Mareferensiya e Urongwa we Musangano Basa Redu uye Kurarama
NYAONGA 1-7
UPFUMI UNOBVA MU SOKO RA MWARI | NUMERO 7-8
“Tinofundei Panocokuita no Musasa we Aisraeri?”
it-1 paji. 525 ndi. 7
Ungano
Ku Israeri, aimiriri akagadzwa kajinji aiseenza mu zina re anhu aaitungamirira. (Esd 10:14) Ngokudaro, “macinda e madzinza” akaita zvibairo mu masure me kugadzirhwa ke tabhernakuro. (Nu 7:1-11) Uyezve, aya akapupurirhwa no “cidhindo ce rugondeso” mu mazuwa a Neemiya ainga ari apristi, arevhi uye “misoro ye Aisraeri.” (Ne 9:38–10:27) Pa nguwa yaihamba-hamba Aisraeri mu renje, kainga kune “macinda e ungano, ainga akasanangurhwa pa ungano, anarume e mbiri,” anarume anokwana 250 e cikwata ici ndiwo akazobatana na Kora, Dhatani, Abhiramu na Oni, pakupandukira Mozesi na Aroni. (Nu 16:1-3) Maererano no zvakabhuiwa na Mwari, Mozesi akasanangura Akuru e Israeri anokwana 70, aitungamirira Aisraeri, kuti amubetsere pa “mutoro” we kutungamirira anhu ngokuti Mozesi ainga asikadi kuzvikwanisa ega. (Nu 11:16, 17, 24, 25) Revhitiko 4:15 inobhuya nge zve “akuru e ungano,” uye zvese zviri kupangidza kuti aya aiimirira e Aisraeri ndiwoo ainga ari akuru-akuru e ungano, misoro yawo, atongi awo uye atungamiriri awo.—Nu 1:4, 16; Djos 23:2; 24:1.
it-2 paji. 876 ndi. 3
Rubheni
Mu musasa we Aisraeri, Arubheni, ainga akatsikidzana no ana a Simiyoni no ana a Gadhi aigara ku matemaidumba e tabhernakuro. Pa nguwa yokuti Aisraeri aicinja mbuto yokugara, cikwata ici cakaumbwa no madzinza matatu aitungamirirhwa na Rubheni, caiteerera zvikwata zve madzinza matatu zva Djudha, Isakari na Zebhuroni. (Nu 2:10-16; 10:14-20) Urongwa uu wakatondoedzwawo pa nguwa yokuti madzinza e Aisraeri akaita zvibairo zvawo pa zuwa re kudimurhwa ke tabhernakuro.—Nu 7:1, 2, 10-47.
w04 8/1 paji. 25 ndi. 1
Mafundo Makuru e Bhuku ra Numero
8:25, 26. Kuti aite basa re Arevhi zvakanaka, uye ecirangarira nge zve mathunga awo, anarume akura aikohomedzeswa kuti asaite mabasa ekubambidzirhwa. Asi, aikwanisawo kudzipira kuti abetsere pa mabasa manganani e Arevhi. Kunyazi hazvo nyamasi uno pasina nhungamiriro inobhuya kuti munhu asiye kuseenza hinga muparidzi nge ndaa yo thunga, zvinobhuiwa no mutemo uu zvinotifundisa ciro cinokosha. Kana muKristu asikacakwanisi kuita mabasa amweni e kunamata nge ndaa yo kucembera, iyena angaita hake zvaanokwanisa.
Upfumi uri mu Soko ra Mwari
it-2 paji. 717
Dangwe, Mwana Wokutanga
Ngokuti matangwe e anarume e Aisraeri aizogara misoro ye nyumba dzakawanda, awona aiimirira dzinza rese re Aisraeri. Djehovha akadainza Aisraeri kuti ainga ari “dangwe” rake, nge ndaa yo citenderano caakaita na Abrahamu. (Eki 4:22) Djehovha akadziirira matangwe e Aisraeri mu Edjipitu, ndiyo ndaa iyena akabhuya kuti “dangwe rese re mwanarume raizobarhwa, kutobatanidzawo matengwe e zvinyama” aidikana kuceneserhwa iyena. (Eki 13:2) Ngokudaro, matangwe ese e anarume ainga ari a Djehovha.
NYAONGA 8-14
UPFUMI UNOBVA MU SOKO RA MWARI | NUMERO 9-10
“Djehovha Anotungamirira Kudini Anhu Ake”
it-1 paji. 39 ndi. 6
Musasa
Kuhamba ke musasa uu wakakura ku mbuto no mbuto (dzinotokwana 40 dzakabhuiwa na Mozesi pana Numero 33) kaipangidza kurongeka kunoshamisa. Gore parairumbwa rakaima pa tabhernakuro musasa we Aisraeri waitogarawo ipona. Gore paraicinja mbuto, awona aitomukawo oriteerera dakara parinoima. “Aigara pa musasa maererano no zvaibhuiwa na Djehovha uye aiita rhwendo maererano no zvaibhuiwa na Djehovha.” (Nu 9:15-23) Painga pano matropito mairi airidzwa, uye paipondwawo martero kuti paziiswe Aisraeri nge zviya zvainga zvabhuiwa na Djehovha nge zve musasa.—Nu 10:2, 5, 6.
w11 4/15 mapaji. 4-5
Munonyasa Kuona Here Zvipangidzo zve Kutungamirira ka Mwari?
Tingapangidza kudini kuti tinoreremedza kutungamirirhwa katinoizwa na Mwari? Mupostori Pauro akati: “Izwai aya ari kumutungamirirai, mudzikande pasi.” (Ahe. 13:17) Pamweni paya azviripi nyore kuita izvi. Hinga muezaniso: Ngatiti muri muIsraeri mu mazuwa a Mozesi. Cimborangarirai kuti mu masure me kuhamba nguwa yakati kuti, gore romboima. Ricatora nguwa yakadini rakaima? Zuwa rimwe here? Sumana imwe here? Mwedzi yakati kuti here? Mungati, ‘Ndosunungura mitoro yangu here?’ Pakutanga mungambobudisa zvamuri kuda kuseenzesa basi. Asi mu masure me mazuwa manganani maremba kuita zvokuvhokonora-vhokonora, ndipo pamunoita zvokusunungura midziyo dzese kamare. Asi pamunonga mapedza kusunungura zvese, munoona gore recimuka, hino munodikanazve kurongedzazve zvese kuti muende! Izvona azviripi nyore. Kunyazi zvakadaro, imwimwi munodikana ‘kuita rhwendo.’—Nu. 9:17-22.
Hino isusu tinotambira kudini nhungamiriro inobva kuna Mwari? Tinobva tazviseenzesa ipona here, kana kuti tinoramba teciita zviro zvatainga tadjaira? Tinodziziya nhungamiriro dzipsva here, dzakadai hingana dze kuitisa fundo dze Bhaibheri, kuparidzira anhu e mureketero umweni, kugara teciita kunamata ke mhuri, kupindirana no Dare Rinobhuirana no Zvipitari, uye kudzibata zvakanaka pa magungano? Tinopangidzawo kuti tinoreremedza nhungamiriro dza Djehovha ngokutambira zvakanaka zano. Patinoda kuita zvisananguro zvakakosha, atidikani kugonda ungwaru wedu asi kupsvaka nhungamiriro dza Djehovha no sangano rake. Uye hinga zvinoita mwana anopsvaka kudziirirhwa no madzibaba ake panouya dutu, tinopsvaka kudziirirhwa no sangano ra Djehovha kana matambudziko e nyika ino auya katiri.
Upfumi uri mu Soko ra Mwari
it-1 paji. 236 ndi. 6
Gungano
Kudikanwa ke Kuungana. Kudikanwa ke kuungana kuitira kuti tinyase kubetsereka pakunamata, kunopangidzwa pa mitambo yaiizwa gore no gore ye Paskwa. Mwanarume wese wainga akacena uye anonga asikaiti rhwendo pa nguwa yo Paskwa asi oramba kuita mutambo uu, iyena waidikana kuuraiwa. (Nu 9:9-14) Mambo Ezekiya paakapika agari e Djudha uye e Israeri kuti aende ku Djerusarema kuti aite mutambo we Paskwa, tsamba yake yo mupiko yaiti padoko payo: Ana e Israeri, hwirirai kuna Djehovha . . . musaomese misoro yenyu hingana zvakaizwa no madzitsekuro enyu. Dzikandei pasi pa Djehovha, muuye ku mbuto yake cena yaakacenesa nokusikaperi, museenzere Djehovha Mwari wenyu, kuti kunyangadzwa kake kukuru kubve pamuri. . . . Djehovha Mwari wenyu ane usisi no ngoni, uye kana mukahwirira kaari aazomusii.” (2Mak 30:6-9) Zve zvirokwazvo kusaenda ku mutambo uu kaipangidza kusada Mwari. Kunyazi hazvo mitambo yakaita hingana Paskwa isikaizwi no aKristu, Pauro akaakohomedzesa kuti asarekere kuungana kunoizwa nguwa dzese no anamati a Mwari, iyena akati: “Ngatirangariranei umwe na umwe wedu, kuitira kuti tibambisane pakupangidza rudo no kuita mabasa akanaka, tisikarekeri kuungana kedu, hingana musambo uno amweni, asi tibambisane, maka-maka meciona zuwa ra Mwari reciguma.”—Ahe 10:24, 25; onai pakazwi UNGANO.
NYAONGA 15-21
UPFUMI UNOBVA MU SOKO RA MWARI | NUMERO 11-12
“Zvakanakirei Kusagara no Musambo we Kugurunguta?”
w01 6/15 paji. 17 ndi. 20
Akawanda e aKristu aaiti uhure. Asi, tinodikanawo kungwarira kuti tisateerere zviro zvinoita kuti tigare no musambo we kugurunguta, uku kusikatenderhwi na Mwari. Pauro anotipasa zano rokuti: “Ngatirekerewo kuedza Djehovha, hinga amweni awo [Aisraeri] akamuedza, akazoparadzwa ne nyoka. Rekeraiwo kugurunguta, hinga amweni awo akagurunguta, ozoparadzwa no muparadzi.” (1 Akorinti 10:9, 10) Aisraeri akagurungutira Mozesi na Aroni—kutobatanidzawo na Mwari wene—ecigurunguta nge ndaa yo mana aaipaswa nge cishamiso. (Numero 16:41; 21:5) Djehovha aazi kuwanyangadzirhwa hinga kunyangadzwa kaakaita nge ndaa yo useki wawo here? Ngano yo Bhaibheri inopangidza kuti akawanda e aya akagurunguta akauraiwa no nyoka. (Numero 21:6) Pa ciitiko cakatangira ici, agurunguti akapanduka anokwana 14 700 akaparadzwa. (Numero 16:49) Hino, ngatisaedza Mwari ngokusareremedza zvaanotipasa.
w06 7/15 paji. 15 ndi. 7
‘Musagurungute’
Marangariro e Aisraeri ainga acinja maningi! Pokutanga akaemba ngoma ecirumbidza Djehovha ecipangidza kuti aitenda zvaakaizirhwa naye paakaabudisa mu Edjipitu uye paakaaponesa pa Bahari re Kupsvuka. (Ekisodho 15:1-21) Paainga aa murenje, musina upenyu wakanyasa kunaka uye ecithya Akenani, kutenda kaainga anako kakatsiiwa no kusagutsikana. Pane kutenda Mwari kuti ainga aasunungura, akamupumha zviro zvakashata zvakadai hinga kunyima. Hino, kugurunguta kawo cainga ciri cipangidzo ce kusatenda zviro zvaakapaswa na Djehovha. Ndiyo ndaa akati: “Ungano ii yakashata icarumbwa yecindigurungutira dakara riini?”—Numero 14:27; 21:5.
it-1 paji. 99 ndi. 10
Kupopotedzana
Kugurunguta. Kugurunguta kunoodza mwoyo uye kunoparadza. Mazuwa mashomanani mu masure me kubuta mu Edjipitu, Aisraeri akagurungutira Djehovha nge ndaa yokugadza kaakaita Mozesi na Aroni kuti aatungamirire. (Eki 16:2, 7) No kuhamba ke nguwa, kugurunguta kawo kakaodza mwoyo Mozesi zvokuti akakumbira kuti afe. (Nu 11:13-15) Kugurunguta kungabara ngozi yakakura kune uya unonga ari kugurunguta. Djehovha akaona kuti kugurungutirhwa kaiizirhwa Mozesi kainga kutori kugurungutira iyena wene. (Nu 14:26-30) Akawanda akafa nge ndaa yo kugurunguta kawo.
Upfumi uri mu Soko ra Mwari
it-2 paji. 278
Mana
Panganidzo. Mana yainga “yakacena hinga mbeu yo koentro” uye yainga yakaita ufu-ufu waiyetukira. Kunaka ke mana kanga “kakaezana no mabhurasha e uci,” kana ‘bhoro rinotapira rakaizwa no mafuta anozwi azeiti.’ Mana yaikwiiwa pa gwiyo kana kuthwiwa, pedzepo yaiizwa hinga zvimabhoro uye yaikocwa.—Eki 16:23, 31; Nu 11:7, 8.
NYAONGA 22-28
UPFUMI UNOBVA MU SOKO RA MWARI | NUMERO 13-14
“Kutenda Kunotibetsera kuti Tigare no Ushingi”
w06 10/1 mapaji. 16-17 mandi. 5-6
Shingiswai no Kutenda uye Nokuthya Mwari
Pasinei no izvi, avhevhi airi aizwi Djoshuwa na Karebhi, aida zve zvirokwazvo kupinda mu Nyika Yakapikirhwa. Awoka akati “ticaakunda zvisikatoshuphi,” akatizve “Aacina caiyadziirira, uye Djehovha anesu. Musathye.” (Numero 14:9) Djoshuwa na Karebhi aireketawo hawo zvisina musoro here? Haiwa! Iwona no Aisraeri ese, ainga akaona Djehovha acipsverudza Edjipitu yainga ino simba no anamwari ayo eciseenzesa Matambudziko Gumi. Pedzepo akaona Djehovha ecindondomesa Pfarao no anyahondo ake mu Bahari re Kupsvuka. (Pisarema 136:15) Zvainga zviri pamhene ku avhevhi gumi no aya akaapurutana kuti ainga asikadikani kuthya. Djehovha akarhwadziwa maningi no zvakaizwa no avhevhi gumi pamwepo no Aisraeri akaapurutana zvokuti akati: “Acaramba asikatendi mandiri pasinei no zvipangidzo zvandakaaitira dakara riini?”—Numero 14:11.
Djehovha wakabhuya painga pano cinetso cakhona—kuthya kaiita anhu aya kaipangidza kuti ainga asina kutenda. Zvirokwazvo nge zvekuti, kutenda no ushingi zvinohamba pamwepo, zvekuti muphostori Juau aikwanisa kutara nge zve ungano yo ciKristu uye hondo yayo eciti: “Uku ndiko kukunda katakakunda nako nyika, kutenda kedu.” (1 Juau 5:4) Mazuwa ano, kutenda kakaita hingana ka Djoshuwa na Karebhi kuri kuita kuti Masoko akanaka e Umambo aparidzirhwe mu nyika yese no Apupuri a Djehovha anodarika mamirionji masere, akuru no adoko, akabamba no asikazi. Apana muzondi akambokwanisa kunyaradza anyahondo aya akabamba uye akashinga.—Aroma 8:31.
Upfumi uri mu Soko ra Mwari
it-1 paji. 740
Nyika Yakapaswa Aisraeri na Mwari
NYIKA yakapaswa Aisraeri na Mwari yainga yakanaka maningi. Mozesi paakatuma avhevhi kuti aende koona kuti Nyika Yakapikirhwa yainga yakagara kudini uye kuti aunzise zvirimwa zvinganani zve nyika ii, avhevhi aya akahwirira no maonde, mapomegraneti no zisumbu re uvha rakakura maningi zvokuti rakaita zvokuthwarhwa no anhu airi pa muti! Kunyazi avhevhi akawanda akahwirira sure nge ndaa yokusatenda kawo, awona akabhuya pamhene kuti: Nyika yakhona “ino uci no mukaka.”—Nu 13:23, 27.
NYAONGA 29–MHINGANI 4
UPFUMI UNOBVA MU SOKO RA MWARI | NUMERO 15-16
“Ngwarirai kuti Musadzikudze uye Kudzigonda”
w11 9/15 paji. 27 ndi. 12
Djehovha Anomuziyai Here?
Pasinei no izvona, dzinza re Israeri parainga riri mugwanza recienda ku Nyika Yakapikirhwa, Kora akaona hinga kuti pane zviro zvainga zvisikazi kugara zvakanaka pa urongwa wa Mwari. Iyena pamwepo no anarume anokwana 250 ainga ano mbiri pakati pe anhu abatana na Kora eciedza kucinja zviro. Kora no amweni ake pamweni aidzinyepera kuti zvaaiita zvaitenderhwa na Djehovha. Awona akabvunza Mozesi kuti: “Imwimwi mazonyanya, ungano yese yakacena uye Djehovha ari pakati payo.” (Nu. 16:1-3) Zve Zvirokwazvo, anarume aya aidzigonda uye aidzikudza maningi! Mozesi akaabvunza kuti: Djehovha acaita kuti zviziikanwe kuti ake ndiapi. (Erengai Numero 16:5.) Pakupera ke zuwa rakazoteera, Kora no ese aimutsigira ainga apera kufa.—Nu. 16:31-35.
w11 9/15 paji. 27 ndi. 11
Djehovha Anomuziyai Here?
Mozesi na Kora akazogara no maonero akasiyana maningi panocokuita no kureremedza urongwa wa Djehovha uye zvaanosanangura. Maitiro awo ndiwo akaita kuti Djehovha aaone ngo mushobo wakasiyana. Kora ainga ari Murevhi we mhuri ya Kohati, uye ainga ane makomborero akawanda, zvecida aibatanidza kuona dzinza rawo reciponeswa pa Bahari Rokupsvuka, kutsigira mutongo wa Djehovha pakapanduka Aisraeri amweni pa Dunhu re Sinai, uye basa re kuthwara areka yo citenderano. (Ek. 32:26-29; Nu. 3:30, 31) Zviri pamhene kuti ainga akagondeka kuna Djehovha ke makore uye ainga aakureremedzwa maningi no Aisraeri akawanda.
Upfumi uri mu Soko ra Mwari
w98 9/1 paji. 20 mandi. 1-2
Garai no Zvirokwazvo kuti Muri Kukanda Zviro zve Kutanga Pakutanga!
Djehovha wakaona kuti shwiro ii yainga yakakura. “Hino,” rinodaro Bhaibheri, “Djehovha akati kuna Mozesi: ‘Mwanarume wakhona unodikana kuuraiwa.’” (Numero 15:35) Ngei Djehovha wakanyangadzwa maningi no zvakaizwa no mwanarume iyena?
Aisraeri ainga ano mazuwa anokwana matanhatu kuti apsvake huni no kuita zvimweniwo zve kurarama nazvo. Awona aidikana kusiya zuwa re cinomwe kuti aite zviro zvinocokuita no kunamata. Kunyazi hazvo zvainga zvisikazi kushata kupsvaka huni, kuita izvona mu sabudu rakagadzirirhwa pakunamata Djehovha zvairambidzwa. Mazuwa ano, Akristu aaripi pasi pe mutemo wa Mozesi, asi zvakaitika izvi zvinotifundisa ciro cinokosha cakaringana no kukanda zviro zvinokosha pokutanga mu upenyu andizvopi?—Afiripi 1:10.
MHINGANI 5-11
UPFUMI UNOBVA MU SOKO RA MWARI | NUMERO 17-19
“Ndini . . . Nhaka Yenyu”
Muri Kuita Djehovha Nhaka Yenyu Here?
w11 9/15 paji. 13 ndi. 9
Edzurirai nge zve Aisraeri asikazi kutambira nhaka ye nyika. Ngokuti aikanda zvekunamata pa mbuto yekutanga, awona aidikana kugonda Djehovha kuti adziriritire. Iyena wakati kaari: “Ndini nhaka yako.” (Nu. 18:20) Kunyazi tisikaseenzi mu tempuru inoonekwa hingana zvaiizwa no apristi no Arevhi, tingateedzera rugondo rawo ngokuthemba kuti Djehovha acatiriritira. Kugonda kuti Djehovha anokwanisa kutiriritira, kaakutonyanya kudikanwa mu mazuwa ano e kupedzesera.—Revhi. 13:17.
w11 9/15 mapaji. 7-8 ndi. 4
Djehovha Ndiye Nhaka Yangu
Basa irona raireya kuti Djehovha aizogara nhaka ye Arevhi. Pane kuti apaswe mbuto yaizogara nhaka yawo, akapaswa basa rainga rakakosha maningi. Nhaka yawo yainga iri “upristi wa Djehovha.” (Djos. 18:7) Ndima inotangira Numero 18:20 uye dziri kuiteera, dzinopangidza kuti izvi zvaizoaitapi kuti agare arombo. (Erengai Numero 18:19, 21, 24.) Arevhi aidikana kupaswa “zvegumi zvese pakati pe Aisraeri kuti zvigare nhaka nge ndaa yo basa rawo.” Awona aizopaswa zvegumi zve zviro zvese zvairimwa no Aisraeri uye zve zvipfuyo zvawo pazvaiwanda. Arevhi aidikana kupasa cegumi ce “zvakanakisisa zvakhona,” kuti atsigire apristi. (Nu. 18:25-29) Apristi aipasawo “mipiro yese yakacena” yaiuya no ana e Israeri pa mbuto yainamatirhwa. Hino, mhuri dze apristi dzaikwanisa kugara no rugondo rekuti Djehovha aizoapasa zvokurarama nazvo.
Upfumi uri mu Soko ra Mwari
g02 6/8 paji. 14 ndi. 2
Munyu—Ciro Cinokosha
Munyu unoseenzeswawo hinga cipangidzo ce ciro cinogara ke nguwa yakareba. Ndiyo ndaa, kana Bhaibheri recida kubhuya nge zve citenderano caizogara ke nguwa yakareba, irona rinocidainza kuti: “Citenderano ce munyu,” apo anhu anga akabatanidzwa pa citenderano ici airhya ese zvokurhya zvine munyu kuti apindirane mu citenderano. (Numero 18:19) Mutemo wa Mozesi waikumbira kuti pakandwe munyu pa zvibairo zvaipaswa pa artari, zvecida kupangidza kuti izvona zvaizogara ke nguwa yakareba zvisikaori.
MHINGANI 12-18
UPFUMI UNOBVA MU SOKO RA MWARI | NUMERO 20-21
“Garai no Upfawi Kunyazi Pamunosongana no Muedzo”
w19.02 mapaji. 12-13 ndi. 19
Psvakai Upfawi kuti Mupfadze Djehovha
Ticanzvenga zvishaishi zvakawanda. Cimborangariraizve nge zva Mozesi. Ke makore akawanda, iyena akarumbwa ane upfawi uye ecipfadza Djehovha. Asi pakupera ke makore 40 mu renje, Mozesi akasiya kugara no upfawi. Yaya ake, aya akamubetsera paainga aciri mucece mu Edjipitu, ainga afa uye akakotswa ku Kadhe. Aisraeri akatangazve kugurunguta kuti aibatana no zvinetso. Vhiaji ino, akapopota kuna Mozesi ngokuti anga asina mvura yo kumwa. Pasinei no zvishamiso zvese zvakaizwa na Djehivha eciseenzesa Mozesi, uye pasinei no zvese zvakaizwa na Mozesi ecipangidza kuti ainga ari mutungamiriri ane upfawi, Aisraeri akandogurunguta basi. Uye awona aazi kugurunguta nge ndaa yo mvura basi, asi nge ndaa ya Mozesi hingana kuti iyena ndiye waiitisa kuti pasaoneke mvura.—Nu. 20:1-5, 9-11.
w19.02 paji. 13 mandi. 20-21
Psvakai Upfawi kuti Mupfadze Djehovha
Mozesi wakanyangadzwa maningi uye wakasiya upfawi wese waiinga anawo. Pane kureketa ku buwe, hinga zvakabhuiwa na Djehovha, Mozesi wakapopotera Aisraeri uye wakaita hingana kuti ndiye waizopasa anhu mvura. Hino, wakaponda buwe kairi kese, uye pakatanga kubuda mvura yakawanda. Kudzikudza no kunyangadzwa ndiko kakaita kuti Mozesi aite cishaishi ici cakakura. (Pis. 106:32, 33) Ngokuti akaruza upfawi wake pa nguwa iyona, Mozesi wakaruza mukana we kupinda mu Nyika Yakapikirhwa.—Nu. 20:12.
Zvakaitika izvi na Mozesi zvinotifundisa zvakawanda. Cokutanga, petai masimba kuti murumbwe mune upfawi nguwa dzese. Kana tikarekera kugara anhu ane upfawi kunyazi ke cinguwa cidoko, tinofungura mukana we kudzikudza uye we kureketa kana kuita zviro zvatisikadikani. Cecipiri, stresi inorembesa upfawi. Ndiyo ndaa, kana mukazwa musoro kupisa, itai zvamunokwanisa kuti murumbwe mune upfawi.
w09 9/1 paji. 19 ndi. 5
Mutongi Anotonga Maererano no Unatsi
Cokutanga, Mwari anga asikazi kubvunza Mozesi kuti abhuye no Aisraeri ne kumutuma kuti aabvunze kuti ainga ari apanduki. Cecipiri, Mozesi na Aroni aazi kupasa mbiri Mwari. Iyena wakati: ‘Amuzi kundicenesa.’ (Vhersikuro 12) Paakati: “Tibudise mvura,” Mozesi akareketa hingana kuti iyena na Aroni ndiwo aizoita cishamiso cokubudisira Aisraeri mvura, haiwa Mwari. Cecitatu, mutongo waakazopaswa, waienderana no mitongo imweni yakaizwa ndi Mwari. Iyena aazi kutendera kuti apanduki apinde mu Kenani, uye izvi ndizvo zvakaitikawo kuna Mozesi na Aroni. (Numero 14:22, 23) Cecirongomuna, Mozesi na Aroni ainga ari atungamiriri e Aisraeri. Munhu paanonga ano ubaba wakakura, Mwari anoimirawo kuti munhu iyena aite zvinoenderana no ubaba wake.—Ruka 12:48.
Upfumi uri mu Soko ra Mwari
w14 6/15 paji. 26 ndi. 12
Munoona Asina Simba Hinga Zvinoizwa na Djehovha Here?
Pa zvese izvi, Djehovha akadai akaphanica Aroni ciripo-ripoco. Asi iyena aizviziya kuti Aroni anga asiripi munhu akashata uye kuti ndaa yese yainga isiripi yake. Aroni akatendera kuita zvakashata nge ndaa yo kubambidzirhwa no anhu. Asi paakaona kuti ainga ashaisha iyena wakatendera kushaisha kaainga aita uye akatendera mutongo wa Djehovha. (Eki. 32:26; Nu. 12:11; 20:23-27) Djehovha akasanangura kukanda ndangariro dzake pa kutenda no kucinyuka ka Aroni. Mazana e makore akazodarika, Aroni no ana ake ainga aciri kuedzurirhwa hinga anhu aithya Mwari.—Pis. 115:10-12; 135:19, 20.
MHINGANI 19-25
UPFUMI UNOBVA MU SOKO RA MWARI | NUMERO 22-24
“Apana Cingapingaidza Makomborero a Djehovha”
bt paji. 53 ndi. 5
Kuziisa “Masoko Akanaka Pamusoro pa Djesu”
Kubvira pa zana rekutanga re makore dakara nyamasi uno, kuteererhwa kunosoizwa anamati a Mwari akukwanisi kuimisa basa re kuparidzira. Kajinji, kufurusa anamati a Mwari—kana kuakanda mukaraboso—kunosotobetsera kuti masoko e Umambo agume ku mbuto idzona. Ngo muezaniso, pa Hondo Yecipiri ye Nyika, Apupuri a Djehovha akaparidzira maningi mu mbuto dzaiunganidzwa asungwa no Anazi. Mudjudha umweni akaziya Apupuri a Djehovha mu mbuto idzi akati: “Kushinga kainga kune Apupuri a Djehovha kakandibetsera kuona kuti awona ainga ano kutenda kakatsamira mu Matarhwa, hino inini ndakabatanawo nawo pa kutenda uku.”
it-2 paji. 247
Kupenga
Kupenga ke Kuphikisana na Djehovha. Muphorofiti Bharami aiita zvokupengeruka ngokuda kuphorofita zvakashata ku Aisraeri, kuitira kuti azopaswe mare no mambo Bharaki we ku moabhi, asi Djehovha akavhiringidza mazano ake. Mupostori Pedru akatara pamusoro pa Bharami kuti “cinyama cekutakurisa zviro, cisikareketi, cakareketa naye no izwi re munhu uye cakaita kuti muphorofiti wakhona asaite zveupenzi zvaaida kuita.” Panocokuita no upenzi wa Bharami, muphostori Pedru akaseenzesa soko re Cigedego rekuti pa·ra·phro·niʹa, rinoreya “kuhunguruka.”—2Pe 2:15, 16; Nu 22:26-31.
Upfumi uri mu Soko ra Mwari
w04 8/1 paji. 27 ndi. 2
Mafundo Makuro e Bhuku ra Numero
22:20-22—Ngei Djehovha wakanyangadzwa maningi na Bharami? Djehovha ainga abvunza Bharami kuti asatuke Aisraeri. (Numero 22:12) Kunyazi zvakadaro, iyena akaenda no anarume a Bharaki no cinangwa ce kutuka Aisraeri. Bharami aida kupfadza mambo we Moabhi kuti azopaswe mare naye. (2 Pedru 2:15, 16; Djudha 11) Paavhiringidzirhwa zano rake uye obambidzirhwa kuti akomborere pane kutuka Aisraeri, iyena akapsvaka kupfarirhwa na mambo ngokubhuya kuti anakadzi ainamata Bhaari aseenzeswe pakucengedza anarume e Israeri. (Numero 31:15, 16) Hino, cakaitisa kuti Djehovha amunyangadzirhwe maningi ndi kukhara kainga anako.
MHINGANI 26–MAUWE 2
UPFUMI UNOBVA MU SOKO RA MWARI | NUMERO 25-26
“Munhu Umwe Ungaita Zvakasiyana Here?”
lvs paji. 118 mandi. 1-2
“Tizai Useki!”
Muedzi we howe unoedza paanoziya kuti pano mukhaindi we howe dzaanoda. Iyena anonyasa kusanangura zvaacakanda pa ciyedzo uye anocikhandira mu mvura. Iyena anoimira asikagogomeki kuti howe irume ciyedzo. Kana akaona kuti howe yaruma, iyena anobvisa kunza ciyedzo uye anobata howe.
Nguwa dzimweni, izvi zvinosoitikawo no anhu. Onai muezaniso we Aisraeri. Painga aakuda kupinda mu Nyika Yakapikirhwa, awona akambogara padhuze no Moabhi. Mambo we Moabhi akabvunza muphorofiti aizwi Bharami kuti aizomupasa mare yakawanda kudai akatuka Aisraeri. Ngokuti mazano a Bharami akavhiringidzwa, iyena akaona mushobo waizoita kuti Aisraeri ashaishe oga pacawo. Iyena wakaseenzesa anakadzi e Moabhi hinga ciro cinokandhwa pa ciyedzo. Awona aidikana kupinda mu musasa we Aisraeri kuti acengedzere anarume.—Numero 22:1-7; 31:15, 16; Zvakapangidzwa 2:14.
lvs paji. 119 ndi. 4
“Tizai Useki!”
Ngei Aisraeri ese aya akashaisha? Ngokuti aindorangarira zvakaanakira basi uye akakanganwa zvese zvaakaizirhwa na Djehovha. Aisraeri ainga ane zvakawanda kuti agare akagondeka kuna Mwari. Djehovha akaapukunyusa mu uranda ku Edjipitu, awona aazi kufa nge nzara mu renje, uye zvino ainga aapadhuze kuda kupinda mu Nyika Yaakapikirhwa. (Ahebheru 3:12) Kunyazi zvakadaro, awona akawira pa musungo we useki. Mupostori Pauro akati: “Ngatisaitewo useki, hinga amweni awo akaita useki ozopedzesera no kufa.”—1 Akorinti 10:8.
Upfumi uri mu Soko ra Mwari
it-1 paji. 695 ndi. 1
Mugano
Hino, zvese zviri kupangidza kuti kugawana ke nyika yokugara ku madzinza e Israeri kakaizwa maererano no zviro zviiri: zviya zvaipangidzwa eciseenzesa mudjenya uye kukura ke dzinza rakhona. Mudjenya waindosenza basi pakupangidza mbuto dzaizogurirhwa madzinza. Zvaipangidzwa no mudjenya zvaibva kuna Djehovha, uye izvi zvaiita kuti pasaoneke shanje no kuzondana pakati pe madzinza. (Zvie 16:33) Ngokudaro, Mwari aitungamirira kugawana ke nyika maererano no magarire e dzinza rimwe na rimwe uye maererano no zvaakafemera Djakobo kuti aphorofite nge zve kugawana ke nyika pana Genesi 49:1-33.
Mu masure me kuseenzesa mudjenya kuti aone kaizogurirhwa madzinza, paidikana kuziya kuti aizogurirhwa nyika yakakura kudini. Hino, kuti adaro awona aiona kuti dzinza rakhona rainga rakakurawo kudini. “Munodikana kukoanisa nyika yakhona ku mhuri dzenyu meciseenzesa mudjenya. Anonga akawanda, munodikana kuapasa yakakura, uye anonga ari padoko munodikana kuagurira inoenderana nawo. Munhu wese acaona nhaka yake panonga pawira mudjenya wake.” (Nu 33:54) Zvaipangidzwa no mudjenya panocokuita no mbuto yaizogurirhwa madzinza, zvainga zvisikazocinjwi, asi zvaiita kucinja zvinocokuita no kukura ke nyika yaipaswa madzinza. Ngokudaro, pakaoneka kuti nyika yakapaswa Djudha yainga yakakura maningi, ndiyo ndaa, yakathurudzwa yopaswawo padoko payo ku dzinza ra Simiyoni.—Djos 19:9.