2. Zvinyi zvakaitika mu nyika kubvira mu gore ra 1914?

Afundi a Djesu akabvunzisa kuti: “Zviro izvi zvicaitika riini uye ndi cipi cipangidzo cokuti nyika yaakuda kupera?” (Mateu 24:3) Pa mhinduro yake, Djesu akareketa zviro zvakawanda zvaizoitika mu nyika paaizotanga kutonga kudenga hinga Mambo we Umambo wa Mwari. Zvaizoitika zviro zvakadai hinga hondo, nzara uye zvigidhigidhi. (Erengai Mateu 24:7.) Bhaibheri rinoreketawo nge zve unhu we anhu “mu mazuwa ekupedzesera,” nge ndaa yazvo upenyu waizonga ‘wecishupa kushingirira.’ (2 Timoti 3:1-5) Kubvira muna 1914, zviro izvi zviri kurumbwa zvecibambirira kushata.

3. Ngei zviro zviri kubambirira kushata kubvira Umambo wa Mwari pe wakatanga kutonga?

Nguwa doko Djesu aa agadzwa hinga Mambo we Umambo wa Mwari, ayena akarhwa hondo na Sathani pamwepo no madhimoni ake. Sathani wakaruza. Bhaibheri rinoti: “Iyena wakakhandirhwa pa nyika, uye ngirozi dzake dzakakhandirhwawo pamwepo naye.” (Zvakapangidzwa 12:9,10, 12) Sathani wakatsamwa maningi ngekuti unozviziya kuti ucaparadzwa. Ndiyo nda iyena ecikonzera marwhadzo no matambudziko akawanda mu nyika yese. Azvishamisi kuti zviro izvi zvakashata zviri kuitika! Asi Umambo wa Mwari ucapedza matambudziko ese.