Tinodikana kuitei kuti tikwedere kuna Mwari?

1. Kodi Mwari anozwa minamato yese here?

Mwari anopika anhu ese kuti akwedere kwaari eciseenzesa munamato. (Pisarema 65:2) Asi Mwari aapurutani kana kutambira minamato yese. Ngo muezaniso, minamato yo mwanarume unoita bvinga ku mukadzi wake, Mwari aapurutani minamato ye munhu wakadaro. (1 Pedru 3:7) WaIsraeri paaibambirira kuita zvakashata, Mwari wainga asikapurutani minamato yawo. Kunyadaro, Mwari anozotambira minamato yo munhu wakaita cishaishi cikuru kana akacinyuka. Izvi zvinopangidza pamhene kuti munamato inyasha ya Mwari.—Erengai Isaya 1:15; 55:7.

2. Tinganamata kudini?

Munamato wakabatana no cinamato cedu. Ngokudaro, tinodikana kunamata ku musiki wedu basi, Djehovha. (Mateu 4:10; 6:9) Uyezve ngokuti tiri anhu asikazi kukwana tinodikana kunamata mu zina ra Djesu ngokuti wakafira zvitema zvedu. (Juau 14:6) Patinoita munamato kuna Djehovha, iyena aadi kuti tiphinde-phinde masoko amwewo, kana akaita zvekutarwa. Djehovha anoda kuti tinamate ne mwoyo wese.—Erengai Mateu 6:7; WaFiripi 4:6, 7.

Musiki wedu anozwa minamato dzinoizwa kunyangwe mucinyararire. (1 Samueri 1:12, 13) Djehovha anotipika kuti tiite munamato mu nguwa yatinoda, ngo muezaniso, pakuedza kwe zuwa uye no parinodoka, pakurya uye kana tikabatana ne zvinetso.—Erengai Pisarema 55:22; Mateu 15:36.

3. Ngei maKristu eciungana pamwepo?

Kukwedera kuna Mwari azvirinyorepi ngokuti takatendererwa nge anhu asikatendi Mwari uye anoseka zvaakapikira zvokuunzisa runyararo pa Nyika. (2 Timoti 3:1, 4; 2 Pedru 3:3, 13) Ngokudaro, tinoda kuungana no hama dzatinonamata nadzo kuti dzitisimbise, uye idzona dzinodawo kuti isusu tidzisimbisewo.—Erengai WaHebheru 10:24, 25.

Kushamwaridzana no anhu anoda Mwari kunotibetsera kuti tikwedere kuna Mwari. Misangano ye Wapupuri wa Djehovha ndi mukana wakanaka kuti tisimbiswe ngo kutenda ke amweni.—Erengai WaRoma 1:11, 12.

4. Tinodikana kuitei kuti tikwedere kuna Mwari?

Tingakwanisa kukwedera kuna Mwari ngo kurangarira zviya zvatinofundiswa mu soko rake. Nyasa kurangarira zviito, nhungamiriro uye zvipikirwa zva Mwari. Kunyasa kurangarira kukaizwa no munamato kunotibatsira kuti tireremedze rudo ra Mwari uye kuziisisa kwake.—Erengai Djoshuwa 1:8; Pisarema 1:1-3.

Kana tikagonda Mwari togara no kutenda ticakwedera kwaari. Asi rugondo rakaita hingana coto cinodikana kukwinhidzirwa kuti cirumbwe cakabaka. Hino tinodikana kurumbwa tecikwinhidzira kutenda kwedu ngo kunyasa kurangarira zviya zvakaita kuti tigare no kutenda.—Erengai Mateu 4:4; WaHebheru 11:1, 6.

5. Kukwedera kuna Mwari kunokubetsera kudini?

Djehovha anorangarira nge zve aya anomuda. Iyena anokwanisa kuwadziirira pa zvese zvingapinza mu ngozi kutenda kwawo uye kariro yawo ye upenyu usikaperi. (Pisarema 91:1, 2, 7-10) Iyena anotingwadza kuti tingwarire mararamiro anopinza mu ngozi uthongo wedu uye mupfaro wedu. Djehovha anotifundisa mararamiro akanaka kamare.—Erengai Pisarema 73:27, 28; Tiyago 4:4, 8.