Mareferensiya e Urongwa we Musangano Basa Redu uye Kurarama
MAUWE 3-9
UPFUMI UNOBVA MU SOKO RA MWARI | NUMERO 27-29
“Teedzerai Djehovha uye Garai Anhu Asikasananguri”
w13 6/15 paji. 10 ndi. 14
Nyasai Kukoshesa Mawara a Djehovha
Ana akhona e anakadzi ashanu akaenda kuna Mozesi uye akamubvunzisa kuti: “Ngei zina ra baba edu rakabviswa pakati pe mhuri yawo, ngekuti ainga asina mwana we mwanarume here?” Akadeketera eciti: “Haiwa, tipei nhaka pakati pe hama dza baba edu.” Mozesi akabhuya here kuti, ‘Akuna mutemo wakadaro’? Haiwa. Asi iyena “akaenda no shwiro yakhona pamberi pa Djehovha.” (Nu. 27:2-5) Djehovha akabhuyei? Iyena akati kuna Mozesi: “Ana e anakadzi a Zerofehadhi ari kureketa zvino unatsi. Unodikana kuapasa nhaka pakati pe hama dza baba awo, uye unodikana kuita kuti agare nhaka ya baba awo.” Djehovha aazi kugumira ipona basi. Iyena akaita kuti ugare mutemo, akabvunza Mozesi kuti: “Kana mwanarume cero upi hake akafa asina mwana we mwanarume, munodikana kuita kuti nhaka yake igarhwe no mwana wake we mwanakadzi.” (Nu. 27:6-8; Djos. 17:1-6) Kubvira ipona, Anakadzi e Israeri aisongana no dambudziko iri ainga aakudziirirhwa.
w13 6/15 paji. 11 ndi. 15
Nyasai Kukoshesa Mawara a Djehovha
Zve zvirokwazvo cisananguro ici caipangidza usisi uye kusasanangura! Djehovha akabata zvakanaka anakadzi aya ainga asina anoadziirira, hingana zvaakaita no Aisraeri ainga ari mu magariro akanaka. (Pis. 68:5) Ii nge imwe ye shwiro dzakawanda dze Bhaibheri dzinopangidza cokwadi cinopfadza cekuti: Djehovha aasananguri aseenzi ake.—1Sa. 16:1-13; Zvi. 10:30-35, 44-48.
w13 6/15 paji. 11 ndi. 16
Nyasai Kukoshesa Mawara a Djehovha
Tingateedzera kudini Djehovha pakusasanangura? Edzurirai kuti, kusanangura kunobatanidza zviro zviiri. Kana tiri anhu asikasananguri ticabata anhu amweni tisikasananguri. Zve zvirokwazvo, tese hedu tingakwanisa kudziona hinga anhu asikasananguri. Mungatotendera kuti, azviripi nyore kudziongorara mazwiro edu nguwa dzese tisikadzinyeperi. Hino, cinyi catingaita kana anhu amweni ecitiona hinga anhu asikasananguri? Djesu paaida kuziya kuti anhu aibhuyei nge zvake, akabvunzisa shamwari dzake dzaaigonda kuti: “Anhu ari kuti mwanakomana we munhu ndiani?” (Mt. 16:13, 14) Tingakwanisa kuteedzera Djesu pa shwiro ii. Mungabvunzisa shamwari yamunogonda kuti amubvunze kuti munoziikanwa hinga munhu wakadini. Munodikana kuitei kana mukazwi munombosanangura anhu ngo ndaa ye ganda kana kaanobva, ubaba waanawo, kana kuti mare yaanayo? Namatai kuna Djehovha no mwoyo wese nge zve mazwiro amunoita, mecikumbira kuti amubetsere kugadzirisa ndangariro dzenyu kuti dzinyase kupangidza kusasanangura.—Mt. 7:7; Ako. 3:10, 11.
Upfumi uri mu Soko ra Mwari
it-2 paji. 509 ndi. 1
Mipiro
Mipiro ye Zvinomwiwa. Mipiro ye zvimwiwa zvaipaswa pamwepo no mipiro dzimweni, nyanye-nyanye mu masure mekuti Aisraeri ainga aa munyika yakapikirhwa. (Nu 15:2, 5, 8-10) Mipiro ii yaibatanidza vhinyu (“zvekumwa zvinoraradzisa”) uye zvaidururirhwa pa artari. (Nu 28:7, 14; ezanisai na Eki 30:9; Nu 15:10.) Mupostori Pauro akatarira aKristu ku Afiripi kuti: “Kunyazi kana ndecidururirhwa hingana mupiro we zvinomwiwa pa cibairo ne basa rakacena rakamutungamidzai no kutenda kenyu, ndinopfara.” Apa iyena waseenzesa muezaniso we mupiro we zvinomwiwa, ecipangidza cido cake cekudziseenzesa eciitira adoni ake eciKristu. (Afi 2:17) Nguwa doko asati afa, iyena akatarira Timoti kuti: “Ndaakudururhwa hinga mupiro we zvinomwiwa, uye nguwa yakasisira ye kusudzunurhwa kangu yaapadhuze.”—2Ti 4:6.
MAUWE 10-16
UPFUMI UNOBVA MU SOKO RA MWARI | NUMERO 30-31
“Ripai Mhiko Dzenyu”
it-2 paji. 1215
Mhiko
Inoizwa nge Kuzvipira, Asi Payaiizwa Yainga yaa Yokubambidzirhwa. Mhiko yaaizwa nge kuzvidira. Ngo kudaro, munhu paiita mhiko, peciseenzeswa mutemo waibambidzirhwa kudzadzisa mhiko yaanonga aita. Zvakadaro, zvaibhuyiwa nge zve mhiko hinga ‘musoho we mwiya’, zvicireya kuti upenyu wake kamare wainga uri cigondeso cekuti acazodzadzisa zvaakapika. (Nu 30:2; onai Aro 1:31, 32.) Upenyu zvaunonga uri pangozi, zvinozwisisika ngei Bhaibheri recitikurudzira kuti tingwarire tisati taita mhiko, tecinyasa kuona zviya zvatinokarirhwa kuti tiite. Mutemo waiti: “Kana mukaitira Djehovha mhiko . . . Mwari, acazomurongosa, uye kana mukatama kuripa mhiko yenyu icazogara citema kamuri. Asi kana mukatama kuita mhiko, amuzogari no citema.”—Dhe 23:21, 22.
it-2 paji. 1215
Mhiko
Mhiko dzinoizwa kuna Mwari dzekuda kuita ciro, kupa cipo kana cibairo, kupinda mu basa rimweni kana mamiriro, kana kusiya kuita zviro zvimweni zvisiripi pa mutemo. Mhiko kainga kuri kupika kaiizwa ngo kuzvipira ke munhu pacake. Nge kugara cigondeso cakakura, mhiko yainga ino simba ye cipikiro, uye kajinji masoko aya mairi anoteedzana mu Bhaibheri. (Nu 30:2; Mt 5:33) “Mhiko” inoziisa cinangwa, nepoo “kupika” kunopangidza kukwidzisa zvinonga zvaizwa ku akuru akuru e anyautongi kuti aongorore cokwadi kana kuti cimiro ce zvakaziiswa zvakhona. Kajinji, kupika kaiperekedza pakuita citenderano.—Ge 26:28; 31:44, 53.
w04 8/1 paji. 27 ndi. 3
Mafundo Makuru Anobva mu Bhuku ra Numero
30:6-8—Mwanarume we ciKristu angakwanisa kucinja mhiko ye mukadzi wake here? Nge zve mhiko, Djehovha zvino anoonerera anamati ake umwe na umwe. Ngo muezaniso, kudzipira kuna Djehovha i mhiko ye munhu ega. (Agaratiya 6:5) Mwamuna aana citendero ce kucinja mhiko ii. Mukadzi aadikani kuita mhiko dzisikapindirani no soko ra Mwari kana kuti mabasa ake ecikristu aanoitira mwamuna wake.
Upfumi uri mu Soko ra Mwari
it-2 paji. 26 ndi. 1
Djefta
Zvaiita kupira munhu kuti aitire basa Djehovha mu mbuto yakacena. Cainga iri citenderhwa caigara no aberiki. Samueri ndi umwe we anhu aya, akagondeswa kuti abatire basa mu tabhernakuro pa mhiko yakaizwa ndi Ana mai ake iyena asati abarhwa. Mwamuna wake Erikana, wakatendera mhiko yaakaita. Samueri paakarumurhwa, Ana akamupira kuti aseenzere mu mbuto yakacena. Ana wakapasa cibairo ce cinyama pamwepo naye. (1Sa 1:11, 22-28; 2:11) Samusoni ndi umwe we mwana umweni akapaswa kuti aseenzere Djehovha hinga Munaziri. —Ato 13:2-5, 11-14; ezanisirai izvi no ubaba una baba ku mwana wawo we mwanakadzi, hingana zvinopanganidzwa pana Nu 30:3-5, 16.
MAUWE 17-23
UPFUMI UNOBVA MU SOKO RA MWARI | NUMERO 32-33
“Dzingirai Agari Ese e Nyikeyo”
w10 8/1 paji. 23
Maizviziya Here?
Cinyi cinozwi “mbuto dzakakhwirira” dzinogara dzecirekethwa mu Matarhwa e Cihebheru?
Aisraeri paainga aakuda kupinda mu Nyika Yakapikirhwa, Djehovha akaabvunza kuti aparadze mbuto dzese dzainamatirhwa no Akenani aigaremo. Mwari akaabvunza kuti “Munodikana kuparadza . . . mifanikiso yawo yese yakagadzirhwa no simbi yakanyunguruswa, uye munodikana kutsakatisa mbuto dzawo dzakakhwirira.” (Numero 33:52) Mbuto idzi dzaizirhwa kunamata ke manyepo dzaigara padenga pe zvimatunhu kana kuti zvikuwa zvainga zvakawakwa mu mbuto dzimweni, zvakadai hinga pasi pe muti kana kuti muthaundi. (1 Madzimambo 14:23; 2 Madzimambo 17:29; Ezekieri 6:3) Zvingaita hinga kuti mbuto idzi dzainga dzino artari, shongwe yakacena, mifanikiso, zvigadziko zve rusenzi no zvimweniwo zvaiseenzeswa pakunamata.
w08 2/15 paji. 27 mandi. 5-6
Fundai no Zvishaishi zve Aisraeri
Nyamasi uno, tinosongana no miedzo dzakaezana no dzakasongana no Aisraeri. Mazuwa ano anhu aakunamata anhu amweni uye zviro zvakawanda ecizviita hinga mwari wawo. Zvinobatanidza mare, zviaraidzo, shasha dze mitambo, zve matomgerhwe e nyika, atungamiriri e magereja, kunyazi anhu e mu mhuri. Tikanyanya kukanda zviro izvi pa mbuto yekutanga mu upenyu wedu. Kuita tsika ndi tsikewo no anhu asikadi Djehovha kungakwanisa kuita kuti tipedzesere tisikacanamati.
Kuita zve pabonde ke asikazi kuwakana cainga ciri ciro caiizwa pakunamata Bhaari uye izvi zvakacengedzera Aisraeri akawanda. Zvimwezvoo, anhu a Mwari aciri kubatanawo no miedzo yakadaro. Ngo muezaniso, munhu angafungura komputadhori ari ega mumba make zvingaita kuti iyena asikadi kudarikwa no ciro kana kuti asikazi kungwaririra anokwanisa kukanganisa hana yake yakanaka. Zvingatsukwarisa kana muKristu akapindhwa no muedzo we kuona zvipsverudzi kana kuti pornografia pa interneti!
it-1 paji. 418 ndi. 3
Kenani
Djoshua no ungwaru “aazi kubvisa kunyazi soko rimwe haro pa zvese zvakabhuyiwa na Djehovha kuna Mozesi” zvinocokuita no kuparadzwa ke Akenani. (Djos 11:15) Asi dzinza re Aisraeri rakasiya kupurutana mutungamiriri wawo wakanaka uye kuparadza zvese zvaizoakanganisa mu nyika ii. Kurumbwa ecigara no Akenani kakanganisa Aisraeri, zvekuti no kuhamba ke nguwa, izvi zvakaita kuti akawanda awo afe (tisikabatanidzi ndaa dzakaizwa, useki, uye kunamata mifanikiso) kudai Aisraeri akaparadza Akenani ese hinga zvainga zvakaziiswa, dai akarumbwa akathembeka. (Nu 33:55, 56; Ato 2:1-3, 11-23; Pis 106:34-43) Djehovha ainga akaziisa Aisraeri kuti unatsi wake no kutonga kake kainga kusikazosananguri, uye kuti dai Aisraeri akatanga kushamwaridzana no Akenani, owakana nawo, ecibatanidza kunamata ke cokwadi no ke mamwepo, uye ecitenda tsika dze magereja no zviito zvawo zvakashata zvaizoreya kudziunzira kuparadzwa pacawo uye zvaizoguma ‘pakurutsirhwawo mu nyika.’—Eki 23:32, 33; 34:12-17; Re 18:26-30; Dhe 7:2-5, 25, 26.
Upfumi uri mu Soko ra Mwari
it-2 paji. 1109 ndi. 1
Mugano
Pasure pekukowanisa nyika ku madzinza ese peciseenzeswa mudjenya, paidikana kupanganidza makurire anonga akaita ndima ye dzinza rimwe nga rimwe maererano no makurire ainonga yakaita. “Munodikana kukowanisa kuti igare nhaka yenyu, meciseenzesa mudjenya, maererano no mhuri. Anonga akawanda munodikana kunhudzira nhaka yawo uye anonga ari padoko munodikaka kupungura nhaka yawo. Pacawira mudjenya, ndipo pacagara nhaka yawo.” (Nu 33:54) Kusanangura paciseenzeswa mudjenya maererano no mbuto kaipera, asi zvaikwanisika kuita gadziriro maererano no kukura ke nhaka. Ngo kudaro, pakazooneka kuti ndima ya Djudha yainga yakakura, mbuto ye nhaka yake yakapungurhwa ikapaswa dii rimweni dzinza ra Simiyoni.—Djos 19:9.
MAUWE 24-30
UPFUMI UNOBVA MU SOKO RA MWARI | NUMERO 34-36
“Tizirai kuna Djehovha”
w17.11 paji. 9 ndi. 4
Muri Kutizira Kuna Djehovha Here?
Aisraeri aiona kudini shwiro ye kuuraya munhu nge tsawana? Kunyazi hazvo zvainga zvaitika no tsawana, muurai wakhona waigara no ndaa ye ngazi isina ndaa. (Ge. 9:5) Asi waitenderhwa kutizira ku rimwe re maguta matanhatu e kutizira kuti asaurayiwe no mutsii we ngazi. Muurayi wakhona waidikana kugara mu guta re kutizira dakara mupristi mukuru afa.—Nu. 35:15, 28.
w17.11 paji. 9 ndi. 6
Muri Kutizira Kuna Djehovha Here?
Pasure pekuti auraya munhu no tsawana, anonga ari kutiza uya aidikana kutanga “areketa shwiro yake ku akuru” pa musuwo we guta raanonga atizira. Aidikana kumutambira zvakanaka. (Djos. 20:4) Paapadarika cinguwa, iyena waizoendeswa ku akuru e nharaunda yaakaurayira munhu uye akuru aya ndiwo aizotonga shwiro yakhona. (Erengai Numero 35:24, 25.) Mutizi wakhona waizohwirira ku guta re kutizira pasure pekuti zvaonekwa kuti munhu wakhona wakaurayiwa no tsawana.
w17.11 paji. 11 ndi. 13
Muri Kutizira Kuna Djehovha Here?
Munhu waigara akacengeteka kana akapinda mu guta re kutizira. Ecireketa nge zve maguta aya, Djehovha akati: “Agare mbuto yamungatizira.” (Djos. 20:2, 3) Djehovha ainga asikadi kuti muurayi wakhona atongerhwezve shwiro yake, kana kuti mutsii we ngazi atenderhwe kuti apinde mu guta rakhona ouraya munhu uya watiza. Hino mutizi wainga asikadikani kuthya kuti waizouraiwawo. Paanonga atopinda mu guta waitogara akacengeteka pasi pe urongwa wa Djehovha unodziirira. Guta iri rainga risiripi karaboso ye kutizira. Mutizi wakhona waitogara no mukana we kuseenza mu guta makhona, kubetsera amweni uye kuseenzera Djehovha no runyararo. Waitokwanisawo kurarama upenyu unopfadza uye unogutsa!
Upfumi uri mu Soko ra Mwari
w91 2/15 paji. 13 ndi. 13
Rusudzunuro Rinoenderana no Anhu Ese
Adhamu na Evha, aazobetsereki no rusudzunuro. Mutemo wa Mozesi une cokwadi cinoti: “Amudikani kutambira rusudzunuro re muurayi unosisira kufa.” (Numero 35:31) Adhamu aazi kucengedzerhwa, ngo kudaro citema cake cainga ciri cekutoziya kamare. (1 Timoti 2:14) Zvaienderana no kuurayiwa ke ana ake, ngekuti aizogara nhaka ye citema cake zvikazoguma no rufu. Zviri pamhene kuti, aitosisira kufa, ngekuti iyena hinga mwanarume wainga akakwana wakasanangura ega kusazwira mutemo wa Mwari. Kungadai kwakapesana no cokwadi ce unatsi wa Djehovha kuti aseenzese rusudzunuro kuna Adhamu. Kuripa mubairo we citema cakaizwa na Adhamu, kaizopfudza mubairo we rufu ku ana a Adhamu! (Aroma 5:16) Hinga zviri pamutemo, simba rinoparadza citema rinogurhwa. Musudzunuri ‘anoraira rufu ku anarume ese,’ ecitambudzikira ana ese a Adhamu nge ndaa ye citema.—Ahebheru 2:9; 2 Akorinti 5:21; 1 Pedru 2:24.
MAUWE 31–MHENZA 6
UPFUMI UNOBVA MU SOKO RA MWARI | DHEUTERONOMIYO 1-2
“Kutonga nge ka Djehovha”
w96 3/15 paji. 23 ndi. 1
Djehovha—Anoda Unaki no Unatsi
Akuru akagadzwa mu ungano anodikana kutonga shwiro ye zvishaishi zvakakura. (1 Akorinti 5:12, 13) Paanoiita izvi, awona anoedzurira kuti unatsi wa Mwari unopsvaka kupa ngoni kana zvecibvira. Kana pasinazvikonzero—hingana ku ashaishi asikacinyuki—apadikani kupangidzwa ngoni. Asi akuru aandodzingi mushaishi mu ungano go kuda kutsiya. Anokarira kuti ciito cokudzinga ciite kuti arangarire zvakanaka. (Ezanisai na Ezekieri 18:23.) Pasi pe utungamiriri wa Kristu, akuru, anoseenza no unatsi, uye izvi zvinobatanidza kugara hinga “mbuto yekutizira dutu.” (Isaya 32:1, 2) Ndiyo ndaa asikadikani kusanangura asi kugara anhu ari nyore kucedza nawo.—Dheuteronomiyo 1:16, 17.
w02 8/1 paji. 9 ndi. 4
Reremedzai Utongi wa Mwari Makagondeka
Kugara mutongi kaidikana kuziya zvakawanda pane kundoziya basi Mutemo. Ngekuti ainga ari anhu asikazi kukwana, anarume akuru aidikana kungwaririra kuti dangariro dzawo dzisaaitise kuti agare no cido cekuita zvakashata—hinga kusarangarira amweni, kusanangura, uye kukhara—izvi zvaizokanganisa kutonga kawo. Mozesi akaabvunza kuti: “Amudikani kusanangura pakutonga. Munodikana kupurutana adoko no akuru zvakaezana. Amudikani kuthya munhu, ngekuti kutonga nge ka Mwari.” Honde, atongi e Israeri aitongera Mwari. Ainga ari makomborero akanaka!—Dheuteronomiyo 1:16, 17.
Upfumi uri mu Soko ra Mwari
w13 9/15 9 ¶9
Zviedzuriro zva Djehovha Zvakagondeka
Aisraeri paakatanga rhwendo rawo ke makore anokwana 40 “murenje rinothyisa,” Djehovha aazi kuabvunza zvese nge zvekuti aizoatungamirira kudini, uye kuti aizoadziirira kudini no kuacengeta. Asi akarumbwa eciapangidzira kuti awona aikwanisa kugonda naye no nhungamiriro dzake. Eciseenzesa shongwe ye gore masikati uye muriro ceusiku, Djehovha akaedzurira Aisraeri kuti aiatsigira pa nguwa yese yaaiatungamirira mu mbuto ii yainga isiripi nyore kuhamba. (Dhe. 1:19; Eki. 40:36-38) Aiapasawo zviro zvekurarama nazvo. “Macira awo aazi kumbotsakara, murenje dzawo adzizi kuzvimba.” Zve zvirokwazvo, “apana caiitama.”—Ne. 9:19-21.
MHENZA 7-13
UPFUMI UNOBVA MU SOKO RA MWARI | DHEUTERONOMIYO 3-4
“Mitemo ya Djehovha ino Ungwaru no Unatsi”
it-1 paji. 815 ndi. 5
Kuzwisisa
Kunyasa kufunda uye kuseenzesa soko no nhungamiriro dza Mwari zvingakwanisa kuita kuti munhu agare no ucenjeri kudarika aya anofundisa, uye anogara no uzii kudarika anarume akura pa thunga. (Pis 119:99, 100, 130; ezanisirai Ru 2:46, 47.) Izvi zvinoitika ngekuti uzii uye kuzwisisa zvinowakirhwa pa nhungamiriro dzakacena dza Mwari no mitemo yake ye kutonga; ndiyo ndaa kuacengeta kawo akathembeka kaiizwa no Aisraeri kakaita kuti madzinza amweni ainga akaatenderedza aone hinga kuti awona ainga ari “anhu akacenjera uye anozwisisa.” (Dhe 4:5-8; Pis 111:7, 8, 10; ezanisirai na 1Mad 2:3.) Munhu anozwisisa anoziya kuti soko ra Mwari ariputswi, anoda kuningirana no mamiriro aro uye anokumbira rubetso kuna Mwari pane izvi. (Pis 119:169) Iyena anotendera kuti soko ra Mwari rinyararire maari (Mt 13:19-23), anotarira mu tabwa re mwoyo wake (Zvie 3:3-6; 7:1-4), uye anozonda “makwanza ekunyepa” (Pis 119:104). Mwana wa Mwari paainga ari panyika, akapangidza kuzwisisa kakadai, akadzipira kufira pa danda kuti adzadzise uprofiti.—Mt 26:51-54.
w99 11/1 paji. 20 mandi. 6-7
Rupo Parinowanda
Ecishamiswa nozvaanozwa uye zvaanoona, mambo we mwanakadzi ecizvidodosa akati: “Anopfara aseenzi enyu anogara nguwa dzese akaima padhuze nemwi, ecizwa ucenjeri wenyu!” (1 Madzimambo 10:4-8) Iyena aazi kubhuya kuti aseenzi a Soromoni anopfara ngekuti ainga akatenderedzwa no pfuma—kunyazi ainga akadaro. Asi aseenzi a Soromoni ainga akakomborerhwa nge kuzwa ucenjeri wa Soromoni waakapaswa na Mwari. Mambo we mwanakadzia we Shebha ndi muezaniso wakanaka ku anhu a Djehovha nyamasi uno, anopfadzwa no ucenjeri we Musiki pacake no Mwana wake, Djesu Kristu!
Cimweni cinodikanwa maningi pane zvakarekethwa na mambo we mwanakadzi kuna Soromoni ngecekuti: “Djehovha Mwari wenyu ngaakudzwe.” (1 Madzimambo 10:9) Zviri pamenhe kuti akaona muoko wa Djehovha mu ucenjeri wa Soromoni uye kubudirira kake. Izvi zvinoenderana no zviya zvainga zvakagondeswa na Djehovha ku Aisraeri, akati ‘Kucengeta mirairo yangu,’ “ndiko kucenjera kenyu uye kuzwisisa kenyu pamberi pe anhu acazwa zvese izvi, eciti, ‘Zvirokwazvo, dzinza iri iguru ndi anhu akacenjera uye anozwisisa.’”—Dheuteronomiyo 4:5-7.
w07 8/1 paji. 29 ndi. 13
“Makapfuma Pamberi Pana Mwari Here”?
Djehovha paanokomborera anhu ake, anoapasa zvakanakisisa nguwa dzese. (Tiyago 1:17) Ngo muezaniso, Djehovha paakapasa Aisraeri nyika yekuti agare, yainga iri “nyika inoerera mukaka no uci.” Kunyazi hazvo nyika ye Edjipitu yakambopanganidzwawo zvakaezana, yakapaswa Aisraeri na Djehovha yainga yakasiyana no Edjipitu pa ciro cimwe. Mozesi akabvunza Aisraeri kuti i “nyika iri kuonererhwa na Djehovha Mwari wako.” No masoko amweni, awona aizobudirira ngekuti Djehovha aiaonerera. Aisraeri aidikana basi kurumbwa akagondeka kuna Djehovha, aizokomborerhwa maningi uye aizopfadzwa no mararamiro ainga akakwirira kudarika e anhu amweni ese ainga akaatenderedza. Zvirokwazvo, makomborero a Djehovha ndiwo basi “anopfumisa”!—Numero 16:13; Dheuteronomiyo 4:5-8; 11:8-15.
Upfumi uri mu Soko ra Mwari
w04 9/15 paji. 25 ndi. 3
Mafundo Makuru Anobva mu Bhuku ra Dheuteronomiyo
4:15-20, 23, 24—Kurambidzwa kugadzira mifanikiso yakatsetswa kunoreya here kuti zvakashata kugadzira zviro zvimweni zve kurungamisa? Haiwa. Kainga kurambidzwa kuita mifanikiso inonamathwa—‘kugwadamira zvifanikiso uye kuzvinamata.’ Bhaibheri arirambidzi kuseenzesa zviro zvakatsetswa no matabwa kana zvakatsurutsuthwa kuti tirungamise mumba medu.—1 Madzimambo 7:18, 25.
MHENZA 14-20
UPFUMI UNOBVA MU SOKO RA MWARI | DHEUTERONOMIYO 5-6
“Fundisai Mwana Wenyu Kuda Djehovha”
w05 6/15 paji. 20 ndi. 11
Abereki, Pasai Zvinodiwa no Mhuri Yenyu
Pa shwiro ii, apana tsamba imweni inonyanya kubhuya nge izvi kudarika Dheuteronomiyo 6:5-7. Tapota fungurai Bhaibheri muerenge mavhersikuro aya. Onai kuti abereki anobvunzwa kuti atange kusakurira ukama wawo na Djehovha, atunhudzire kumuda uye kuita kuti masoko ake agare mu mwoyo mawo. Zve zvirokwazvo, munodikana kugara mufundi we Soko ra Mwari anoshingirira, mecierenga Bhaibheri nguwa dzese mecinyasa kurangarira zvamunonga maerenga kuitira kuti munyase kuzwisisa uye kuti mude makwanza a Djehovha, zvaanoreketa, uye mitemo yake. Kana mukadaro, mwoyo wenyu ucadzara no cokwadi ce Bhaibheri cicaita kuti mupfare, mureremedze uye mude Djehovha. Mucagara no zviro zvakawanda zvekanaka zvekuti mupe ana enyu.—Ruka 6:45.
w07 5/15 mapaji. 15-16
Ndingabetsera Kudini Ana Angu Kuti Agare Anhu Akanyasa Kufunda?
Zvamunokarira kuzoita, zvamunoda, zvamunokoshesa, uye zvamunopfarira azvioneki basi no zvamunoreketa asi pane zvamunoita. (Aroma 2:21, 22) Kubvira paudoko, ana anokwanisa kufunda no kuona zvinoizwa no abereki awo. Ana anoona zvinodikanwa no abereki, ndizvo zvaacaitawo. Kana mecinyasa kuda Djehovha, ana enyu acazviona. Ngo muezaniso, acaona kuti munoda kuerenga Bhaibheri uye kurifunda. Acaziya kuti munokanda Umambo wa Mwari pa mbuto ye kutanga mu upenyu wenyu. (Mateu 6:33) Kupinda misangano yeciKristu nguwa dzese uye kuitawo basa re kuparidzira-Umambo zvecipangidzira kuti munoda kuitira Djehovha basa.—Mateu 28:19, 20; Ahebheru 10:24, 25.
w05 6/15 paji. 21 ndi. 14
Abereki, Pasai Zvinodiwa no Mhuri Yenyu
Hingana zvinopangidzwa pana Dheuteronomiyo 6:7, abereki mungacedza no ana enyu nguwa yakawanda nge zve zviro zvinocokuita no kunamata. Pamunonga mecihamba mwese, meciita mabasa e panyumba muri pamwepo, kana pamunonga mecizorora mwese, psvakai mukana we kupasa ana enyu zvaanoda pane zve kunamata. Zve zvirokwazvo, amudikani henyu kurumbwa “mecindobhuira” ana enyu cokwadi ce Bhaibheri. Asi edzai kuita kuti kucedzesana hinga mhuri kurumbwe kecibambisa mune zvokunamata. Ngo muezaniso, revhista inozwi Mukai! inoshwiro dzakawanda pa mafundo akawanda akasiyana-siyana. Shwiro dzakadaro dzingafungura mukana we kucedza nge zve zvinyama zvakasikwa na Djehovha, mbuto dzakanaka mu pasi rese, uye kusiyana-siyana kakaita tsika dze anhu no mararamiro awo. Kucedzesana kakadai kungaita kuti ana adoko ade kuerenga mabhuku akawanda anokowaniswa no museenzi akagondeka uye akangwara.—Mateu 24:45-47.
Upfumi uri mu Soko ra Mwari
w19.02 paji. 22 ndi. 11
Rudo uye Kubata Amweni Zvakanaka Panguwa ye Aisraeri
Mafundo: Djehovha aagumiri nge kuona munhu nge cekunze. Iyena anoona zvatiri nge cemukati, mu mowoyo medu kamare. (1Sa. 16:7) Apana catingarangarira kana kuita, catingamufisira. Anopsvaka zviro zvakanaka pa zviro zvatinoita, otikurudzira kurumbwa tecizviita. Asi anoda kuti tikasike kuona ndangariro dzakashata todzibvisa tisati taguma pakuita zvakashata.—2Ako. 16:9; Mt. 5:27-30.
MHENZA 21-27
UPFUMI UNOBVA MU SOKO RA MWARI | DHEUTERONOMIYO 7-8
Aisraeri Anga Asikadikani Kuwakana no Aya Asikaseenzeri Djehovha
w12 7/1 paji. 29 ndi. 2
Ngei Djehovha Aida Kuti Anamati Ake Acate no Aya Basi Aanonamata Nawo?
Djehovha aiziya kuti Sathani aida kukanganisa anhu Ake ese, eciapausa kuti anamate anamwari e kunyepa. Hino akaangwadza eciti uu asikatendi “acapausa mwana we mukomana wako kuti asiye kundipurutana, uye onamata anamwari amweni.” Anhu ake ainga ari pangozi. Kudai Aisraeri aizonamata anamwari amweni, aizokanganisa ukama wawo na Mwari uye ainga asikazoadziiriri, zvoita kuti akundhwe no azondi. Dai zvaizodaro, zvainga zvisikazoiti kuti Mesiya abarirhwe mu dzinza rakhona. Zviri pamhene kuti, Sathani aida kucengedzera Aisraeri kuti awakane no anhu asikatendi.
w15 3/15 mapaji. 30-31
Nhungamiriro ye Kuwaka “Muna Tenzi Basi”—Iciri Kuseenza Here?
Kunyazi zvakadaro, Bhaibheri rinopangidza kuti Djehovha anoda kuti muKristu awake kana kuwakwa muna Tenzi basi. Ngei? Ngekuti anoziya zvakanakira anhu ake. Anoda kudziirira aseenzi ake pa zviro zvinozoapindisa mumatambudziko uye anodawo kuti apfare. Mu mazuwa a Neemiya, Adjudha akawanda paaiwakana no anhu e nyika dzainga dzisikanamati Djehovha, Neemiya wakareketa nge zve muezaniso wakashata wa Soromoni. Kunyazi hazvo Soromoni “aidiwa na Mwari wake, . . . Akadzi ake e nyika dzimweni akaita kuti aite citema.” (Ne. 13:23-26) Hino Mwari ari kukohomedzesa aseenzi ake kuti kana ecida kuti zviro zviahambire zvakanaka anodikana kuwakana no anamati e cokwadi basi. (Pis. 19:7-10; Isa. 48:17, 18) AKristu e cokwadi anotenda maningi nge rudo ra Mwari uye kuti ane usisi nawo. Anogonda no kutungamirira kaanoita. Paanopurutana Djehovha hinga Mutongi wawo, anonga ecitotendera kuti ndiye anosisira kuwabvunza zvekuita.—Zvie. 1:5.
w15 8/15 paji. 26 ndi. 12
Ngwarirai Shamwari Dzakashata Mazuwa Ano e Kupedzesera
MuKristu anoda kuwaka kana kuwakwa, anodikana kunyasa kungwarira anhu aanoshamwaridzana nawo. Soko ra Mwari rinoti: “Musasungwe zvisikazi kusisira pa Djoki rimwero no asikatendi. Ngekuti ushamwari upi uripo pakati pe unatsi no kusapurutana mutemo? Kana kuti ciedza cinomubairo upi pa cidima?” (2Ako. 6:14) Bhaibheri rinopasa mazano ku aseenzi a Mwari ari kupsvaka munhu we kuwakana naye kuti awake kana kuwakwa “muna Tenzi basi,” Masoko okuti, muna tenzi basi, anoreya kuti anodikana kuwakana basi no anamata Djehovha akabhabhatidwa, anorarama maererano no zvinofundiswa no Bhaibheri. (1Ako. 7:39) Kana mukawakana no munhu akadaro anoda Djehovha, munhu uu acamubetserai kuti murumbwe makagondeka kuna Djehovha.
Upfumi uri mu Soko ra Mwari
w04 2/1 paji. 13 ndi. 4
Djehovha Anotipasa Zvatinoda zve Zuwa no Zuwa
Kunamata tecikumbira pau yedu ye zuwa no zuwa kunodikanawo kutiedzurira nge zve kurhya zve ku mwiya zve zuwa no zuwa. Kunyazi ainga anonzara yakakura pasure pe kutsanya ke nguwa yakareba, Djesu akaramba muedzo wa Sathani we kutora mapuwe omaita pau eciti: “Zvakatarhwa kuti, ‘Munhu anodikana kurarama, haiwa no pau basi asi no kubhuya kese kunobuda mu muromo ma Djehovha.’” (Mateu 4:4) Apa Djesu akatora masoko e muporofita Mozesi, akabvunza Aisraeri kuti: “[Djehovha] akamudodosa akamuziisa nzara omugutisa no mana, yamainga musikazii kunyazi madzibaba enyu ainga asikaiziiwo; kuti amuziise kuti munhu aararami basi no zvekurhya zvega, asi kuti munhu anorarama no zvese zvinobuda mu muromo wa Djehovha.” (Dheuteronomiyo 8:3) Gwanza iri rakaseenzeswa na Djehovha pakukowanisa mana arizi kupasa Aisraeri zvekurhya zve kunyama basi asi no mafundo e ku mwiya. Ciro cimweni cinodikanwa maningi ngecekuti “ainongera zvaiakwanira zuwa rimwe no rimwe.” Kana akanongera zvakawanda zvaidarika zve zuwa rimwe, zvaisarezvo zvakacengethwa zvaizotanga kunuhwa zvobara makonye. (Ekisodho 16:4, 20) Asi, izvi zvainga zvisikaitiki pa zuwa re citanhatu paaidikana kuunganidza zvakapethwa kairi zvaizoita kuti aone zvokurhya pa Sabudu. (Ekisodho 16:5, 23, 24) Hino mana yakhona yakaita kuti aziye waaidikana kuzwira uye kuti upenyu wawo waitsamira haiwa pa pau basi asi pa “zvese zvinobuda mu muromo wa Djehovha.”
MHENZA 28–KHUNGURU 4
UPFUMI UNOBVA MU SOKO RA MWARI | DHEUTERONOMIYO 9-10
“Djehovha Mwari Wenyu Anokumbirei Kamuri?”
w09 10/1 paji. 10 mandi. 3-4
Djehovha Anokumbirei Katiri?
Cinyi cingangatikurudzira kuti tipurutane Mwari ne mwoyo unoda? Mozesi akabhuya ciro cimwe catingaita, eciti: ‘Ithya Djehovha Mwari wako.’ (Ndima 12) Kuthya kuri kubhuyiwa apa akuthyapi kukuwadzwa asi kuthya kakanaka ke kureremedza Mwari no makwanza ake. Kana tecithya Mwari, atizoiti zviro zvinomunyangadza.
Hino, cido cedu cikuru cokupurutana Mwari cinodikana kugara cinyi? Mozesi anoti: “Umude uye seenzera Djehovha Mwari wako no mwoyo wako wese no mwiya wako wese.” (Ndima 12) Kuda Djehovha akundoreyi kuzwa mecimuda basi. Bhuku rimweni rinopanganidza kuti: “Masoko eciito eciHebheru anoreketa nge zve mazwiro, nguwa dzimweni anoreyawo migumisiro inouya pamusana pe zviro zvinonga zvaizwa nge ndaa ye mazwiro.” Bhuku rimwero-rimwero rinoti kuda Mwari kunoreya ‘kuita zviro zvinopangidza kumuda.’ No masoko amweni, kana tecida Mwari zve zvirokwazvo, ticaita zvinomupfadza.—Zvierengo 27:11.
w09 10/1 paji. 10 ndi. 6
Djehovha Anokumbirei Katiri?
Acatikomborera kana tikamupurutana tecida. Mozesi akatara kuti: “Ucengete mirayiro ya Djehovha . . . yandiri kukurayira nyamasi, kuti zvikunakire.” (Ndima 13) Zve zvirokwazvo murayiro wese watinopaswa na Djehovha—zvese zvaanotikumbira—zvakatinakira. Azvingambotami kutinakira ngokuti Bhaibheri rinoti, “Mwari rudo.” (1 Juau 4:8) Hino, akatipasa mirayiro yakadaro kuti zviro zvitinakire nokusikaperi. (Isaya 48:17) Tikaita zvese zvatinokumbirhwa na Djehovha ticadziirirhwa pa zviro zvakawanda zvinotsukwarisa mwoyo zvinouno uye toona makomborero asikaperi Umambo wake paunonga waakutonga.
cl 16 ndi. 2
Mungakwanisadi “Kukwedera Dhuze na Mwari Here”?
Abrahamu we kare ndi umwe akagara padhuze zvakadaro. Djehovha akareketa nge zve mukuru we kare uu ecimuti “shamwari yangu.” (Isaya 41:8) Honde, Djehovha aiona Abrahamu hinga shamwari yake kamare. Abrahamu akagara no ushamwari uu we padhuze ngekuti iyena “aitenda muna Djehovha.” (Tiyago 2:23) Nyamasiwo, Djehovha anopsvaka mikana “yekupfarira” aya anomuseenzera no rudo. (Dheuteronomiyo 10:15) Soko rake rinokurudzira kuti: “Khwederai kuna Mwari, uye iyena acakhwedera kamuri.” (Tiyago 4:8) Masoko aya anotipika uye anotipasa cigondeso.
Upfumi uri mu Soko ra Mwari
it-1 paji. 127 ndi. 3
Anaki
Dzinza re anhu akakura aigara kumatunhu e Kenani, no ku mbuto dzimweni e kumahombekombe, nyanye-nanye dii re kakutsi. Pane nguwa dzimweni, anarume atatu aionekwa hinga Anaki, Ahimani, Sheshai na Tarimai, aigara ku Hebron. (Nu 13:22) Ndipo apa pakaonekwa Anaki ke kutanga noavhevhi 12 eciHebheru, uye avhevhi 10 akapanganidza zvisirizvopi pane zvaakaona, eciti anarume aya ainga ari ana e manefirimu e mu nguwa ya Noa, uye kuti zveciezaniswa nawo, Ahebheru ainga akaita hinga “makwiza”. (Nu 13:28-33; Dhe 1:28) Kureba kainga akaita kakaita kuti aseenzeswe pakuezanisira kupanganidzira kunyazi anarume akakura pakati pe a Emimu no Refaimu. Zviri pamhene kuti, simba rawo rakaita kuti patarhwe cierengo ici: “Ndiyani angaima akabamba pamberi pe ana e akomana e Anaki?”—Dhe 2:10, 11, 20, 21; 9:1-3.