Mu nyika yese, anhu ane maonero akasiyana nge zvekumwa zvinoraradzisa. Amweni anopfarira kumwa pamweni paya no shamwari dzawo. Amweni anosanangura kusamwa. Uye amweni anomwa dakara pakuraradza. Ngaapi maonero anoita Bhaibheri nge zve zvekumwa zvinoraradzisa?

1. Zvakashata here kumwa?

Bhaibheri arirambidzi kumwa. Pane kudaro, irona rinoti “vhinyu, inopfadza mwoyo we munhu,” inobatanidzwa pa zvipo zvakawanda zvetakapaswa na Mwari. (Pisarema 104:14, 15) Anarume no anakadzi akagondeka anorekethwa mu Bhaibheri aimwawo zvekumwa zvinoraradzisa.—1 Timoti 5:23.

2. Ngaapi mazano anopaswa no Bhaibheri ku aya anosanangura kumwa?

Djehovha anobhuya kuti zvakashata kumwa dakara pakuraradza. (Agaratiya 5:21) Bhaibheri rinoti: “Usagare pakati pe aya anomwisa maningi vhinyu.” (Zvierengo 23:20) Ndiyo ndaa, kana tikasanangura kumwa tinodikana kuzviita no maonero ari pakati no pakati kunyazi patinonga tiri tega. Kumwisa kunoita kuti munhu asarangarire ngo mushobo wakadjeka uye asakwanise kudzibata pa zviro zvaanobhuya uye zvaanoita. Kusiya izvona, kungakwanisa kukuwadza uthongo wake. Kana tisikakwanisi kudzibata patinomwa, tinodikana kutosiya kumwa.

3. Tingareremedza kudini cisanaguro ce amweni?

Kumwa zve kumwa zvinoraradzisa cisananguro ce munhu ega. Atidikani kutonga amweni anosanangura kumwa doro ngo mushobo uri pakati no pakati. Uye atidikaniwo kubambidzira munhu kuti amwe. (Aroma 14:10) Tinosanangura kusama kumwa kana izvona zvecinyangadza amweni. (Erengai Aroma 14:21.) Isusu tinopsvaka “haiwa zvakatinakira basi, asi zvakanakirawo amweni.”—Erengai 1 Akorinti 10:23, 24.

FUNDAI ZVAKAWANDA

4. Sanangurai kuti mucamwa here kana haiwa

Djesu aiona kudini kumwa zve kumwa zvinoraradzisa? Cishamiso cokutanga ca Djesu cinotibetsera kuziya mhinduro yakhona. Erengai Juau 2:1-11, pedzepo cedzai nge zve mibvunzo inoteera:

• Cishamiso ici cinotibetsera kudini kuziya maonero a Djesu nge zvekumwa zvinoraradzisa uye uya anosanangura kumwa?

• Djesu aazi kubhuya kuti kumwa kakashata, asi aKristu anodikana kurangarirei nge zve aya anosanangura kumwa?

Ngekuti mukristu angakwanisa kumwa, izvi azvirei kuti ndico ciro cakanaka cekuita nguwa dzese. Erengai Zvierengo 22:3, pedzepo cedzai nge zve mafundo anoteera kuti angabata-bata kudini cisananguro cenyu:

• Muri kuda kutekenya karu kana kuseenzesa ciro cimweni cingakuwadza here.

• Mune mimba here.

• Medhiko akamubvunza kuti musamwe here.

• Mune cinetso ce kusama kuziya kudzibata pamunomwa here.

• Mutemo we munyika yamunogara autenderi kuti mumwe here.

• Munogara no munhu wakasanangura kusamwa ngekuti wakambosongana no cinetso nge ndaa ye kumwa here.

Kodi munodikana kuita kuti pagare ne zve kumwa zvinoraradzisa pa mucato here kana kuti pa misangano ye ushamwari? Kuti muone cingamubetsera kuita cisananguro, ridzai VHIDHIYO.

VHIDHIYO: Ndinoda Kuti Pagare ne Zvekumwa Zvinoraradzisa Here? (2:41)

Erengai Aroma 13:13 uye 1 Akorinti 10:31, 32. Mu masure me kuerenga tsamba imwe basi, cedzai nge zve mubvunzo unoteera:

• Kuseenzesa mazano aya kungamubetsera kudini kuti muite cisananguro cinopfadza Djehovha?

5. Sanangurai mudida wamucamwa

Kana mukasanangura kumwa zvinoraradzisa, edzurirai izvi: Djehovha aarambidzi kumwa zvekumwa zvinoraradzisa, asi anorambidza kumwa dakara pakuraradza. Ngei? Erengai Ozeya 4:11, 18, pedzepo cedzai nge zve mubvunzo unoteera:

• Cinyi cinozoitika munhu paanomwa maningi?

Cinyi cicatibetsera kuti tisamwe maningi? Tinodikana kugara pakati no pakati, kana kuti, kuziya patinogumira. Erengai Zvierengo 11:2, pedzepo cedzai nge zve mubvunzo unoteera:

• Ngei zvakanaka kugadza mugano pa mudida wamucamwa?

6. Rubetso ku aya anomwa maningi

VHIDHIYO: ‘Upenyu Wangu Wainga Usikacapfadzi’ (6:32)

• Mu vhidhiyo, Dmitry waigara no maitiro api paaimwa?

• Kodi iyena wakakwanisa kuima kumwa paakatanga here?

• Iyena wakakwanisa kudini kukunda musambo uu?

Erengai 1 Akorinti 6:10, 11, pedzepo cedzai nge zve mibvunzo dzinoteera:

• Cinyi cinopangidza kuti kuraradza ndi citema cakakura?

• Cinyi cinopangidza kuti munhu anomwisa maningi angakwanisa kucinja?

Erengai Mateu 5:30, pedzepo cedzai nge mubvunzo unoteera:

• Pa muezaniso wa Djesu we kugura nyara, iyena aida kureya kuti tinodikana kuita zviri zvese kuti tipfadze Djehovha. Cinyi camungaita kana muri kurhwisa kuti mukunde musambo we kumwa zvinoraradzisa?a

Erengai 1 Akorinti 15:33, pedzepo cedzai nge zve mubvunzo unoteera:

• Kana imwimwi mune shamwari inomwa maningi, izvi zvingamubata-batai kudini?

MUCIGWAGWA

Zvekumwa zvinoraradzisa zvinobatanidzwa pa zvipo zvakawanda zvatakapaswa na Mwari, asi iyena anorambidza kumwa dakara pakuraradza.

Mibvunzo yekuhwirinzira

• Bhaibheri rinobhuyei nge zvekumwa zvinoraradzisa?

• I ngozi dzipi dziripo pa kumwa maningi?

• Tingapangidza kudini kuti tinoreremedza zvinosanangurhwa no amweni pa nyaya dze kumwa?

ZIYAI ZVAKAWANDA

Madjaha angaita kudini zvisananguro zvakanaka pa nyaya ye zve kumwa zvinoraradzisa?

Nyasai Kurangarira Musati Mamwa Zvinoraradzisa (2:31)

Onai zvamungaita kuti mukunde cinetso ce kumwa zvekumwa zvinoraradzisa.

“Kumwa Doro Zvine Mudida (Murundiri wa 1 ya Janero wa 2010)

Mu Kristu unotenderhwa here kupondanisa makopo pakumwa?

“Mibvunzo Inobva ku Aerengi” (Murindiri wa 15 ya Fevrero wa 2007)

Erengai eshiperiyensiya inoti, “Ndainga Ndiri Amusiya Dzasukwa” muone kuti mwanarume umweni wakaima kudini kumwa maningi.

“Bhaibheri Rinocinja Upenyu” (Murindiri wa 1 ya Mayo wa 2012)

Umwe na umwe wedu uno mapfekero aanopfarira. Mu Bhaibheri muno mazano angatibetsera kuti tipfeke nge mushobo watinoda asi tecipfadza Djehovha. Ngatione mazano manganani akhona.

1. Cinyi cingatibetsera kuti tisanangure mapfekero atingaita?

Tinodikana kusanangura ’macira ano rureremedzo, anopangidza kugara no maonero ari pakati no pakati uye marangariro akanaka,’ uye kugara takacena kunopangidza kuti tiri anhu “anonamata Mwari.” (1 Timoti 2:9, 10) Ngatione zviro zvirongomuna zvinorekethwa no Bhaibheri: (1) Macira edu anodikana kugara “ano ciimo cakanaka.” Hinga zvamakamboona pa misangano ye cikristu, anhu a Djehovha anopfarira kupfeka zvakasiyana-siyana, asi mapfekero edu nemagadziriro atinoita tsitsi redu anopangidza kuti tinoreremedza Mwari watinonamata. (2) Kupfeka “zviri pakati ne pakati” kunoreya kuti atidikani kupfeka macira anoita kuti anhu arangarire nge zve pamaponde zvekuti madziso ese anonga ecindoringisa isusu. (3) Tinopangidza kuti tino “ndangariro dzakanaka” kana tikasama kuteedzera mapfekero ese anonga ari pa modha. (4) Ciimo cedu cinodikana kupangidza kuti tiri anhu “akadzipira kuna Mwari,” uye kuti tinonamata Mwari we zvirokwazvo.—1 Akorinti 10:31.

2. Ngei tecidikana kurangarirawo nge zve hama dzedu patinosanangura zvekupfeka?

Kunyazi takasudzunuka kusanangura zvatinoda kupfeka, tinodikana kurangarira kuti amweni akationa acazwawo kudini. Tinoita zviri zvese kuti tisakuhunyise kutenda ke amweni, asi kuti ‘tipfadze mudoni wedu kuti zvimunakire, uye zvimubambise.’—Erengai Aroma 15:1, 2.

3. Mapfekero edu angakwanisa kudini kuita kuti anhu amweni ade kunamata Djehovha?

Tinoedza kupfeka macira ano ciimo cakanaka nguwa dzese, asi kunyanya paya patinonga tiri kumisangano uye patinonga teciparidzira. Atidi kuita kuti macira edu aite kuti anhu ashore soko ratiri kuaendesera. Asi tinoda kuti mapfekero edu aite kuti cokwadi cipfarirhwe no amweni, zvoita “kuti fundiso ye Muponesi wedu ikudzwe.”—Tito 2:10.

FUNDAI ZVAKAWANDA

4. Kupfeka zvakanaka kunopangidza kuti tinoreremedza Djehovha

Cikonzero cipi cikuru cinoita kuti tingwarire mapfekero edu? Erengai Pisarema 47:2, pedzepo cedzai nge zve mibvunzo dzinoteera:

• Kuziya kuti tirikuimirira Djehovha kunodikana kuita kuti tipfeke kudini?

• Munorangarira kuti zvino basa here kungwarira mapfekero edu patinoenda kumisangano kana kuti kooparidzira? Ngei mecirangarira kudaro?

5. Masananguriro amungaita macira ekupfeka

Ridzai VHIDHIYO.

VHIDHIYO: “Itai Zviro Zvese Kuti Mwari Akudzwe” (10:18)

Kunyazi tisina mare yekutenga macira anodhura, awona anodikana kugara akacena uye anopindirana no mbuto yatiri uye no zvatiri kuita. Erengai 1 Akorinti 10:24 uye 1 Timoti 2:9, 10. Pedzepo cedzai nge zve kuti ngei tisikadikani kupfeka macira . . .

• asikazi kucena uye macirawo hawo.

• anobata maningi, anosiya mwiri wecionekera, uye anoita kuti anhu arangarire zvisirizvopi.

Kunyazi Akristu asiripi pasi pe Mutemo wa Mozesi, mutemo uu unotibetsera kuziya maonero a Djehovha. Erengai Dheuteronomiyo 22:5, pedzepo cedzai nge zve mubvunzo unoteera:

• Ngei tisikadini kupfeka macira anoita kuti anarume agare hingana anakadzi uye anakadzi agare hingana anarume?

Erengai 1 Akorinti 10:32, 33 uye 1 Juau 2:15, 16, pedzepo cedzai nge zve mibvunzo dzinoteera:

• Ngei tecidikana kungwarira kuti mapfekero edu asakuhunyise amweni ari mumutanha watinogara kana kuti mu ungano?

• Kamunogara anhu anopfeka kudini?

• Munorangarira kuti mishobo imweni yekupfeka aisisiri ku Akristu here? Ngei mecirangarira kudaro?

MUCIGWAGWA

Kana tikasanangura kupfeka zvakanaka tinonga tecipangidza kuti tinoreremedza Djehovha uye tinonga tecireremedzawo amweni.

Mibvunzo yekuhwirinzira

• Ngei mapfekero uye ciimo cedu zvecikosha kuna Djehovha?

• Ngaapi mazano manganani ari mu Bhaibheri angatibetsera pa nyaya yekusanangura zvekupfeka?

• Mapfekero edu angaita kuti anhu aone kudini kunamata kedu?

ZIYAI ZVAKAWANDA

Onai kuti macira enyu anokwanisa kupangidza anhu kuti muri munhu wakaita kudini.

“Macira Enyu Anopangidzei Ngezvenyu?” (Fundo ye mu saite, mu ciShona)

Fundai kuti zvakanakira papi kutanga mamborangarira musati matarhwa-tarhwa muiri wenyu.

“Matatuaji-Bhaibheri Rinofundisei Ngezvawo? (Fundo ye mu saite, mu ciShona)

Ongororai zviro zvimweni zvinorekethwa no Bhaibheri zvingamubetsera pakusanangura macira ekupfeka.

“Mushobo Wenyu Wekupfeka Unoita Kuti Mwari akudzwe Here?” (Murindiri wa Setembro 2016)

Mwanakadzi umweni wakaguma kudini pakuzwisisa kuti anhu amweni anopfarirawo kupfeka macira akasiyana no zvaakadjaira?

“Ndainyangadzwa Nge Ndaa ye Mapfekero e Amweni” (Mukai!, wa 22 ya Dezembro wa 2003)