• Tingaita Kudini Kuti Tigare Anhu Akacena Kuna Mwari?
    Pfadzwai ne Upenyu Nokusikaperi!—Kursu ye Bhaibheri
    • Fundo 40. Mwanarume umweni ecikarawa nyara no mvura uye ne sabau.

      FUNDO 40

      Tingaita Kudini Kuti Tigare Anhu Akacena Kuna Mwari?

      Rangaridzai mai ecigadzirira mwana wawo kuti aende kucikora. Maiwo anogara no cokwadi cekuti mwanewo wasamba uye kuti macira ake akacena. Izvi zvinoita kuti arumbwe akacena uye anhu amweni anoonawo kuti abereki ake arikumucengeta zvakanaka. Zvimwe-zvimwezvoo, Baba edu ano rudo Djehovha, anodawo kuti tigare anhu ano tsika dzakacena uye ano usiri. Kugara anhu akacena kunobetsera isusu kamare uye kunoita kuti Mwari akudzwe.

      1. Tingaita kudini kuti tigare anhu ano usiri?

      Djehovha anotibvunza kuti: “Garai akacena.” (1 Pedru 1:16) Kuti tigare anhu akacena, tinodikana kugara no tsika dzakanaka uye no usiri. Tinoita izvi nge kusamba, kuphadza macira edu, kucengeta muzi dzedu, uye karu dzedu kuti dzigare dzakacena uye dzakarongeka. Tinokwanisa kubetserawo pakuita kuti Nyumba ye Umambo igare yakacena. Kana tikagara no usiri, tinoita kuti Djehovha akudzwe.—2 Akorinti 6:3, 4.

      2. Tinodikana kusiya miitiro ipi Kuti tigare anhu akacena?

      Bhaibheri rinotikohomedzesa kuti tidzicenese “pa zviro zvese zvinosvipisa mwiri no mwiya.” (2 Akorinti 7:1) Hino tinoedza kusiyana no zviro zvese zvinokwanisa kukuwadza mwiri wedu kana kuti ndangariro dzedu. Zvatinorangarira zvinodikana kupfadza Djehovha, ndiyo ndaa tinoedza kuita zvese zvatinokwanisa kuti tisarangarire zviro zvisikazi kunaka. (Pisarema 104:34) Isusu tinoedzawo kureketa masoko akacena.—Erengai Akorosi 3:8.

      Ngazvipi zviro zvimweni zvinokwanisa kusvipisa mwiri wedu kana kuti tsika dzedu? Zviro zvimweni zvakaita hingana forhya, mitombo inoraradzisa zvingakwanisa kusvipisa mwiri wedu. Ndiyo ndaa tisikaseenzesi zviro zvakadaro kuitira kuti tigare no uthongo wakanaka uye tinonga tecipangidza kuti tinoreremedza cipo ce upenyu. Isusu Tinoedzawo kugara no tsika dzakanaka ngekusiya kuita miitiro yakaita hingana bonhora uye kuona pornografiya. (Pisarema 119:37; Aefeso 5:5) Azviripi nyore kukurira tsika idzi, asi Djehovha anokwanisa kutibetsera.—Erengai Isaya 41:13.

      FUNDAI ZVAKAWANDA

      Onai kuti kugara no usiri kunokudza kudini Djehovha uye onaiwo kuti mungarhwisa kudini miitiro isikazi kucena.

      3. Usiri unoita kuti Djehovha akudzwe

      Tinokwanisa kuzwisisa kuti Djehovha anoona kudini usiri kana tikaongorora mitemo yaakapasa Aisraeri. Erengai Ekisodho 19:10 uye 30:17-19, pedzepo cedzai nge zve mibvunzo inoteera:

      • Tsamba idzi dzinopangidza kudini maonero a Djehovha nge zve usiri?

      • Mungaita kudini kuti mugare anhu ano usiri?

      I basa rakakura kugara no zviro zvedu zvese zvakacena. Asi tinokwanisa kuzviita pasinei nokatinogara kunyazi tiri arombo kana apfumi. Ridzai VHIDHIYO, pedzepo cedzai nge zve mibvunzo dzinoteera.

      VHIDHIYO: Mwari Anoda Anhu Akacena (4:10)

      • Kugara tino zviro zvakacena kunobetsera kudini kuti anhu areremedze basa redu rekuparidzira?

      4. Kurhwisa miitiro isikazi kucena

      Mwanarume umweni ecipsveta sigaro mu rishu.

      Djehovha angatibetsera kuti tikunde miitiro ipi hayo yakashata

      Kana mecibhema kana kuti meciseenzesa mitombo inoraradzisa, munotoziya kushupha kunoita kusiya miitiro yakadaro. Cinyi cingamubetsera? Rangarirai kuti kuita izvona kungakuwadza kudini. Erengai Mateu 22:37-39, pedzepo cedzai nge zve kuti kubhema kana kuti kuseenzesa mitombo inoraradzisa kungakuwadza kudini . . .

      • ushamwari wenyu na Djehovha.

      • mhuri yenyu no anhu amunotamba nawo.

      Itai zvekuronga kuti mungarhwisa kudini miitiro isikazi kucenaa. Ridzai VHIDHIYO.

      VHIDHIYO: Garai Munhu Anodzibata (2:47)

      Erengai Afiripi 4:13, pedzepo cedzai nge zve mubvunzo unoteera:

      • Kugara no urongwa wekuita minamato, kufunda Bhaibheri, uye kupinda misangano kungabetsera kudini munhu kuti arhwise miitiro isikazi kucena?

      5. Rhwisai marangariro uye miitiro isikazi kunaka

      Erengai Akorosi 3:5, pedzepo cedzai nge zve mibvunzo dzinoteera:

      • Tinoziya kudini kuti kuona pornografiya, kutumira mamesaje anopsverudza, uye bonhora azvizi kucena kuna Djehovha?

      • Munorangarira kuti zvinoita kugara no tsika dzakanaka hingana zvinodiwa na Djehovha here? Ngei?

      Onai kuti mungarhwisa kudini marangariro asikazi kucena. Ridzai VHIDHIYO.

      VHIDHIYO: Torai Matanho Angamubetsera Kuti Mugare Akacena (1:51)

      Djesu akaseenzesa mufanikiso waipangidza kuti tinodikana kutora matanho akakura kuti tirumbwe tino tsika dzakanaka. Erengai Mateu 5:29, 30, pedzepo cedzai nge zve mubvunzo unoteera:

      • Kunyazi Djesu ainga asikabhui kuti tinodikana kudzikuwadza, iyena aipangidza kuti pano zviro zvatinodikana kuita. I danho ripi rakakura ringaizwa no munhu kuti asarangarire zviro zvisikazi kucena?b

      Kana murikurhwisa kuti mukurire marangariro dzisikazi kucena, Djehovha anopfara nge zviro zvamuri kuedza kuita. Erengai Pisarema 103:13, 14, pedzepo cedzai nge zve mubvunzo unoteera:

      • Kana mecikonerhwa kukunda tsika isikazi kunaka, tsamba ii ingamubetsera kudini kuti murumbwe mecirhwisa?

      Musarembe!

      Zviri nyore kurangarira kuti: ‘Ndazvikonerhwa, hino azvibetseri kuti ndirumbwe ndeciedza.’ Asi ziyai kuti kana mugogomi akambwera, azvirei kuti watoruza mutambo uye azvirei kuti unodikana kutangisazve pasva. Zvimwezvoo, azvirei kuti imwimwi matokonerhwa kana mukahwirira kuita zviro zvamainga matosiya. Uye azvirei kuti zviro zvese zvamakaita kare kuti mukunde tsikeyo, azvicabetseri. Izvi zvinoitika ku munhu wese uye zvinopangidza kuti murikutorhwisa. Musahwirire sure! No rubetso ra Djehovha, imwimwi mucakwanisa kukurira tsika dzisikazi kunaka.

      Mugogomi uri pa mutambo eciprumuka mu masure mekumbwera.

      ANHU AMWENI ANOTI: “Zvaamunyama. Andicakwanisi kuzvisiya.”

      • I tsamba ipi yamaizoseenzesa kuti mupangidze munhu wakadaro kuti ungakwanisa kurhwisa miitiro isikazi kunaka ecibetserhwa na Djehovha?

      MUCIGWAGWA

      Kana tikagara no mwiri, marangariro uye miitiro yakacena, tinopfadza Djehovha.

      Mibvunzo yekuhwirinzira

      • Ngei zvecikosha kuti tigare takacena?

      • Tingaita kudini kuti tigare no usiri?

      • Mungaita kudini kuti ndangariro dzenyu no miitiro yenyu igare yakacena?

      Edzai kuita zvinoteera

      ZIYAI ZVAKAWANDA

      Zviro zvipi zvisikashuphi zvamungakwanisa kuita kuti mugare no usiri kunyazi muri munhu usina mare yakawanda?

      Uthongo uye Usiri —Kukarawa Nyara (3:01)

      Onai matanho amungatora kuti musiye kubhema.

      “Zvamungaita Kuti Musiye Kubhema” (Mukai!, wa Mauwe 2010)

      Ongororai kuti kuona pornografiya kungakuwadza kudini.

      “Zvipsverudzi—Azvikuwadzi Here?” (Murindiri wa 1 ya Katutu wa 2013)

      Erengai nge zve mwanarume umweni wainga adjaira kuona pornografiya asi wakazokunda dambudzikoro.

      “Ndakambokonerhwa Kakawanda, Asi Ndazozvikwanisa” (Murindiri N.° 4 2016)

      a Revhista ino musoro unoti, “Zvamungakwanisa Kuita Kuti Musiye Kubhema”, iri pa musoro unoti, Ziyai Zvakawanda we fundo ino, inopanganidza matanho anodikana kutorhwa ne munhu kuti asiye zviro zvaanonga adjaira.

      b Kuti muone zvingamubetsera kurhwisa miitiro ye bonhora, onai fundo inoti, “Ndingakurira Sei Tsika Yokuita Bonhora?” mu bhuku rinozwi Mibvunzo Inoizwa no Madjaha—Mhinduro Dzinoshanda, Bhuku 1, chitsauko 25.