuwa ano?

Ndakapedza fundo ii muna:

Edzai kuita zvinoteera

Rumbwai mecifunda zvipikirhwa zve Bhaibheri nge kuerenga tsamba dzakatarhwa mu fundo ii..

Zvimweni:

Your other goal

ZIYAI ZVAKAWANDA

Vhidhiyo inozwi ‘Ndaida Kurhwisa Rusananguro.’ Rafika ecishamisika nge kuona anhu e madzindza akasiyana-siyana paakatanga kupinda gungano re Apupuri a Djehovha.

Fundai zvakawanda zvakaringana no simba re kariro.

“Kariro—Ine Basa Here?” (Mukai! wa 22 ya Mauwe ya 2004)

Onai kuti kariro ye zve ramangwana ingabetsera kudini ku aya ano nhenda yagarisa.

“Kurarama no Nhenda Isikarapiki—Bhaibheri Rinokwanisa Kubetsera Here?” (Fundo ye mu site)

Pamunoona ngoma ye vhidhiyo, dzionei ne mhuri yenyu mecipfara mu zvipikirhwa zve Bhaibheri zve Paraizo ye ramangwana.

Rangaridzai Muri mu Paraizo (3:37)

Erengai nyaya ye upenyu ye munhu wairhwira zvitenderhwa zve anhu kuti upenyu wake wakacinja kudini paakafunda zvipikirhwa zve Bhaibheri zve ramangwana.

“Andicarangariri kuti ndinodikana kucinja nyika” (Murindiri wa 1 ya Julho ya 2013)